| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১৪. গন্ধত্থেনসুত্তৰণ্ণনা
14. Gandhatthenasuttavaṇṇanā
২৩৪. চুদ্দসমে অজ্ঝভাসীতি তং ভিক্খুং নাল়ে গহেত্ৰা পদুমং সিঙ্ঘমানং দিস্ৰাৰ – ‘‘অযং ভিক্খু সত্থু সন্তিকে কম্মট্ঠানং গহেত্ৰা সমণধম্মং কাতুং অরঞ্ঞং পৰিট্ঠো গন্ধারম্মণং উপনিজ্ঝাযতি, স্ৰাযং অজ্জ উপসিঙ্ঘং স্ৰেপি পুনদিৰসেপি উপসিঙ্ঘিস্সতি, এৰমস্স সা গন্ধতণ্হা ৰড্ঢিত্ৰা দিট্ঠধম্মিকসম্পরাযিকং অত্থং নাসেস্সতি, মা মযি পস্সন্তিযা নস্সতু, চোদেস্সামি ন’’ন্তি উপসঙ্কমিত্ৰা অভাসি।
234. Cuddasame ajjhabhāsīti taṃ bhikkhuṃ nāḷe gahetvā padumaṃ siṅghamānaṃ disvāva – ‘‘ayaṃ bhikkhu satthu santike kammaṭṭhānaṃ gahetvā samaṇadhammaṃ kātuṃ araññaṃ paviṭṭho gandhārammaṇaṃ upanijjhāyati, svāyaṃ ajja upasiṅghaṃ svepi punadivasepi upasiṅghissati, evamassa sā gandhataṇhā vaḍḍhitvā diṭṭhadhammikasamparāyikaṃ atthaṃ nāsessati, mā mayi passantiyā nassatu, codessāmi na’’nti upasaṅkamitvā abhāsi.
একঙ্গমেতং থেয্যানন্তি থেনিতব্বানং রূপারম্মণাদীনং পঞ্চকোট্ঠাসানং ইদং একঙ্গং, এককোট্ঠাসোতি অত্থো। ন হরামীতি ন গহেত্ৰা গচ্ছামি। আরাতি দূরে নাল়ে গহেত্ৰা নামেত্ৰা দূরে ঠিতো উপসিঙ্ঘামীতি ৰদতি। ৰণ্ণেনাতি কারণেন।
Ekaṅgametaṃtheyyānanti thenitabbānaṃ rūpārammaṇādīnaṃ pañcakoṭṭhāsānaṃ idaṃ ekaṅgaṃ, ekakoṭṭhāsoti attho. Na harāmīti na gahetvā gacchāmi. Ārāti dūre nāḷe gahetvā nāmetvā dūre ṭhito upasiṅghāmīti vadati. Vaṇṇenāti kāraṇena.
য্ৰাযন্তি যো অযং। তস্মিং কির দেৰতায সদ্ধিং কথেন্তেযেৰ একো তাপসো ওতরিত্ৰা ভিসখননাদীনি কাতুং আরদ্ধো, তং সন্ধাযেৰমাহ। আকিণ্ণকম্মন্তোতি এৰং অপরিসুদ্ধকম্মন্তো। অখীণকম্মন্তোতিপি পাঠো, কক্খল়কম্মন্তোতি অত্থো। ন ৰুচ্চতীতি গন্ধচোরোতি ৰা পুপ্ফচোরোতি ৰা কস্মা ন ৰুচ্চতি।
Yvāyanti yo ayaṃ. Tasmiṃ kira devatāya saddhiṃ kathenteyeva eko tāpaso otaritvā bhisakhananādīni kātuṃ āraddho, taṃ sandhāyevamāha. Ākiṇṇakammantoti evaṃ aparisuddhakammanto. Akhīṇakammantotipi pāṭho, kakkhaḷakammantoti attho. Na vuccatīti gandhacoroti vā pupphacoroti vā kasmā na vuccati.
আকিণ্ণলুদ্দোতি বহুপাপো গাল়্হপাপো ৰা, তস্মা ন ৰুচ্চতি। ধাতিচেলংৰ মক্খিতোতি যথা ধাতিযা নিৰত্থকিলিট্ঠৰত্থং উচ্চারপস্সাৰপংসুমসিকদ্দমাদীহি মক্খিতং, এৰমেৰং রাগদোসাদীহি মক্খিতো। অরহামি ৰত্তৰেতি অরহামি ৰত্তুং। দেৰতায চোদনা কির সুগতানুসিট্ঠিসদিসা, ন তং লামকা হীনাধিমুত্তিকা মিচ্ছাপটিপন্নকপুগ্গলা লভন্তি। তস্মিং পন অত্তভাৰে মগ্গফলানং ভব্বরূপা পুগ্গলা তং লভন্তি, তস্মা এৰমাহ।
Ākiṇṇaluddoti bahupāpo gāḷhapāpo vā, tasmā na vuccati. Dhāticelaṃva makkhitoti yathā dhātiyā nivatthakiliṭṭhavatthaṃ uccārapassāvapaṃsumasikaddamādīhi makkhitaṃ, evamevaṃ rāgadosādīhi makkhito. Arahāmi vattaveti arahāmi vattuṃ. Devatāya codanā kira sugatānusiṭṭhisadisā, na taṃ lāmakā hīnādhimuttikā micchāpaṭipannakapuggalā labhanti. Tasmiṃ pana attabhāve maggaphalānaṃ bhabbarūpā puggalā taṃ labhanti, tasmā evamāha.
সুচিগৰেসিনোতি সুচীনি সীলসমাধিঞাণানি গৰেসন্তস্স। অব্ভামত্তং ৰাতি ৰলাহককূটমত্তং ৰিয। জানাসীতি সুদ্ধো অযন্তি জানাসি। ৰজ্জাসীতি ৰদেয্যাসি। নেৰ তং উপজীৰামাতি দেৰতা কির চিন্তেসি – ‘‘অযং ভিক্খু অত্থি মে হিতকামা দেৰতা, সা মং চোদেস্সতি সারেস্সতীতি পমাদম্পি অনুযুঞ্জেয্য, নাস্স ৰচনং সম্পটিচ্ছিস্সামী’’তি। তস্মা এৰমাহ। ত্ৰমেৰাতি ত্ৰংযেৰ। জানেয্যাতি জানেয্যাসি। যেনাতি যেন কম্মেন সুগতিং গচ্ছেয্যাসি, তং কম্মং ত্ৰংযেৰ জানেয্যাসীতি। চুদ্দসমং।
Sucigavesinoti sucīni sīlasamādhiñāṇāni gavesantassa. Abbhāmattaṃ vāti valāhakakūṭamattaṃ viya. Jānāsīti suddho ayanti jānāsi. Vajjāsīti vadeyyāsi. Neva taṃ upajīvāmāti devatā kira cintesi – ‘‘ayaṃ bhikkhu atthi me hitakāmā devatā, sā maṃ codessati sāressatīti pamādampi anuyuñjeyya, nāssa vacanaṃ sampaṭicchissāmī’’ti. Tasmā evamāha. Tvamevāti tvaṃyeva. Jāneyyāti jāneyyāsi. Yenāti yena kammena sugatiṃ gaccheyyāsi, taṃ kammaṃ tvaṃyeva jāneyyāsīti. Cuddasamaṃ.
ইতি সারত্থপ্পকাসিনিযা
Iti sāratthappakāsiniyā
সংযুত্তনিকায-অট্ঠকথায
Saṃyuttanikāya-aṭṭhakathāya
ৰনসংযুত্তৰণ্ণনা নিট্ঠিতা।
Vanasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১৪. গন্ধত্থেনসুত্তং • 14. Gandhatthenasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১৪. গন্ধত্থেনসুত্তৰণ্ণনা • 14. Gandhatthenasuttavaṇṇanā
