| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১৪. গন্ধত্থেনসুত্তৰণ্ণনা
14. Gandhatthenasuttavaṇṇanā
২৩৪. গন্ধারম্মণং উপনিজ্ঝাযতীতি গন্ধসঙ্খাতং আরম্মণং উপেচ্চ নিজ্ঝাযতি, রূপারম্মণেন ৰিয ৰিঞ্ঞাণেন রূপং, গন্ধারম্মণেন তং উপেচ্চ নিজ্ঝাযতি পচ্চক্খতো, যাথাৰতো সভাৰতো পটিৰিজ্ঝতীতি অত্থো। উপসিঙ্ঘিস্সতীতি তণ্হাৰসেন উপগন্ত্ৰা সিঙ্ঘিস্সতি।
234.Gandhārammaṇaṃupanijjhāyatīti gandhasaṅkhātaṃ ārammaṇaṃ upecca nijjhāyati, rūpārammaṇena viya viññāṇena rūpaṃ, gandhārammaṇena taṃ upecca nijjhāyati paccakkhato, yāthāvato sabhāvato paṭivijjhatīti attho. Upasiṅghissatīti taṇhāvasena upagantvā siṅghissati.
একঙ্গমেতং থেয্যানন্তি আরম্মণৰসেন থেয্যৰত্থূসু ৰিভজিযমানেসু একমঙ্গমেতং গন্ধারম্মণন্তি আহ ‘‘থেনিতব্বান’’ন্তিআদি। ওজাপেক্খায থেয্যায পৰত্তমানায ধম্মারম্মণতাপি তস্সা সিযা, সা পন ন মধুরা থেয্যকতা চাতি ‘‘পঞ্চকোট্ঠাসান’’ন্তি ৰুত্তং। কামঞ্চ তং গন্ধারম্মণং কেনচি পরিগ্গহিতং ন হোতীতি আদিযিতুং সক্কা, সত্থারা পন অননুঞ্ঞাতত্তা ন যুত্তো তস্স পরিভোগো। যং পন তেন ভিক্খুনা ৰুত্তং ‘‘ন হরামি ন ভঞ্জামী’’তি, তস্সপি অযমেৰ পরিহারো। ৰণ্ণীযতি ফলং এতেনাতি ৰণ্ণং, কারণন্তি ৰুত্তং ‘‘ৰণ্ণেনাতি কারণেনা’’তি।
Ekaṅgametaṃtheyyānanti ārammaṇavasena theyyavatthūsu vibhajiyamānesu ekamaṅgametaṃ gandhārammaṇanti āha ‘‘thenitabbāna’’ntiādi. Ojāpekkhāya theyyāya pavattamānāya dhammārammaṇatāpi tassā siyā, sā pana na madhurā theyyakatā cāti ‘‘pañcakoṭṭhāsāna’’nti vuttaṃ. Kāmañca taṃ gandhārammaṇaṃ kenaci pariggahitaṃ na hotīti ādiyituṃ sakkā, satthārā pana ananuññātattā na yutto tassa paribhogo. Yaṃ pana tena bhikkhunā vuttaṃ ‘‘na harāmi na bhañjāmī’’ti, tassapi ayameva parihāro. Vaṇṇīyati phalaṃ etenāti vaṇṇaṃ, kāraṇanti vuttaṃ ‘‘vaṇṇenāti kāraṇenā’’ti.
তস্মিন্তি তস্মিং ভিক্খুস্মিং। আকিণ্ণকম্মন্তোতি তণ্হাদিট্ঠিআদিৰসেন অকুসলকম্মন্তো দিট্ঠিমোহতণ্হাদিৰসেন আদিতো পট্ঠায কুসলকম্মানং পটিক্খেপনতো। দিট্ঠিৰসেন চ কথিনকক্খল়খরিগতত্তা ‘‘অখীণকম্মন্তো কক্খল়কম্মন্তো’’তি ৰুত্তং।
Tasminti tasmiṃ bhikkhusmiṃ. Ākiṇṇakammantoti taṇhādiṭṭhiādivasena akusalakammanto diṭṭhimohataṇhādivasena ādito paṭṭhāya kusalakammānaṃ paṭikkhepanato. Diṭṭhivasena ca kathinakakkhaḷakharigatattā ‘‘akhīṇakammanto kakkhaḷakammanto’’ti vuttaṃ.
আকিণ্ণলুদ্দোতি আকিণ্ণো হুত্ৰা কক্খল়ো। তেনাহ ‘‘বহুপাপো’’তিআদি। মক্খিতোতি লিত্তো। তন্তি দেৰতাচোদনং। তস্মাতি অতিক্কম্ম ঠিতত্তা‘‘ত্ৰঞ্চারহামি ৰত্তৰে’’তি এৰমাহ।
Ākiṇṇaluddoti ākiṇṇo hutvā kakkhaḷo. Tenāha ‘‘bahupāpo’’tiādi. Makkhitoti litto. Tanti devatācodanaṃ. Tasmāti atikkamma ṭhitattā‘‘tvañcārahāmi vattave’’ti evamāha.
গৰেসন্তস্স অত্তনো সন্তানে উপ্পাদনৰসেন পরিযেসন্তস্স। অনেকযোজনাযামৰিত্থারং গগনতলং ব্যাপেত্ৰা উপ্পন্নৰলাহককূটপ্পমাণং ৰিয। সুদ্ধোতি সীলেন পরিসুদ্ধো অযন্তি জানাসি। সুগতিন্তি সুন্দরনিব্বত্তিং। তেন নিব্বানস্সপি সঙ্গহো সিদ্ধো।
Gavesantassa attano santāne uppādanavasena pariyesantassa. Anekayojanāyāmavitthāraṃ gaganatalaṃ byāpetvā uppannavalāhakakūṭappamāṇaṃ viya. Suddhoti sīlena parisuddho ayanti jānāsi. Sugatinti sundaranibbattiṃ. Tena nibbānassapi saṅgaho siddho.
গন্ধত্থেনসুত্তৰণ্ণনা নিট্ঠিতা।
Gandhatthenasuttavaṇṇanā niṭṭhitā.
সারত্থপ্পকাসিনিযা সংযুত্তনিকায-অট্ঠকথায
Sāratthappakāsiniyā saṃyuttanikāya-aṭṭhakathāya
ৰনসংযুত্তৰণ্ণনায লীনত্থপ্পকাসনা সমত্তা।
Vanasaṃyuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১৪. গন্ধত্থেনসুত্তং • 14. Gandhatthenasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১৪. গন্ধত্থেনসুত্তৰণ্ণনা • 14. Gandhatthenasuttavaṇṇanā
