| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១៤. គន្ធត្ថេនសុត្តវណ្ណនា
14. Gandhatthenasuttavaṇṇanā
២៣៤. គន្ធារម្មណំ ឧបនិជ្ឈាយតីតិ គន្ធសង្ខាតំ អារម្មណំ ឧបេច្ច និជ្ឈាយតិ, រូបារម្មណេន វិយ វិញ្ញាណេន រូបំ, គន្ធារម្មណេន តំ ឧបេច្ច និជ្ឈាយតិ បច្ចក្ខតោ, យាថាវតោ សភាវតោ បដិវិជ្ឈតីតិ អត្ថោ។ ឧបសិង្ឃិស្សតីតិ តណ្ហាវសេន ឧបគន្ត្វា សិង្ឃិស្សតិ។
234.Gandhārammaṇaṃupanijjhāyatīti gandhasaṅkhātaṃ ārammaṇaṃ upecca nijjhāyati, rūpārammaṇena viya viññāṇena rūpaṃ, gandhārammaṇena taṃ upecca nijjhāyati paccakkhato, yāthāvato sabhāvato paṭivijjhatīti attho. Upasiṅghissatīti taṇhāvasena upagantvā siṅghissati.
ឯកង្គមេតំ ថេយ្យានន្តិ អារម្មណវសេន ថេយ្យវត្ថូសុ វិភជិយមានេសុ ឯកមង្គមេតំ គន្ធារម្មណន្តិ អាហ ‘‘ថេនិតព្ពាន’’ន្តិអាទិ។ ឱជាបេក្ខាយ ថេយ្យាយ បវត្តមានាយ ធម្មារម្មណតាបិ តស្សា សិយា, សា បន ន មធុរា ថេយ្យកតា ចាតិ ‘‘បញ្ចកោដ្ឋាសាន’’ន្តិ វុត្តំ។ កាមញ្ច តំ គន្ធារម្មណំ កេនចិ បរិគ្គហិតំ ន ហោតីតិ អាទិយិតុំ សក្កា, សត្ថារា បន អននុញ្ញាតត្តា ន យុត្តោ តស្ស បរិភោគោ។ យំ បន តេន ភិក្ខុនា វុត្តំ ‘‘ន ហរាមិ ន ភញ្ជាមី’’តិ, តស្សបិ អយមេវ បរិហារោ។ វណ្ណីយតិ ផលំ ឯតេនាតិ វណ្ណំ, ការណន្តិ វុត្តំ ‘‘វណ្ណេនាតិ ការណេនា’’តិ។
Ekaṅgametaṃtheyyānanti ārammaṇavasena theyyavatthūsu vibhajiyamānesu ekamaṅgametaṃ gandhārammaṇanti āha ‘‘thenitabbāna’’ntiādi. Ojāpekkhāya theyyāya pavattamānāya dhammārammaṇatāpi tassā siyā, sā pana na madhurā theyyakatā cāti ‘‘pañcakoṭṭhāsāna’’nti vuttaṃ. Kāmañca taṃ gandhārammaṇaṃ kenaci pariggahitaṃ na hotīti ādiyituṃ sakkā, satthārā pana ananuññātattā na yutto tassa paribhogo. Yaṃ pana tena bhikkhunā vuttaṃ ‘‘na harāmi na bhañjāmī’’ti, tassapi ayameva parihāro. Vaṇṇīyati phalaṃ etenāti vaṇṇaṃ, kāraṇanti vuttaṃ ‘‘vaṇṇenāti kāraṇenā’’ti.
តស្មិន្តិ តស្មិំ ភិក្ខុស្មិំ។ អាកិណ្ណកម្មន្តោតិ តណ្ហាទិដ្ឋិអាទិវសេន អកុសលកម្មន្តោ ទិដ្ឋិមោហតណ្ហាទិវសេន អាទិតោ បដ្ឋាយ កុសលកម្មានំ បដិក្ខេបនតោ។ ទិដ្ឋិវសេន ច កថិនកក្ខឡខរិគតត្តា ‘‘អខីណកម្មន្តោ កក្ខឡកម្មន្តោ’’តិ វុត្តំ។
Tasminti tasmiṃ bhikkhusmiṃ. Ākiṇṇakammantoti taṇhādiṭṭhiādivasena akusalakammanto diṭṭhimohataṇhādivasena ādito paṭṭhāya kusalakammānaṃ paṭikkhepanato. Diṭṭhivasena ca kathinakakkhaḷakharigatattā ‘‘akhīṇakammanto kakkhaḷakammanto’’ti vuttaṃ.
អាកិណ្ណលុទ្ទោតិ អាកិណ្ណោ ហុត្វា កក្ខឡោ។ តេនាហ ‘‘ពហុបាបោ’’តិអាទិ។ មក្ខិតោតិ លិត្តោ។ តន្តិ ទេវតាចោទនំ។ តស្មាតិ អតិក្កម្ម ឋិតត្តា‘‘ត្វញ្ចារហាមិ វត្តវេ’’តិ ឯវមាហ។
Ākiṇṇaluddoti ākiṇṇo hutvā kakkhaḷo. Tenāha ‘‘bahupāpo’’tiādi. Makkhitoti litto. Tanti devatācodanaṃ. Tasmāti atikkamma ṭhitattā‘‘tvañcārahāmi vattave’’ti evamāha.
គវេសន្តស្ស អត្តនោ សន្តានេ ឧប្បាទនវសេន បរិយេសន្តស្ស។ អនេកយោជនាយាមវិត្ថារំ គគនតលំ ព្យាបេត្វា ឧប្បន្នវលាហកកូដប្បមាណំ វិយ។ សុទ្ធោតិ សីលេន បរិសុទ្ធោ អយន្តិ ជានាសិ។ សុគតិន្តិ សុន្ទរនិព្ពត្តិំ។ តេន និព្ពានស្សបិ សង្គហោ សិទ្ធោ។
Gavesantassa attano santāne uppādanavasena pariyesantassa. Anekayojanāyāmavitthāraṃ gaganatalaṃ byāpetvā uppannavalāhakakūṭappamāṇaṃ viya. Suddhoti sīlena parisuddho ayanti jānāsi. Sugatinti sundaranibbattiṃ. Tena nibbānassapi saṅgaho siddho.
គន្ធត្ថេនសុត្តវណ្ណនា និដ្ឋិតា។
Gandhatthenasuttavaṇṇanā niṭṭhitā.
សារត្ថប្បកាសិនិយា សំយុត្តនិកាយ-អដ្ឋកថាយ
Sāratthappakāsiniyā saṃyuttanikāya-aṭṭhakathāya
វនសំយុត្តវណ្ណនាយ លីនត្ថប្បកាសនា សមត្តា។
Vanasaṃyuttavaṇṇanāya līnatthappakāsanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១៤. គន្ធត្ថេនសុត្តំ • 14. Gandhatthenasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១៤. គន្ធត្ថេនសុត្តវណ្ណនា • 14. Gandhatthenasuttavaṇṇanā
