| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೧೪. ಗನ್ಧತ್ಥೇನಸುತ್ತವಣ್ಣನಾ
14. Gandhatthenasuttavaṇṇanā
೨೩೪. ಚುದ್ದಸಮೇ ಅಜ್ಝಭಾಸೀತಿ ತಂ ಭಿಕ್ಖುಂ ನಾಳೇ ಗಹೇತ್ವಾ ಪದುಮಂ ಸಿಙ್ಘಮಾನಂ ದಿಸ್ವಾವ – ‘‘ಅಯಂ ಭಿಕ್ಖು ಸತ್ಥು ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ಸಮಣಧಮ್ಮಂ ಕಾತುಂ ಅರಞ್ಞಂ ಪವಿಟ್ಠೋ ಗನ್ಧಾರಮ್ಮಣಂ ಉಪನಿಜ್ಝಾಯತಿ, ಸ್ವಾಯಂ ಅಜ್ಜ ಉಪಸಿಙ್ಘಂ ಸ್ವೇಪಿ ಪುನದಿವಸೇಪಿ ಉಪಸಿಙ್ಘಿಸ್ಸತಿ, ಏವಮಸ್ಸ ಸಾ ಗನ್ಧತಣ್ಹಾ ವಡ್ಢಿತ್ವಾ ದಿಟ್ಠಧಮ್ಮಿಕಸಮ್ಪರಾಯಿಕಂ ಅತ್ಥಂ ನಾಸೇಸ್ಸತಿ, ಮಾ ಮಯಿ ಪಸ್ಸನ್ತಿಯಾ ನಸ್ಸತು, ಚೋದೇಸ್ಸಾಮಿ ನ’’ನ್ತಿ ಉಪಸಙ್ಕಮಿತ್ವಾ ಅಭಾಸಿ।
234. Cuddasame ajjhabhāsīti taṃ bhikkhuṃ nāḷe gahetvā padumaṃ siṅghamānaṃ disvāva – ‘‘ayaṃ bhikkhu satthu santike kammaṭṭhānaṃ gahetvā samaṇadhammaṃ kātuṃ araññaṃ paviṭṭho gandhārammaṇaṃ upanijjhāyati, svāyaṃ ajja upasiṅghaṃ svepi punadivasepi upasiṅghissati, evamassa sā gandhataṇhā vaḍḍhitvā diṭṭhadhammikasamparāyikaṃ atthaṃ nāsessati, mā mayi passantiyā nassatu, codessāmi na’’nti upasaṅkamitvā abhāsi.
ಏಕಙ್ಗಮೇತಂ ಥೇಯ್ಯಾನನ್ತಿ ಥೇನಿತಬ್ಬಾನಂ ರೂಪಾರಮ್ಮಣಾದೀನಂ ಪಞ್ಚಕೋಟ್ಠಾಸಾನಂ ಇದಂ ಏಕಙ್ಗಂ, ಏಕಕೋಟ್ಠಾಸೋತಿ ಅತ್ಥೋ। ನ ಹರಾಮೀತಿ ನ ಗಹೇತ್ವಾ ಗಚ್ಛಾಮಿ। ಆರಾತಿ ದೂರೇ ನಾಳೇ ಗಹೇತ್ವಾ ನಾಮೇತ್ವಾ ದೂರೇ ಠಿತೋ ಉಪಸಿಙ್ಘಾಮೀತಿ ವದತಿ। ವಣ್ಣೇನಾತಿ ಕಾರಣೇನ।
Ekaṅgametaṃtheyyānanti thenitabbānaṃ rūpārammaṇādīnaṃ pañcakoṭṭhāsānaṃ idaṃ ekaṅgaṃ, ekakoṭṭhāsoti attho. Na harāmīti na gahetvā gacchāmi. Ārāti dūre nāḷe gahetvā nāmetvā dūre ṭhito upasiṅghāmīti vadati. Vaṇṇenāti kāraṇena.
ಯ್ವಾಯನ್ತಿ ಯೋ ಅಯಂ। ತಸ್ಮಿಂ ಕಿರ ದೇವತಾಯ ಸದ್ಧಿಂ ಕಥೇನ್ತೇಯೇವ ಏಕೋ ತಾಪಸೋ ಓತರಿತ್ವಾ ಭಿಸಖನನಾದೀನಿ ಕಾತುಂ ಆರದ್ಧೋ, ತಂ ಸನ್ಧಾಯೇವಮಾಹ। ಆಕಿಣ್ಣಕಮ್ಮನ್ತೋತಿ ಏವಂ ಅಪರಿಸುದ್ಧಕಮ್ಮನ್ತೋ। ಅಖೀಣಕಮ್ಮನ್ತೋತಿಪಿ ಪಾಠೋ, ಕಕ್ಖಳಕಮ್ಮನ್ತೋತಿ ಅತ್ಥೋ। ನ ವುಚ್ಚತೀತಿ ಗನ್ಧಚೋರೋತಿ ವಾ ಪುಪ್ಫಚೋರೋತಿ ವಾ ಕಸ್ಮಾ ನ ವುಚ್ಚತಿ।
Yvāyanti yo ayaṃ. Tasmiṃ kira devatāya saddhiṃ kathenteyeva eko tāpaso otaritvā bhisakhananādīni kātuṃ āraddho, taṃ sandhāyevamāha. Ākiṇṇakammantoti evaṃ aparisuddhakammanto. Akhīṇakammantotipi pāṭho, kakkhaḷakammantoti attho. Na vuccatīti gandhacoroti vā pupphacoroti vā kasmā na vuccati.
ಆಕಿಣ್ಣಲುದ್ದೋತಿ ಬಹುಪಾಪೋ ಗಾಳ್ಹಪಾಪೋ ವಾ, ತಸ್ಮಾ ನ ವುಚ್ಚತಿ। ಧಾತಿಚೇಲಂವ ಮಕ್ಖಿತೋತಿ ಯಥಾ ಧಾತಿಯಾ ನಿವತ್ಥಕಿಲಿಟ್ಠವತ್ಥಂ ಉಚ್ಚಾರಪಸ್ಸಾವಪಂಸುಮಸಿಕದ್ದಮಾದೀಹಿ ಮಕ್ಖಿತಂ, ಏವಮೇವಂ ರಾಗದೋಸಾದೀಹಿ ಮಕ್ಖಿತೋ। ಅರಹಾಮಿ ವತ್ತವೇತಿ ಅರಹಾಮಿ ವತ್ತುಂ। ದೇವತಾಯ ಚೋದನಾ ಕಿರ ಸುಗತಾನುಸಿಟ್ಠಿಸದಿಸಾ, ನ ತಂ ಲಾಮಕಾ ಹೀನಾಧಿಮುತ್ತಿಕಾ ಮಿಚ್ಛಾಪಟಿಪನ್ನಕಪುಗ್ಗಲಾ ಲಭನ್ತಿ। ತಸ್ಮಿಂ ಪನ ಅತ್ತಭಾವೇ ಮಗ್ಗಫಲಾನಂ ಭಬ್ಬರೂಪಾ ಪುಗ್ಗಲಾ ತಂ ಲಭನ್ತಿ, ತಸ್ಮಾ ಏವಮಾಹ।
Ākiṇṇaluddoti bahupāpo gāḷhapāpo vā, tasmā na vuccati. Dhāticelaṃva makkhitoti yathā dhātiyā nivatthakiliṭṭhavatthaṃ uccārapassāvapaṃsumasikaddamādīhi makkhitaṃ, evamevaṃ rāgadosādīhi makkhito. Arahāmi vattaveti arahāmi vattuṃ. Devatāya codanā kira sugatānusiṭṭhisadisā, na taṃ lāmakā hīnādhimuttikā micchāpaṭipannakapuggalā labhanti. Tasmiṃ pana attabhāve maggaphalānaṃ bhabbarūpā puggalā taṃ labhanti, tasmā evamāha.
ಸುಚಿಗವೇಸಿನೋತಿ ಸುಚೀನಿ ಸೀಲಸಮಾಧಿಞಾಣಾನಿ ಗವೇಸನ್ತಸ್ಸ। ಅಬ್ಭಾಮತ್ತಂ ವಾತಿ ವಲಾಹಕಕೂಟಮತ್ತಂ ವಿಯ। ಜಾನಾಸೀತಿ ಸುದ್ಧೋ ಅಯನ್ತಿ ಜಾನಾಸಿ। ವಜ್ಜಾಸೀತಿ ವದೇಯ್ಯಾಸಿ। ನೇವ ತಂ ಉಪಜೀವಾಮಾತಿ ದೇವತಾ ಕಿರ ಚಿನ್ತೇಸಿ – ‘‘ಅಯಂ ಭಿಕ್ಖು ಅತ್ಥಿ ಮೇ ಹಿತಕಾಮಾ ದೇವತಾ, ಸಾ ಮಂ ಚೋದೇಸ್ಸತಿ ಸಾರೇಸ್ಸತೀತಿ ಪಮಾದಮ್ಪಿ ಅನುಯುಞ್ಜೇಯ್ಯ, ನಾಸ್ಸ ವಚನಂ ಸಮ್ಪಟಿಚ್ಛಿಸ್ಸಾಮೀ’’ತಿ। ತಸ್ಮಾ ಏವಮಾಹ। ತ್ವಮೇವಾತಿ ತ್ವಂಯೇವ। ಜಾನೇಯ್ಯಾತಿ ಜಾನೇಯ್ಯಾಸಿ। ಯೇನಾತಿ ಯೇನ ಕಮ್ಮೇನ ಸುಗತಿಂ ಗಚ್ಛೇಯ್ಯಾಸಿ, ತಂ ಕಮ್ಮಂ ತ್ವಂಯೇವ ಜಾನೇಯ್ಯಾಸೀತಿ। ಚುದ್ದಸಮಂ।
Sucigavesinoti sucīni sīlasamādhiñāṇāni gavesantassa. Abbhāmattaṃ vāti valāhakakūṭamattaṃ viya. Jānāsīti suddho ayanti jānāsi. Vajjāsīti vadeyyāsi. Neva taṃ upajīvāmāti devatā kira cintesi – ‘‘ayaṃ bhikkhu atthi me hitakāmā devatā, sā maṃ codessati sāressatīti pamādampi anuyuñjeyya, nāssa vacanaṃ sampaṭicchissāmī’’ti. Tasmā evamāha. Tvamevāti tvaṃyeva. Jāneyyāti jāneyyāsi. Yenāti yena kammena sugatiṃ gaccheyyāsi, taṃ kammaṃ tvaṃyeva jāneyyāsīti. Cuddasamaṃ.
ಇತಿ ಸಾರತ್ಥಪ್ಪಕಾಸಿನಿಯಾ
Iti sāratthappakāsiniyā
ಸಂಯುತ್ತನಿಕಾಯ-ಅಟ್ಠಕಥಾಯ
Saṃyuttanikāya-aṭṭhakathāya
ವನಸಂಯುತ್ತವಣ್ಣನಾ ನಿಟ್ಠಿತಾ।
Vanasaṃyuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೪. ಗನ್ಧತ್ಥೇನಸುತ್ತಂ • 14. Gandhatthenasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧೪. ಗನ್ಧತ್ಥೇನಸುತ್ತವಣ್ಣನಾ • 14. Gandhatthenasuttavaṇṇanā
