| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೪. ಗನ್ಧತ್ಥೇನಸುತ್ತವಣ್ಣನಾ
14. Gandhatthenasuttavaṇṇanā
೨೩೪. ಗನ್ಧಾರಮ್ಮಣಂ ಉಪನಿಜ್ಝಾಯತೀತಿ ಗನ್ಧಸಙ್ಖಾತಂ ಆರಮ್ಮಣಂ ಉಪೇಚ್ಚ ನಿಜ್ಝಾಯತಿ, ರೂಪಾರಮ್ಮಣೇನ ವಿಯ ವಿಞ್ಞಾಣೇನ ರೂಪಂ, ಗನ್ಧಾರಮ್ಮಣೇನ ತಂ ಉಪೇಚ್ಚ ನಿಜ್ಝಾಯತಿ ಪಚ್ಚಕ್ಖತೋ, ಯಾಥಾವತೋ ಸಭಾವತೋ ಪಟಿವಿಜ್ಝತೀತಿ ಅತ್ಥೋ। ಉಪಸಿಙ್ಘಿಸ್ಸತೀತಿ ತಣ್ಹಾವಸೇನ ಉಪಗನ್ತ್ವಾ ಸಿಙ್ಘಿಸ್ಸತಿ।
234.Gandhārammaṇaṃupanijjhāyatīti gandhasaṅkhātaṃ ārammaṇaṃ upecca nijjhāyati, rūpārammaṇena viya viññāṇena rūpaṃ, gandhārammaṇena taṃ upecca nijjhāyati paccakkhato, yāthāvato sabhāvato paṭivijjhatīti attho. Upasiṅghissatīti taṇhāvasena upagantvā siṅghissati.
ಏಕಙ್ಗಮೇತಂ ಥೇಯ್ಯಾನನ್ತಿ ಆರಮ್ಮಣವಸೇನ ಥೇಯ್ಯವತ್ಥೂಸು ವಿಭಜಿಯಮಾನೇಸು ಏಕಮಙ್ಗಮೇತಂ ಗನ್ಧಾರಮ್ಮಣನ್ತಿ ಆಹ ‘‘ಥೇನಿತಬ್ಬಾನ’’ನ್ತಿಆದಿ। ಓಜಾಪೇಕ್ಖಾಯ ಥೇಯ್ಯಾಯ ಪವತ್ತಮಾನಾಯ ಧಮ್ಮಾರಮ್ಮಣತಾಪಿ ತಸ್ಸಾ ಸಿಯಾ, ಸಾ ಪನ ನ ಮಧುರಾ ಥೇಯ್ಯಕತಾ ಚಾತಿ ‘‘ಪಞ್ಚಕೋಟ್ಠಾಸಾನ’’ನ್ತಿ ವುತ್ತಂ। ಕಾಮಞ್ಚ ತಂ ಗನ್ಧಾರಮ್ಮಣಂ ಕೇನಚಿ ಪರಿಗ್ಗಹಿತಂ ನ ಹೋತೀತಿ ಆದಿಯಿತುಂ ಸಕ್ಕಾ, ಸತ್ಥಾರಾ ಪನ ಅನನುಞ್ಞಾತತ್ತಾ ನ ಯುತ್ತೋ ತಸ್ಸ ಪರಿಭೋಗೋ। ಯಂ ಪನ ತೇನ ಭಿಕ್ಖುನಾ ವುತ್ತಂ ‘‘ನ ಹರಾಮಿ ನ ಭಞ್ಜಾಮೀ’’ತಿ, ತಸ್ಸಪಿ ಅಯಮೇವ ಪರಿಹಾರೋ। ವಣ್ಣೀಯತಿ ಫಲಂ ಏತೇನಾತಿ ವಣ್ಣಂ, ಕಾರಣನ್ತಿ ವುತ್ತಂ ‘‘ವಣ್ಣೇನಾತಿ ಕಾರಣೇನಾ’’ತಿ।
Ekaṅgametaṃtheyyānanti ārammaṇavasena theyyavatthūsu vibhajiyamānesu ekamaṅgametaṃ gandhārammaṇanti āha ‘‘thenitabbāna’’ntiādi. Ojāpekkhāya theyyāya pavattamānāya dhammārammaṇatāpi tassā siyā, sā pana na madhurā theyyakatā cāti ‘‘pañcakoṭṭhāsāna’’nti vuttaṃ. Kāmañca taṃ gandhārammaṇaṃ kenaci pariggahitaṃ na hotīti ādiyituṃ sakkā, satthārā pana ananuññātattā na yutto tassa paribhogo. Yaṃ pana tena bhikkhunā vuttaṃ ‘‘na harāmi na bhañjāmī’’ti, tassapi ayameva parihāro. Vaṇṇīyati phalaṃ etenāti vaṇṇaṃ, kāraṇanti vuttaṃ ‘‘vaṇṇenāti kāraṇenā’’ti.
ತಸ್ಮಿನ್ತಿ ತಸ್ಮಿಂ ಭಿಕ್ಖುಸ್ಮಿಂ। ಆಕಿಣ್ಣಕಮ್ಮನ್ತೋತಿ ತಣ್ಹಾದಿಟ್ಠಿಆದಿವಸೇನ ಅಕುಸಲಕಮ್ಮನ್ತೋ ದಿಟ್ಠಿಮೋಹತಣ್ಹಾದಿವಸೇನ ಆದಿತೋ ಪಟ್ಠಾಯ ಕುಸಲಕಮ್ಮಾನಂ ಪಟಿಕ್ಖೇಪನತೋ। ದಿಟ್ಠಿವಸೇನ ಚ ಕಥಿನಕಕ್ಖಳಖರಿಗತತ್ತಾ ‘‘ಅಖೀಣಕಮ್ಮನ್ತೋ ಕಕ್ಖಳಕಮ್ಮನ್ತೋ’’ತಿ ವುತ್ತಂ।
Tasminti tasmiṃ bhikkhusmiṃ. Ākiṇṇakammantoti taṇhādiṭṭhiādivasena akusalakammanto diṭṭhimohataṇhādivasena ādito paṭṭhāya kusalakammānaṃ paṭikkhepanato. Diṭṭhivasena ca kathinakakkhaḷakharigatattā ‘‘akhīṇakammanto kakkhaḷakammanto’’ti vuttaṃ.
ಆಕಿಣ್ಣಲುದ್ದೋತಿ ಆಕಿಣ್ಣೋ ಹುತ್ವಾ ಕಕ್ಖಳೋ। ತೇನಾಹ ‘‘ಬಹುಪಾಪೋ’’ತಿಆದಿ। ಮಕ್ಖಿತೋತಿ ಲಿತ್ತೋ। ತನ್ತಿ ದೇವತಾಚೋದನಂ। ತಸ್ಮಾತಿ ಅತಿಕ್ಕಮ್ಮ ಠಿತತ್ತಾ‘‘ತ್ವಞ್ಚಾರಹಾಮಿ ವತ್ತವೇ’’ತಿ ಏವಮಾಹ।
Ākiṇṇaluddoti ākiṇṇo hutvā kakkhaḷo. Tenāha ‘‘bahupāpo’’tiādi. Makkhitoti litto. Tanti devatācodanaṃ. Tasmāti atikkamma ṭhitattā‘‘tvañcārahāmi vattave’’ti evamāha.
ಗವೇಸನ್ತಸ್ಸ ಅತ್ತನೋ ಸನ್ತಾನೇ ಉಪ್ಪಾದನವಸೇನ ಪರಿಯೇಸನ್ತಸ್ಸ। ಅನೇಕಯೋಜನಾಯಾಮವಿತ್ಥಾರಂ ಗಗನತಲಂ ಬ್ಯಾಪೇತ್ವಾ ಉಪ್ಪನ್ನವಲಾಹಕಕೂಟಪ್ಪಮಾಣಂ ವಿಯ। ಸುದ್ಧೋತಿ ಸೀಲೇನ ಪರಿಸುದ್ಧೋ ಅಯನ್ತಿ ಜಾನಾಸಿ। ಸುಗತಿನ್ತಿ ಸುನ್ದರನಿಬ್ಬತ್ತಿಂ। ತೇನ ನಿಬ್ಬಾನಸ್ಸಪಿ ಸಙ್ಗಹೋ ಸಿದ್ಧೋ।
Gavesantassa attano santāne uppādanavasena pariyesantassa. Anekayojanāyāmavitthāraṃ gaganatalaṃ byāpetvā uppannavalāhakakūṭappamāṇaṃ viya. Suddhoti sīlena parisuddho ayanti jānāsi. Sugatinti sundaranibbattiṃ. Tena nibbānassapi saṅgaho siddho.
ಗನ್ಧತ್ಥೇನಸುತ್ತವಣ್ಣನಾ ನಿಟ್ಠಿತಾ।
Gandhatthenasuttavaṇṇanā niṭṭhitā.
ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ
Sāratthappakāsiniyā saṃyuttanikāya-aṭṭhakathāya
ವನಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।
Vanasaṃyuttavaṇṇanāya līnatthappakāsanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೪. ಗನ್ಧತ್ಥೇನಸುತ್ತಂ • 14. Gandhatthenasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೪. ಗನ್ಧತ್ಥೇನಸುತ್ತವಣ್ಣನಾ • 14. Gandhatthenasuttavaṇṇanā
