| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
14. ගන්‌ධත්‌ථෙනසුත්‌තවණ්‌ණනා
14. Gandhatthenasuttavaṇṇanā
234. චුද්‌දසමෙ අජ්‌ඣභාසීති තං භික්‌ඛුං නාළෙ ගහෙත්‌වා පදුමං සිඞ්‌ඝමානං දිස්‌වාව – ‘‘අයං භික්‌ඛු සත්‌ථු සන්‌තිකෙ කම්‌මට්‌ඨානං ගහෙත්‌වා සමණධම්‌මං කාතුං අරඤ්‌ඤං පවිට්‌ඨො ගන්‌ධාරම්‌මණං උපනිජ්‌ඣායති, ස්‌වායං අජ්‌ජ උපසිඞ්‌ඝං ස්‌වෙපි පුනදිවසෙපි උපසිඞ්‌ඝිස්‌සති, එවමස්‌ස සා ගන්‌ධතණ්‌හා වඩ්‌ඪිත්‌වා දිට්‌ඨධම්‌මිකසම්‌පරායිකං අත්‌ථං නාසෙස්‌සති, මා මයි පස්‌සන්‌තියා නස්‌සතු, චොදෙස්‌සාමි න’’න්‌ති උපසඞ්‌කමිත්‌වා අභාසි.
234. Cuddasame ajjhabhāsīti taṃ bhikkhuṃ nāḷe gahetvā padumaṃ siṅghamānaṃ disvāva – ‘‘ayaṃ bhikkhu satthu santike kammaṭṭhānaṃ gahetvā samaṇadhammaṃ kātuṃ araññaṃ paviṭṭho gandhārammaṇaṃ upanijjhāyati, svāyaṃ ajja upasiṅghaṃ svepi punadivasepi upasiṅghissati, evamassa sā gandhataṇhā vaḍḍhitvā diṭṭhadhammikasamparāyikaṃ atthaṃ nāsessati, mā mayi passantiyā nassatu, codessāmi na’’nti upasaṅkamitvā abhāsi.
එකඞ්‌ගමෙතං ථෙය්‍යානන්‌ති ථෙනිතබ්‌බානං රූපාරම්‌මණාදීනං පඤ්‌චකොට්‌ඨාසානං ඉදං එකඞ්‌ගං, එකකොට්‌ඨාසොති අත්‌ථො. න හරාමීති න ගහෙත්‌වා ගච්‌ඡාමි. ආරාති දූරෙ නාළෙ ගහෙත්‌වා නාමෙත්‌වා දූරෙ ඨිතො උපසිඞ්‌ඝාමීති වදති. වණ්‌ණෙනාති කාරණෙන.
Ekaṅgametaṃtheyyānanti thenitabbānaṃ rūpārammaṇādīnaṃ pañcakoṭṭhāsānaṃ idaṃ ekaṅgaṃ, ekakoṭṭhāsoti attho. Na harāmīti na gahetvā gacchāmi. Ārāti dūre nāḷe gahetvā nāmetvā dūre ṭhito upasiṅghāmīti vadati. Vaṇṇenāti kāraṇena.
ය්‌වායන්‌ති යො අයං. තස්‌මිං කිර දෙවතාය සද්‌ධිං කථෙන්‌තෙයෙව එකො තාපසො ඔතරිත්‌වා භිසඛනනාදීනි කාතුං ආරද්‌ධො, තං සන්‌ධායෙවමාහ. ආකිණ්‌ණකම්‌මන්‌තොති එවං අපරිසුද්‌ධකම්‌මන්‌තො. අඛීණකම්‌මන්‌තොතිපි පාඨො, කක්‌ඛළකම්‌මන්‌තොති අත්‌ථො. න වුච්‌චතීති ගන්‌ධචොරොති වා පුප්‌ඵචොරොති වා කස්‌මා න වුච්‌චති.
Yvāyanti yo ayaṃ. Tasmiṃ kira devatāya saddhiṃ kathenteyeva eko tāpaso otaritvā bhisakhananādīni kātuṃ āraddho, taṃ sandhāyevamāha. Ākiṇṇakammantoti evaṃ aparisuddhakammanto. Akhīṇakammantotipi pāṭho, kakkhaḷakammantoti attho. Na vuccatīti gandhacoroti vā pupphacoroti vā kasmā na vuccati.
ආකිණ්‌ණලුද්‌දොති බහුපාපො ගාළ්‌හපාපො වා, තස්‌මා න වුච්‌චති. ධාතිචෙලංව මක්‌ඛිතොති යථා ධාතියා නිවත්‌ථකිලිට්‌ඨවත්‌ථං උච්‌චාරපස්‌සාවපංසුමසිකද්‌දමාදීහි මක්‌ඛිතං, එවමෙවං රාගදොසාදීහි මක්‌ඛිතො. අරහාමි වත්‌තවෙති අරහාමි වත්‌තුං. දෙවතාය චොදනා කිර සුගතානුසිට්‌ඨිසදිසා, න තං ලාමකා හීනාධිමුත්‌තිකා මිච්‌ඡාපටිපන්‌නකපුග්‌ගලා ලභන්‌ති. තස්‌මිං පන අත්‌තභාවෙ මග්‌ගඵලානං භබ්‌බරූපා පුග්‌ගලා තං ලභන්‌ති, තස්‌මා එවමාහ.
Ākiṇṇaluddoti bahupāpo gāḷhapāpo vā, tasmā na vuccati. Dhāticelaṃva makkhitoti yathā dhātiyā nivatthakiliṭṭhavatthaṃ uccārapassāvapaṃsumasikaddamādīhi makkhitaṃ, evamevaṃ rāgadosādīhi makkhito. Arahāmi vattaveti arahāmi vattuṃ. Devatāya codanā kira sugatānusiṭṭhisadisā, na taṃ lāmakā hīnādhimuttikā micchāpaṭipannakapuggalā labhanti. Tasmiṃ pana attabhāve maggaphalānaṃ bhabbarūpā puggalā taṃ labhanti, tasmā evamāha.
සුචිගවෙසිනොති සුචීනි සීලසමාධිඤාණානි ගවෙසන්‌තස්‌ස. අබ්‌භාමත්‌තං වාති වලාහකකූටමත්‌තං විය. ජානාසීති සුද්‌ධො අයන්‌ති ජානාසි. වජ්‌ජාසීති වදෙය්‍යාසි. නෙව තං උපජීවාමාති දෙවතා කිර චින්‌තෙසි – ‘‘අයං භික්‌ඛු අත්‌ථි මෙ හිතකාමා දෙවතා, සා මං චොදෙස්‌සති සාරෙස්‌සතීති පමාදම්‌පි අනුයුඤ්‌ජෙය්‍ය, නාස්‌ස වචනං සම්‌පටිච්‌ඡිස්‌සාමී’’ති. තස්‌මා එවමාහ. ත්‌වමෙවාති ත්‌වංයෙව. ජානෙය්‍යාති ජානෙය්‍යාසි. යෙනාති යෙන කම්‌මෙන සුගතිං ගච්‌ඡෙය්‍යාසි, තං කම්‌මං ත්‌වංයෙව ජානෙය්‍යාසීති. චුද්‌දසමං.
Sucigavesinoti sucīni sīlasamādhiñāṇāni gavesantassa. Abbhāmattaṃ vāti valāhakakūṭamattaṃ viya. Jānāsīti suddho ayanti jānāsi. Vajjāsīti vadeyyāsi. Neva taṃ upajīvāmāti devatā kira cintesi – ‘‘ayaṃ bhikkhu atthi me hitakāmā devatā, sā maṃ codessati sāressatīti pamādampi anuyuñjeyya, nāssa vacanaṃ sampaṭicchissāmī’’ti. Tasmā evamāha. Tvamevāti tvaṃyeva. Jāneyyāti jāneyyāsi. Yenāti yena kammena sugatiṃ gaccheyyāsi, taṃ kammaṃ tvaṃyeva jāneyyāsīti. Cuddasamaṃ.
ඉති සාරත්‌ථප්‌පකාසිනියා
Iti sāratthappakāsiniyā
සංයුත්‌තනිකාය-අට්‌ඨකථාය
Saṃyuttanikāya-aṭṭhakathāya
වනසංයුත්‌තවණ්‌ණනා නිට්‌ඨිතා.
Vanasaṃyuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 14. ගන්‌ධත්‌ථෙනසුත්‌තං • 14. Gandhatthenasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 14. ගන්‌ධත්‌ථෙනසුත්‌තවණ්‌ණනා • 14. Gandhatthenasuttavaṇṇanā
