| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၄. ဂန္ဓောဒကိယတ္ထေရအပဒာနဝဏ္ဏနာ
4. Gandhodakiyattheraapadānavaṇṇanā
နိသဇ္ဇ ပာသာဒဝရေတိအာဒိကံ အာယသ္မတော ဂန္ဓောဒကိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ နိဗ္ဗာနူပနိသ္သယာနိ ပုညာနိ ဥပစိနန္တော ဝိပသ္သီဘဂဝတော ကာလေ သေဋ္ဌိကုလေ နိဗ္ဗတ္တော ဝိညုတံ ပတ္ဝာ မဟဒ္ဓနော မဟာဘောဂော ဒိဗ္ဗသုခမနုဘဝန္တော ဝိယ မနုသ္သသုခမနုဘဝန္တော ဧကသ္မိံ ဒိဝသေ ပာသာဒဝရေ နိသိန္နော ဟောတိ။ တဒာ ဘဂဝာ သုဝဏ္ဏမဟာမေရု ဝိယ ဝီထိယာ ဝိစရတိ, တံ ဝိစရမာနံ ဘဂဝန္တံ ဒိသ္ဝာ ပသန္နမာနသော ဂန္တ္ဝာ ဝန္ဒိတ္ဝာ သုဂန္ဓောဒကေန ဘဂဝန္တံ ဩသိဉ္စမာနော ပူဇေသိ။ သော တေန ပုညေန ဒေဝမနုသ္သေသု သံသရန္တော ဣမသ္မိံ ဗုဒ္ဓုပ္ပာဒေ ဧကသ္မိံ ကုလဂေဟေ နိဗ္ဗတ္တော ဝိညုတံ ပတ္တော ဃရာဝာသေန အနလ္လီနော သတ္ထု သန္တိကေ ပဗ္ဗဇိတ္ဝာ ကမ္မဋ္ဌာနံ ဂဟေတ္ဝာ ဝိပသ္သနံ ဝဍ္ဎေတ္ဝာ နစိရသ္သေဝ အရဟာ အဟောသိ။
Nisajja pāsādavaretiādikaṃ āyasmato gandhodakiyattherassa apadānaṃ. Ayampi purimabuddhesu katādhikāro tattha tattha bhave nibbānūpanissayāni puññāni upacinanto vipassībhagavato kāle seṭṭhikule nibbatto viññutaṃ patvā mahaddhano mahābhogo dibbasukhamanubhavanto viya manussasukhamanubhavanto ekasmiṃ divase pāsādavare nisinno hoti. Tadā bhagavā suvaṇṇamahāmeru viya vīthiyā vicarati, taṃ vicaramānaṃ bhagavantaṃ disvā pasannamānaso gantvā vanditvā sugandhodakena bhagavantaṃ osiñcamāno pūjesi. So tena puññena devamanussesu saṃsaranto imasmiṃ buddhuppāde ekasmiṃ kulagehe nibbatto viññutaṃ patto gharāvāsena anallīno satthu santike pabbajitvā kammaṭṭhānaṃ gahetvā vipassanaṃ vaḍḍhetvā nacirasseva arahā ahosi.
၃၅. သော အပရဘာဂေ အတ္တနော ပုဗ္ဗကုသလံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော နိသဇ္ဇ ပာသာဒဝရေတိအာဒိမာဟ။ တတ္ထ ပာသာဒောတိ ပသာဒံ သောမနသ္သံ ဇနေတိ ဥပ္ပာဒေတီတိ ပာသာဒော , မာလာကမ္မစိတ္တကမ္မသုဝဏ္ဏကမ္မာဒ္ယနေကဝိစိတ္တံ ဒိသ္ဝာ တတ္ထ ပဝိဋ္ဌာနံ ဇနာနံ ပသာဒံ ဇနယတီတိ အတ္ထော။ ပာသာဒော စ သော ပတ္ထေတဗ္ဗဋ္ဌေန ဝရော စာတိ ပာသာဒဝရော, တသ္မိံ ပာသာဒဝရေ နိသဇ္ဇ နိသီဒိတ္ဝာ ဝိပသ္သိံ ဇိနဝရံ အဒ္ဒသန္တိ သမ္ဗန္ဓော။ သေသံ သဗ္ဗတ္ထ ဥတ္တာနမေဝာတိ။
35. So aparabhāge attano pubbakusalaṃ saritvā somanassajāto pubbacaritāpadānaṃ pakāsento nisajja pāsādavaretiādimāha. Tattha pāsādoti pasādaṃ somanassaṃ janeti uppādetīti pāsādo , mālākammacittakammasuvaṇṇakammādyanekavicittaṃ disvā tattha paviṭṭhānaṃ janānaṃ pasādaṃ janayatīti attho. Pāsādo ca so patthetabbaṭṭhena varo cāti pāsādavaro, tasmiṃ pāsādavare nisajja nisīditvā vipassiṃ jinavaraṃ addasanti sambandho. Sesaṃ sabbattha uttānamevāti.
ဂန္ဓောဒကိယတ္ထေရအပဒာနဝဏ္ဏနာ သမတ္တာ။
Gandhodakiyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၄. ဂန္ဓောဒကိယတ္ထေရအပဒာနံ • 4. Gandhodakiyattheraapadānaṃ
