| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
খুদ্দকনিকাযে
Khuddakanikāye
পেতৰত্থু-অট্ঠকথা
Petavatthu-aṭṭhakathā
গন্থারম্ভকথা
Ganthārambhakathā
মহাকারুণিকং নাথং, ঞেয্যসাগরপারগুং।
Mahākāruṇikaṃ nāthaṃ, ñeyyasāgarapāraguṃ;
ৰন্দে নিপুণগম্ভীর-ৰিচিত্রনযদেসনং॥
Vande nipuṇagambhīra-vicitranayadesanaṃ.
ৰিজ্জাচরণসম্পন্না, যেন নিয্যন্তি লোকতো।
Vijjācaraṇasampannā, yena niyyanti lokato;
ৰন্দে তমুত্তমং ধম্মং, সম্মাসম্বুদ্ধপূজিতং॥
Vande tamuttamaṃ dhammaṃ, sammāsambuddhapūjitaṃ.
সীলাদিগুণসম্পন্নো, ঠিতো মগ্গফলেসু যো।
Sīlādiguṇasampanno, ṭhito maggaphalesu yo;
ৰন্দে অরিযসঙ্ঘং তং, পুঞ্ঞক্খেত্তং অনুত্তরং॥
Vande ariyasaṅghaṃ taṃ, puññakkhettaṃ anuttaraṃ.
ৰন্দনাজনিতং পুঞ্ঞং, ইতি যং রতনত্তযে।
Vandanājanitaṃ puññaṃ, iti yaṃ ratanattaye;
হতন্তরাযো সব্বত্থ, হুত্ৰাহং তস্স তেজসা॥
Hatantarāyo sabbattha, hutvāhaṃ tassa tejasā.
পেতেহি চ কতং কম্মং, যং যং পুরিমজাতিসু।
Petehi ca kataṃ kammaṃ, yaṃ yaṃ purimajātisu;
পেতভাৰাৰহং তং তং, তেসঞ্হি ফলভেদতো॥
Petabhāvāvahaṃ taṃ taṃ, tesañhi phalabhedato.
পকাসযন্তী বুদ্ধানং, দেসনা যা ৰিসেসতো।
Pakāsayantī buddhānaṃ, desanā yā visesato;
সংৰেগজননী কম্ম-ফলপচ্চক্খকারিনী॥
Saṃvegajananī kamma-phalapaccakkhakārinī.
পেতৰত্থূতি নামেন, সুপরিঞ্ঞাতৰত্থুকা।
Petavatthūti nāmena, supariññātavatthukā;
যং খুদ্দকনিকাযস্মিং, সঙ্গাযিংসু মহেসযো॥
Yaṃ khuddakanikāyasmiṃ, saṅgāyiṃsu mahesayo.
তস্স সম্মাৰলম্বিত্ৰা, পোরাণট্ঠকথানযং।
Tassa sammāvalambitvā, porāṇaṭṭhakathānayaṃ;
তত্থ তত্থ নিদানানি, ৰিভাৰেন্তো ৰিসেসতো॥
Tattha tattha nidānāni, vibhāvento visesato.
সুৰিসুদ্ধং অসংকিণ্ণং, নিপুণত্থৰিনিচ্ছযং।
Suvisuddhaṃ asaṃkiṇṇaṃ, nipuṇatthavinicchayaṃ;
মহাৰিহারৰাসীনং, সমযং অৰিলোমযং॥
Mahāvihāravāsīnaṃ, samayaṃ avilomayaṃ.
যথাবলং করিস্সামি, অত্থসংৰণ্ণনং সুভং।
Yathābalaṃ karissāmi, atthasaṃvaṇṇanaṃ subhaṃ;
সক্কচ্চং ভাসতো তং মে, নিসামযথ সাধৰোতি॥
Sakkaccaṃ bhāsato taṃ me, nisāmayatha sādhavoti.
তত্থ পেতৰত্থূতি সেট্ঠিপুত্তাদিকস্স তস্স তস্স সত্তস্স পেতভাৰহেতুভূতং কম্মং, তস্স পন পকাসনৰসেন পৰত্তো ‘‘খেত্তূপমা অরহন্তো’’তিআদিকা পরিযত্তিধম্মো ইধ ‘‘পেতৰত্থূ’’তি অধিপ্পেতো।
Tattha petavatthūti seṭṭhiputtādikassa tassa tassa sattassa petabhāvahetubhūtaṃ kammaṃ, tassa pana pakāsanavasena pavatto ‘‘khettūpamā arahanto’’tiādikā pariyattidhammo idha ‘‘petavatthū’’ti adhippeto.
তযিদং পেতৰত্থু কেন ভাসিতং, কত্থ ভাসিতং, কদা ভাসিতং, কস্মা চ ভাসিতন্তি? ৰুচ্চতে – ইদঞ্হি পেতৰত্থু দুৰিধেন পৰত্তং অট্ঠুপ্পত্তিৰসেন, পুচ্ছাৰিস্সজ্জনৰসেন চ। তত্থ যং অট্ঠুপ্পত্তিৰসেন পৰত্তং, তং ভগৰতা ভাসিতং, ইতরং নারদত্থেরাদীহি পুচ্ছিতং তেহি তেহি পেতেহি ভাসিতং। সত্থা পন যস্মা নারদত্থেরাদীহি তস্মিং তস্মিং পুচ্ছাৰিস্সজ্জনে আরোচিতে তং তং অট্ঠুপ্পত্তিং কত্ৰা সম্পত্তপরিসায ধম্মং দেসেসি, তস্মা সব্বম্পেতং পেতৰত্থু সত্থারা ভাসিতমেৰ নাম জাতং। পৰত্তিতৰরধম্মচক্কে হি সত্থরি তত্থ তত্থ রাজগহাদীসু ৰিহরন্তে যেভুয্যেন তায তায অট্ঠুপ্পত্তিযা পুচ্ছাৰিস্সজ্জনৰসেন সত্তানং কম্মফলপচ্চক্খকরণায তং তং পেতৰত্থু দেসনারুল়্হন্তি অযং তাৰেত্থ ‘‘কেন ভাসিত’’ন্তিআদীনং পদানং সাধারণতো ৰিস্সজ্জনা। অসাধারণতো পন তস্স তস্স ৰত্থুস্স অত্থৰণ্ণনাযমেৰ আগমিস্সতি।
Tayidaṃ petavatthu kena bhāsitaṃ, kattha bhāsitaṃ, kadā bhāsitaṃ, kasmā ca bhāsitanti? Vuccate – idañhi petavatthu duvidhena pavattaṃ aṭṭhuppattivasena, pucchāvissajjanavasena ca. Tattha yaṃ aṭṭhuppattivasena pavattaṃ, taṃ bhagavatā bhāsitaṃ, itaraṃ nāradattherādīhi pucchitaṃ tehi tehi petehi bhāsitaṃ. Satthā pana yasmā nāradattherādīhi tasmiṃ tasmiṃ pucchāvissajjane ārocite taṃ taṃ aṭṭhuppattiṃ katvā sampattaparisāya dhammaṃ desesi, tasmā sabbampetaṃ petavatthu satthārā bhāsitameva nāma jātaṃ. Pavattitavaradhammacakke hi satthari tattha tattha rājagahādīsu viharante yebhuyyena tāya tāya aṭṭhuppattiyā pucchāvissajjanavasena sattānaṃ kammaphalapaccakkhakaraṇāya taṃ taṃ petavatthu desanāruḷhanti ayaṃ tāvettha ‘‘kena bhāsita’’ntiādīnaṃ padānaṃ sādhāraṇato vissajjanā. Asādhāraṇato pana tassa tassa vatthussa atthavaṇṇanāyameva āgamissati.
তং পনেতং পেতৰত্থু ৰিনযপিটকং সুত্তন্তপিটকং অভিধম্মপিটকন্তি তীসু পিটকেসু সুত্তন্তপিটকপরিযাপন্নং, দীঘনিকাযো মজ্ঝিমনিকাযো সংযুত্তনিকাযো অঙ্গুত্তরনিকাযো খুদ্দকনিকাযোতি পঞ্চসু নিকাযেসু খুদ্দকনিকাযপরিযাপন্নং, সুত্তং গেয্যং ৰেয্যাকরণং গাথা উদানং ইতিৰুত্তকং জাতকং অব্ভুতধম্মং ৰেদল্লন্তি নৰসু সাসনঙ্গেসু গাথাসঙ্গহং।
Taṃ panetaṃ petavatthu vinayapiṭakaṃ suttantapiṭakaṃ abhidhammapiṭakanti tīsu piṭakesu suttantapiṭakapariyāpannaṃ, dīghanikāyo majjhimanikāyo saṃyuttanikāyo aṅguttaranikāyo khuddakanikāyoti pañcasu nikāyesu khuddakanikāyapariyāpannaṃ, suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhutadhammaṃ vedallanti navasu sāsanaṅgesu gāthāsaṅgahaṃ.
‘‘দ্ৰাসীতি বুদ্ধতো গণ্হিং, দ্ৰে সহস্সানি ভিক্খুতো।
‘‘Dvāsīti buddhato gaṇhiṃ, dve sahassāni bhikkhuto;
চতুরাসীতি সহস্সানি, যে মে ধম্মা পৰত্তিনো’’তি॥ (থেরগা॰ ১০২৭) –
Caturāsīti sahassāni, ye me dhammā pavattino’’ti. (theragā. 1027) –
এৰং ধম্মভণ্ডাগারিকেন পটিঞ্ঞাতেসু চতুরাসীতিযা ধম্মক্খন্ধসহস্সেসু কতিপযধম্মক্খন্ধসঙ্গহং, ভাণৰারতো চতুভাণৰারমত্তং, ৰগ্গতো – উরগৰগ্গো উব্বরিৰগ্গো চূল়ৰগ্গো মহাৰগ্গোতি চতুৰগ্গসঙ্গহং। তেসু পঠমৰগ্গে দ্ৰাদস ৰত্থূনি, দুতিযৰগ্গে তেরস ৰত্থূনি, ততিযৰগ্গে দস ৰত্থূনি, চতুত্থৰগ্গে সোল়স ৰত্থূনীতি ৰত্থুতো একপঞ্ঞাসৰত্থুপটিমণ্ডিতং। তস্স ৰগ্গেসু উরগৰগ্গো আদি, ৰত্থূসু খেত্তূপমপেতৰত্থু আদি, তস্সাপি ‘‘খেত্তূপমা অরহন্তো’’তি অযং গাথা আদি।
Evaṃ dhammabhaṇḍāgārikena paṭiññātesu caturāsītiyā dhammakkhandhasahassesu katipayadhammakkhandhasaṅgahaṃ, bhāṇavārato catubhāṇavāramattaṃ, vaggato – uragavaggo ubbarivaggo cūḷavaggo mahāvaggoti catuvaggasaṅgahaṃ. Tesu paṭhamavagge dvādasa vatthūni, dutiyavagge terasa vatthūni, tatiyavagge dasa vatthūni, catutthavagge soḷasa vatthūnīti vatthuto ekapaññāsavatthupaṭimaṇḍitaṃ. Tassa vaggesu uragavaggo ādi, vatthūsu khettūpamapetavatthu ādi, tassāpi ‘‘khettūpamā arahanto’’ti ayaṃ gāthā ādi.
