| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
ৰিনযপিটকে
Vinayapiṭake
ৰজিরবুদ্ধি-টীকা
Vajirabuddhi-ṭīkā
গন্থারম্ভকথা
Ganthārambhakathā
পঞ্ঞাৰিসুদ্ধায দযায সব্বে।
Paññāvisuddhāya dayāya sabbe;
ৰিমোচিতা যেন ৰিনেয্যসত্তা।
Vimocitā yena vineyyasattā;
তং চক্খুভূতং সিরসা নমিত্ৰা।
Taṃ cakkhubhūtaṃ sirasā namitvā;
লোকস্স লোকন্তগতস্স ধম্মং॥
Lokassa lokantagatassa dhammaṃ.
সঙ্ঘঞ্চ সীলাদিগুণেহি যুত্ত-
Saṅghañca sīlādiguṇehi yutta-
মাদায সব্বেসু পদেসু সারং।
Mādāya sabbesu padesu sāraṃ;
সঙ্খেপকামেন মমাসযেন।
Saṅkhepakāmena mamāsayena;
সঞ্চোদিতো ভিক্খুহিতঞ্চ দিস্ৰা॥
Sañcodito bhikkhuhitañca disvā.
সমন্তপাসাদিকসঞ্ঞিতায ।
Samantapāsādikasaññitāya ;
সম্বুদ্ধঘোসাচরিযোদিতায।
Sambuddhaghosācariyoditāya;
সমাসতো লীনপদে লিখিস্সং।
Samāsato līnapade likhissaṃ;
সমাসতো লীনপদে লিখীতং॥
Samāsato līnapade likhītaṃ.
সঞ্ঞা নিমিত্তং কত্তা চ, পরিমাণং পযোজনং।
Saññā nimittaṃ kattā ca, parimāṇaṃ payojanaṃ;
সব্বাগমস্স পুব্বেৰ, ৰত্তব্বং ৰত্তুমিচ্ছতাতি॥ –
Sabbāgamassa pubbeva, vattabbaṃ vattumicchatāti. –
ৰচনতো সমন্তপাসাদিকেতি সঞ্ঞা। দীপন্তরে ভিক্খুজনস্স অত্থং নাভিসম্ভুণাতীতি নিমিত্তং। বুদ্ধঘোসোতি গরূহি গহিতনামধেয্যেনাতি কত্তা। সমধিকসত্তৰীসতিসহস্সমত্তেন তস্স গন্থেনাতি পরিমাণং। চিরট্ঠিতত্থং ধম্মস্সাতি পযোজনং।
Vacanato samantapāsādiketi saññā. Dīpantare bhikkhujanassa atthaṃ nābhisambhuṇātīti nimittaṃ. Buddhaghosoti garūhi gahitanāmadheyyenāti kattā. Samadhikasattavīsatisahassamattena tassa ganthenāti parimāṇaṃ. Ciraṭṭhitatthaṃ dhammassāti payojanaṃ.
তত্রাহ – ‘‘ৰত্তব্বং ৰত্তুমিচ্ছতাতি যং ৰুত্তং, তত্থ কথংৰিধো ৰত্তা’’তি? উচ্চতে –
Tatrāha – ‘‘vattabbaṃ vattumicchatāti yaṃ vuttaṃ, tattha kathaṃvidho vattā’’ti? Uccate –
পাঠত্থৰিদূসংহীরো, ৰত্তা সুচি অমচ্ছরো।
Pāṭhatthavidūsaṃhīro, vattā suci amaccharo;
চতুক্কমপরিচ্চাগী, দেসকস্স হিতুস্সুকোতি॥ (মহানি॰ অট্ঠ॰ গন্থারম্ভকথা)।
Catukkamapariccāgī, desakassa hitussukoti. (mahāni. aṭṭha. ganthārambhakathā);
তত্র পঠীযতেতি পাঠো। সো হি অনেকপ্পকারো অত্থানুরূপো অত্থাননুরূপো চেতি। কথং? সন্ধাযভাসিতো ব্যঞ্জনভাসিতো সাৰসেসপাঠো নিরৰসেসপাঠো নীতো নেয্যোতি। তত্র অনেকত্থৰত্তা সন্ধাযভাসিতো নাম ‘‘মাতরং পিতরং হন্ত্ৰা’’তিআদি (ধ॰ প॰ ২৯৪)। একত্থৰত্তা ব্যঞ্জনভাসিতো নাম ‘‘মনোপুব্বঙ্গমা ধম্মা’’ত্যাদি (ধ॰ প॰ ১, ২; নেত্তি॰ ৯০, ৯২; পেটকো॰ ১৪)। সাৰসেসো নাম ‘‘সব্বং, ভিক্খৰে, আদিত্ত’’মিত্যাদি (মহাৰ॰ ৫৪; সং॰ নি॰ ৪.২৮)। ৰিপরীতো নিরৰসেসো নাম ‘‘সব্বে ধম্মা সব্বাকারেন বুদ্ধস্স ভগৰতো ঞাণমুখে আপাথং আগচ্ছন্তী’’ত্যাদি (মহানি॰ ১৫৬; পটি॰ ম॰ ৩.৫)। যথা ৰচনং, তথা অৰগন্তব্বো নীতো নাম ‘‘অনিচ্চং দুক্খমনত্তা’’ত্যাদি। যুত্তিযা অনুস্সরিতব্বো নেয্যো নাম ‘‘একপুগ্গলো, ভিক্খৰে’’ত্যাদি (অ॰ নি॰ ১.১৭০)।
Tatra paṭhīyateti pāṭho. So hi anekappakāro atthānurūpo atthānanurūpo ceti. Kathaṃ? Sandhāyabhāsito byañjanabhāsito sāvasesapāṭho niravasesapāṭho nīto neyyoti. Tatra anekatthavattā sandhāyabhāsito nāma ‘‘mātaraṃ pitaraṃ hantvā’’tiādi (dha. pa. 294). Ekatthavattā byañjanabhāsito nāma ‘‘manopubbaṅgamā dhammā’’tyādi (dha. pa. 1, 2; netti. 90, 92; peṭako. 14). Sāvaseso nāma ‘‘sabbaṃ, bhikkhave, āditta’’mityādi (mahāva. 54; saṃ. ni. 4.28). Viparīto niravaseso nāma ‘‘sabbe dhammā sabbākārena buddhassa bhagavato ñāṇamukhe āpāthaṃ āgacchantī’’tyādi (mahāni. 156; paṭi. ma. 3.5). Yathā vacanaṃ, tathā avagantabbo nīto nāma ‘‘aniccaṃ dukkhamanattā’’tyādi. Yuttiyā anussaritabbo neyyo nāma ‘‘ekapuggalo, bhikkhave’’tyādi (a. ni. 1.170).
অত্থোপি অনেকপ্পকারো পাঠত্থো সভাৰত্থো ঞেয্যত্থো পাঠানুরূপো পাঠাননুরূপো সাৰসেসত্থো নিরৰসেসত্থো নীতত্থো নেয্যত্থোত্যাদি। তত্থ যো তংতংসঞ্ঞাপনত্থমুচ্চারীযতে পাঠো, স পাঠত্থো ‘‘সাত্থং সব্যঞ্জন’’মিত্যাদীসু (পারা॰ ১; দী॰ নি॰ ১.১৯০) ৰিয। রূপারূপধম্মানং লক্খণরসাদি সভাৰত্থো ‘‘সম্মাদিট্ঠিং ভাৰেতী’’ত্যাদীসু (ৰিভ॰ ৪৮৯; সং॰ নি॰ ৫.৩) ৰিয। যো ঞাযমানো হিতায ভৰতি, স ঞাতুমরহত্তা ঞেয্যত্থো ‘‘অত্থৰাদী ধম্মৰাদী’’ত্যেৰমাদীসু (দী॰ নি॰ ১.৯, ১৯৪; ৩.২৩৮; ম॰ নি॰ ১.৪১১) ৰিয। যথাপাঠং ভাসিতো পাঠানুরূপো ‘‘চক্খু, ভিক্খৰে, পুরাণকম্ম’’ন্তি (সং॰ নি॰ ৪.১৪৬) ভগৰতা ৰুত্তমতো চক্খুমপি কম্মন্তি। ব্যঞ্জনচ্ছাযায অত্থং পটিবাহযমানেন ৰুত্তো পাঠাননুরূপো। ৰজ্জেতব্বং কিঞ্চি অপরিচ্চজিত্ৰা পরিসেসং কত্ৰা ৰুত্তো সাৰসেসত্থো ‘‘চক্খুঞ্চ পটিচ্চ রূপে চ উপ্পজ্জতী’’তি (সং॰ নি॰ ৪.৬০; মহানি॰ ১০৭) চ, ‘‘সব্বে তসন্তি দণ্ডস্স, সব্বে ভাযন্তি মচ্চুনো’’ত্যাদীসু (ধ॰ প॰ ১২৯) ৰিয। ৰিপরীতো নিরৰসেসত্থো ‘‘সন্ধাৰিতং সংসরিতং মমঞ্চেৰ তুম্হাকঞ্চ (দী॰ নি॰ ২.১৫৫; মহা॰ ২৮৭; নেত্তি॰ ১১৪)। তত্র, ভিক্খৰে, কো মন্তা কো সদ্ধাতা…পে॰… অঞ্ঞত্র দিট্ঠপদেহী’’ত্যাদি (অ॰ নি॰ ৭.৬৬)। সদ্দৰসেনেৰ ৰেদনীযো নীতত্থো ‘‘রূপা সদ্দা রসা গন্ধা, ফোট্ঠব্বা চ মনোরমা’’ত্যাদীসু (সং॰ নি॰ ১.১৫১, ১৬৫; মহাৰ॰ ৩৩) ৰিয। সম্মুতিৰসেন ৰেদিতব্বো নেয্যত্থো ‘‘চত্তারোমে, ভিক্খৰে, ৰলাহকূপমাপুগ্গলা’’ত্যাদীসু ৰিয (অ॰ নি॰ ৪.১০১; পু॰ প॰ ১৫৭)। আহ চ –
Atthopi anekappakāro pāṭhattho sabhāvattho ñeyyattho pāṭhānurūpo pāṭhānanurūpo sāvasesattho niravasesattho nītattho neyyatthotyādi. Tattha yo taṃtaṃsaññāpanatthamuccārīyate pāṭho, sa pāṭhattho ‘‘sātthaṃ sabyañjana’’mityādīsu (pārā. 1; dī. ni. 1.190) viya. Rūpārūpadhammānaṃ lakkhaṇarasādi sabhāvattho ‘‘sammādiṭṭhiṃ bhāvetī’’tyādīsu (vibha. 489; saṃ. ni. 5.3) viya. Yo ñāyamāno hitāya bhavati, sa ñātumarahattā ñeyyattho ‘‘atthavādī dhammavādī’’tyevamādīsu (dī. ni. 1.9, 194; 3.238; ma. ni. 1.411) viya. Yathāpāṭhaṃ bhāsito pāṭhānurūpo ‘‘cakkhu, bhikkhave, purāṇakamma’’nti (saṃ. ni. 4.146) bhagavatā vuttamato cakkhumapi kammanti. Byañjanacchāyāya atthaṃ paṭibāhayamānena vutto pāṭhānanurūpo. Vajjetabbaṃ kiñci apariccajitvā parisesaṃ katvā vutto sāvasesattho ‘‘cakkhuñca paṭicca rūpe ca uppajjatī’’ti (saṃ. ni. 4.60; mahāni. 107) ca, ‘‘sabbe tasanti daṇḍassa, sabbe bhāyanti maccuno’’tyādīsu (dha. pa. 129) viya. Viparīto niravasesattho ‘‘sandhāvitaṃ saṃsaritaṃ mamañceva tumhākañca (dī. ni. 2.155; mahā. 287; netti. 114). Tatra, bhikkhave, ko mantā ko saddhātā…pe… aññatra diṭṭhapadehī’’tyādi (a. ni. 7.66). Saddavaseneva vedanīyo nītattho ‘‘rūpā saddā rasā gandhā, phoṭṭhabbā ca manoramā’’tyādīsu (saṃ. ni. 1.151, 165; mahāva. 33) viya. Sammutivasena veditabbo neyyattho ‘‘cattārome, bhikkhave, valāhakūpamāpuggalā’’tyādīsu viya (a. ni. 4.101; pu. pa. 157). Āha ca –
‘‘যো অত্থো সদ্দতো ঞেয্যো, নীতত্থং ইতি তং ৰিদূ।
‘‘Yo attho saddato ñeyyo, nītatthaṃ iti taṃ vidū;
অত্থস্সেৰাভিসামগ্গী, নেয্যত্থো ইতি কথ্যতে’’তি॥
Atthassevābhisāmaggī, neyyattho iti kathyate’’ti.
এৰং পভেদগতে পাঠত্থে ৰিজানাতীতি পাঠত্থৰিদূ। ন সংহীরতে পরপৰাদীহি দীঘরত্তং তিত্থৰাসেনেত্যসংহীরো। ভাৰনাযাগমাধিগমসম্পন্নত্তা ৰত্তুং সক্কোতীতি ৰত্তা, সঙ্খেপৰিত্থারনযেন হেতুদাহরণাদীহি অৰবোধযিতুং সমত্থোত্যত্থো। সোচযত্যত্তানং পরে চেতি সুচি, দুস্সীল্যদুদ্দিট্ঠিমলৰিরহিতোত্যত্থো। দুস্সীলো হি অত্তানমুপহন্তুনাদেয্যৰাচো চ ভৰত্যপত্তাহারাচারো ইৰ নিচ্চাতুরো ৰেজ্জো। দুদ্দিট্ঠি পরং উপহন্তি, নাৰস্সং নিস্সযো চ ভৰত্যহিৰাল়গহাকুলো ইৰ কমলসণ্ডো। উভযৰিপন্নো সব্বথাপ্যনুপাসনীযো ভৰতি গূথগতমিৰ ছৰালাতং গূথগতো ৰিয চ কণ্হসপ্পো। উভযসম্পন্নো পন সুচি সব্বথাপ্যুপাসনীযো সেৰিতব্বো চ ৰিঞ্ঞূহি, নিরুপদ্দৰো ইৰ রতনাকরো। নাস্স মচ্ছরোত্যমচ্ছরো, অহীনাচরিযমুট্ঠীত্যত্থো। সুত্তসুত্তানুলোমাচরিযৰাদঅত্তনোমতিসঙ্খাতস্স চতুক্কস্সাপরিচ্চাগী, তদত্থস্সেৰ ব্যাখ্যাতেত্যত্থো। অথ ৰা পচ্চক্খানুমানসদ্দত্থাপত্তিপ্পভেদস্স পমাণচতুক্কস্সাপরিচ্চাগী।
Evaṃ pabhedagate pāṭhatthe vijānātīti pāṭhatthavidū. Na saṃhīrate parapavādīhi dīgharattaṃ titthavāsenetyasaṃhīro. Bhāvanāyāgamādhigamasampannattā vattuṃ sakkotīti vattā, saṅkhepavitthāranayena hetudāharaṇādīhi avabodhayituṃ samatthotyattho. Socayatyattānaṃ pare ceti suci, dussīlyaduddiṭṭhimalavirahitotyattho. Dussīlo hi attānamupahantunādeyyavāco ca bhavatyapattāhārācāro iva niccāturo vejjo. Duddiṭṭhi paraṃ upahanti, nāvassaṃ nissayo ca bhavatyahivāḷagahākulo iva kamalasaṇḍo. Ubhayavipanno sabbathāpyanupāsanīyo bhavati gūthagatamiva chavālātaṃ gūthagato viya ca kaṇhasappo. Ubhayasampanno pana suci sabbathāpyupāsanīyo sevitabbo ca viññūhi, nirupaddavo iva ratanākaro. Nāssa maccharotyamaccharo, ahīnācariyamuṭṭhītyattho. Suttasuttānulomācariyavādaattanomatisaṅkhātassa catukkassāpariccāgī, tadatthasseva byākhyātetyattho. Atha vā paccakkhānumānasaddatthāpattippabhedassa pamāṇacatukkassāpariccāgī.
‘‘একংসৰচনং একং, ৰিভজ্জৰচনাপরং।
‘‘Ekaṃsavacanaṃ ekaṃ, vibhajjavacanāparaṃ;
ততিযং পটিপুচ্ছেয্য, চতুত্থং পন ঠাপযে’’তি॥ –
Tatiyaṃ paṭipuccheyya, catutthaṃ pana ṭhāpaye’’ti. –
এৰং ৰুত্তচতুক্কস্স ৰা অপরিচ্চাগী। হিতুস্সুকো ইতি সোতূনং হিতাযোস্সুকো, তেসমৰবোধনং পতি পত্থেতী ত্যত্থো। সো এসো সুচিত্তা পিযো। চতুক্কস্স অপরিচ্চাগিত্তা গরু। অসংহীরত্তা ভাৰনীযো। দেসকত্তা ৰত্তা। হিতুস্সুকত্তা ৰচনক্খমো। পাঠত্থৰিদুত্তা গম্ভীরকথং কত্তা। অমচ্ছরত্তা নো চট্ঠানে নিযোজকোতি।
Evaṃ vuttacatukkassa vā apariccāgī; Hitussuko iti sotūnaṃ hitāyossuko, tesamavabodhanaṃ pati patthetī tyattho; So eso sucittā piyo; Catukkassa apariccāgittā garu; Asaṃhīrattā bhāvanīyo; Desakattā vattā; Hitussukattā vacanakkhamo; Pāṭhatthaviduttā gambhīrakathaṃ kattā; Amaccharattā no caṭṭhāne niyojakoti;
‘‘পিযো গরু ভাৰনীযো, ৰত্তা চ ৰচনক্খমো।
‘‘Piyo garu bhāvanīyo, vattā ca vacanakkhamo;
গম্ভীরঞ্চ কথং কত্তা, নো চট্ঠানে নিযোজকো’’॥ (অ॰ নি॰ ৭.৩৭; নেত্তি॰ ১১৩) –
Gambhīrañca kathaṃ kattā, no caṭṭhāne niyojako’’. (a. ni. 7.37; netti. 113) –
ইতিঅভিহিতো দেসকো।
Itiabhihito desako;
সোতা ইদানি অভিধীযতে –
Sotā idāni abhidhīyate –
ধম্মাচরিযগরু সদ্ধা-পঞ্ঞাদিগুণমণ্ডিতো।
Dhammācariyagaru saddhā-paññādiguṇamaṇḍito;
অসঠামাযো সোতাস্স, সুমেধো অমতামুখো॥
Asaṭhāmāyo sotāssa, sumedho amatāmukho.
তত্থ ধম্মগরুত্তা কথং ন পরিভৰতি, আচরিযগরুত্তা কথিকং ন পরিভৰতি, সদ্ধাপঞ্ঞাদিগুণপটিমণ্ডিতত্তা অত্তানং ন পরিভৰতি, অসঠামাযত্তা অমতাভিমুখত্তা চ অৰিক্খিত্তচিত্তো ভৰতি, সুমেধত্তা যোনিসোমনসিকরোতীত্যত্থো। ৰুত্তঞ্হেতং –
Tattha dhammagaruttā kathaṃ na paribhavati, ācariyagaruttā kathikaṃ na paribhavati, saddhāpaññādiguṇapaṭimaṇḍitattā attānaṃ na paribhavati, asaṭhāmāyattā amatābhimukhattā ca avikkhittacitto bhavati, sumedhattā yonisomanasikarotītyattho. Vuttañhetaṃ –
‘‘পঞ্চহি, ভিক্খৰে, ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্তং। কতমেহি পঞ্চহি? ন কথং পরিভোতি, ন কথিকং পরিভোতি, ন অত্তানং পরিভোতি, অৰিক্খিত্তচিত্তো ধম্মং সুণাতি একগ্গচিত্তো, যোনিসো চ মনসি করোতী’’তি (অ॰ নি॰ ৫.১৫১)।
‘‘Pañcahi, bhikkhave, dhammehi samannāgato suṇanto saddhammaṃ bhabbo niyāmaṃ okkamituṃ kusalesu dhammesu sammattaṃ. Katamehi pañcahi? Na kathaṃ paribhoti, na kathikaṃ paribhoti, na attānaṃ paribhoti, avikkhittacitto dhammaṃ suṇāti ekaggacitto, yoniso ca manasi karotī’’ti (a. ni. 5.151).
তংলক্খণপ্পত্তত্তা ভাৰনা ভৰতি সৰনস্সেত্যুত্তো সোতা।
Taṃlakkhaṇappattattā bhāvanā bhavati savanassetyutto sotā.
