| Library / Tipiṭaka / তিপিটক • Tipiṭaka / ৰিনযালঙ্কার-টীকা • Vinayālaṅkāra-ṭīkā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
ৰিনযপিটকে
Vinayapiṭake
ৰিনযালঙ্কার-টীকা (পঠমো ভাগো)
Vinayālaṅkāra-ṭīkā (paṭhamo bhāgo)
গন্থারম্ভকথা
Ganthārambhakathā
মুত্তহারাদিনযগাথা
Muttahārādinayagāthā
যো লোকে লোকলোকো ৰরতরপরদো রাজরাজগ্গজঞ্ঞো।
Yo loke lokaloko varataraparado rājarājaggajañño;
আকাসাকারকারো পরমরতিরতো দেৰদেৰন্তৰজ্জো॥
Ākāsākārakāro paramaratirato devadevantavajjo.
সংসারাসারসারো সুনরনমনতো মারহারন্তরট্ঠো।
Saṃsārāsārasāro sunaranamanato mārahārantaraṭṭho;
লোকালঙ্কারকারো অতিসতিগতিমা ধীরৰীরত্তরম্মো॥
Lokālaṅkārakāro atisatigatimā dhīravīrattarammo.
সীহনিৰত্তননযগাথা
Sīhanivattananayagāthā
সংসারচক্কৰিদ্ধংসং, সম্বুদ্ধং তং সুমানসং।
Saṃsāracakkaviddhaṃsaṃ, sambuddhaṃ taṃ sumānasaṃ;
সংনমামি সুগুণেসং, সংদেসিতসুদুদ্দসং॥
Saṃnamāmi suguṇesaṃ, saṃdesitasududdasaṃ.
অনোতত্তোদকাৰত্তনযগাথা
Anotattodakāvattanayagāthā
যেন ৰিদ্ধংসিতা পাপা, যেন নিব্বাপিতা দরা।
Yena viddhaṃsitā pāpā, yena nibbāpitā darā;
যেন লোকা নিস্সরিসুং, যেন চাহং নমামি তং॥
Yena lokā nissarisuṃ, yena cāhaṃ namāmi taṃ.
চতুদীপচক্কৰত্তননযগাথা
Catudīpacakkavattananayagāthā
সঙ্ঘং সসঙ্ঘং নমামি, ৰন্তন্তৰরধম্মজং।
Saṅghaṃ sasaṅghaṃ namāmi, vantantavaradhammajaṃ;
মগ্গগ্গমনফলট্ঠং, সুসংসং সুভমানসং॥
Maggaggamanaphalaṭṭhaṃ, susaṃsaṃ subhamānasaṃ.
অব্যপেতচতুপাদআদিযমকগাথা
Abyapetacatupādaādiyamakagāthā
ৰিনযং ৰিনযং সারং, সঙ্গহং সঙ্গহং করং।
Vinayaṃ vinayaṃ sāraṃ, saṅgahaṃ saṅgahaṃ karaṃ;
চরিযং চরিযং ৰন্দে, পরমং পরমং সুতং॥
Cariyaṃ cariyaṃ vande, paramaṃ paramaṃ sutaṃ.
ব্যপেতচতুপাদআদিঅন্তযমকগাথা
Byapetacatupādaādiantayamakagāthā
পকারে বহুপকারে, সাগরে গুণসাগরে।
Pakāre bahupakāre, sāgare guṇasāgare;
গরৰো মম গরৰো, ৰন্দামি অভিৰন্দামি॥
Garavo mama garavo, vandāmi abhivandāmi.
ৰত্থুত্তযে গন্থকারে, গরূসু সাদরং মযা।
Vatthuttaye ganthakāre, garūsu sādaraṃ mayā;
কতেন নমক্কারেন, হিত্ৰা সব্বে উপদ্দৰে॥
Katena namakkārena, hitvā sabbe upaddave.
সিক্খাকামেহি ধীরেহি, জিনসাসনকারিভি।
Sikkhākāmehi dhīrehi, jinasāsanakāribhi;
ভিক্খূহি ৰিনযঞ্ঞূহি, সাদরং অভিযাচিতো॥
Bhikkhūhi vinayaññūhi, sādaraṃ abhiyācito.
ৰণ্ণযিস্সামি ৰিনয-সঙ্গহং পীতিৰড্ঢনং।
Vaṇṇayissāmi vinaya-saṅgahaṃ pītivaḍḍhanaṃ;
ভিক্খূনং ৰেনযিকানং, যথাসত্তিবলং অহং॥
Bhikkhūnaṃ venayikānaṃ, yathāsattibalaṃ ahaṃ.
পোরাণেহি কতা টীকা, কিঞ্চাপি অত্থি সা পন।
Porāṇehi katā ṭīkā, kiñcāpi atthi sā pana;
অতিসঙ্খেপভাৰেন, ন সাধেতি যথিচ্ছিতং॥
Atisaṅkhepabhāvena, na sādheti yathicchitaṃ.
তস্মা হি নানাসত্থেহি, সারমাদায সাধুকং।
Tasmā hi nānāsatthehi, sāramādāya sādhukaṃ;
নাতিসঙ্খেপৰিত্থারং, করিস্সং অত্থৰণ্ণনং॥
Nātisaṅkhepavitthāraṃ, karissaṃ atthavaṇṇanaṃ.
ৰিনযালঙ্কারং নাম, পেসলানং পমোদনং।
Vinayālaṅkāraṃ nāma, pesalānaṃ pamodanaṃ;
ইমং পকরণং সব্বে, সম্মা ধারেন্তু সাধৰোতি॥
Imaṃ pakaraṇaṃ sabbe, sammā dhārentu sādhavoti.
গন্থারম্ভকথাৰণ্ণনা
Ganthārambhakathāvaṇṇanā
ৰিৰিধৰিসেসনযসমন্নাগতং কাযৰাচাৰিনযনকরণসমত্থং লজ্জিপেসলভিক্খূনং সংসযৰিনোদনকারকং যোগাৰচরপুগ্গলানং সীলৰিসুদ্ধিসম্পাপকং জিনসাসনৰুড্ঢিহেতুভূতং পকরণমিদমারভিতুকামো অযমাচরিযাসভো পঠমং তাৰ রতনত্তযপণামপণামারহভাৰঅভিধেয্যকরণহেতু করণপ্পকারপকরণাভিধাননিমিত্তপযোজনানি দস্সেতুং ‘‘ৰত্থুত্তযং নমস্সিত্ৰা’’তিআদিমাহ। এত্থ হি ৰত্থুত্তযং নমস্সিত্ৰাতি ইমিনা রতনত্তযপণামো ৰুত্তো পণামেতব্বপণামঅত্থদস্সনতো। সরণং সব্বপাণিনন্তি ইমিনা পণামারহভাৰো পণামহেতুদস্সনতো। পাল়িমুত্তৰিনিচ্ছযন্তি অভিধেয্যো ইমস্স পকরণস্স অত্থভাৰতো। ৰিপ্পকিণ্ণমনেকত্থাতি করণহেতু তেনেৰকারণেন পকরণস্স কতত্তা। সমাহরিত্ৰা একত্থ, দস্সযিস্সমনাকুলন্তি করণপ্পকারো তেনাকারেন পকরণস্স করণতো। পকরণাভিধানং পন সমাহরিতসদ্দস্স সামত্থিযতো দস্সিতং সমাহরিত্ৰা দস্সনেনেৰ ইমস্স পকরণস্স ৰিনযসঙ্গহইতি নামস্স লভনতো।
Vividhavisesanayasamannāgataṃ kāyavācāvinayanakaraṇasamatthaṃ lajjipesalabhikkhūnaṃ saṃsayavinodanakārakaṃ yogāvacarapuggalānaṃ sīlavisuddhisampāpakaṃ jinasāsanavuḍḍhihetubhūtaṃ pakaraṇamidamārabhitukāmo ayamācariyāsabho paṭhamaṃ tāva ratanattayapaṇāmapaṇāmārahabhāvaabhidheyyakaraṇahetu karaṇappakārapakaraṇābhidhānanimittapayojanāni dassetuṃ ‘‘vatthuttayaṃ namassitvā’’tiādimāha. Ettha hi vatthuttayaṃ namassitvāti iminā ratanattayapaṇāmo vutto paṇāmetabbapaṇāmaatthadassanato. Saraṇaṃ sabbapāṇinanti iminā paṇāmārahabhāvo paṇāmahetudassanato. Pāḷimuttavinicchayanti abhidheyyo imassa pakaraṇassa atthabhāvato. Vippakiṇṇamanekatthāti karaṇahetu tenevakāraṇena pakaraṇassa katattā. Samāharitvā ekattha, dassayissamanākulanti karaṇappakāro tenākārena pakaraṇassa karaṇato. Pakaraṇābhidhānaṃ pana samāharitasaddassa sāmatthiyato dassitaṃ samāharitvā dassaneneva imassa pakaraṇassa vinayasaṅgahaiti nāmassa labhanato.
নিমিত্তং পন অজ্ঝত্তিকবাহিরৰসেন দুৰিধং। তত্থ অজ্ঝত্তিকং নাম করুণা, তং দস্সনকিরিযায সামত্থিযতো দস্সিতং তস্মিং অসতি দস্সনকিরিযায অভাৰতো। বাহিরং নাম সোতুজনসমূহো, তং যোগাৰচরভিক্খূনন্তি তস্স করুণারম্মণভাৰতো। পযোজনং পন দুৰিধং পণামপযোজনপকরণপযোজনৰসেন। তত্থ পণামপযোজনং নাম অন্তরাযৰিসোসনপসাদজননাদিকং, তং সরণং সব্বপাণিনন্তি ইমস্স সামত্থিযতো দস্সিতং হেতুম্হি সতি ফলস্স অৰিনাভাৰতো। ৰুত্তঞ্হি অভিধম্মটীকাচরিযেন ‘‘গুণৰিসেসৰা হি পণামারহো হোতি, পণামারহে চ কতো পণামো ৰুত্তপ্পযোজনসিদ্ধিকরোৰ হোতী’’তি (ধ॰ স॰ মূলটী॰ ১)। পকরণপযোজনম্পি দুৰিধং মুখ্যানুসঙ্গিকৰসেন। তেসু মুখ্যপযোজনং নাম ব্যঞ্জনানুরূপং অত্থস্স পটিৰিজ্ঝনং পকাসনঞ্চ অত্থানুরূপং ব্যঞ্জনস্স উদ্দিসনং উদ্দেসাপনঞ্চ, তং ৰিনযে পাটৰত্থাযাতি ইমিনা ৰুত্তং। অনুসঙ্গিকপযোজনং নাম সীলাদিঅনুপাদাপরিনিব্বানন্তো অত্থো, তং সমাহরিত্ৰা একত্থ দস্সযিস্সন্তি ইমস্স সামত্থিযেন দস্সিতং একত্থ সমাহরিত্ৰা দস্সনে সতি তদুগ্গহপরিপুচ্ছাদিনা কতপযোগস্স অনন্তরাযেন তদত্থসিজ্ঝনতোতি।
Nimittaṃ pana ajjhattikabāhiravasena duvidhaṃ. Tattha ajjhattikaṃ nāma karuṇā, taṃ dassanakiriyāya sāmatthiyato dassitaṃ tasmiṃ asati dassanakiriyāya abhāvato. Bāhiraṃ nāma sotujanasamūho, taṃ yogāvacarabhikkhūnanti tassa karuṇārammaṇabhāvato. Payojanaṃ pana duvidhaṃ paṇāmapayojanapakaraṇapayojanavasena. Tattha paṇāmapayojanaṃ nāma antarāyavisosanapasādajananādikaṃ, taṃ saraṇaṃ sabbapāṇinanti imassa sāmatthiyato dassitaṃ hetumhi sati phalassa avinābhāvato. Vuttañhi abhidhammaṭīkācariyena ‘‘guṇavisesavā hi paṇāmāraho hoti, paṇāmārahe ca kato paṇāmo vuttappayojanasiddhikarova hotī’’ti (dha. sa. mūlaṭī. 1). Pakaraṇapayojanampi duvidhaṃ mukhyānusaṅgikavasena. Tesu mukhyapayojanaṃ nāma byañjanānurūpaṃ atthassa paṭivijjhanaṃ pakāsanañca atthānurūpaṃ byañjanassa uddisanaṃ uddesāpanañca, taṃ vinaye pāṭavatthāyāti iminā vuttaṃ. Anusaṅgikapayojanaṃ nāma sīlādianupādāparinibbānanto attho, taṃ samāharitvā ekattha dassayissanti imassa sāmatthiyena dassitaṃ ekattha samāharitvā dassane sati taduggahaparipucchādinā katapayogassa anantarāyena tadatthasijjhanatoti.
কিমত্থং পনেত্থ রতনত্তযপণামাদযো আচরিযেন কতা, ননু অধিপ্পেতগন্থারম্ভোৰ কাতব্বোতি? ৰুচ্চতে – এত্থ রতনত্তযপণামকরণং তব্বিহতন্তরাযো হুত্ৰা অনাযাসেন গন্থপরিসমাপনত্থং। পণামারহভাৰৰচনং অত্তনো যুত্তপত্তকারিতাদস্সনত্থং, তং ৰিঞ্ঞূনং তোসাপনত্থং, তং পকরণস্স উগ্গহণত্থং, তং সব্বসম্পত্তিনিপ্ফাদনত্থং। অভিধেয্যকথনং ৰিদিতাভিধেয্যস্স গন্থস্স ৰিঞ্ঞূনং উগ্গহধারণাদিৰসেন পটিপজ্জনত্থং। করণহেতুকথনং অকারণে কতস্স ৰাযামস্স নিপ্ফলভাৰতো তপ্পটিক্খেপনত্থং। করণপ্পকারকথনং ৰিদিতপ্পকারস্স গন্থস্স সোতূনং উগ্গহণাদীসু রুচিজননত্থং। অভিধানদস্সনং ৰোহারসুখত্থং। নিমিত্তকথনং আসন্নকারণদস্সনত্থং। পযোজনদস্সনং দুৰিধপযোজনকামীনং সোতূনং সমুস্সাহজননত্থন্তি।
Kimatthaṃ panettha ratanattayapaṇāmādayo ācariyena katā, nanu adhippetaganthārambhova kātabboti? Vuccate – ettha ratanattayapaṇāmakaraṇaṃ tabbihatantarāyo hutvā anāyāsena ganthaparisamāpanatthaṃ. Paṇāmārahabhāvavacanaṃ attano yuttapattakāritādassanatthaṃ, taṃ viññūnaṃ tosāpanatthaṃ, taṃ pakaraṇassa uggahaṇatthaṃ, taṃ sabbasampattinipphādanatthaṃ. Abhidheyyakathanaṃ viditābhidheyyassa ganthassa viññūnaṃ uggahadhāraṇādivasena paṭipajjanatthaṃ. Karaṇahetukathanaṃ akāraṇe katassa vāyāmassa nipphalabhāvato tappaṭikkhepanatthaṃ. Karaṇappakārakathanaṃ viditappakārassa ganthassa sotūnaṃ uggahaṇādīsu rucijananatthaṃ. Abhidhānadassanaṃ vohārasukhatthaṃ. Nimittakathanaṃ āsannakāraṇadassanatthaṃ. Payojanadassanaṃ duvidhapayojanakāmīnaṃ sotūnaṃ samussāhajananatthanti.
রতনত্তযপণামপযোজনং পন বহূহি পকারেহি ৰিত্থারযন্তি আচরিযা, তং তত্থ তত্থ ৰুত্তনযেনেৰ গহেতব্বং। ইধ পন গন্থগরুভাৰমোচনত্থং অট্ঠকথাচরিযেহি অধিপ্পেতপযোজনমেৰ কথযিম্হ। ৰুত্তঞ্হি অট্ঠকথাচরিযেন –
Ratanattayapaṇāmapayojanaṃ pana bahūhi pakārehi vitthārayanti ācariyā, taṃ tattha tattha vuttanayeneva gahetabbaṃ. Idha pana ganthagarubhāvamocanatthaṃ aṭṭhakathācariyehi adhippetapayojanameva kathayimha. Vuttañhi aṭṭhakathācariyena –
‘‘নিপচ্চকারস্সেতস্স ।
‘‘Nipaccakārassetassa ;
কতস্স রতনত্তযে।
Katassa ratanattaye;
আনুভাৰেন সোসেত্ৰা।
Ānubhāvena sosetvā;
অন্তরাযে অসেসতো’’তি॥ (ধ॰ স॰ অট্ঠ॰ গন্থারম্ভকথা ৭)।
Antarāye asesato’’ti. (dha. sa. aṭṭha. ganthārambhakathā 7);
অযমেত্থ সমুদাযত্থো, অযং পন অৰযৰত্থো – অহং সব্বপাণীনং সরণং সরণীভূতং ৰত্থুত্তযং নমস্সামি, নমস্সিত্ৰা যোগাৰচরভিক্খূনং ৰিনযে পাটৰত্থায অনেকত্থৰিপ্পকিণ্ণং পাল়িমুত্তৰিনিচ্ছযং একত্থ সমাহরিত্ৰা অনাকুলং কত্ৰা দস্সযিস্সং দস্সযিস্সামীতি যোজনা।
Ayamettha samudāyattho, ayaṃ pana avayavattho – ahaṃ sabbapāṇīnaṃ saraṇaṃ saraṇībhūtaṃ vatthuttayaṃ namassāmi, namassitvā yogāvacarabhikkhūnaṃ vinaye pāṭavatthāya anekatthavippakiṇṇaṃ pāḷimuttavinicchayaṃ ekattha samāharitvā anākulaṃ katvā dassayissaṃ dassayissāmīti yojanā.
তত্থ ৰসন্তি এত্থাতি ৰত্থু। কিং তং? বুদ্ধাদিরতনং। তঞ্হি যস্মা সরণগতা সপ্পুরিসা সরণগমনসমঙ্গিনো হুত্ৰা বুদ্ধাদিরতনং আরম্মণং কত্ৰা তস্মিং আরম্মণে ৰসন্তি আৰসন্তি নিৰসন্তি, তস্মা ‘‘ৰত্থূ’’তি ৰুচ্চতি। আরম্মণঞ্হি আধারো, আরম্মণিকং আধেয্যোতি। ইতো পরানিপি ৰত্থুসদ্দস্স ৰচনত্থাদীনি আচরিযেহি ৰুত্তানি, তানিপি তত্থ তত্থ ৰুত্তনযেনেৰ ৰেদিতব্বানি। ইধ পন গন্থৰিত্থারপরিহরণত্থং এত্তকমেৰ ৰুত্তন্তি ৰেদিতব্বন্তি। তিণ্ণং সমূহোতি তযং, তযো অংসা অৰযৰা অস্সাতি ৰা তযং। কিং তং? সমুদাযো। ৰত্থূনং তযন্তি ৰত্থুত্তযং। কিং তং? বুদ্ধাদিরতনত্তযং। নমস্সামীতি নমস্সিত্ৰা, অনমিন্তি নমস্সিত্ৰা। বুদ্ধাদিরতনঞ্হি আরম্মণং কত্ৰা চিত্তস্স উপ্পজ্জনকালে ত্ৰা-পচ্চযো পচ্চুপ্পন্নকালিকো হোতি, তস্মা পঠমো ৰিগ্গহো কতো, পাল়িমুত্তৰিনিচ্ছযং একত্থ দস্সনকালে অতীতকালিকো, তস্মা দুতিযো ৰিগ্গহো। তেনেৰ চ কারণেন অত্থযোজনাযপি পচ্চুপ্পন্নকালঅতীতকালৰসেন যোজনা কতা।
Tattha vasanti etthāti vatthu. Kiṃ taṃ? Buddhādiratanaṃ. Tañhi yasmā saraṇagatā sappurisā saraṇagamanasamaṅgino hutvā buddhādiratanaṃ ārammaṇaṃ katvā tasmiṃ ārammaṇe vasanti āvasanti nivasanti, tasmā ‘‘vatthū’’ti vuccati. Ārammaṇañhi ādhāro, ārammaṇikaṃ ādheyyoti. Ito parānipi vatthusaddassa vacanatthādīni ācariyehi vuttāni, tānipi tattha tattha vuttanayeneva veditabbāni. Idha pana ganthavitthārapariharaṇatthaṃ ettakameva vuttanti veditabbanti. Tiṇṇaṃ samūhoti tayaṃ, tayo aṃsā avayavā assāti vā tayaṃ. Kiṃ taṃ? Samudāyo. Vatthūnaṃ tayanti vatthuttayaṃ. Kiṃ taṃ? Buddhādiratanattayaṃ. Namassāmīti namassitvā, anaminti namassitvā. Buddhādiratanañhi ārammaṇaṃ katvā cittassa uppajjanakāle tvā-paccayo paccuppannakāliko hoti, tasmā paṭhamo viggaho kato, pāḷimuttavinicchayaṃ ekattha dassanakāle atītakāliko, tasmā dutiyo viggaho. Teneva ca kāraṇena atthayojanāyapi paccuppannakālaatītakālavasena yojanā katā.
সরতি হিংসতীতি সরণং। কিং তং? বুদ্ধাদিরতনত্তযং। তঞ্হি সরণগতানং সপ্পুরিসানং ভযং সন্তাসং দুক্খং দুগ্গতিৰিনিপাতং সংকিলেসং সরতি হিংসতি ৰিনাসেতি, তস্মা ‘‘সরণ’’ন্তি ৰুচ্চতি। ৰুত্তঞ্হি ভগৰতা –
Sarati hiṃsatīti saraṇaṃ. Kiṃ taṃ? Buddhādiratanattayaṃ. Tañhi saraṇagatānaṃ sappurisānaṃ bhayaṃ santāsaṃ dukkhaṃ duggativinipātaṃ saṃkilesaṃ sarati hiṃsati vināseti, tasmā ‘‘saraṇa’’nti vuccati. Vuttañhi bhagavatā –
‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতী’’তিআদি (অ॰ নি॰ ৬.১০; ১১.১১),
‘‘Yasmiṃ, mahānāma, samaye ariyasāvako tathāgataṃ anussarati, nevassa tasmiṃ samaye rāgapariyuṭṭhitaṃ cittaṃ hotī’’tiādi (a. ni. 6.10; 11.11),
‘‘এৰং বুদ্ধং সরন্তানং।
‘‘Evaṃ buddhaṃ sarantānaṃ;
ধম্মং সঙ্ঘঞ্চ ভিক্খৰো।
Dhammaṃ saṅghañca bhikkhavo;
ভযং ৰা ছম্ভিতত্তং ৰা।
Bhayaṃ vā chambhitattaṃ vā;
লোমহংসো ন হেস্সতী’’তি চ॥ (সং॰ নি॰ ১.২৪৯)।
Lomahaṃso na hessatī’’ti ca. (saṃ. ni. 1.249);
যস্মা পন ‘‘সরণ’’ন্তি ইদং পদং ‘‘নাথ’’ন্তি পদস্স ৰেৰচনভূতং কিতসুদ্ধনামপদং হোতি, ন কিতমত্তপদং, তস্মা ধাত্ৰত্থো অন্তোনীতো। ‘‘সর হিংসায’’ন্তি হি ৰুত্তং হিংসত্থং গহেত্ৰা সব্বপাণীনং সরণং হিংসকং ৰত্থুত্তযং নমস্সিত্ৰা ৰিঞ্ঞাযমানে অনিট্ঠপ্পসঙ্গতো সব্বপাণীনং সরণং সরণীভূতং নাথভূতং ৰত্থুত্তযং নমস্সিত্ৰাতি ৰিঞ্ঞাযমানেযেৰ যুজ্জতি, তেনেৰ চ কারণেন অত্থযোজনাযম্পি তথা যোজনা কতা। সব্ব-সদ্দো নিরৰসেসত্থৰাচকং সব্বনামপদং। সহ অৰেন যো ৰত্ততীতি সব্বোতি কতে পন সকল-সদ্দো ৰিয সমুদাযৰাচকং সমাসনামপদং হোতি। পাণো এতেসং অত্থীতি পাণিনো, পাণোতি চেত্থ জীৰিতিন্দ্রিযং অধিপ্পেতং। সব্বে পাণিনো সব্বপাণিনো, তেসং সব্বপাণীনং। এত্তাৰতা ৰত্থুত্তযস্স সব্বলোকসরণভাৰং, ততোযেৰ চ নমস্সনারহভাৰং, নমস্সনারহে চ কতাযনমস্সনকিরিযায যথাধিপ্পেতত্থসিদ্ধিকরভাৰং, অত্তনো কিরিযায চ খেত্তঙ্গতভাৰং দস্সেতি।
Yasmā pana ‘‘saraṇa’’nti idaṃ padaṃ ‘‘nātha’’nti padassa vevacanabhūtaṃ kitasuddhanāmapadaṃ hoti, na kitamattapadaṃ, tasmā dhātvattho antonīto. ‘‘Sara hiṃsāya’’nti hi vuttaṃ hiṃsatthaṃ gahetvā sabbapāṇīnaṃ saraṇaṃ hiṃsakaṃ vatthuttayaṃ namassitvā viññāyamāne aniṭṭhappasaṅgato sabbapāṇīnaṃ saraṇaṃ saraṇībhūtaṃ nāthabhūtaṃ vatthuttayaṃ namassitvāti viññāyamāneyeva yujjati, teneva ca kāraṇena atthayojanāyampi tathā yojanā katā. Sabba-saddo niravasesatthavācakaṃ sabbanāmapadaṃ. Saha avena yo vattatīti sabboti kate pana sakala-saddo viya samudāyavācakaṃ samāsanāmapadaṃ hoti. Pāṇo etesaṃ atthīti pāṇino, pāṇoti cettha jīvitindriyaṃ adhippetaṃ. Sabbe pāṇino sabbapāṇino, tesaṃ sabbapāṇīnaṃ. Ettāvatā vatthuttayassa sabbalokasaraṇabhāvaṃ, tatoyeva ca namassanārahabhāvaṃ, namassanārahe ca katāyanamassanakiriyāya yathādhippetatthasiddhikarabhāvaṃ, attano kiriyāya ca khettaṅgatabhāvaṃ dasseti.
এৰং সহেতুকং রতনত্তযপণামং দস্সেত্ৰা ইদানি পকরণারম্ভস্স সনিমিত্তং মুখ্যপযোজনং দস্সেতুমাহ ‘‘ৰিনযে পাটৰত্থায, যোগাৰচরভিক্খূন’’ন্তি। এত্থ চ ৰিনযে পাটৰত্থাযাতি মুখ্যপযোজনদস্সনং, তংদস্সনেন চ অনুসঙ্গিকপযোজনম্পি ৰিভাৰিতমেৰ হোতি কারণে সিদ্ধে কারিযস্স সিজ্ঝনতো। যোগাৰচরভিক্খূনন্তি বাহিরনিমিত্তদস্সনং, তস্মিং দস্সিতে অজ্ঝত্তিকনিমিত্তম্পি দীপিতমেৰ হোতি আরম্মণে ঞাতে আরম্মণিকস্স ঞাতব্বতো। তত্থ ৰিৰিধা নযা এত্থাতি ৰিনযো, দুৰিধপাতিমোক্খদুৰিধৰিভঙ্গপঞ্চৰিধপাতিমোক্খুদ্দেসপঞ্চআপত্তিক্খন্ধসত্তআপত্তিক্খন্ধাদযো ৰিৰিধা অনেকপ্পকারা নযা এত্থ সন্তীতি অত্থো। অথ ৰা ৰিসেসা নযা এত্থাতি ৰিনযো, দল়্হীকম্মসিথিলকরণপযোজনা অনুপঞ্ঞত্তিনযাদযো ৰিসেসা নযা এত্থ সন্তীতি অত্থো। অথ ৰা ৰিনেতীতি ৰিনযো। কাযো ৰিনেতি কাযৰাচাযো, ইতি কাযৰাচানং ৰিনযনতো ৰিনযো। ৰুত্তঞ্হি অট্ঠকথাযং –
Evaṃ sahetukaṃ ratanattayapaṇāmaṃ dassetvā idāni pakaraṇārambhassa sanimittaṃ mukhyapayojanaṃ dassetumāha ‘‘vinayepāṭavatthāya, yogāvacarabhikkhūna’’nti. Ettha ca vinaye pāṭavatthāyāti mukhyapayojanadassanaṃ, taṃdassanena ca anusaṅgikapayojanampi vibhāvitameva hoti kāraṇe siddhe kāriyassa sijjhanato. Yogāvacarabhikkhūnanti bāhiranimittadassanaṃ, tasmiṃ dassite ajjhattikanimittampi dīpitameva hoti ārammaṇe ñāte ārammaṇikassa ñātabbato. Tattha vividhā nayā etthāti vinayo, duvidhapātimokkhaduvidhavibhaṅgapañcavidhapātimokkhuddesapañcaāpattikkhandhasattaāpattikkhandhādayo vividhā anekappakārā nayā ettha santīti attho. Atha vā visesā nayā etthāti vinayo, daḷhīkammasithilakaraṇapayojanā anupaññattinayādayo visesā nayā ettha santīti attho. Atha vā vinetīti vinayo. Kāyo vineti kāyavācāyo, iti kāyavācānaṃ vinayanato vinayo. Vuttañhi aṭṭhakathāyaṃ –
‘‘ৰিৰিধৰিসেসনযত্তা ।
‘‘Vividhavisesanayattā ;
ৰিনযনতো চেৰ কাযৰাচানং।
Vinayanato ceva kāyavācānaṃ;
ৰিনযত্থৰিদূহি অযং।
Vinayatthavidūhi ayaṃ;
ৰিনযো ‘ৰিনযো’তি অক্খাতো’’তি॥ (পারা॰ অট্ঠ॰ ১.পঠমমহাসঙ্গীতিকথা; ধ॰ স॰ অট্ঠ॰ নিদানকথা; দী॰ নি॰ অট্ঠ॰ ১.পঠমমহাসঙ্গীতিকথা)।
Vinayo ‘vinayo’ti akkhāto’’ti. (pārā. aṭṭha. 1.paṭhamamahāsaṅgītikathā; dha. sa. aṭṭha. nidānakathā; dī. ni. aṭṭha. 1.paṭhamamahāsaṅgītikathā);
কো সো? ৰিনযপিটকং। তস্মিং ৰিনযে। পটতি ৰিযত্তভাৰং গচ্ছতীতি পটু। কো সো? পণ্ডিতো। পটুনো ভাৰো পাটৰং। কিং তং? ঞাণং। অসতি কারণানুরূপং ভৰতীতি অত্থো। কো সো? পযোজনং। পাটৰমেৰ অত্থো পাটৰত্থো, তস্স পাটৰত্থায, ৰিনযপিটকে কোসল্লঞাণপযোজনাযাতি ৰুত্তং হোতি। যুঞ্জনং যোগো, কম্মট্ঠানমনসিকারো। অৰচরন্তীতি অৰচরা, যোগে অৰচরা যোগাৰচরা, কম্মট্ঠানিকা ভিক্খূ। সংসারে ভযং ইক্খন্তীতি ভিক্খূ, যোগাৰচরা চ তে ভিক্খূ চাতি যোগাৰচরভিক্খূ, তেসং যোগাৰচরভিক্খূনং। এতেন ৰিনযে পটুভাৰো নাম ভিক্খূনংযেৰ অত্থো হোতি, ন গহট্ঠতাপসপরিব্বাজকাদীনং। ভিক্খূসু চ কম্মট্ঠানে নিযুত্তানং লজ্জিপেসলভিক্খূনংযেৰ, ন ৰিস্সট্ঠকম্মট্ঠানানং অলজ্জিভিক্খূনন্তি ইমমত্থং দস্সেতি।
Ko so? Vinayapiṭakaṃ. Tasmiṃ vinaye. Paṭati viyattabhāvaṃ gacchatīti paṭu. Ko so? Paṇḍito. Paṭuno bhāvo pāṭavaṃ. Kiṃ taṃ? Ñāṇaṃ. Asati kāraṇānurūpaṃ bhavatīti attho. Ko so? Payojanaṃ. Pāṭavameva attho pāṭavattho, tassa pāṭavatthāya, vinayapiṭake kosallañāṇapayojanāyāti vuttaṃ hoti. Yuñjanaṃ yogo, kammaṭṭhānamanasikāro. Avacarantīti avacarā, yoge avacarā yogāvacarā, kammaṭṭhānikā bhikkhū. Saṃsāre bhayaṃ ikkhantīti bhikkhū, yogāvacarā ca te bhikkhū cāti yogāvacarabhikkhū, tesaṃ yogāvacarabhikkhūnaṃ. Etena vinaye paṭubhāvo nāma bhikkhūnaṃyeva attho hoti, na gahaṭṭhatāpasaparibbājakādīnaṃ. Bhikkhūsu ca kammaṭṭhāne niyuttānaṃ lajjipesalabhikkhūnaṃyeva, na vissaṭṭhakammaṭṭhānānaṃ alajjibhikkhūnanti imamatthaṃ dasseti.
এৰং পকরণারম্ভস্স সনিমিত্তং পযোজনং দস্সেত্ৰা ইদানি সহেতুকং অভিধেয্যং দস্সেতুং ‘‘ৰিপ্পকিণ্ণমনেকত্থ, পাল়িমুত্তৰিনিচ্ছয’’ন্তি আহ। তত্থ ৰিপ্পকিণ্ণং অনেকত্থাতি ইমিনা পকরণারম্ভস্স হেতুং দস্সেতি হেতুমন্তৰিসেসনত্তা, ইমস্স অনেকত্থৰিপ্পকিণ্ণত্তাযেৰ আচরিযস্স আরম্ভো হোতি, ন অৰিপ্পকিণ্ণে সতি। ৰক্খতি হি ‘‘সমাহরিত্ৰা একত্থ দস্সযিস্স’’ন্তি (ৰি॰ সঙ্গ॰ অট্ঠ॰ গন্থারম্ভকথা)। পাল়িমুত্তৰিনিচ্ছযন্তি ইমিনা পকরণাভিধেয্যং। তত্থ কিরতি ৰিক্খিপতীতি কিণ্ণো, পকারেন কিণ্ণো পকিণ্ণো, ৰিৰিধেন পকিণ্ণো ৰিপ্পকিণ্ণো। কো সো? পাল়িমুত্তৰিনিচ্ছযো, তং ৰিপ্পকিণ্ণং।
Evaṃ pakaraṇārambhassa sanimittaṃ payojanaṃ dassetvā idāni sahetukaṃ abhidheyyaṃ dassetuṃ ‘‘vippakiṇṇamanekattha, pāḷimuttavinicchaya’’nti āha. Tattha vippakiṇṇaṃ anekatthāti iminā pakaraṇārambhassa hetuṃ dasseti hetumantavisesanattā, imassa anekatthavippakiṇṇattāyeva ācariyassa ārambho hoti, na avippakiṇṇe sati. Vakkhati hi ‘‘samāharitvā ekattha dassayissa’’nti (vi. saṅga. aṭṭha. ganthārambhakathā). Pāḷimuttavinicchayanti iminā pakaraṇābhidheyyaṃ. Tattha kirati vikkhipatīti kiṇṇo, pakārena kiṇṇo pakiṇṇo, vividhena pakiṇṇo vippakiṇṇo. Ko so? Pāḷimuttavinicchayo, taṃ vippakiṇṇaṃ.
অনেকত্থাতি এত্থ সঙ্খ্যাৰাচকো সব্বনামিকো এক-সদ্দো, ন একো অনেকে। বহ্ৰত্থৰাচকো অনেকসদ্দো। একন্তএকৰচনন্তোপি এক-সদ্দো ন-ইতিনিপাতেন যুত্তত্তা বহুৰচনন্তো জাতোতি। তত্থ অনেকত্থ বহূসূতি অত্থো, পারাজিককণ্ডট্ঠকথাদীসু অনেকেসু পকরণেসূতি ৰুত্তং হোতি। পোরাণটীকাযং পন অনেকত্থাতি অনেকেসু সিক্খাপদপদেসেসূতি অত্থো দস্সিতো, এৰঞ্চ সতি উপরি ‘‘সমাহরিত্ৰা একত্থা’’তি ৰক্খমানত্তা ‘‘অনেকত্থৰিপ্পকিণ্ণং একত্থ সমাহরিত্ৰা’’তি ইমেসং পদানং সহযোগীভূতত্তা অনেকেসু সিক্খাপদপদেসেসু ৰিপ্পকিণ্ণং একস্মিং সিক্খাপদপদেসে সমাহরিত্ৰাতি অত্থো ভৰেয্য, সো চ অত্থো অযুত্তো। কস্মা? অনেকেসু পকরণেসু ৰিপ্পকিণ্ণং একস্মিং পকরণে সমাহরিত্ৰাতি অত্থো অম্হেহি ৰুত্তো। অথ পন ‘‘একত্থা’’তি ইমস্স ‘‘একতো’’তি অত্থং ৰিকপ্পেত্ৰা অনেকেসু সিক্খাপদপদেসেসু ৰিপ্পকিণ্ণং একতো সমাহরিত্ৰাতি অত্থং গণ্হেয্য, সো অত্থো যুত্তো ভৰেয্য।
Anekatthāti ettha saṅkhyāvācako sabbanāmiko eka-saddo, na eko aneke. Bahvatthavācako anekasaddo. Ekantaekavacanantopi eka-saddo na-itinipātena yuttattā bahuvacananto jātoti. Tattha anekattha bahūsūti attho, pārājikakaṇḍaṭṭhakathādīsu anekesu pakaraṇesūti vuttaṃ hoti. Porāṇaṭīkāyaṃ pana anekatthāti anekesu sikkhāpadapadesesūti attho dassito, evañca sati upari ‘‘samāharitvā ekatthā’’ti vakkhamānattā ‘‘anekatthavippakiṇṇaṃ ekattha samāharitvā’’ti imesaṃ padānaṃ sahayogībhūtattā anekesu sikkhāpadapadesesu vippakiṇṇaṃ ekasmiṃ sikkhāpadapadese samāharitvāti attho bhaveyya, so ca attho ayutto. Kasmā? Anekesu pakaraṇesu vippakiṇṇaṃ ekasmiṃ pakaraṇe samāharitvāti attho amhehi vutto. Atha pana ‘‘ekatthā’’ti imassa ‘‘ekato’’ti atthaṃ vikappetvā anekesu sikkhāpadapadesesu vippakiṇṇaṃ ekato samāharitvāti atthaṃ gaṇheyya, so attho yutto bhaveyya.
পকট্ঠানং আল়ীতি পাল়ি, উত্তমানং ৰচনানং অনুক্কমোতি অত্থো। অথ ৰা অত্তত্থপরত্থাদিভেদং অত্থং পালেতি রক্খতীতি পাল়ি, লল়ানমৰিসেসো। কা সা? ৰিনযতন্তি। মুচ্চতীতি মুত্তো, পাল়িতো মুত্তো পাল়িমুত্তো। ছিন্দিযতে অনেনাতি ছযো, নীহরিত্ৰা ছযো নিচ্ছযো, ৰিসেসেন নিচ্ছযো ৰিনিচ্ছযো, খিলমদ্দনাকারেন পৰত্তো সদ্দনযো অত্থনযো চ। পাল়িমুত্তো চ সো ৰিনিচ্ছযো চাতি পাল়িমুত্তৰিনিচ্ছযো, তং পাল়িমুত্তৰিনিচ্ছযং। ইদঞ্চ ‘‘আনগরা খদিরৰন’’ন্তিআদীসু ৰিয যেভুয্যনযৰসেন ৰুত্তং কত্থচি পাল়িৰিনিচ্ছযস্সপি দিস্সনতো। পোরাণটীকাযং পন পাল়িৰিনিচ্ছযো চ পাল়িমুত্তৰিনিচ্ছযো চ পাল়িমুত্তৰিনিচ্ছযোতি এৰং একদেসসরূপেকসেসৰসেন ৰা এতং ৰুত্তন্তি দট্ঠব্বন্তি দুতিযনযোপি ৰুত্তো, এৰঞ্চ সতি পাল়িৰিনিচ্ছযপাল়িমুত্তৰিনিচ্ছযেহি অঞ্ঞস্স ৰিনিচ্ছযস্স অভাৰা কিমেতেন গন্থগরুকরেন পাল়িমুত্তগ্গহণেন। ৰিসেসনঞ্হি সম্ভৰব্যভিচারে চ সতি সাত্থকং সিযাতি পঠমনযোৰ আরাধনীযো হোতি।
Pakaṭṭhānaṃ āḷīti pāḷi, uttamānaṃ vacanānaṃ anukkamoti attho. Atha vā attatthaparatthādibhedaṃ atthaṃ pāleti rakkhatīti pāḷi, laḷānamaviseso. Kā sā? Vinayatanti. Muccatīti mutto, pāḷito mutto pāḷimutto. Chindiyate anenāti chayo, nīharitvā chayo nicchayo, visesena nicchayo vinicchayo, khilamaddanākārena pavatto saddanayo atthanayo ca. Pāḷimutto ca so vinicchayo cāti pāḷimuttavinicchayo, taṃ pāḷimuttavinicchayaṃ. Idañca ‘‘ānagarā khadiravana’’ntiādīsu viya yebhuyyanayavasena vuttaṃ katthaci pāḷivinicchayassapi dissanato. Porāṇaṭīkāyaṃ pana pāḷivinicchayo ca pāḷimuttavinicchayo ca pāḷimuttavinicchayoti evaṃ ekadesasarūpekasesavasena vā etaṃ vuttanti daṭṭhabbanti dutiyanayopi vutto, evañca sati pāḷivinicchayapāḷimuttavinicchayehi aññassa vinicchayassa abhāvā kimetena ganthagarukarena pāḷimuttaggahaṇena. Visesanañhi sambhavabyabhicāre ca sati sātthakaṃ siyāti paṭhamanayova ārādhanīyo hoti.
এৰং সহেতুকং অভিধেয্যং দস্সেত্ৰা ইদানি করণপ্পকারং দস্সেতি ‘‘সমাহরিত্ৰা’’তিআদিনা। দুৰিধো হেত্থ করণপ্পকারো একত্থসমাহরণঅনাকুলকরণৰসেন। সো দুৰিধোপি তেন পকারেন পকরণস্স কতত্তা ‘‘করণপ্পকারো’’তি ৰুচ্চতি। তত্থ সমাহরিস্সামীতি সমাহরিত্ৰা, সং-সদ্দো সঙ্খেপত্থো, তস্মা সঙ্খিপিয আহরিস্সামীতি অত্থো। অনাগতকালিকৰসেন পচ্চমানেন ‘‘দস্সযিস্স’’ন্তি পদেন সমানকালত্তা অনাগতকালিকো ইধ ত্ৰা-পচ্চযো ৰুত্তো। একত্থাতি একস্মিং ইধ ৰিনযসঙ্গহপ্পকরণে। একত্থাতি ৰা একতো। দস্সযিস্সন্তি দস্সযিস্সামি, ঞাপযিস্সামীতি অত্থো। আকুলতি ব্যাকুলতীতি আকুলো, ন আকুলো অনাকুলো, পুব্বাপরব্যাকিণ্ণৰিরহিতো পাল়িমুত্তৰিনিচ্ছযো। অনাকুলন্তি পন ভাৰনপুংসকং, তস্মা করধাতুমযেন কত্ৰাসদ্দেন যোজেত্ৰা দস্সনকিরিযায সম্বন্ধিতব্বং।
Evaṃ sahetukaṃ abhidheyyaṃ dassetvā idāni karaṇappakāraṃ dasseti ‘‘samāharitvā’’tiādinā. Duvidho hettha karaṇappakāro ekatthasamāharaṇaanākulakaraṇavasena. So duvidhopi tena pakārena pakaraṇassa katattā ‘‘karaṇappakāro’’ti vuccati. Tattha samāharissāmīti samāharitvā, saṃ-saddo saṅkhepattho, tasmā saṅkhipiya āharissāmīti attho. Anāgatakālikavasena paccamānena ‘‘dassayissa’’nti padena samānakālattā anāgatakāliko idha tvā-paccayo vutto. Ekatthāti ekasmiṃ idha vinayasaṅgahappakaraṇe. Ekatthāti vā ekato. Dassayissanti dassayissāmi, ñāpayissāmīti attho. Ākulati byākulatīti ākulo, na ākulo anākulo, pubbāparabyākiṇṇavirahito pāḷimuttavinicchayo. Anākulanti pana bhāvanapuṃsakaṃ, tasmā karadhātumayena katvāsaddena yojetvā dassanakiriyāya sambandhitabbaṃ.
এৰং রতনত্তযপণামাদিকং পুব্বকরণং দস্সেত্ৰা ইদানি যে পাল়িমুত্তৰিনিচ্ছযে দস্সেতুকামো, তেসং অনুক্কমকরণত্থং মাতিকং ঠপেন্তো ‘‘তত্রাযং মাতিকা’’তিআদিমাহ। মাতিকায হি অসতি দস্সিতৰিনিচ্ছযা ৰিকিরন্তি ৰিধংসেন্তি যথা তং সুত্তেন অসঙ্গহিতানি পুপ্ফানি। সন্তিযা পন মাতিকায দস্সিতৰিনিচ্ছযা ন ৰিকিরন্তি ন ৰিধংসেন্তি যথা তং সুত্তেন সঙ্গহিতানি পুপ্ফানি। তং তং অত্থং জানিতুকামেহি মাতিকানুসারেন গন্ত্ৰা ইচ্ছিতিচ্ছিতৰিনিচ্ছযং পত্ৰা সো সো অত্থো জানিতব্বো হোতি, তস্মা সুখগ্গহণত্থং মাতিকা ঠপিতা। তত্থ তত্রাতি তস্মিং পাল়িমুত্তৰিনিচ্ছযে। অযন্তি অযং মযা ৰক্খমানা। মাতা ৰিযাতি মাতিকা। যথা হি পুত্তা মাতিতো পভৰন্তি, এৰং নিদ্দেসপদানি উদ্দেসতো পভৰন্তি, তস্মা উদ্দেসো মাতিকা ৰিযাতি ‘‘মাতিকা’’তি ৰুচ্চতি।
Evaṃ ratanattayapaṇāmādikaṃ pubbakaraṇaṃ dassetvā idāni ye pāḷimuttavinicchaye dassetukāmo, tesaṃ anukkamakaraṇatthaṃ mātikaṃ ṭhapento ‘‘tatrāyaṃ mātikā’’tiādimāha. Mātikāya hi asati dassitavinicchayā vikiranti vidhaṃsenti yathā taṃ suttena asaṅgahitāni pupphāni. Santiyā pana mātikāya dassitavinicchayā na vikiranti na vidhaṃsenti yathā taṃ suttena saṅgahitāni pupphāni. Taṃ taṃ atthaṃ jānitukāmehi mātikānusārena gantvā icchiticchitavinicchayaṃ patvā so so attho jānitabbo hoti, tasmā sukhaggahaṇatthaṃ mātikā ṭhapitā. Tattha tatrāti tasmiṃ pāḷimuttavinicchaye. Ayanti ayaṃ mayā vakkhamānā. Mātā viyāti mātikā. Yathā hi puttā mātito pabhavanti, evaṃ niddesapadāni uddesato pabhavanti, tasmā uddeso mātikā viyāti ‘‘mātikā’’ti vuccati.
দিৰাসেয্যাতিআদীসু দিৰাসেয্যা দিৰাসেয্যৰিনিচ্ছযকথা। পরিক্খারো পরিক্খারৰিনিচ্ছযকথা…পে॰… পকিণ্ণকং পকিণ্ণকৰিনিচ্ছযকথাতি যোজনা। তেনেৰ ৰক্খতি ‘‘দিৰাসযনৰিনিচ্ছযকথা সমত্তা’’তিআদি। ইতি-সদ্দো ইদমত্থো ৰা নিদস্সনত্থো ৰা পরিসমাপনত্থো ৰা। তেসু ইদমত্থে কা সা? দিৰাসেয্যা…পে॰… পকিণ্ণকং ইতি অযন্তি। নিদস্সনত্থে কথং সা? দিৰাসেয্যা…পে॰… পকিণ্ণকং ইতি দট্ঠব্বাতি। পরিসমাপনত্থে সা কিত্তকেন পরিসমত্তা? দিৰাসেয্যা…পে॰… পকিণ্ণকং ইতি এত্তকেন পরিসমত্তাতি অত্থো। ইমেসং পন দিৰাসেয্যাদিপদানং ৰাক্যৰিগ্গহং কত্ৰা অত্থে ইধ ৰুচ্চমানে অতিপপঞ্চো ভৰিস্সতি, সোতূনঞ্চ দুস্সল্লক্খণীযো, তস্মা তস্স তস্স নিদ্দেসস্স আদিম্হিযেৰ যথানুরূপং ৰক্খাম।
Divāseyyātiādīsu divāseyyā divāseyyavinicchayakathā. Parikkhāro parikkhāravinicchayakathā…pe… pakiṇṇakaṃ pakiṇṇakavinicchayakathāti yojanā. Teneva vakkhati ‘‘divāsayanavinicchayakathā samattā’’tiādi. Iti-saddo idamattho vā nidassanattho vā parisamāpanattho vā. Tesu idamatthe kā sā? Divāseyyā…pe… pakiṇṇakaṃ iti ayanti. Nidassanatthe kathaṃ sā? Divāseyyā…pe… pakiṇṇakaṃ iti daṭṭhabbāti. Parisamāpanatthe sā kittakena parisamattā? Divāseyyā…pe… pakiṇṇakaṃ iti ettakena parisamattāti attho. Imesaṃ pana divāseyyādipadānaṃ vākyaviggahaṃ katvā atthe idha vuccamāne atipapañco bhavissati, sotūnañca dussallakkhaṇīyo, tasmā tassa tassa niddesassa ādimhiyeva yathānurūpaṃ vakkhāma.
গন্থারম্ভকথাৰণ্ণনা নিট্ঠিতা।
Ganthārambhakathāvaṇṇanā niṭṭhitā.
