| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
куд̣̇д̣̇аганигааяз
Khuddakanikāye
ид̇ивуд̇д̇ага-адтагат̇аа
Itivuttaka-aṭṭhakathā
г̇ант̇аарамбхагат̇аа
Ganthārambhakathā
махаагаарун̣игам̣ наат̇ам̣, н̃зяяасааг̇арабаараг̇ум̣;
Mahākāruṇikaṃ nāthaṃ, ñeyyasāgarapāraguṃ;
ванд̣̇з нибун̣аг̇амбхийра-вижид̇ранаяад̣̇зсанам̣.
Vande nipuṇagambhīra-vicitranayadesanaṃ.
виж̇ж̇аажаран̣асамбаннаа, язна нияяанд̇и логад̇о;
Vijjācaraṇasampannā, yena niyyanti lokato;
ванд̣̇з д̇амуд̇д̇амам̣ д̇хаммам̣, саммаасамб̣уд̣̇д̇хабууж̇ид̇ам̣.
Vande tamuttamaṃ dhammaṃ, sammāsambuddhapūjitaṃ.
сийлаад̣̇иг̇ун̣асамбанно, тид̇о маг̇г̇апалзсу яо;
Sīlādiguṇasampanno, ṭhito maggaphalesu yo;
ванд̣̇з арияасан̇гхам̣ д̇ам̣, бун̃н̃агкзд̇д̇ам̣ ануд̇д̇арам̣.
Vande ariyasaṅghaṃ taṃ, puññakkhettaṃ anuttaraṃ.
ванд̣̇анааж̇анид̇ам̣ бун̃н̃ам̣, ид̇и яам̣ рад̇анад̇д̇аяз;
Vandanājanitaṃ puññaṃ, iti yaṃ ratanattaye;
хад̇анд̇арааяо саб̣б̣ад̇т̇а, худ̇ваахам̣ д̇асса д̇зж̇асаа.
Hatantarāyo sabbattha, hutvāhaṃ tassa tejasā.
згагаад̣̇иббабхзд̣̇зна , д̣̇зсид̇аани махзсинаа;
Ekakādippabhedena , desitāni mahesinā;
лобхаад̣̇ийнам̣ бахаанаани, д̣̇ийбанаани висзсад̇о.
Lobhādīnaṃ pahānāni, dīpanāni visesato.
суд̇д̇аани згад̇о гад̇ваа, ид̇ивуд̇д̇абад̣̇агкарам̣;
Suttāni ekato katvā, itivuttapadakkharaṃ;
д̇хаммасан̇г̇аахагаа т̇зраа, сан̇г̇ааяим̣су махзсаяо.
Dhammasaṅgāhakā therā, saṅgāyiṃsu mahesayo.
ид̇ивуд̇д̇агамижжзва, наамзна васино бурз;
Itivuttakamicceva, nāmena vasino pure;
яам̣ куд̣̇д̣̇аганигааяасмим̣, г̇амбхийрад̇т̇абад̣̇аггамам̣.
Yaṃ khuddakanikāyasmiṃ, gambhīratthapadakkamaṃ.
д̇асса г̇амбхийран̃аан̣зхи, ог̇аахзд̇аб̣б̣абхаавад̇о;
Tassa gambhīrañāṇehi, ogāhetabbabhāvato;
гин̃жааби д̣̇уггараа гаад̇ум̣, ад̇т̇асам̣ван̣н̣анаа маяаа.
Kiñcāpi dukkarā kātuṃ, atthasaṃvaṇṇanā mayā.
сахасам̣ван̣н̣анам̣ яасмаа, д̇харад̇з сад̇т̇у саасанам̣;
Sahasaṃvaṇṇanaṃ yasmā, dharate satthu sāsanaṃ;
буб̣б̣аажарияасийхаанам̣, д̇идтад̇зва винижчаяо.
Pubbācariyasīhānaṃ, tiṭṭhateva vinicchayo.
д̇асмаа д̇ам̣ аваламб̣ид̇ваа, ог̇аахзд̇ваана бан̃жаби;
Tasmā taṃ avalambitvā, ogāhetvāna pañcapi;
нигааяз убаниссааяа, бораан̣адтагат̇аанаяам̣.
Nikāye upanissāya, porāṇaṭṭhakathānayaṃ.
ниссид̇ам̣ ваажанаамаг̇г̇ам̣, сувисуд̣̇д̇хам̣ анаагулам̣;
Nissitaṃ vācanāmaggaṃ, suvisuddhaṃ anākulaṃ;
махаавихаараваасийнам̣, нибун̣ад̇т̇авинижчаяам̣.
Mahāvihāravāsīnaṃ, nipuṇatthavinicchayaṃ.
бунаббунааг̇ад̇ам̣ ад̇т̇ам̣, важ̇ж̇аяид̇ваана саад̇хугам̣;
Punappunāgataṃ atthaṃ, vajjayitvāna sādhukaṃ;
яат̇ааб̣алам̣ гариссаами, ид̇ивуд̇д̇агаван̣н̣анам̣.
Yathābalaṃ karissāmi, itivuttakavaṇṇanaṃ.
ид̇и ааган̇камаанасса, сад̣̇д̇хаммасса жирадтид̇им̣;
Iti ākaṅkhamānassa, saddhammassa ciraṭṭhitiṃ;
вибхаж̇анд̇асса д̇ассад̇т̇ам̣, нисаамаяат̇а саад̇хавод̇и.
Vibhajantassa tassatthaṃ, nisāmayatha sādhavoti.
д̇ад̇т̇а ид̇ивуд̇д̇агам̣ наама згаганибаад̇о, д̣̇уганибаад̇о, д̇иганибаад̇о, жад̇угганибаад̇од̇и жад̇унибаад̇асан̇г̇ахам̣. д̇амби винаяабидагам̣, суд̇д̇анд̇абидагам̣, абхид̇хаммабидаганд̇и д̇ийсу бидагзсу суд̇д̇анд̇абидагабарияаабаннам̣; д̣̇ийгханигааяо маж̇жхиманигааяо, сам̣яуд̇д̇анигааяо, ан̇г̇уд̇д̇аранигааяо, куд̣̇д̣̇аганигааяод̇и бан̃жасу нигааязсу куд̣̇д̣̇аганигааяабарияаабаннам̣; суд̇д̇ам̣, г̇зяяам̣, взяяаагаран̣ам̣, г̇аат̇аа, уд̣̇аанам̣, ид̇ивуд̇д̇агам̣, ж̇аад̇агам̣, аб̣бхуд̇ад̇хаммам̣, взд̣̇алланд̇и навасу саасанан̇г̇зсу ид̇ивуд̇д̇аган̇г̇абхууд̇ам̣.
Tattha itivuttakaṃ nāma ekakanipāto, dukanipāto, tikanipāto, catukkanipātoti catunipātasaṅgahaṃ. Tampi vinayapiṭakaṃ, suttantapiṭakaṃ, abhidhammapiṭakanti tīsu piṭakesu suttantapiṭakapariyāpannaṃ; dīghanikāyo majjhimanikāyo, saṃyuttanikāyo, aṅguttaranikāyo, khuddakanikāyoti pañcasu nikāyesu khuddakanikāyapariyāpannaṃ; suttaṃ, geyyaṃ, veyyākaraṇaṃ, gāthā, udānaṃ, itivuttakaṃ, jātakaṃ, abbhutadhammaṃ, vedallanti navasu sāsanaṅgesu itivuttakaṅgabhūtaṃ.
‘‘д̣̇ваасийд̇и б̣уд̣̇д̇хад̇о г̇ан̣хим̣, д̣̇взсахассаани бхигкуд̇о;
‘‘Dvāsīti buddhato gaṇhiṃ, dvesahassāni bhikkhuto;
жад̇ураасийд̇и сахассаани, яз мз д̇хаммаа бавад̇д̇ино’’д̇и. (т̇зраг̇аа. 1027) –
Caturāsīti sahassāni, ye me dhammā pavattino’’ti. (theragā. 1027) –
звам̣ д̇хаммабхан̣д̣ааг̇ааригзна бадин̃н̃аад̇зсу жад̇ураасийд̇ияаа д̇хаммагканд̇хасахассзсу гад̇ибаяад̇хаммагканд̇хасан̇г̇ахам̣. суд̇д̇ад̇о згаганибаад̇з д̇аава сад̇д̇авийсад̇и суд̇д̇аани, д̣̇уганибаад̇з д̣̇ваавийсад̇и, д̇иганибаад̇з бан̃н̃ааса, жад̇угганибаад̇з д̇зрасаад̇и д̣̇ваад̣̇асаад̇хигасуд̇д̇асад̇асан̇г̇ахам̣. д̇асса нибаад̇зсу згаганибаад̇о аад̣̇и, ваг̇г̇зсу баадибхог̇аваг̇г̇о, суд̇д̇зсу лобхасуд̇д̇ам̣. д̇ассааби ‘‘вуд̇д̇ан̃хзд̇ам̣ бхаг̇авад̇аа’’д̇иаад̣̇игам̣ ааяасмад̇аа аананд̣̇зна батамамахаасан̇г̇ийд̇игаалз вуд̇д̇ам̣ нид̣̇аанамаад̣̇и. саа банааяам̣ батамамахаасан̇г̇ийд̇и винаяабидагз д̇анд̇имаарул̣хаа зва. яо банзд̇т̇а нид̣̇аанагосаллад̇т̇ам̣ вад̇д̇аб̣б̣о гат̇аамаг̇г̇о , соби суман̇г̇алавилаасинияаа д̣̇ийгханигааяа-адтагат̇ааяа вид̇т̇аарад̇о вуд̇д̇оязваад̇и д̇ад̇т̇а вуд̇д̇анаязнзва взд̣̇ид̇аб̣б̣о.
Evaṃ dhammabhaṇḍāgārikena paṭiññātesu caturāsītiyā dhammakkhandhasahassesu katipayadhammakkhandhasaṅgahaṃ. Suttato ekakanipāte tāva sattavīsati suttāni, dukanipāte dvāvīsati, tikanipāte paññāsa, catukkanipāte terasāti dvādasādhikasuttasatasaṅgahaṃ. Tassa nipātesu ekakanipāto ādi, vaggesu pāṭibhogavaggo, suttesu lobhasuttaṃ. Tassāpi ‘‘vuttañhetaṃ bhagavatā’’tiādikaṃ āyasmatā ānandena paṭhamamahāsaṅgītikāle vuttaṃ nidānamādi. Sā panāyaṃ paṭhamamahāsaṅgīti vinayapiṭake tantimāruḷhā eva. Yo panettha nidānakosallatthaṃ vattabbo kathāmaggo , sopi sumaṅgalavilāsiniyā dīghanikāya-aṭṭhakathāya vitthārato vuttoyevāti tattha vuttanayeneva veditabbo.
