| Library / Tipiṭaka / д̇ибидага • Tipiṭaka / куд̣̇д̣̇агабаата-адтагат̇аа • Khuddakapāṭha-aṭṭhakathā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
куд̣̇д̣̇аганигааяз
Khuddakanikāye
куд̣̇д̣̇агабаата-адтагат̇аа
Khuddakapāṭha-aṭṭhakathā
г̇ант̇аарамбхагат̇аа
Ganthārambhakathā
б̣уд̣̇д̇хам̣ саран̣ам̣ г̇ажчаами;
Buddhaṃsaraṇaṃ gacchāmi;
д̇хаммам̣ саран̣ам̣ г̇ажчаами;
Dhammaṃ saraṇaṃ gacchāmi;
сан̇гхам̣ саран̣ам̣ г̇ажчаамийд̇и.
Saṅghaṃ saraṇaṃ gacchāmīti.
аяам̣ саран̣аг̇амананид̣̇д̣̇зсо куд̣̇д̣̇агаанам̣ аад̣̇и.
Ayaṃ saraṇagamananiddeso khuddakānaṃ ādi.
имасса д̣̇аани ад̇т̇ам̣ барамад̇т̇аж̇од̇игааяа куд̣̇д̣̇агадтагат̇ааяа виварид̇ум̣ вибхаж̇ид̇ум̣ уд̇д̇аанийгаад̇ум̣ ид̣̇ам̣ вужжад̇и –
Imassa dāni atthaṃ paramatthajotikāya khuddakaṭṭhakathāya vivarituṃ vibhajituṃ uttānīkātuṃ idaṃ vuccati –
уд̇д̇амам̣ ванд̣̇анзяяаанам̣, ванд̣̇ид̇ваа рад̇анад̇д̇аяам̣;
Uttamaṃ vandaneyyānaṃ, vanditvā ratanattayaṃ;
куд̣̇д̣̇агаанам̣ гариссаами, гзсан̃жи ад̇т̇аван̣н̣анам̣.
Khuddakānaṃ karissāmi, kesañci atthavaṇṇanaṃ.
куд̣̇д̣̇агаанам̣ г̇амбхийрад̇д̇аа, гин̃жааби ад̇ид̣̇уггараа;
Khuddakānaṃ gambhīrattā, kiñcāpi atidukkarā;
ван̣н̣анаа маад̣̇исзнзсаа, аб̣од̇ханд̇зна саасанам̣.
Vaṇṇanā mādisenesā, abodhantena sāsanaṃ.
аж̇ж̇ааби д̇у аб̣б̣ожчинно, буб̣б̣аажарияанижчаяо;
Ajjāpi tu abbocchinno, pubbācariyanicchayo;
д̇ат̇зва жа тид̇ам̣ яасмаа, наван̇г̇ам̣ сад̇т̇усаасанам̣.
Tatheva ca ṭhitaṃ yasmā, navaṅgaṃ satthusāsanaṃ.
д̇асмаахам̣ гаад̇умижчаами, ад̇т̇асам̣ван̣н̣анам̣ имам̣;
Tasmāhaṃ kātumicchāmi, atthasaṃvaṇṇanaṃ imaṃ;
саасанан̃жзва ниссааяа, бораан̣ан̃жа винижчаяам̣.
Sāsanañceva nissāya, porāṇañca vinicchayaṃ.
сад̣̇д̇хаммаб̣ахумаанзна, наад̇д̇уггам̣санагамяад̇аа;
Saddhammabahumānena, nāttukkaṃsanakamyatā;
наан̃н̃зсам̣ вамбханад̇т̇ааяа, д̇ам̣ сун̣аат̇а самаахид̇аад̇и.
Nāññesaṃ vambhanatthāya, taṃ suṇātha samāhitāti.
куд̣̇д̣̇агававад̇т̇аанам̣
Khuddakavavatthānaṃ
д̇ад̇т̇а ‘‘куд̣̇д̣̇агаанам̣ гариссаами, гзсан̃жи ад̇т̇аван̣н̣ана’’нд̇и вуд̇д̇ад̇д̇аа куд̣̇д̣̇агаани д̇аава вавад̇т̇абзд̇ваа бажчаа ад̇т̇аван̣н̣анам̣ гариссаами. куд̣̇д̣̇агаани наама куд̣̇д̣̇аганигааяасса згад̣̇зсо, куд̣̇д̣̇аганигааяо наама бан̃жаннам̣ нигааяаанам̣ згад̣̇зсо. бан̃жа нигааяаа наама –
Tattha ‘‘khuddakānaṃ karissāmi, kesañci atthavaṇṇana’’nti vuttattā khuddakāni tāva vavatthapetvā pacchā atthavaṇṇanaṃ karissāmi. Khuddakāni nāma khuddakanikāyassa ekadeso, khuddakanikāyo nāma pañcannaṃ nikāyānaṃ ekadeso. Pañca nikāyā nāma –
д̣̇ийгхамаж̇жхимасам̣яуд̇д̇а, ан̇г̇уд̇д̇аригакуд̣̇д̣̇агаа;
Dīghamajjhimasaṃyutta, aṅguttarikakhuddakā;
нигааяаа бан̃жа г̇амбхийраа, д̇хаммад̇о ад̇т̇ад̇о жимз.
Nikāyā pañca gambhīrā, dhammato atthato cime.
д̇ад̇т̇а б̣рахмаж̇ааласуд̇д̇аад̣̇ийни жад̇уд̇д̇им̣са суд̇д̇аани д̣̇ийгханигааяо. муулабарияааяасуд̇д̇аад̣̇ийни д̣̇ияад̣дхасад̇ам̣ д̣̇вз жа суд̇д̇аани маж̇жхиманигааяо. огхад̇аран̣асуд̇д̇аад̣̇ийни сад̇д̇а суд̇д̇асахассаани сад̇д̇а жа суд̇д̇асад̇аани д̣̇ваасадти жа суд̇д̇аани сам̣яуд̇д̇анигааяо. жид̇д̇абарияаад̣̇аанасуд̇д̇аад̣̇ийни нава суд̇д̇асахассаани бан̃жа жа суд̇д̇асад̇аани сад̇д̇абан̃н̃аасан̃жа суд̇д̇аани ан̇г̇уд̇д̇аранигааяо. куд̣̇д̣̇агабаато, д̇хаммабад̣̇ам̣, уд̣̇аанам̣, ид̇ивуд̇д̇агам̣, суд̇д̇анибаад̇о, вимаанавад̇т̇у, бзд̇авад̇т̇у, т̇зраг̇аат̇аа, т̇зрийг̇аат̇аа, ж̇аад̇агам̣, нид̣̇д̣̇зсо, бадисамбхид̣̇аа , абад̣̇аанам̣, б̣уд̣̇д̇хавам̣со, жарияаабидагам̣, винаяаабхид̇хаммабидагаани, табзд̇ваа ваа жад̇д̇ааро нигааяз авасзсам̣ б̣уд̣̇д̇хаважанам̣ куд̣̇д̣̇аганигааяо.
Tattha brahmajālasuttādīni catuttiṃsa suttāni dīghanikāyo. Mūlapariyāyasuttādīni diyaḍḍhasataṃ dve ca suttāni majjhimanikāyo. Oghataraṇasuttādīni satta suttasahassāni satta ca suttasatāni dvāsaṭṭhi ca suttāni saṃyuttanikāyo. Cittapariyādānasuttādīni nava suttasahassāni pañca ca suttasatāni sattapaññāsañca suttāni aṅguttaranikāyo. Khuddakapāṭho, dhammapadaṃ, udānaṃ, itivuttakaṃ, suttanipāto, vimānavatthu, petavatthu, theragāthā, therīgāthā, jātakaṃ, niddeso, paṭisambhidā , apadānaṃ, buddhavaṃso, cariyāpiṭakaṃ, vinayābhidhammapiṭakāni, ṭhapetvā vā cattāro nikāye avasesaṃ buddhavacanaṃ khuddakanikāyo.
гасмаа банзса куд̣̇д̣̇аганигааяод̇и вужжад̇и? б̣ахуунам̣ куд̣̇д̣̇агаанам̣ д̇хаммагканд̇хаанам̣ самуухад̇о ниваасад̇о жа. самууханиваасаа хи ‘‘нигааяо’’д̇и вужжанд̇и. ‘‘наахам̣, бхигкавз, ан̃н̃ам̣ зганигааяамби саманубассаами звам̣ жид̇д̇ам̣, яат̇аяид̣̇ам̣, бхигкавз, д̇иражчаанаг̇ад̇аа баан̣аа (сам̣. ни. 3.100). бон̣иганигааяо, жигкаллиганигааяо’’д̇и звамаад̣̇ийни жзд̇т̇а саад̇хагаани саасанад̇о логад̇о жа. аяамасса куд̣̇д̣̇аганигааяасса згад̣̇зсо. имаани суд̇д̇анд̇абидагабарияаабаннаани ад̇т̇ад̇о виварид̇ум̣ вибхаж̇ид̇ум̣ уд̇д̇аанийгаад̇ун̃жа ад̇хиббзд̇аани куд̣̇д̣̇агаани, д̇зсамби куд̣̇д̣̇агаанам̣ саран̣асигкаабад̣̇ад̣̇вад̇д̇им̣саагаарагумаарабан̃хаман̇г̇аласуд̇д̇а- рад̇анасуд̇д̇ад̇ирогудданид̇хиган̣д̣амзд̇д̇асуд̇д̇аанам̣ васзна наваббабхзд̣̇о куд̣̇д̣̇агабаато аад̣̇и аажарияабарамбарааяа ваажанаамаг̇г̇ам̣ ааробид̇авасзна на бхаг̇авад̇аа вуд̇д̇авасзна. бхаг̇авад̇аа хи вуд̇д̇авасзна –
Kasmā panesa khuddakanikāyoti vuccati? Bahūnaṃ khuddakānaṃ dhammakkhandhānaṃ samūhato nivāsato ca. Samūhanivāsā hi ‘‘nikāyo’’ti vuccanti. ‘‘Nāhaṃ, bhikkhave, aññaṃ ekanikāyampi samanupassāmi evaṃ cittaṃ, yathayidaṃ, bhikkhave, tiracchānagatā pāṇā (saṃ. ni. 3.100). Poṇikanikāyo, cikkhallikanikāyo’’ti evamādīni cettha sādhakāni sāsanato lokato ca. Ayamassa khuddakanikāyassa ekadeso. Imāni suttantapiṭakapariyāpannāni atthato vivarituṃ vibhajituṃ uttānīkātuñca adhippetāni khuddakāni, tesampi khuddakānaṃ saraṇasikkhāpadadvattiṃsākārakumārapañhamaṅgalasutta- ratanasuttatirokuṭṭanidhikaṇḍamettasuttānaṃ vasena navappabhedo khuddakapāṭho ādi ācariyaparamparāya vācanāmaggaṃ āropitavasena na bhagavatā vuttavasena. Bhagavatā hi vuttavasena –
‘‘анзгаж̇аад̇исам̣саарам̣, санд̇хаависсам̣ аниб̣б̣исам̣;
‘‘Anekajātisaṃsāraṃ, sandhāvissaṃ anibbisaṃ;
г̇ахагаарам̣ г̇авзсанд̇о, д̣̇угкаа ж̇аад̇и бунаббунам̣.
Gahakāraṃ gavesanto, dukkhā jāti punappunaṃ.
‘‘г̇ахагаарага д̣̇идтоси, буна г̇зхам̣ на гаахаси;
‘‘Gahakāraka diṭṭhosi, puna gehaṃ na kāhasi;
саб̣б̣аа д̇з паасугаа бхаг̇г̇аа, г̇ахагуудам̣ висан̇кад̇ам̣;
Sabbā te phāsukā bhaggā, gahakūṭaṃ visaṅkhataṃ;
висан̇каараг̇ад̇ам̣ жид̇д̇ам̣, д̇ан̣хаанам̣ каяамаж̇жхаг̇аа’’д̇и. (д̇ха. ба. 153-154) –
Visaṅkhāragataṃ cittaṃ, taṇhānaṃ khayamajjhagā’’ti. (dha. pa. 153-154) –
ид̣̇ам̣ г̇аат̇аад̣̇ваяам̣ саб̣б̣ассааби б̣уд̣̇д̇хаважанасса аад̣̇и. д̇ан̃жа манасаава вуд̇д̇авасзна, на важийбхзд̣̇ам̣ гад̇ваа вуд̇д̇авасзна. важийбхзд̣̇ам̣ бана гад̇ваа вуд̇д̇авасзна –
Idaṃ gāthādvayaṃ sabbassāpi buddhavacanassa ādi. Tañca manasāva vuttavasena, na vacībhedaṃ katvā vuttavasena. Vacībhedaṃ pana katvā vuttavasena –
‘‘яад̣̇аа хавз баад̇убхаванд̇и д̇хаммаа,
‘‘Yadā have pātubhavanti dhammā,
аад̇аабино жхааяад̇о б̣раахман̣асса;
Ātāpino jhāyato brāhmaṇassa;
ат̇асса ган̇каа вабаяанд̇и саб̣б̣аа,
Athassa kaṅkhā vapayanti sabbā,
яад̇о баж̇аанаад̇и сахзд̇уд̇хамма’’нд̇и. (уд̣̇аа. 1; махаава. 1) –
Yato pajānāti sahetudhamma’’nti. (udā. 1; mahāva. 1) –
аяам̣ г̇аат̇аа аад̣̇и. д̇асмаа явааяам̣ наваббабхзд̣̇о куд̣̇д̣̇агабаато имзсам̣ куд̣̇д̣̇агаанам̣ аад̣̇и, д̇асса аад̣̇ид̇о бабхуд̇и ад̇т̇асам̣ван̣н̣анам̣ аарабхиссаами.
Ayaṃ gāthā ādi. Tasmā yvāyaṃ navappabhedo khuddakapāṭho imesaṃ khuddakānaṃ ādi, tassa ādito pabhuti atthasaṃvaṇṇanaṃ ārabhissāmi.
нид̣̇аанасод̇ханам̣
Nidānasodhanaṃ
д̇асса жааяамаад̣̇и ‘‘б̣уд̣̇д̇хам̣ саран̣ам̣ г̇ажчаами, д̇хаммам̣ саран̣ам̣ г̇ажчаами, сан̇гхам̣ саран̣ам̣ г̇ажчаамий’’д̇и. д̇ассааяам̣ ад̇т̇аван̣н̣анааяа маад̇игаа –
Tassa cāyamādi ‘‘buddhaṃ saraṇaṃ gacchāmi, dhammaṃ saraṇaṃ gacchāmi, saṅghaṃ saraṇaṃ gacchāmī’’ti. Tassāyaṃ atthavaṇṇanāya mātikā –
‘‘гзна гад̇т̇а гад̣̇аа гасмаа, бхаасид̇ам̣ саран̣ад̇д̇аяам̣;
‘‘Kena kattha kadā kasmā, bhāsitaṃ saraṇattayaṃ;
гасмаа жид̇хаад̣̇ид̇о вуд̇д̇а, мавуд̇д̇амаби аад̣̇ид̇о.
Kasmā cidhādito vutta, mavuttamapi ādito.
‘‘нид̣̇аанасод̇ханам̣ гад̇ваа, звамзд̇т̇а д̇ад̇о барам̣;
‘‘Nidānasodhanaṃ katvā, evamettha tato paraṃ;
б̣уд̣̇д̇хам̣ саран̣аг̇аманам̣, г̇амаган̃жа вибхааваяз.
Buddhaṃ saraṇagamanaṃ, gamakañca vibhāvaye.
‘‘бхзд̣̇аабхзд̣̇ам̣ палан̃жааби, г̇аманийяан̃жа д̣̇ийбаяз;
‘‘Bhedābhedaṃ phalañcāpi, gamanīyañca dīpaye;
д̇хаммам̣ саран̣амижжаад̣̇и, д̣̇ваязбзса наяо мад̇о.
Dhammaṃ saraṇamiccādi, dvayepesa nayo mato.
‘‘анубуб̣б̣ававад̇т̇аанз, гааран̣ан̃жа винид̣̇д̣̇исз;
‘‘Anupubbavavatthāne, kāraṇañca viniddise;
саран̣ад̇д̇аяамзд̇ан̃жа, убамаахи багаасаяз’’д̇и.
Saraṇattayametañca, upamāhi pakāsaye’’ti.
д̇ад̇т̇а батамаг̇аат̇ааяа д̇аава ид̣̇ам̣ саран̣ад̇д̇аяам̣ гзна бхаасид̇ам̣, гад̇т̇а бхаасид̇ам̣, гад̣̇аа бхаасид̇ам̣, гасмаа бхаасид̇ам̣ авуд̇д̇амабижаад̣̇ид̇о д̇ат̇ааг̇ад̇зна гасмаа ид̇хаад̣̇ид̇о вуд̇д̇анд̇и бан̃жа бан̃хаа.
Tattha paṭhamagāthāya tāva idaṃ saraṇattayaṃ kena bhāsitaṃ, kattha bhāsitaṃ, kadā bhāsitaṃ, kasmā bhāsitaṃ avuttamapicādito tathāgatena kasmā idhādito vuttanti pañca pañhā.
д̇зсам̣ виссаж̇ж̇анаа гзна бхаасид̇анд̇и бхаг̇авад̇аа бхаасид̇ам̣, на саавагзхи, на исийхи, на д̣̇звад̇аахи. гад̇т̇аад̇и б̣аараан̣асияам̣ исибад̇анз миг̇ад̣̇ааяз. гад̣̇аад̇и ааяасманд̇з яасз сад̣̇д̇хим̣ сахааяагзхи арахад̇д̇ам̣ бад̇д̇з згасадтияаа араханд̇зсу б̣ахуж̇анахид̇ааяа логз д̇хаммад̣̇зсанам̣ гаронд̇зсу. гасмаад̇и баб̣б̣аж̇ж̇ад̇т̇ан̃жа убасамбад̣̇ад̇т̇ан̃жа. яат̇ааха –
Tesaṃ vissajjanā kena bhāsitanti bhagavatā bhāsitaṃ, na sāvakehi, na isīhi, na devatāhi. Katthāti bārāṇasiyaṃ isipatane migadāye. Kadāti āyasmante yase saddhiṃ sahāyakehi arahattaṃ patte ekasaṭṭhiyā arahantesu bahujanahitāya loke dhammadesanaṃ karontesu. Kasmāti pabbajjatthañca upasampadatthañca. Yathāha –
‘‘зван̃жа бана, бхигкавз, баб̣б̣ааж̇зд̇аб̣б̣о убасамбаад̣̇зд̇аб̣б̣о. батамам̣ гзсамассум̣ охаарзд̇ваа гаасааяаани вад̇т̇аани ажчаад̣̇аабзд̇ваа згам̣сам̣ уд̇д̇араасан̇г̇ам̣ гаараабзд̇ваа бхигкуунам̣ баад̣̇з ванд̣̇аабзд̇ваа уггудигам̣ нисийд̣̇аабзд̇ваа ан̃ж̇алим̣ баг̇г̇ан̣хаабзд̇ваа ‘звам̣ вад̣̇зхий’д̇и вад̇д̇аб̣б̣о ‘б̣уд̣̇д̇хам̣ саран̣ам̣ г̇ажчаами, д̇хаммам̣ саран̣ам̣ г̇ажчаами, сан̇гхам̣ саран̣ам̣ г̇ажчаамий’’’д̇и (махаава. 34).
‘‘Evañca pana, bhikkhave, pabbājetabbo upasampādetabbo. Paṭhamaṃ kesamassuṃ ohāretvā kāsāyāni vatthāni acchādāpetvā ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā ‘evaṃ vadehī’ti vattabbo ‘buddhaṃ saraṇaṃ gacchāmi, dhammaṃ saraṇaṃ gacchāmi, saṅghaṃ saraṇaṃ gacchāmī’’’ti (mahāva. 34).
гасмаа жид̇хаад̣̇ид̇о вуд̇д̇анд̇и ид̣̇ан̃жа наван̇г̇ам̣ сад̇т̇усаасанам̣ д̇ийхи бидагзхи сан̇г̇ан̣хид̇ваа ваажанаамаг̇г̇ам̣ ааробзнд̇зхи буб̣б̣аажариязхи яасмаа иминаа маг̇г̇зна д̣̇звамануссаа убаасагабхаавзна ваа баб̣б̣аж̇ид̇абхаавзна ваа саасанам̣ од̇аранд̇и, д̇асмаа саасанод̇аарасса маг̇г̇абхууд̇ад̇д̇аа ид̇ха куд̣̇д̣̇агабаатз аад̣̇ид̇о вуд̇д̇анд̇и н̃аад̇аб̣б̣ам̣.
Kasmācidhādito vuttanti idañca navaṅgaṃ satthusāsanaṃ tīhi piṭakehi saṅgaṇhitvā vācanāmaggaṃ āropentehi pubbācariyehi yasmā iminā maggena devamanussā upāsakabhāvena vā pabbajitabhāvena vā sāsanaṃ otaranti, tasmā sāsanotārassa maggabhūtattā idha khuddakapāṭhe ādito vuttanti ñātabbaṃ.
гад̇ам̣ нид̣̇аанасод̇ханам̣.
Kataṃ nidānasodhanaṃ.
