| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
винаяабидагз
Vinayapiṭake
важ̇ираб̣уд̣̇д̇хи-дийгаа
Vajirabuddhi-ṭīkā
г̇ант̇аарамбхагат̇аа
Ganthārambhakathā
бан̃н̃аависуд̣̇д̇хааяа д̣̇аяааяа саб̣б̣з;
Paññāvisuddhāya dayāya sabbe;
виможид̇аа язна винзяяасад̇д̇аа;
Vimocitā yena vineyyasattā;
д̇ам̣ жагкубхууд̇ам̣ сирасаа намид̇ваа;
Taṃ cakkhubhūtaṃ sirasā namitvā;
логасса логанд̇аг̇ад̇асса д̇хаммам̣.
Lokassa lokantagatassa dhammaṃ.
сан̇гхан̃жа сийлаад̣̇иг̇ун̣зхи яуд̇д̇а-
Saṅghañca sīlādiguṇehi yutta-
маад̣̇ааяа саб̣б̣зсу бад̣̇зсу саарам̣;
Mādāya sabbesu padesu sāraṃ;
сан̇кзбагаамзна мамаасаязна;
Saṅkhepakāmena mamāsayena;
сан̃жод̣̇ид̇о бхигкухид̇ан̃жа д̣̇исваа.
Sañcodito bhikkhuhitañca disvā.
саманд̇абаасаад̣̇игасан̃н̃ид̇ааяа ;
Samantapāsādikasaññitāya ;
самб̣уд̣̇д̇хагхосаажарияод̣̇ид̇ааяа;
Sambuddhaghosācariyoditāya;
самаасад̇о лийнабад̣̇з ликиссам̣;
Samāsato līnapade likhissaṃ;
самаасад̇о лийнабад̣̇з ликийд̇ам̣.
Samāsato līnapade likhītaṃ.
сан̃н̃аа нимид̇д̇ам̣ гад̇д̇аа жа, баримаан̣ам̣ баяож̇анам̣;
Saññā nimittaṃ kattā ca, parimāṇaṃ payojanaṃ;
саб̣б̣ааг̇амасса буб̣б̣зва, вад̇д̇аб̣б̣ам̣ вад̇д̇умижчад̇аад̇и. –
Sabbāgamassa pubbeva, vattabbaṃ vattumicchatāti. –
важанад̇о саманд̇абаасаад̣̇игзд̇и сан̃н̃аа. д̣̇ийбанд̇арз бхигкуж̇анасса ад̇т̇ам̣ наабхисамбхун̣аад̇ийд̇и нимид̇д̇ам̣. б̣уд̣̇д̇хагхосод̇и г̇аруухи г̇ахид̇анаамад̇хзяязнаад̇и гад̇д̇аа. самад̇хигасад̇д̇авийсад̇исахассамад̇д̇зна д̇асса г̇ант̇знаад̇и баримаан̣ам̣. жирадтид̇ад̇т̇ам̣ д̇хаммассаад̇и баяож̇анам̣.
Vacanato samantapāsādiketi saññā. Dīpantare bhikkhujanassa atthaṃ nābhisambhuṇātīti nimittaṃ. Buddhaghosoti garūhi gahitanāmadheyyenāti kattā. Samadhikasattavīsatisahassamattena tassa ganthenāti parimāṇaṃ. Ciraṭṭhitatthaṃ dhammassāti payojanaṃ.
д̇ад̇рааха – ‘‘вад̇д̇аб̣б̣ам̣ вад̇д̇умижчад̇аад̇и яам̣ вуд̇д̇ам̣, д̇ад̇т̇а гат̇ам̣вид̇хо вад̇д̇аа’’д̇и? ужжад̇з –
Tatrāha – ‘‘vattabbaṃ vattumicchatāti yaṃ vuttaṃ, tattha kathaṃvidho vattā’’ti? Uccate –
баатад̇т̇авид̣̇уусам̣хийро, вад̇д̇аа сужи амажчаро;
Pāṭhatthavidūsaṃhīro, vattā suci amaccharo;
жад̇уггамабарижжааг̇ий, д̣̇зсагасса хид̇уссугод̇и. (махаани. адта. г̇ант̇аарамбхагат̇аа);
Catukkamapariccāgī, desakassa hitussukoti. (mahāni. aṭṭha. ganthārambhakathā);
д̇ад̇ра батийяад̇зд̇и баато. со хи анзгаббагааро ад̇т̇аануруубо ад̇т̇аанануруубо жзд̇и. гат̇ам̣? санд̇хааяабхаасид̇о б̣яан̃ж̇анабхаасид̇о саавасзсабаато ниравасзсабаато нийд̇о нзяяод̇и. д̇ад̇ра анзгад̇т̇авад̇д̇аа санд̇хааяабхаасид̇о наама ‘‘маад̇арам̣ бид̇арам̣ ханд̇ваа’’д̇иаад̣̇и (д̇ха. ба. 294). згад̇т̇авад̇д̇аа б̣яан̃ж̇анабхаасид̇о наама ‘‘манобуб̣б̣ан̇г̇амаа д̇хаммаа’’д̇яаад̣̇и (д̇ха. ба. 1, 2; нзд̇д̇и. 90, 92; бздаго. 14). саавасзсо наама ‘‘саб̣б̣ам̣, бхигкавз, аад̣̇ид̇д̇а’’мид̇яаад̣̇и (махаава. 54; сам̣. ни. 4.28). вибарийд̇о ниравасзсо наама ‘‘саб̣б̣з д̇хаммаа саб̣б̣аагаарзна б̣уд̣̇д̇хасса бхаг̇авад̇о н̃аан̣амукз аабаат̇ам̣ ааг̇ажчанд̇ий’’д̇яаад̣̇и (махаани. 156; бади. ма. 3.5). яат̇аа важанам̣, д̇ат̇аа аваг̇анд̇аб̣б̣о нийд̇о наама ‘‘анижжам̣ д̣̇угкаманад̇д̇аа’’д̇яаад̣̇и. яуд̇д̇ияаа ануссарид̇аб̣б̣о нзяяо наама ‘‘згабуг̇г̇ало, бхигкавз’’д̇яаад̣̇и (а. ни. 1.170).
Tatra paṭhīyateti pāṭho. So hi anekappakāro atthānurūpo atthānanurūpo ceti. Kathaṃ? Sandhāyabhāsito byañjanabhāsito sāvasesapāṭho niravasesapāṭho nīto neyyoti. Tatra anekatthavattā sandhāyabhāsito nāma ‘‘mātaraṃ pitaraṃ hantvā’’tiādi (dha. pa. 294). Ekatthavattā byañjanabhāsito nāma ‘‘manopubbaṅgamā dhammā’’tyādi (dha. pa. 1, 2; netti. 90, 92; peṭako. 14). Sāvaseso nāma ‘‘sabbaṃ, bhikkhave, āditta’’mityādi (mahāva. 54; saṃ. ni. 4.28). Viparīto niravaseso nāma ‘‘sabbe dhammā sabbākārena buddhassa bhagavato ñāṇamukhe āpāthaṃ āgacchantī’’tyādi (mahāni. 156; paṭi. ma. 3.5). Yathā vacanaṃ, tathā avagantabbo nīto nāma ‘‘aniccaṃ dukkhamanattā’’tyādi. Yuttiyā anussaritabbo neyyo nāma ‘‘ekapuggalo, bhikkhave’’tyādi (a. ni. 1.170).
ад̇т̇оби анзгаббагааро баатад̇т̇о сабхаавад̇т̇о н̃зяяад̇т̇о баатаануруубо баатаанануруубо саавасзсад̇т̇о ниравасзсад̇т̇о нийд̇ад̇т̇о нзяяад̇т̇од̇яаад̣̇и. д̇ад̇т̇а яо д̇ам̣д̇ам̣сан̃н̃аабанад̇т̇амужжаарийяад̇з баато, са баатад̇т̇о ‘‘саад̇т̇ам̣ саб̣яан̃ж̇ана’’мид̇яаад̣̇ийсу (баараа. 1; д̣̇ий. ни. 1.190) вияа. руубааруубад̇хаммаанам̣ лагкан̣арасаад̣̇и сабхаавад̇т̇о ‘‘саммаад̣̇идтим̣ бхаавзд̇ий’’д̇яаад̣̇ийсу (вибха. 489; сам̣. ни. 5.3) вияа. яо н̃ааяамаано хид̇ааяа бхавад̇и, са н̃аад̇умарахад̇д̇аа н̃зяяад̇т̇о ‘‘ад̇т̇аваад̣̇ий д̇хаммаваад̣̇ий’’д̇язвамаад̣̇ийсу (д̣̇ий. ни. 1.9, 194; 3.238; ма. ни. 1.411) вияа. яат̇аабаатам̣ бхаасид̇о баатаануруубо ‘‘жагку, бхигкавз, бураан̣агамма’’нд̇и (сам̣. ни. 4.146) бхаг̇авад̇аа вуд̇д̇амад̇о жагкумаби гамманд̇и. б̣яан̃ж̇анажчааяааяа ад̇т̇ам̣ бадиб̣аахаяамаанзна вуд̇д̇о баатаанануруубо. важ̇ж̇зд̇аб̣б̣ам̣ гин̃жи абарижжаж̇ид̇ваа барисзсам̣ гад̇ваа вуд̇д̇о саавасзсад̇т̇о ‘‘жагкун̃жа бадижжа руубз жа уббаж̇ж̇ад̇ий’’д̇и (сам̣. ни. 4.60; махаани. 107) жа, ‘‘саб̣б̣з д̇асанд̇и д̣̇ан̣д̣асса, саб̣б̣з бхааяанд̇и мажжуно’’д̇яаад̣̇ийсу (д̇ха. ба. 129) вияа. вибарийд̇о ниравасзсад̇т̇о ‘‘санд̇хаавид̇ам̣ сам̣сарид̇ам̣ маман̃жзва д̇умхааган̃жа (д̣̇ий. ни. 2.155; махаа. 287; нзд̇д̇и. 114). д̇ад̇ра, бхигкавз, го манд̇аа го сад̣̇д̇хаад̇аа…бз… ан̃н̃ад̇ра д̣̇идтабад̣̇зхий’’д̇яаад̣̇и (а. ни. 7.66). сад̣̇д̣̇авасзнзва взд̣̇анийяо нийд̇ад̇т̇о ‘‘руубаа сад̣̇д̣̇аа расаа г̇анд̇хаа, подтаб̣б̣аа жа манорамаа’’д̇яаад̣̇ийсу (сам̣. ни. 1.151, 165; махаава. 33) вияа. саммуд̇ивасзна взд̣̇ид̇аб̣б̣о нзяяад̇т̇о ‘‘жад̇д̇ааромз, бхигкавз, валаахагуубамаабуг̇г̇алаа’’д̇яаад̣̇ийсу вияа (а. ни. 4.101; бу. ба. 157). ааха жа –
Atthopi anekappakāro pāṭhattho sabhāvattho ñeyyattho pāṭhānurūpo pāṭhānanurūpo sāvasesattho niravasesattho nītattho neyyatthotyādi. Tattha yo taṃtaṃsaññāpanatthamuccārīyate pāṭho, sa pāṭhattho ‘‘sātthaṃ sabyañjana’’mityādīsu (pārā. 1; dī. ni. 1.190) viya. Rūpārūpadhammānaṃ lakkhaṇarasādi sabhāvattho ‘‘sammādiṭṭhiṃ bhāvetī’’tyādīsu (vibha. 489; saṃ. ni. 5.3) viya. Yo ñāyamāno hitāya bhavati, sa ñātumarahattā ñeyyattho ‘‘atthavādī dhammavādī’’tyevamādīsu (dī. ni. 1.9, 194; 3.238; ma. ni. 1.411) viya. Yathāpāṭhaṃ bhāsito pāṭhānurūpo ‘‘cakkhu, bhikkhave, purāṇakamma’’nti (saṃ. ni. 4.146) bhagavatā vuttamato cakkhumapi kammanti. Byañjanacchāyāya atthaṃ paṭibāhayamānena vutto pāṭhānanurūpo. Vajjetabbaṃ kiñci apariccajitvā parisesaṃ katvā vutto sāvasesattho ‘‘cakkhuñca paṭicca rūpe ca uppajjatī’’ti (saṃ. ni. 4.60; mahāni. 107) ca, ‘‘sabbe tasanti daṇḍassa, sabbe bhāyanti maccuno’’tyādīsu (dha. pa. 129) viya. Viparīto niravasesattho ‘‘sandhāvitaṃ saṃsaritaṃ mamañceva tumhākañca (dī. ni. 2.155; mahā. 287; netti. 114). Tatra, bhikkhave, ko mantā ko saddhātā…pe… aññatra diṭṭhapadehī’’tyādi (a. ni. 7.66). Saddavaseneva vedanīyo nītattho ‘‘rūpā saddā rasā gandhā, phoṭṭhabbā ca manoramā’’tyādīsu (saṃ. ni. 1.151, 165; mahāva. 33) viya. Sammutivasena veditabbo neyyattho ‘‘cattārome, bhikkhave, valāhakūpamāpuggalā’’tyādīsu viya (a. ni. 4.101; pu. pa. 157). Āha ca –
‘‘яо ад̇т̇о сад̣̇д̣̇ад̇о н̃зяяо, нийд̇ад̇т̇ам̣ ид̇и д̇ам̣ вид̣̇уу;
‘‘Yo attho saddato ñeyyo, nītatthaṃ iti taṃ vidū;
ад̇т̇ассзваабхисаамаг̇г̇ий, нзяяад̇т̇о ид̇и гат̇яад̇з’’д̇и.
Atthassevābhisāmaggī, neyyattho iti kathyate’’ti.
звам̣ бабхзд̣̇аг̇ад̇з баатад̇т̇з виж̇аанаад̇ийд̇и баатад̇т̇авид̣̇уу. на сам̣хийрад̇з барабаваад̣̇ийхи д̣̇ийгхарад̇д̇ам̣ д̇ид̇т̇аваасзнзд̇яасам̣хийро. бхааванааяааг̇амаад̇хиг̇амасамбаннад̇д̇аа вад̇д̇ум̣ саггод̇ийд̇и вад̇д̇аа, сан̇кзбавид̇т̇ааранаязна хзд̇уд̣̇аахаран̣аад̣̇ийхи аваб̣од̇хаяид̇ум̣ самад̇т̇од̇яад̇т̇о. сожаяад̇яад̇д̇аанам̣ барз жзд̇и сужи, д̣̇уссийляад̣̇уд̣̇д̣̇идтималавирахид̇од̇яад̇т̇о. д̣̇уссийло хи ад̇д̇аанамубаханд̇унаад̣̇зяяаваажо жа бхавад̇яабад̇д̇аахаараажааро ива нижжаад̇уро взж̇ж̇о. д̣̇уд̣̇д̣̇идти барам̣ убаханд̇и, наавассам̣ ниссаяо жа бхавад̇яахиваал̣аг̇ахаагуло ива гамаласан̣д̣о. убхаяавибанно саб̣б̣ат̇аабяанубаасанийяо бхавад̇и г̇уут̇аг̇ад̇амива чаваалаад̇ам̣ г̇уут̇аг̇ад̇о вияа жа ган̣хасаббо. убхаяасамбанно бана сужи саб̣б̣ат̇аабяубаасанийяо сзвид̇аб̣б̣о жа вин̃н̃уухи, нирубад̣̇д̣̇аво ива рад̇анаагаро. наасса мажчарод̇яамажчаро, ахийнаажарияамудтийд̇яад̇т̇о. суд̇д̇асуд̇д̇аануломаажарияаваад̣̇аад̇д̇аномад̇исан̇каад̇асса жад̇уггассаабарижжааг̇ий, д̇ад̣̇ад̇т̇ассзва б̣яаакяаад̇зд̇яад̇т̇о. ат̇а ваа бажжагкаанумаанасад̣̇д̣̇ад̇т̇аабад̇д̇иббабхзд̣̇асса бамаан̣ажад̇уггассаабарижжааг̇ий.
Evaṃ pabhedagate pāṭhatthe vijānātīti pāṭhatthavidū. Na saṃhīrate parapavādīhi dīgharattaṃ titthavāsenetyasaṃhīro. Bhāvanāyāgamādhigamasampannattā vattuṃ sakkotīti vattā, saṅkhepavitthāranayena hetudāharaṇādīhi avabodhayituṃ samatthotyattho. Socayatyattānaṃ pare ceti suci, dussīlyaduddiṭṭhimalavirahitotyattho. Dussīlo hi attānamupahantunādeyyavāco ca bhavatyapattāhārācāro iva niccāturo vejjo. Duddiṭṭhi paraṃ upahanti, nāvassaṃ nissayo ca bhavatyahivāḷagahākulo iva kamalasaṇḍo. Ubhayavipanno sabbathāpyanupāsanīyo bhavati gūthagatamiva chavālātaṃ gūthagato viya ca kaṇhasappo. Ubhayasampanno pana suci sabbathāpyupāsanīyo sevitabbo ca viññūhi, nirupaddavo iva ratanākaro. Nāssa maccharotyamaccharo, ahīnācariyamuṭṭhītyattho. Suttasuttānulomācariyavādaattanomatisaṅkhātassa catukkassāpariccāgī, tadatthasseva byākhyātetyattho. Atha vā paccakkhānumānasaddatthāpattippabhedassa pamāṇacatukkassāpariccāgī.
‘‘згам̣саважанам̣ згам̣, вибхаж̇ж̇аважанаабарам̣;
‘‘Ekaṃsavacanaṃ ekaṃ, vibhajjavacanāparaṃ;
д̇ад̇ияам̣ бадибужчзяяа, жад̇уд̇т̇ам̣ бана таабаяз’’д̇и. –
Tatiyaṃ paṭipuccheyya, catutthaṃ pana ṭhāpaye’’ti. –
звам̣ вуд̇д̇ажад̇уггасса ваа абарижжааг̇ий; хид̇уссуго ид̇и сод̇уунам̣ хид̇ааяоссуго, д̇зсамаваб̣од̇ханам̣ бад̇и бад̇т̇зд̇ий д̇яад̇т̇о; со зсо сужид̇д̇аа бияо; жад̇уггасса абарижжааг̇ид̇д̇аа г̇ару; асам̣хийрад̇д̇аа бхааванийяо; д̣̇зсагад̇д̇аа вад̇д̇аа; хид̇уссугад̇д̇аа важанагкамо; баатад̇т̇авид̣̇уд̇д̇аа г̇амбхийрагат̇ам̣ гад̇д̇аа; амажчарад̇д̇аа но жадтаанз нияож̇агод̇и;
Evaṃ vuttacatukkassa vā apariccāgī; Hitussuko iti sotūnaṃ hitāyossuko, tesamavabodhanaṃ pati patthetī tyattho; So eso sucittā piyo; Catukkassa apariccāgittā garu; Asaṃhīrattā bhāvanīyo; Desakattā vattā; Hitussukattā vacanakkhamo; Pāṭhatthaviduttā gambhīrakathaṃ kattā; Amaccharattā no caṭṭhāne niyojakoti;
‘‘бияо г̇ару бхааванийяо, вад̇д̇аа жа важанагкамо;
‘‘Piyo garu bhāvanīyo, vattā ca vacanakkhamo;
г̇амбхийран̃жа гат̇ам̣ гад̇д̇аа, но жадтаанз нияож̇аго’’. (а. ни. 7.37; нзд̇д̇и. 113) –
Gambhīrañca kathaṃ kattā, no caṭṭhāne niyojako’’. (a. ni. 7.37; netti. 113) –
ид̇иабхихид̇о д̣̇зсаго;
Itiabhihito desako;
сод̇аа ид̣̇аани абхид̇хийяад̇з –
Sotā idāni abhidhīyate –
д̇хаммаажарияаг̇ару сад̣̇д̇хаа-бан̃н̃аад̣̇иг̇ун̣аман̣д̣ид̇о;
Dhammācariyagaru saddhā-paññādiguṇamaṇḍito;
асатаамааяо сод̇аасса, сумзд̇хо амад̇аамуко.
Asaṭhāmāyo sotāssa, sumedho amatāmukho.
д̇ад̇т̇а д̇хаммаг̇аруд̇д̇аа гат̇ам̣ на барибхавад̇и, аажарияаг̇аруд̇д̇аа гат̇игам̣ на барибхавад̇и, сад̣̇д̇хаабан̃н̃аад̣̇иг̇ун̣абадиман̣д̣ид̇ад̇д̇аа ад̇д̇аанам̣ на барибхавад̇и, асатаамааяад̇д̇аа амад̇аабхимукад̇д̇аа жа авигкид̇д̇ажид̇д̇о бхавад̇и, сумзд̇хад̇д̇аа яонисоманасигарод̇ийд̇яад̇т̇о. вуд̇д̇ан̃хзд̇ам̣ –
Tattha dhammagaruttā kathaṃ na paribhavati, ācariyagaruttā kathikaṃ na paribhavati, saddhāpaññādiguṇapaṭimaṇḍitattā attānaṃ na paribhavati, asaṭhāmāyattā amatābhimukhattā ca avikkhittacitto bhavati, sumedhattā yonisomanasikarotītyattho. Vuttañhetaṃ –
‘‘бан̃жахи, бхигкавз, д̇хаммзхи саманнааг̇ад̇о сун̣анд̇о сад̣̇д̇хаммам̣ бхаб̣б̣о нияаамам̣ оггамид̇ум̣ гусалзсу д̇хаммзсу саммад̇д̇ам̣. гад̇амзхи бан̃жахи? на гат̇ам̣ барибход̇и, на гат̇игам̣ барибход̇и, на ад̇д̇аанам̣ барибход̇и, авигкид̇д̇ажид̇д̇о д̇хаммам̣ сун̣аад̇и згаг̇г̇ажид̇д̇о, яонисо жа манаси гарод̇ий’’д̇и (а. ни. 5.151).
‘‘Pañcahi, bhikkhave, dhammehi samannāgato suṇanto saddhammaṃ bhabbo niyāmaṃ okkamituṃ kusalesu dhammesu sammattaṃ. Katamehi pañcahi? Na kathaṃ paribhoti, na kathikaṃ paribhoti, na attānaṃ paribhoti, avikkhittacitto dhammaṃ suṇāti ekaggacitto, yoniso ca manasi karotī’’ti (a. ni. 5.151).
д̇ам̣лагкан̣аббад̇д̇ад̇д̇аа бхааванаа бхавад̇и саванассзд̇яуд̇д̇о сод̇аа.
Taṃlakkhaṇappattattā bhāvanā bhavati savanassetyutto sotā.
