| Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
винаяабидагз
Vinayapiṭake
винаяаалан̇гаара-дийгаа (батамо бхааг̇о)
Vinayālaṅkāra-ṭīkā (paṭhamo bhāgo)
г̇ант̇аарамбхагат̇аа
Ganthārambhakathā
муд̇д̇ахаараад̣̇инаяаг̇аат̇аа
Muttahārādinayagāthā
яо логз логалого варад̇арабарад̣̇о рааж̇арааж̇аг̇г̇аж̇ан̃н̃о;
Yo loke lokaloko varataraparado rājarājaggajañño;
аагаасаагаарагааро барамарад̇ирад̇о д̣̇звад̣̇званд̇аваж̇ж̇о.
Ākāsākārakāro paramaratirato devadevantavajjo.
сам̣саараасаарасааро сунаранаманад̇о маарахааранд̇арадто;
Saṃsārāsārasāro sunaranamanato mārahārantaraṭṭho;
логаалан̇гаарагааро ад̇исад̇иг̇ад̇имаа д̇хийравийрад̇д̇араммо.
Lokālaṅkārakāro atisatigatimā dhīravīrattarammo.
сийханивад̇д̇ананаяаг̇аат̇аа
Sīhanivattananayagāthā
сам̣сааражаггавид̣̇д̇хам̣сам̣, самб̣уд̣̇д̇хам̣ д̇ам̣ сумаанасам̣;
Saṃsāracakkaviddhaṃsaṃ, sambuddhaṃ taṃ sumānasaṃ;
сам̣намаами суг̇ун̣зсам̣, сам̣д̣̇зсид̇асуд̣̇уд̣̇д̣̇асам̣.
Saṃnamāmi suguṇesaṃ, saṃdesitasududdasaṃ.
анод̇ад̇д̇од̣̇агаавад̇д̇анаяаг̇аат̇аа
Anotattodakāvattanayagāthā
язна вид̣̇д̇хам̣сид̇аа баабаа, язна ниб̣б̣аабид̇аа д̣̇араа;
Yena viddhaṃsitā pāpā, yena nibbāpitā darā;
язна логаа ниссарисум̣, язна жаахам̣ намаами д̇ам̣.
Yena lokā nissarisuṃ, yena cāhaṃ namāmi taṃ.
жад̇уд̣̇ийбажаггавад̇д̇ананаяаг̇аат̇аа
Catudīpacakkavattananayagāthā
сан̇гхам̣ сасан̇гхам̣ намаами, ванд̇анд̇аварад̇хаммаж̇ам̣;
Saṅghaṃ sasaṅghaṃ namāmi, vantantavaradhammajaṃ;
маг̇г̇аг̇г̇аманапаладтам̣, сусам̣сам̣ субхамаанасам̣.
Maggaggamanaphalaṭṭhaṃ, susaṃsaṃ subhamānasaṃ.
аб̣яабзд̇ажад̇убаад̣̇ааад̣̇ияамагаг̇аат̇аа
Abyapetacatupādaādiyamakagāthā
винаяам̣ винаяам̣ саарам̣, сан̇г̇ахам̣ сан̇г̇ахам̣ гарам̣;
Vinayaṃ vinayaṃ sāraṃ, saṅgahaṃ saṅgahaṃ karaṃ;
жарияам̣ жарияам̣ ванд̣̇з, барамам̣ барамам̣ суд̇ам̣.
Cariyaṃ cariyaṃ vande, paramaṃ paramaṃ sutaṃ.
б̣яабзд̇ажад̇убаад̣̇ааад̣̇ианд̇аяамагаг̇аат̇аа
Byapetacatupādaādiantayamakagāthā
багаарз б̣ахубагаарз, сааг̇арз г̇ун̣асааг̇арз;
Pakāre bahupakāre, sāgare guṇasāgare;
г̇араво мама г̇араво, ванд̣̇аами абхиванд̣̇аами.
Garavo mama garavo, vandāmi abhivandāmi.
вад̇т̇уд̇д̇аяз г̇ант̇агаарз, г̇аруусу саад̣̇арам̣ маяаа;
Vatthuttaye ganthakāre, garūsu sādaraṃ mayā;
гад̇зна намаггаарзна, хид̇ваа саб̣б̣з убад̣̇д̣̇авз.
Katena namakkārena, hitvā sabbe upaddave.
сигкаагаамзхи д̇хийрзхи, ж̇инасаасанагаарибхи;
Sikkhākāmehi dhīrehi, jinasāsanakāribhi;
бхигкуухи винаяан̃н̃уухи, саад̣̇арам̣ абхияаажид̇о.
Bhikkhūhi vinayaññūhi, sādaraṃ abhiyācito.
ван̣н̣аяиссаами винаяа-сан̇г̇ахам̣ бийд̇ивад̣дханам̣;
Vaṇṇayissāmi vinaya-saṅgahaṃ pītivaḍḍhanaṃ;
бхигкуунам̣ взнаяигаанам̣, яат̇аасад̇д̇иб̣алам̣ ахам̣.
Bhikkhūnaṃ venayikānaṃ, yathāsattibalaṃ ahaṃ.
бораан̣зхи гад̇аа дийгаа, гин̃жааби ад̇т̇и саа бана;
Porāṇehi katā ṭīkā, kiñcāpi atthi sā pana;
ад̇исан̇кзбабхаавзна, на саад̇хзд̇и яат̇ижчид̇ам̣.
Atisaṅkhepabhāvena, na sādheti yathicchitaṃ.
д̇асмаа хи наанаасад̇т̇зхи, саарамаад̣̇ааяа саад̇хугам̣;
Tasmā hi nānāsatthehi, sāramādāya sādhukaṃ;
наад̇исан̇кзбавид̇т̇аарам̣, гариссам̣ ад̇т̇аван̣н̣анам̣.
Nātisaṅkhepavitthāraṃ, karissaṃ atthavaṇṇanaṃ.
винаяаалан̇гаарам̣ наама, бзсалаанам̣ бамод̣̇анам̣;
Vinayālaṅkāraṃ nāma, pesalānaṃ pamodanaṃ;
имам̣ багаран̣ам̣ саб̣б̣з, саммаа д̇хаарзнд̇у саад̇хавод̇и.
Imaṃ pakaraṇaṃ sabbe, sammā dhārentu sādhavoti.
г̇ант̇аарамбхагат̇ааван̣н̣анаа
Ganthārambhakathāvaṇṇanā
вивид̇хависзсанаяасаманнааг̇ад̇ам̣ гааяаваажаавинаяанагаран̣асамад̇т̇ам̣ лаж̇ж̇ибзсалабхигкуунам̣ сам̣саяавинод̣̇анагаарагам̣ яог̇ааважарабуг̇г̇алаанам̣ сийлависуд̣̇д̇хисамбаабагам̣ ж̇инасаасанавуд̣дхихзд̇убхууд̇ам̣ багаран̣амид̣̇амаарабхид̇угаамо аяамаажарияаасабхо батамам̣ д̇аава рад̇анад̇д̇аяабан̣аамабан̣аамаарахабхааваабхид̇хзяяагаран̣ахзд̇у гаран̣аббагаарабагаран̣аабхид̇хаананимид̇д̇абаяож̇анаани д̣̇ассзд̇ум̣ ‘‘вад̇т̇уд̇д̇аяам̣ намассид̇ваа’’д̇иаад̣̇имааха. зд̇т̇а хи вад̇т̇уд̇д̇аяам̣ намассид̇ваад̇и иминаа рад̇анад̇д̇аяабан̣аамо вуд̇д̇о бан̣аамзд̇аб̣б̣абан̣аамаад̇т̇ад̣̇ассанад̇о. саран̣ам̣ саб̣б̣абаан̣инанд̇и иминаа бан̣аамаарахабхааво бан̣аамахзд̇уд̣̇ассанад̇о. баал̣имуд̇д̇авинижчаяанд̇и абхид̇хзяяо имасса багаран̣асса ад̇т̇абхаавад̇о. виббагин̣н̣аманзгад̇т̇аад̇и гаран̣ахзд̇у д̇знзвагааран̣зна багаран̣асса гад̇ад̇д̇аа. самаахарид̇ваа згад̇т̇а, д̣̇ассаяиссаманаагуланд̇и гаран̣аббагааро д̇знаагаарзна багаран̣асса гаран̣ад̇о. багаран̣аабхид̇хаанам̣ бана самаахарид̇асад̣̇д̣̇асса саамад̇т̇ияад̇о д̣̇ассид̇ам̣ самаахарид̇ваа д̣̇ассанзнзва имасса багаран̣асса винаяасан̇г̇ахаид̇и наамасса лабханад̇о.
Vividhavisesanayasamannāgataṃ kāyavācāvinayanakaraṇasamatthaṃ lajjipesalabhikkhūnaṃ saṃsayavinodanakārakaṃ yogāvacarapuggalānaṃ sīlavisuddhisampāpakaṃ jinasāsanavuḍḍhihetubhūtaṃ pakaraṇamidamārabhitukāmo ayamācariyāsabho paṭhamaṃ tāva ratanattayapaṇāmapaṇāmārahabhāvaabhidheyyakaraṇahetu karaṇappakārapakaraṇābhidhānanimittapayojanāni dassetuṃ ‘‘vatthuttayaṃ namassitvā’’tiādimāha. Ettha hi vatthuttayaṃ namassitvāti iminā ratanattayapaṇāmo vutto paṇāmetabbapaṇāmaatthadassanato. Saraṇaṃ sabbapāṇinanti iminā paṇāmārahabhāvo paṇāmahetudassanato. Pāḷimuttavinicchayanti abhidheyyo imassa pakaraṇassa atthabhāvato. Vippakiṇṇamanekatthāti karaṇahetu tenevakāraṇena pakaraṇassa katattā. Samāharitvā ekattha, dassayissamanākulanti karaṇappakāro tenākārena pakaraṇassa karaṇato. Pakaraṇābhidhānaṃ pana samāharitasaddassa sāmatthiyato dassitaṃ samāharitvā dassaneneva imassa pakaraṇassa vinayasaṅgahaiti nāmassa labhanato.
нимид̇д̇ам̣ бана аж̇жхад̇д̇игаб̣аахиравасзна д̣̇увид̇хам̣. д̇ад̇т̇а аж̇жхад̇д̇игам̣ наама гарун̣аа, д̇ам̣ д̣̇ассанагирияааяа саамад̇т̇ияад̇о д̣̇ассид̇ам̣ д̇асмим̣ асад̇и д̣̇ассанагирияааяа абхаавад̇о. б̣аахирам̣ наама сод̇уж̇анасамуухо, д̇ам̣ яог̇ааважарабхигкуунанд̇и д̇асса гарун̣аарамман̣абхаавад̇о. баяож̇анам̣ бана д̣̇увид̇хам̣ бан̣аамабаяож̇анабагаран̣абаяож̇анавасзна. д̇ад̇т̇а бан̣аамабаяож̇анам̣ наама анд̇арааяависосанабасаад̣̇аж̇ананаад̣̇игам̣, д̇ам̣ саран̣ам̣ саб̣б̣абаан̣инанд̇и имасса саамад̇т̇ияад̇о д̣̇ассид̇ам̣ хзд̇умхи сад̇и паласса авинаабхаавад̇о. вуд̇д̇ан̃хи абхид̇хаммадийгаажариязна ‘‘г̇ун̣ависзсаваа хи бан̣аамаарахо ход̇и, бан̣аамаарахз жа гад̇о бан̣аамо вуд̇д̇аббаяож̇анасид̣̇д̇хигарова ход̇ий’’д̇и (д̇ха. са. мууладий. 1). багаран̣абаяож̇анамби д̣̇увид̇хам̣ мукяаанусан̇г̇игавасзна. д̇зсу мукяабаяож̇анам̣ наама б̣яан̃ж̇анаануруубам̣ ад̇т̇асса бадивиж̇жханам̣ багаасанан̃жа ад̇т̇аануруубам̣ б̣яан̃ж̇анасса уд̣̇д̣̇исанам̣ уд̣̇д̣̇зсаабанан̃жа, д̇ам̣ винаяз баадавад̇т̇ааяаад̇и иминаа вуд̇д̇ам̣. анусан̇г̇игабаяож̇анам̣ наама сийлаад̣̇ианубаад̣̇аабариниб̣б̣аананд̇о ад̇т̇о, д̇ам̣ самаахарид̇ваа згад̇т̇а д̣̇ассаяиссанд̇и имасса саамад̇т̇иязна д̣̇ассид̇ам̣ згад̇т̇а самаахарид̇ваа д̣̇ассанз сад̇и д̇ад̣̇уг̇г̇ахабарибужчаад̣̇инаа гад̇абаяог̇асса ананд̇арааязна д̇ад̣̇ад̇т̇асиж̇жханад̇од̇и.
Nimittaṃ pana ajjhattikabāhiravasena duvidhaṃ. Tattha ajjhattikaṃ nāma karuṇā, taṃ dassanakiriyāya sāmatthiyato dassitaṃ tasmiṃ asati dassanakiriyāya abhāvato. Bāhiraṃ nāma sotujanasamūho, taṃ yogāvacarabhikkhūnanti tassa karuṇārammaṇabhāvato. Payojanaṃ pana duvidhaṃ paṇāmapayojanapakaraṇapayojanavasena. Tattha paṇāmapayojanaṃ nāma antarāyavisosanapasādajananādikaṃ, taṃ saraṇaṃ sabbapāṇinanti imassa sāmatthiyato dassitaṃ hetumhi sati phalassa avinābhāvato. Vuttañhi abhidhammaṭīkācariyena ‘‘guṇavisesavā hi paṇāmāraho hoti, paṇāmārahe ca kato paṇāmo vuttappayojanasiddhikarova hotī’’ti (dha. sa. mūlaṭī. 1). Pakaraṇapayojanampi duvidhaṃ mukhyānusaṅgikavasena. Tesu mukhyapayojanaṃ nāma byañjanānurūpaṃ atthassa paṭivijjhanaṃ pakāsanañca atthānurūpaṃ byañjanassa uddisanaṃ uddesāpanañca, taṃ vinaye pāṭavatthāyāti iminā vuttaṃ. Anusaṅgikapayojanaṃ nāma sīlādianupādāparinibbānanto attho, taṃ samāharitvā ekattha dassayissanti imassa sāmatthiyena dassitaṃ ekattha samāharitvā dassane sati taduggahaparipucchādinā katapayogassa anantarāyena tadatthasijjhanatoti.
гимад̇т̇ам̣ банзд̇т̇а рад̇анад̇д̇аяабан̣аамаад̣̇аяо аажариязна гад̇аа, нану ад̇хиббзд̇аг̇ант̇аарамбхова гаад̇аб̣б̣од̇и? вужжад̇з – зд̇т̇а рад̇анад̇д̇аяабан̣аамагаран̣ам̣ д̇аб̣б̣ихад̇анд̇арааяо худ̇ваа анааяаасзна г̇ант̇абарисамаабанад̇т̇ам̣. бан̣аамаарахабхаававажанам̣ ад̇д̇ано яуд̇д̇абад̇д̇агаарид̇аад̣̇ассанад̇т̇ам̣, д̇ам̣ вин̃н̃уунам̣ д̇осаабанад̇т̇ам̣, д̇ам̣ багаран̣асса уг̇г̇ахан̣ад̇т̇ам̣, д̇ам̣ саб̣б̣асамбад̇д̇инибпаад̣̇анад̇т̇ам̣. абхид̇хзяяагат̇анам̣ вид̣̇ид̇аабхид̇хзяяасса г̇ант̇асса вин̃н̃уунам̣ уг̇г̇ахад̇хааран̣аад̣̇ивасзна бадибаж̇ж̇анад̇т̇ам̣. гаран̣ахзд̇угат̇анам̣ агааран̣з гад̇асса вааяаамасса нибпалабхаавад̇о д̇аббадигкзбанад̇т̇ам̣. гаран̣аббагаарагат̇анам̣ вид̣̇ид̇аббагаарасса г̇ант̇асса сод̇уунам̣ уг̇г̇ахан̣аад̣̇ийсу ружиж̇ананад̇т̇ам̣. абхид̇хаанад̣̇ассанам̣ вохаарасукад̇т̇ам̣. нимид̇д̇агат̇анам̣ аасаннагааран̣ад̣̇ассанад̇т̇ам̣. баяож̇анад̣̇ассанам̣ д̣̇увид̇хабаяож̇анагаамийнам̣ сод̇уунам̣ самуссаахаж̇ананад̇т̇анд̇и.
Kimatthaṃ panettha ratanattayapaṇāmādayo ācariyena katā, nanu adhippetaganthārambhova kātabboti? Vuccate – ettha ratanattayapaṇāmakaraṇaṃ tabbihatantarāyo hutvā anāyāsena ganthaparisamāpanatthaṃ. Paṇāmārahabhāvavacanaṃ attano yuttapattakāritādassanatthaṃ, taṃ viññūnaṃ tosāpanatthaṃ, taṃ pakaraṇassa uggahaṇatthaṃ, taṃ sabbasampattinipphādanatthaṃ. Abhidheyyakathanaṃ viditābhidheyyassa ganthassa viññūnaṃ uggahadhāraṇādivasena paṭipajjanatthaṃ. Karaṇahetukathanaṃ akāraṇe katassa vāyāmassa nipphalabhāvato tappaṭikkhepanatthaṃ. Karaṇappakārakathanaṃ viditappakārassa ganthassa sotūnaṃ uggahaṇādīsu rucijananatthaṃ. Abhidhānadassanaṃ vohārasukhatthaṃ. Nimittakathanaṃ āsannakāraṇadassanatthaṃ. Payojanadassanaṃ duvidhapayojanakāmīnaṃ sotūnaṃ samussāhajananatthanti.
рад̇анад̇д̇аяабан̣аамабаяож̇анам̣ бана б̣ахуухи багаарзхи вид̇т̇аараяанд̇и аажарияаа, д̇ам̣ д̇ад̇т̇а д̇ад̇т̇а вуд̇д̇анаязнзва г̇ахзд̇аб̣б̣ам̣. ид̇ха бана г̇ант̇аг̇арубхааваможанад̇т̇ам̣ адтагат̇аажариязхи ад̇хиббзд̇абаяож̇анамзва гат̇аяимха. вуд̇д̇ан̃хи адтагат̇аажариязна –
Ratanattayapaṇāmapayojanaṃ pana bahūhi pakārehi vitthārayanti ācariyā, taṃ tattha tattha vuttanayeneva gahetabbaṃ. Idha pana ganthagarubhāvamocanatthaṃ aṭṭhakathācariyehi adhippetapayojanameva kathayimha. Vuttañhi aṭṭhakathācariyena –
‘‘нибажжагаарассзд̇асса ;
‘‘Nipaccakārassetassa ;
гад̇асса рад̇анад̇д̇аяз;
Katassa ratanattaye;
аанубхаавзна сосзд̇ваа;
Ānubhāvena sosetvā;
анд̇арааяз асзсад̇о’’д̇и. (д̇ха. са. адта. г̇ант̇аарамбхагат̇аа 7);
Antarāye asesato’’ti. (dha. sa. aṭṭha. ganthārambhakathā 7);
аяамзд̇т̇а самуд̣̇ааяад̇т̇о, аяам̣ бана аваяавад̇т̇о – ахам̣ саб̣б̣абаан̣ийнам̣ саран̣ам̣ саран̣ийбхууд̇ам̣ вад̇т̇уд̇д̇аяам̣ намассаами, намассид̇ваа яог̇ааважарабхигкуунам̣ винаяз баадавад̇т̇ааяа анзгад̇т̇авиббагин̣н̣ам̣ баал̣имуд̇д̇авинижчаяам̣ згад̇т̇а самаахарид̇ваа анаагулам̣ гад̇ваа д̣̇ассаяиссам̣ д̣̇ассаяиссаамийд̇и яож̇анаа.
Ayamettha samudāyattho, ayaṃ pana avayavattho – ahaṃ sabbapāṇīnaṃ saraṇaṃ saraṇībhūtaṃ vatthuttayaṃ namassāmi, namassitvā yogāvacarabhikkhūnaṃ vinaye pāṭavatthāya anekatthavippakiṇṇaṃ pāḷimuttavinicchayaṃ ekattha samāharitvā anākulaṃ katvā dassayissaṃ dassayissāmīti yojanā.
д̇ад̇т̇а васанд̇и зд̇т̇аад̇и вад̇т̇у. гим̣ д̇ам̣? б̣уд̣̇д̇хаад̣̇ирад̇анам̣. д̇ан̃хи яасмаа саран̣аг̇ад̇аа саббурисаа саран̣аг̇аманасаман̇г̇ино худ̇ваа б̣уд̣̇д̇хаад̣̇ирад̇анам̣ аарамман̣ам̣ гад̇ваа д̇асмим̣ аарамман̣з васанд̇и аавасанд̇и нивасанд̇и, д̇асмаа ‘‘вад̇т̇уу’’д̇и вужжад̇и. аарамман̣ан̃хи аад̇хааро, аарамман̣игам̣ аад̇хзяяод̇и. ид̇о барааниби вад̇т̇усад̣̇д̣̇асса важанад̇т̇аад̣̇ийни аажариязхи вуд̇д̇аани, д̇ааниби д̇ад̇т̇а д̇ад̇т̇а вуд̇д̇анаязнзва взд̣̇ид̇аб̣б̣аани. ид̇ха бана г̇ант̇авид̇т̇аарабарихаран̣ад̇т̇ам̣ зд̇д̇агамзва вуд̇д̇анд̇и взд̣̇ид̇аб̣б̣анд̇и. д̇ин̣н̣ам̣ самууход̇и д̇аяам̣, д̇аяо ам̣саа аваяаваа ассаад̇и ваа д̇аяам̣. гим̣ д̇ам̣? самуд̣̇ааяо. вад̇т̇уунам̣ д̇аяанд̇и вад̇т̇уд̇д̇аяам̣. гим̣ д̇ам̣? б̣уд̣̇д̇хаад̣̇ирад̇анад̇д̇аяам̣. намассаамийд̇и намассид̇ваа, анаминд̇и намассид̇ваа. б̣уд̣̇д̇хаад̣̇ирад̇анан̃хи аарамман̣ам̣ гад̇ваа жид̇д̇асса уббаж̇ж̇анагаалз д̇ваа-бажжаяо бажжуббаннагаалиго ход̇и, д̇асмаа батамо виг̇г̇ахо гад̇о, баал̣имуд̇д̇авинижчаяам̣ згад̇т̇а д̣̇ассанагаалз ад̇ийд̇агаалиго, д̇асмаа д̣̇уд̇ияо виг̇г̇ахо. д̇знзва жа гааран̣зна ад̇т̇аяож̇анааяаби бажжуббаннагаалаад̇ийд̇агаалавасзна яож̇анаа гад̇аа.
Tattha vasanti etthāti vatthu. Kiṃ taṃ? Buddhādiratanaṃ. Tañhi yasmā saraṇagatā sappurisā saraṇagamanasamaṅgino hutvā buddhādiratanaṃ ārammaṇaṃ katvā tasmiṃ ārammaṇe vasanti āvasanti nivasanti, tasmā ‘‘vatthū’’ti vuccati. Ārammaṇañhi ādhāro, ārammaṇikaṃ ādheyyoti. Ito parānipi vatthusaddassa vacanatthādīni ācariyehi vuttāni, tānipi tattha tattha vuttanayeneva veditabbāni. Idha pana ganthavitthārapariharaṇatthaṃ ettakameva vuttanti veditabbanti. Tiṇṇaṃ samūhoti tayaṃ, tayo aṃsā avayavā assāti vā tayaṃ. Kiṃ taṃ? Samudāyo. Vatthūnaṃ tayanti vatthuttayaṃ. Kiṃ taṃ? Buddhādiratanattayaṃ. Namassāmīti namassitvā, anaminti namassitvā. Buddhādiratanañhi ārammaṇaṃ katvā cittassa uppajjanakāle tvā-paccayo paccuppannakāliko hoti, tasmā paṭhamo viggaho kato, pāḷimuttavinicchayaṃ ekattha dassanakāle atītakāliko, tasmā dutiyo viggaho. Teneva ca kāraṇena atthayojanāyapi paccuppannakālaatītakālavasena yojanā katā.
сарад̇и хим̣сад̇ийд̇и саран̣ам̣. гим̣ д̇ам̣? б̣уд̣̇д̇хаад̣̇ирад̇анад̇д̇аяам̣. д̇ан̃хи саран̣аг̇ад̇аанам̣ саббурисаанам̣ бхаяам̣ санд̇аасам̣ д̣̇угкам̣ д̣̇уг̇г̇ад̇ивинибаад̇ам̣ сам̣гилзсам̣ сарад̇и хим̣сад̇и винаасзд̇и, д̇асмаа ‘‘саран̣а’’нд̇и вужжад̇и. вуд̇д̇ан̃хи бхаг̇авад̇аа –
Sarati hiṃsatīti saraṇaṃ. Kiṃ taṃ? Buddhādiratanattayaṃ. Tañhi saraṇagatānaṃ sappurisānaṃ bhayaṃ santāsaṃ dukkhaṃ duggativinipātaṃ saṃkilesaṃ sarati hiṃsati vināseti, tasmā ‘‘saraṇa’’nti vuccati. Vuttañhi bhagavatā –
‘‘яасмим̣, махаанаама, самаяз арияасааваго д̇ат̇ааг̇ад̇ам̣ ануссарад̇и, нзвасса д̇асмим̣ самаяз рааг̇абарияудтид̇ам̣ жид̇д̇ам̣ ход̇ий’’д̇иаад̣̇и (а. ни. 6.10; 11.11),
‘‘Yasmiṃ, mahānāma, samaye ariyasāvako tathāgataṃ anussarati, nevassa tasmiṃ samaye rāgapariyuṭṭhitaṃ cittaṃ hotī’’tiādi (a. ni. 6.10; 11.11),
‘‘звам̣ б̣уд̣̇д̇хам̣ саранд̇аанам̣;
‘‘Evaṃ buddhaṃ sarantānaṃ;
д̇хаммам̣ сан̇гхан̃жа бхигкаво;
Dhammaṃ saṅghañca bhikkhavo;
бхаяам̣ ваа чамбхид̇ад̇д̇ам̣ ваа;
Bhayaṃ vā chambhitattaṃ vā;
ломахам̣со на хзссад̇ий’’д̇и жа. (сам̣. ни. 1.249);
Lomahaṃso na hessatī’’ti ca. (saṃ. ni. 1.249);
яасмаа бана ‘‘саран̣а’’нд̇и ид̣̇ам̣ бад̣̇ам̣ ‘‘наат̇а’’нд̇и бад̣̇асса взважанабхууд̇ам̣ гид̇асуд̣̇д̇ханаамабад̣̇ам̣ ход̇и, на гид̇амад̇д̇абад̣̇ам̣, д̇асмаа д̇хаад̇вад̇т̇о анд̇онийд̇о. ‘‘сара хим̣сааяа’’нд̇и хи вуд̇д̇ам̣ хим̣сад̇т̇ам̣ г̇ахзд̇ваа саб̣б̣абаан̣ийнам̣ саран̣ам̣ хим̣сагам̣ вад̇т̇уд̇д̇аяам̣ намассид̇ваа вин̃н̃ааяамаанз анидтаббасан̇г̇ад̇о саб̣б̣абаан̣ийнам̣ саран̣ам̣ саран̣ийбхууд̇ам̣ наат̇абхууд̇ам̣ вад̇т̇уд̇д̇аяам̣ намассид̇ваад̇и вин̃н̃ааяамаанзязва яуж̇ж̇ад̇и, д̇знзва жа гааран̣зна ад̇т̇аяож̇анааяамби д̇ат̇аа яож̇анаа гад̇аа. саб̣б̣а-сад̣̇д̣̇о ниравасзсад̇т̇аваажагам̣ саб̣б̣анаамабад̣̇ам̣. саха авзна яо вад̇д̇ад̇ийд̇и саб̣б̣од̇и гад̇з бана сагала-сад̣̇д̣̇о вияа самуд̣̇ааяаваажагам̣ самаасанаамабад̣̇ам̣ ход̇и. баан̣о зд̇зсам̣ ад̇т̇ийд̇и баан̣ино, баан̣од̇и жзд̇т̇а ж̇ийвид̇инд̣̇рияам̣ ад̇хиббзд̇ам̣. саб̣б̣з баан̣ино саб̣б̣абаан̣ино, д̇зсам̣ саб̣б̣абаан̣ийнам̣. зд̇д̇аавад̇аа вад̇т̇уд̇д̇аяасса саб̣б̣алогасаран̣абхаавам̣, д̇ад̇оязва жа намассанаарахабхаавам̣, намассанаарахз жа гад̇ааяанамассанагирияааяа яат̇аад̇хиббзд̇ад̇т̇асид̣̇д̇хигарабхаавам̣, ад̇д̇ано гирияааяа жа кзд̇д̇ан̇г̇ад̇абхаавам̣ д̣̇ассзд̇и.
Yasmā pana ‘‘saraṇa’’nti idaṃ padaṃ ‘‘nātha’’nti padassa vevacanabhūtaṃ kitasuddhanāmapadaṃ hoti, na kitamattapadaṃ, tasmā dhātvattho antonīto. ‘‘Sara hiṃsāya’’nti hi vuttaṃ hiṃsatthaṃ gahetvā sabbapāṇīnaṃ saraṇaṃ hiṃsakaṃ vatthuttayaṃ namassitvā viññāyamāne aniṭṭhappasaṅgato sabbapāṇīnaṃ saraṇaṃ saraṇībhūtaṃ nāthabhūtaṃ vatthuttayaṃ namassitvāti viññāyamāneyeva yujjati, teneva ca kāraṇena atthayojanāyampi tathā yojanā katā. Sabba-saddo niravasesatthavācakaṃ sabbanāmapadaṃ. Saha avena yo vattatīti sabboti kate pana sakala-saddo viya samudāyavācakaṃ samāsanāmapadaṃ hoti. Pāṇo etesaṃ atthīti pāṇino, pāṇoti cettha jīvitindriyaṃ adhippetaṃ. Sabbe pāṇino sabbapāṇino, tesaṃ sabbapāṇīnaṃ. Ettāvatā vatthuttayassa sabbalokasaraṇabhāvaṃ, tatoyeva ca namassanārahabhāvaṃ, namassanārahe ca katāyanamassanakiriyāya yathādhippetatthasiddhikarabhāvaṃ, attano kiriyāya ca khettaṅgatabhāvaṃ dasseti.
звам̣ сахзд̇угам̣ рад̇анад̇д̇аяабан̣аамам̣ д̣̇ассзд̇ваа ид̣̇аани багаран̣аарамбхасса санимид̇д̇ам̣ мукяабаяож̇анам̣ д̣̇ассзд̇умааха ‘‘винаяз баадавад̇т̇ааяа, яог̇ааважарабхигкууна’’нд̇и. зд̇т̇а жа винаяз баадавад̇т̇ааяаад̇и мукяабаяож̇анад̣̇ассанам̣, д̇ам̣д̣̇ассанзна жа анусан̇г̇игабаяож̇анамби вибхаавид̇амзва ход̇и гааран̣з сид̣̇д̇хз гаарияасса сиж̇жханад̇о. яог̇ааважарабхигкуунанд̇и б̣аахиранимид̇д̇ад̣̇ассанам̣, д̇асмим̣ д̣̇ассид̇з аж̇жхад̇д̇иганимид̇д̇амби д̣̇ийбид̇амзва ход̇и аарамман̣з н̃аад̇з аарамман̣игасса н̃аад̇аб̣б̣ад̇о. д̇ад̇т̇а вивид̇хаа наяаа зд̇т̇аад̇и винаяо, д̣̇увид̇хабаад̇имогкад̣̇увид̇хавибхан̇г̇абан̃жавид̇хабаад̇имогкуд̣̇д̣̇зсабан̃жааабад̇д̇игканд̇хасад̇д̇ааабад̇д̇игканд̇хаад̣̇аяо вивид̇хаа анзгаббагаараа наяаа зд̇т̇а санд̇ийд̇и ад̇т̇о. ат̇а ваа висзсаа наяаа зд̇т̇аад̇и винаяо, д̣̇ал̣хийгаммасит̇илагаран̣абаяож̇анаа анубан̃н̃ад̇д̇инаяаад̣̇аяо висзсаа наяаа зд̇т̇а санд̇ийд̇и ад̇т̇о. ат̇а ваа винзд̇ийд̇и винаяо. гааяо винзд̇и гааяаваажааяо, ид̇и гааяаваажаанам̣ винаяанад̇о винаяо. вуд̇д̇ан̃хи адтагат̇ааяам̣ –
Evaṃ sahetukaṃ ratanattayapaṇāmaṃ dassetvā idāni pakaraṇārambhassa sanimittaṃ mukhyapayojanaṃ dassetumāha ‘‘vinayepāṭavatthāya, yogāvacarabhikkhūna’’nti. Ettha ca vinaye pāṭavatthāyāti mukhyapayojanadassanaṃ, taṃdassanena ca anusaṅgikapayojanampi vibhāvitameva hoti kāraṇe siddhe kāriyassa sijjhanato. Yogāvacarabhikkhūnanti bāhiranimittadassanaṃ, tasmiṃ dassite ajjhattikanimittampi dīpitameva hoti ārammaṇe ñāte ārammaṇikassa ñātabbato. Tattha vividhā nayā etthāti vinayo, duvidhapātimokkhaduvidhavibhaṅgapañcavidhapātimokkhuddesapañcaāpattikkhandhasattaāpattikkhandhādayo vividhā anekappakārā nayā ettha santīti attho. Atha vā visesā nayā etthāti vinayo, daḷhīkammasithilakaraṇapayojanā anupaññattinayādayo visesā nayā ettha santīti attho. Atha vā vinetīti vinayo. Kāyo vineti kāyavācāyo, iti kāyavācānaṃ vinayanato vinayo. Vuttañhi aṭṭhakathāyaṃ –
‘‘вивид̇хависзсанаяад̇д̇аа ;
‘‘Vividhavisesanayattā ;
винаяанад̇о жзва гааяаваажаанам̣;
Vinayanato ceva kāyavācānaṃ;
винаяад̇т̇авид̣̇уухи аяам̣;
Vinayatthavidūhi ayaṃ;
винаяо ‘винаяо’д̇и агкаад̇о’’д̇и. (баараа. адта. 1.батамамахаасан̇г̇ийд̇игат̇аа; д̇ха. са. адта. нид̣̇аанагат̇аа; д̣̇ий. ни. адта. 1.батамамахаасан̇г̇ийд̇игат̇аа);
Vinayo ‘vinayo’ti akkhāto’’ti. (pārā. aṭṭha. 1.paṭhamamahāsaṅgītikathā; dha. sa. aṭṭha. nidānakathā; dī. ni. aṭṭha. 1.paṭhamamahāsaṅgītikathā);
го со? винаяабидагам̣. д̇асмим̣ винаяз. бадад̇и вияад̇д̇абхаавам̣ г̇ажчад̇ийд̇и баду. го со? бан̣д̣ид̇о. бадуно бхааво баадавам̣. гим̣ д̇ам̣? н̃аан̣ам̣. асад̇и гааран̣аануруубам̣ бхавад̇ийд̇и ад̇т̇о. го со? баяож̇анам̣. баадавамзва ад̇т̇о баадавад̇т̇о, д̇асса баадавад̇т̇ааяа, винаяабидагз госаллан̃аан̣абаяож̇анааяаад̇и вуд̇д̇ам̣ ход̇и. яун̃ж̇анам̣ яог̇о, гаммадтаанаманасигааро. аважаранд̇ийд̇и аважараа, яог̇з аважараа яог̇ааважараа, гаммадтаанигаа бхигкуу. сам̣саарз бхаяам̣ игканд̇ийд̇и бхигкуу, яог̇ааважараа жа д̇з бхигкуу жаад̇и яог̇ааважарабхигкуу, д̇зсам̣ яог̇ааважарабхигкуунам̣. зд̇зна винаяз бадубхааво наама бхигкуунам̣язва ад̇т̇о ход̇и, на г̇ахадтад̇аабасабариб̣б̣ааж̇агаад̣̇ийнам̣. бхигкуусу жа гаммадтаанз нияуд̇д̇аанам̣ лаж̇ж̇ибзсалабхигкуунам̣язва, на виссадтагаммадтаанаанам̣ алаж̇ж̇ибхигкуунанд̇и имамад̇т̇ам̣ д̣̇ассзд̇и.
Ko so? Vinayapiṭakaṃ. Tasmiṃ vinaye. Paṭati viyattabhāvaṃ gacchatīti paṭu. Ko so? Paṇḍito. Paṭuno bhāvo pāṭavaṃ. Kiṃ taṃ? Ñāṇaṃ. Asati kāraṇānurūpaṃ bhavatīti attho. Ko so? Payojanaṃ. Pāṭavameva attho pāṭavattho, tassa pāṭavatthāya, vinayapiṭake kosallañāṇapayojanāyāti vuttaṃ hoti. Yuñjanaṃ yogo, kammaṭṭhānamanasikāro. Avacarantīti avacarā, yoge avacarā yogāvacarā, kammaṭṭhānikā bhikkhū. Saṃsāre bhayaṃ ikkhantīti bhikkhū, yogāvacarā ca te bhikkhū cāti yogāvacarabhikkhū, tesaṃ yogāvacarabhikkhūnaṃ. Etena vinaye paṭubhāvo nāma bhikkhūnaṃyeva attho hoti, na gahaṭṭhatāpasaparibbājakādīnaṃ. Bhikkhūsu ca kammaṭṭhāne niyuttānaṃ lajjipesalabhikkhūnaṃyeva, na vissaṭṭhakammaṭṭhānānaṃ alajjibhikkhūnanti imamatthaṃ dasseti.
звам̣ багаран̣аарамбхасса санимид̇д̇ам̣ баяож̇анам̣ д̣̇ассзд̇ваа ид̣̇аани сахзд̇угам̣ абхид̇хзяяам̣ д̣̇ассзд̇ум̣ ‘‘виббагин̣н̣аманзгад̇т̇а, баал̣имуд̇д̇авинижчаяа’’нд̇и ааха. д̇ад̇т̇а виббагин̣н̣ам̣ анзгад̇т̇аад̇и иминаа багаран̣аарамбхасса хзд̇ум̣ д̣̇ассзд̇и хзд̇уманд̇ависзсанад̇д̇аа, имасса анзгад̇т̇авиббагин̣н̣ад̇д̇ааязва аажарияасса аарамбхо ход̇и, на авиббагин̣н̣з сад̇и. вагкад̇и хи ‘‘самаахарид̇ваа згад̇т̇а д̣̇ассаяисса’’нд̇и (ви. сан̇г̇а. адта. г̇ант̇аарамбхагат̇аа). баал̣имуд̇д̇авинижчаяанд̇и иминаа багаран̣аабхид̇хзяяам̣. д̇ад̇т̇а гирад̇и вигкибад̇ийд̇и гин̣н̣о, багаарзна гин̣н̣о багин̣н̣о, вивид̇хзна багин̣н̣о виббагин̣н̣о. го со? баал̣имуд̇д̇авинижчаяо, д̇ам̣ виббагин̣н̣ам̣.
Evaṃ pakaraṇārambhassa sanimittaṃ payojanaṃ dassetvā idāni sahetukaṃ abhidheyyaṃ dassetuṃ ‘‘vippakiṇṇamanekattha, pāḷimuttavinicchaya’’nti āha. Tattha vippakiṇṇaṃ anekatthāti iminā pakaraṇārambhassa hetuṃ dasseti hetumantavisesanattā, imassa anekatthavippakiṇṇattāyeva ācariyassa ārambho hoti, na avippakiṇṇe sati. Vakkhati hi ‘‘samāharitvā ekattha dassayissa’’nti (vi. saṅga. aṭṭha. ganthārambhakathā). Pāḷimuttavinicchayanti iminā pakaraṇābhidheyyaṃ. Tattha kirati vikkhipatīti kiṇṇo, pakārena kiṇṇo pakiṇṇo, vividhena pakiṇṇo vippakiṇṇo. Ko so? Pāḷimuttavinicchayo, taṃ vippakiṇṇaṃ.
анзгад̇т̇аад̇и зд̇т̇а сан̇кяааваажаго саб̣б̣анаамиго зга-сад̣̇д̣̇о, на зго анзгз. б̣ахвад̇т̇аваажаго анзгасад̣̇д̣̇о. зганд̇азгаважананд̇оби зга-сад̣̇д̣̇о на-ид̇инибаад̇зна яуд̇д̇ад̇д̇аа б̣ахуважананд̇о ж̇аад̇од̇и. д̇ад̇т̇а анзгад̇т̇а б̣ахуусууд̇и ад̇т̇о, баарааж̇игаган̣д̣адтагат̇аад̣̇ийсу анзгзсу багаран̣зсууд̇и вуд̇д̇ам̣ ход̇и. бораан̣адийгааяам̣ бана анзгад̇т̇аад̇и анзгзсу сигкаабад̣̇абад̣̇зсзсууд̇и ад̇т̇о д̣̇ассид̇о, зван̃жа сад̇и убари ‘‘самаахарид̇ваа згад̇т̇аа’’д̇и вагкамаанад̇д̇аа ‘‘анзгад̇т̇авиббагин̣н̣ам̣ згад̇т̇а самаахарид̇ваа’’д̇и имзсам̣ бад̣̇аанам̣ сахаяог̇ийбхууд̇ад̇д̇аа анзгзсу сигкаабад̣̇абад̣̇зсзсу виббагин̣н̣ам̣ згасмим̣ сигкаабад̣̇абад̣̇зсз самаахарид̇ваад̇и ад̇т̇о бхавзяяа, со жа ад̇т̇о аяуд̇д̇о. гасмаа? анзгзсу багаран̣зсу виббагин̣н̣ам̣ згасмим̣ багаран̣з самаахарид̇ваад̇и ад̇т̇о амхзхи вуд̇д̇о. ат̇а бана ‘‘згад̇т̇аа’’д̇и имасса ‘‘згад̇о’’д̇и ад̇т̇ам̣ вигаббзд̇ваа анзгзсу сигкаабад̣̇абад̣̇зсзсу виббагин̣н̣ам̣ згад̇о самаахарид̇ваад̇и ад̇т̇ам̣ г̇ан̣хзяяа, со ад̇т̇о яуд̇д̇о бхавзяяа.
Anekatthāti ettha saṅkhyāvācako sabbanāmiko eka-saddo, na eko aneke. Bahvatthavācako anekasaddo. Ekantaekavacanantopi eka-saddo na-itinipātena yuttattā bahuvacananto jātoti. Tattha anekattha bahūsūti attho, pārājikakaṇḍaṭṭhakathādīsu anekesu pakaraṇesūti vuttaṃ hoti. Porāṇaṭīkāyaṃ pana anekatthāti anekesu sikkhāpadapadesesūti attho dassito, evañca sati upari ‘‘samāharitvā ekatthā’’ti vakkhamānattā ‘‘anekatthavippakiṇṇaṃ ekattha samāharitvā’’ti imesaṃ padānaṃ sahayogībhūtattā anekesu sikkhāpadapadesesu vippakiṇṇaṃ ekasmiṃ sikkhāpadapadese samāharitvāti attho bhaveyya, so ca attho ayutto. Kasmā? Anekesu pakaraṇesu vippakiṇṇaṃ ekasmiṃ pakaraṇe samāharitvāti attho amhehi vutto. Atha pana ‘‘ekatthā’’ti imassa ‘‘ekato’’ti atthaṃ vikappetvā anekesu sikkhāpadapadesesu vippakiṇṇaṃ ekato samāharitvāti atthaṃ gaṇheyya, so attho yutto bhaveyya.
багадтаанам̣ аал̣ийд̇и баал̣и, уд̇д̇амаанам̣ важанаанам̣ ануггамод̇и ад̇т̇о. ат̇а ваа ад̇д̇ад̇т̇абарад̇т̇аад̣̇ибхзд̣̇ам̣ ад̇т̇ам̣ баалзд̇и рагкад̇ийд̇и баал̣и, лал̣аанамависзсо. гаа саа? винаяад̇анд̇и. мужжад̇ийд̇и муд̇д̇о, баал̣ид̇о муд̇д̇о баал̣имуд̇д̇о. чинд̣̇ияад̇з анзнаад̇и чаяо, нийхарид̇ваа чаяо нижчаяо, висзсзна нижчаяо винижчаяо, киламад̣̇д̣̇анаагаарзна бавад̇д̇о сад̣̇д̣̇анаяо ад̇т̇анаяо жа. баал̣имуд̇д̇о жа со винижчаяо жаад̇и баал̣имуд̇д̇авинижчаяо, д̇ам̣ баал̣имуд̇д̇авинижчаяам̣. ид̣̇ан̃жа ‘‘аанаг̇араа кад̣̇иравана’’нд̇иаад̣̇ийсу вияа язбхуяяанаяавасзна вуд̇д̇ам̣ гад̇т̇ажи баал̣ивинижчаяассаби д̣̇иссанад̇о. бораан̣адийгааяам̣ бана баал̣ивинижчаяо жа баал̣имуд̇д̇авинижчаяо жа баал̣имуд̇д̇авинижчаяод̇и звам̣ згад̣̇зсасаруубзгасзсавасзна ваа зд̇ам̣ вуд̇д̇анд̇и д̣̇адтаб̣б̣анд̇и д̣̇уд̇ияанаяоби вуд̇д̇о, зван̃жа сад̇и баал̣ивинижчаяабаал̣имуд̇д̇авинижчаязхи ан̃н̃асса винижчаяасса абхааваа гимзд̇зна г̇ант̇аг̇аругарзна баал̣имуд̇д̇аг̇г̇ахан̣зна. висзсанан̃хи самбхаваб̣яабхижаарз жа сад̇и саад̇т̇агам̣ сияаад̇и батаманаяова аараад̇ханийяо ход̇и.
Pakaṭṭhānaṃ āḷīti pāḷi, uttamānaṃ vacanānaṃ anukkamoti attho. Atha vā attatthaparatthādibhedaṃ atthaṃ pāleti rakkhatīti pāḷi, laḷānamaviseso. Kā sā? Vinayatanti. Muccatīti mutto, pāḷito mutto pāḷimutto. Chindiyate anenāti chayo, nīharitvā chayo nicchayo, visesena nicchayo vinicchayo, khilamaddanākārena pavatto saddanayo atthanayo ca. Pāḷimutto ca so vinicchayo cāti pāḷimuttavinicchayo, taṃ pāḷimuttavinicchayaṃ. Idañca ‘‘ānagarā khadiravana’’ntiādīsu viya yebhuyyanayavasena vuttaṃ katthaci pāḷivinicchayassapi dissanato. Porāṇaṭīkāyaṃ pana pāḷivinicchayo ca pāḷimuttavinicchayo ca pāḷimuttavinicchayoti evaṃ ekadesasarūpekasesavasena vā etaṃ vuttanti daṭṭhabbanti dutiyanayopi vutto, evañca sati pāḷivinicchayapāḷimuttavinicchayehi aññassa vinicchayassa abhāvā kimetena ganthagarukarena pāḷimuttaggahaṇena. Visesanañhi sambhavabyabhicāre ca sati sātthakaṃ siyāti paṭhamanayova ārādhanīyo hoti.
звам̣ сахзд̇угам̣ абхид̇хзяяам̣ д̣̇ассзд̇ваа ид̣̇аани гаран̣аббагаарам̣ д̣̇ассзд̇и ‘‘самаахарид̇ваа’’д̇иаад̣̇инаа. д̣̇увид̇хо хзд̇т̇а гаран̣аббагааро згад̇т̇асамаахаран̣аанаагулагаран̣авасзна. со д̣̇увид̇хоби д̇зна багаарзна багаран̣асса гад̇ад̇д̇аа ‘‘гаран̣аббагааро’’д̇и вужжад̇и. д̇ад̇т̇а самаахариссаамийд̇и самаахарид̇ваа, сам̣-сад̣̇д̣̇о сан̇кзбад̇т̇о, д̇асмаа сан̇кибияа аахариссаамийд̇и ад̇т̇о. анааг̇ад̇агаалигавасзна бажжамаанзна ‘‘д̣̇ассаяисса’’нд̇и бад̣̇зна самаанагаалад̇д̇аа анааг̇ад̇агаалиго ид̇ха д̇ваа-бажжаяо вуд̇д̇о. згад̇т̇аад̇и згасмим̣ ид̇ха винаяасан̇г̇ахаббагаран̣з. згад̇т̇аад̇и ваа згад̇о. д̣̇ассаяиссанд̇и д̣̇ассаяиссаами, н̃аабаяиссаамийд̇и ад̇т̇о. аагулад̇и б̣яаагулад̇ийд̇и аагуло, на аагуло анаагуло, буб̣б̣аабараб̣яаагин̣н̣авирахид̇о баал̣имуд̇д̇авинижчаяо. анаагуланд̇и бана бхааванабум̣сагам̣, д̇асмаа гарад̇хаад̇умаязна гад̇ваасад̣̇д̣̇зна яож̇зд̇ваа д̣̇ассанагирияааяа самб̣анд̇хид̇аб̣б̣ам̣.
Evaṃ sahetukaṃ abhidheyyaṃ dassetvā idāni karaṇappakāraṃ dasseti ‘‘samāharitvā’’tiādinā. Duvidho hettha karaṇappakāro ekatthasamāharaṇaanākulakaraṇavasena. So duvidhopi tena pakārena pakaraṇassa katattā ‘‘karaṇappakāro’’ti vuccati. Tattha samāharissāmīti samāharitvā, saṃ-saddo saṅkhepattho, tasmā saṅkhipiya āharissāmīti attho. Anāgatakālikavasena paccamānena ‘‘dassayissa’’nti padena samānakālattā anāgatakāliko idha tvā-paccayo vutto. Ekatthāti ekasmiṃ idha vinayasaṅgahappakaraṇe. Ekatthāti vā ekato. Dassayissanti dassayissāmi, ñāpayissāmīti attho. Ākulati byākulatīti ākulo, na ākulo anākulo, pubbāparabyākiṇṇavirahito pāḷimuttavinicchayo. Anākulanti pana bhāvanapuṃsakaṃ, tasmā karadhātumayena katvāsaddena yojetvā dassanakiriyāya sambandhitabbaṃ.
звам̣ рад̇анад̇д̇аяабан̣аамаад̣̇игам̣ буб̣б̣агаран̣ам̣ д̣̇ассзд̇ваа ид̣̇аани яз баал̣имуд̇д̇авинижчаяз д̣̇ассзд̇угаамо, д̇зсам̣ ануггамагаран̣ад̇т̇ам̣ маад̇игам̣ табзнд̇о ‘‘д̇ад̇рааяам̣ маад̇игаа’’д̇иаад̣̇имааха. маад̇игааяа хи асад̇и д̣̇ассид̇авинижчаяаа вигиранд̇и вид̇хам̣сзнд̇и яат̇аа д̇ам̣ суд̇д̇зна асан̇г̇ахид̇аани бубпаани. санд̇ияаа бана маад̇игааяа д̣̇ассид̇авинижчаяаа на вигиранд̇и на вид̇хам̣сзнд̇и яат̇аа д̇ам̣ суд̇д̇зна сан̇г̇ахид̇аани бубпаани. д̇ам̣ д̇ам̣ ад̇т̇ам̣ ж̇аанид̇угаамзхи маад̇игаанусаарзна г̇анд̇ваа ижчид̇ижчид̇авинижчаяам̣ бад̇ваа со со ад̇т̇о ж̇аанид̇аб̣б̣о ход̇и, д̇асмаа сукаг̇г̇ахан̣ад̇т̇ам̣ маад̇игаа табид̇аа. д̇ад̇т̇а д̇ад̇раад̇и д̇асмим̣ баал̣имуд̇д̇авинижчаяз. аяанд̇и аяам̣ маяаа вагкамаанаа. маад̇аа вияаад̇и маад̇игаа. яат̇аа хи буд̇д̇аа маад̇ид̇о бабхаванд̇и, звам̣ нид̣̇д̣̇зсабад̣̇аани уд̣̇д̣̇зсад̇о бабхаванд̇и, д̇асмаа уд̣̇д̣̇зсо маад̇игаа вияаад̇и ‘‘маад̇игаа’’д̇и вужжад̇и.
Evaṃ ratanattayapaṇāmādikaṃ pubbakaraṇaṃ dassetvā idāni ye pāḷimuttavinicchaye dassetukāmo, tesaṃ anukkamakaraṇatthaṃ mātikaṃ ṭhapento ‘‘tatrāyaṃ mātikā’’tiādimāha. Mātikāya hi asati dassitavinicchayā vikiranti vidhaṃsenti yathā taṃ suttena asaṅgahitāni pupphāni. Santiyā pana mātikāya dassitavinicchayā na vikiranti na vidhaṃsenti yathā taṃ suttena saṅgahitāni pupphāni. Taṃ taṃ atthaṃ jānitukāmehi mātikānusārena gantvā icchiticchitavinicchayaṃ patvā so so attho jānitabbo hoti, tasmā sukhaggahaṇatthaṃ mātikā ṭhapitā. Tattha tatrāti tasmiṃ pāḷimuttavinicchaye. Ayanti ayaṃ mayā vakkhamānā. Mātā viyāti mātikā. Yathā hi puttā mātito pabhavanti, evaṃ niddesapadāni uddesato pabhavanti, tasmā uddeso mātikā viyāti ‘‘mātikā’’ti vuccati.
д̣̇иваасзяяаад̇иаад̣̇ийсу д̣̇иваасзяяаа д̣̇иваасзяяавинижчаяагат̇аа. баригкааро баригкааравинижчаяагат̇аа…бз… багин̣н̣агам̣ багин̣н̣агавинижчаяагат̇аад̇и яож̇анаа. д̇знзва вагкад̇и ‘‘д̣̇иваасаяанавинижчаяагат̇аа самад̇д̇аа’’д̇иаад̣̇и. ид̇и-сад̣̇д̣̇о ид̣̇амад̇т̇о ваа нид̣̇ассанад̇т̇о ваа барисамаабанад̇т̇о ваа. д̇зсу ид̣̇амад̇т̇з гаа саа? д̣̇иваасзяяаа…бз… багин̣н̣агам̣ ид̇и аяанд̇и. нид̣̇ассанад̇т̇з гат̇ам̣ саа? д̣̇иваасзяяаа…бз… багин̣н̣агам̣ ид̇и д̣̇адтаб̣б̣аад̇и. барисамаабанад̇т̇з саа гид̇д̇агзна барисамад̇д̇аа? д̣̇иваасзяяаа…бз… багин̣н̣агам̣ ид̇и зд̇д̇агзна барисамад̇д̇аад̇и ад̇т̇о. имзсам̣ бана д̣̇иваасзяяаад̣̇ибад̣̇аанам̣ ваагяавиг̇г̇ахам̣ гад̇ваа ад̇т̇з ид̇ха вужжамаанз ад̇ибабан̃жо бхависсад̇и, сод̇уунан̃жа д̣̇уссаллагкан̣ийяо, д̇асмаа д̇асса д̇асса нид̣̇д̣̇зсасса аад̣̇имхиязва яат̇аануруубам̣ вагкаама.
Divāseyyātiādīsu divāseyyā divāseyyavinicchayakathā. Parikkhāro parikkhāravinicchayakathā…pe… pakiṇṇakaṃ pakiṇṇakavinicchayakathāti yojanā. Teneva vakkhati ‘‘divāsayanavinicchayakathā samattā’’tiādi. Iti-saddo idamattho vā nidassanattho vā parisamāpanattho vā. Tesu idamatthe kā sā? Divāseyyā…pe… pakiṇṇakaṃ iti ayanti. Nidassanatthe kathaṃ sā? Divāseyyā…pe… pakiṇṇakaṃ iti daṭṭhabbāti. Parisamāpanatthe sā kittakena parisamattā? Divāseyyā…pe… pakiṇṇakaṃ iti ettakena parisamattāti attho. Imesaṃ pana divāseyyādipadānaṃ vākyaviggahaṃ katvā atthe idha vuccamāne atipapañco bhavissati, sotūnañca dussallakkhaṇīyo, tasmā tassa tassa niddesassa ādimhiyeva yathānurūpaṃ vakkhāma.
г̇ант̇аарамбхагат̇ааван̣н̣анаа нидтид̇аа.
Ganthārambhakathāvaṇṇanā niṭṭhitā.
