| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
க³ந்தா²ரம்ப⁴கதா²வண்ணனா
Ganthārambhakathāvaṇṇanā
தத்தா²தோ³ தாவ ஸப்³ப³ஸக்கதஸ்ஸ ஸப்³ப³ஸத்துத்தமஸ்ஸ ஸத்து²னோ பணாமங் த³ஸ்ஸெந்தோ ஆஹ ‘‘நத்வா நாத²’’ந்த்யாதி³. நாத²ங் சதூஹி நாத²ங்கே³ஹி ஸமன்னாக³தங் ப⁴க³வந்தங் நத்வா வந்தி³த்வா ஆதோ³ ஆதி³ம்ஹி உபஸம்பன்னதோ பட்டா²ய நவகேன பி⁴க்கு²னா அது⁴னா பப்³ப³ஜிதேன உபஸம்பன்னேன மூலபா⁴ஸாய மாக³த⁴பா⁴ஸாய ஸிக்கி²துங் ஸமாஸதோ ஸங்கே²பேன மூலஸிக்க²ங் அஹங் பவக்கா²மீதி பிண்ட³த்தோ².
Tatthādo tāva sabbasakkatassa sabbasattuttamassa satthuno paṇāmaṃ dassento āha ‘‘natvā nātha’’ntyādi. Nāthaṃ catūhi nāthaṅgehi samannāgataṃ bhagavantaṃ natvā vanditvā ādo ādimhi upasampannato paṭṭhāya navakena bhikkhunā adhunā pabbajitena upasampannena mūlabhāsāya māgadhabhāsāya sikkhituṃ samāsato saṅkhepena mūlasikkhaṃ ahaṃ pavakkhāmīti piṇḍattho.
அயங் பன அவயவத்தோ² – நத்வாதி தன்னின்னதப்போணதப்பப்³பா⁴ரோ ஹுத்வா காயவசீமனொத்³வாரேஹி வந்தி³த்வாதி அத்தோ². நாத²தீதி நாதோ², வேனெய்யானங் ஹிதஸுக²ங் மெத்தாயனவஸேன ஆஸீஸதி பத்தே²தீதி அத்தோ², அத² வா நாத²தி வேனெய்யக³தே கிலேஸே உபதாபேதீதி அத்தோ², நாத²தி வா யாசதீதி அத்தோ². ப⁴க³வா ஹி ‘‘ஸாது⁴, பி⁴க்க²வே, பி⁴க்கு² காலேன காலங் அத்தஸம்பத்திங் பச்சவெக்கெ²ய்யா’’திஆதி³னா (அ॰ நி॰ 8.7) ஸத்தானங் தங் தங் ஹிதப்படிபத்திங் யாசித்வாபி கருணாய ஸமுஸ்ஸாஹிதோ தே தத்த² நியோஜேதி. பரமேன வா சித்திஸ்ஸரியேன ஸமன்னாக³தோ ஸப்³ப³ஸத்தே ஈஸதி அபி⁴ப⁴வதீதி பரமிஸ்ஸரோ ப⁴க³வா ‘‘நாதோ²’’தி வுச்சதி. ஸப்³போ³ சாயமத்தோ² ஸத்³த³ஸத்தா²னுஸாரதோ வேதி³தப்³போ³. பவக்கா²மீதி பகாரேன கதெ²ஸ்ஸாமி. மூலஸிக்கா²தி அதி⁴ஸீலஅதி⁴சித்தஅதி⁴பஞ்ஞாவஸேன திஸ்ஸோபி ஸிக்கா², உபஸம்பன்னஸ்ஸ ஸுப்பதிட்டி²தபா⁴வஸாத⁴னட்டே²ன மூலா ச ஸா ஸிக்கி²தப்³ப³தோ ஸிக்கா² சாதி மூலஸிக்கா². க³ந்த²வஸேனெத்த² ஸங்கி²பித்வா வுத்தத்தா தத்³தீ³பனோ க³ந்தோ² ‘‘மூலஸிக்கா²’’தி வுச்சதி.
Ayaṃ pana avayavattho – natvāti tanninnatappoṇatappabbhāro hutvā kāyavacīmanodvārehi vanditvāti attho. Nāthatīti nātho, veneyyānaṃ hitasukhaṃ mettāyanavasena āsīsati patthetīti attho, atha vā nāthati veneyyagate kilese upatāpetīti attho, nāthati vā yācatīti attho. Bhagavā hi ‘‘sādhu, bhikkhave, bhikkhu kālena kālaṃ attasampattiṃ paccavekkheyyā’’tiādinā (a. ni. 8.7) sattānaṃ taṃ taṃ hitappaṭipattiṃ yācitvāpi karuṇāya samussāhito te tattha niyojeti. Paramena vā cittissariyena samannāgato sabbasatte īsati abhibhavatīti paramissaro bhagavā ‘‘nātho’’ti vuccati. Sabbo cāyamattho saddasatthānusārato veditabbo. Pavakkhāmīti pakārena kathessāmi. Mūlasikkhāti adhisīlaadhicittaadhipaññāvasena tissopi sikkhā, upasampannassa suppatiṭṭhitabhāvasādhanaṭṭhena mūlā ca sā sikkhitabbato sikkhā cāti mūlasikkhā. Ganthavasenettha saṅkhipitvā vuttattā taddīpano gantho ‘‘mūlasikkhā’’ti vuccati.
தத்த² கதமங் ஸீலங், கதமங் அதி⁴ஸீலங், கதமங் சித்தங், கதமங் அதி⁴சித்தங், கதமா பஞ்ஞா, கதமா அதி⁴பஞ்ஞாதி? வுச்சதே – பஞ்சங்க³அட்ட²ங்க³த³ஸங்க³ஸீலங் தாவ ஸீலமேவ. பாதிமொக்க²ஸங்வரஸீலங் பன ‘‘அதி⁴ஸீல’’ந்தி வுச்சதி. தஞ்ஹி ஸூரியோ விய பஜ்ஜோதானங், ஸினேரு விய பப்³ப³தானங் ஸப்³ப³லோகியஸீலானங் அதி⁴கஞ்சேவ உத்தமஞ்ச. பாதிமொக்க²ஸங்வரதோபி ச மக்³க³ப²லஸம்பயுத்தமேவ ஸீலங் அதி⁴ஸீலங், தங் பன இத⁴ நாதி⁴ப்பேதங். ந ஹி தங் ஸிக்க²ந்தோ மேது²னங் த⁴ம்மங் படிஸேவதி. காமாவசரானி பன அட்ட² குஸலசித்தானி, லோகியஅட்ட²ஸமாபத்திசித்தானி ச ஏகஜ்ஜ²ங் கத்வா சித்தமேவ. விபஸ்ஸனாபாத³கங் அட்ட²ஸமாபத்திசித்தங் பன ‘‘அதி⁴சித்த’’ந்தி வுச்சதி. தஞ்ஹி ஸப்³ப³லோகியசித்தானங் அதி⁴கஞ்சேவ உத்தமஞ்ச. ததோபி ச மக்³க³ப²லசித்தமேவ அதி⁴சித்தங், தங் பன இத⁴ நாதி⁴ப்பேதங். ந ஹி தங் ஸிக்க²ந்தோ மேது²னங் த⁴ம்மங் படிஸேவதி. ‘‘அத்தி² தி³ன்னங், அத்தி² யிட்ட²’’ந்திஆதி³னயப்பவத்தங் கம்மஸ்ஸகதாஞாணங் பஞ்ஞா, திலக்க²ணாகாரபரிச்சே²த³கங் பன விபஸ்ஸனாஞாணங் ‘‘அதி⁴பஞ்ஞா’’தி வுச்சதி. ஸா ஹி ஸப்³ப³லோகியபஞ்ஞானங் அதி⁴கா சேவ உத்தமா ச. ததோபி ச மக்³க³ப²லபஞ்ஞாவ அதி⁴பஞ்ஞா, ஸா பன இத⁴ நாதி⁴ப்பேதா. ந ஹி தங் ஸிக்க²ந்தோ மேது²னங் த⁴ம்மங் படிஸேவதி.
Tattha katamaṃ sīlaṃ, katamaṃ adhisīlaṃ, katamaṃ cittaṃ, katamaṃ adhicittaṃ, katamā paññā, katamā adhipaññāti? Vuccate – pañcaṅgaaṭṭhaṅgadasaṅgasīlaṃ tāva sīlameva. Pātimokkhasaṃvarasīlaṃ pana ‘‘adhisīla’’nti vuccati. Tañhi sūriyo viya pajjotānaṃ, sineru viya pabbatānaṃ sabbalokiyasīlānaṃ adhikañceva uttamañca. Pātimokkhasaṃvaratopi ca maggaphalasampayuttameva sīlaṃ adhisīlaṃ, taṃ pana idha nādhippetaṃ. Na hi taṃ sikkhanto methunaṃ dhammaṃ paṭisevati. Kāmāvacarāni pana aṭṭha kusalacittāni, lokiyaaṭṭhasamāpatticittāni ca ekajjhaṃ katvā cittameva. Vipassanāpādakaṃ aṭṭhasamāpatticittaṃ pana ‘‘adhicitta’’nti vuccati. Tañhi sabbalokiyacittānaṃ adhikañceva uttamañca. Tatopi ca maggaphalacittameva adhicittaṃ, taṃ pana idha nādhippetaṃ. Na hi taṃ sikkhanto methunaṃ dhammaṃ paṭisevati. ‘‘Atthi dinnaṃ, atthi yiṭṭha’’ntiādinayappavattaṃ kammassakatāñāṇaṃ paññā, tilakkhaṇākāraparicchedakaṃ pana vipassanāñāṇaṃ ‘‘adhipaññā’’ti vuccati. Sā hi sabbalokiyapaññānaṃ adhikā ceva uttamā ca. Tatopi ca maggaphalapaññāva adhipaññā, sā pana idha nādhippetā. Na hi taṃ sikkhanto methunaṃ dhammaṃ paṭisevati.
தாஸு தீஸு அதி⁴ஸீலஸிக்கா² சாரித்தவாரித்தவஸேன து³வித⁴ம்பி ஸீலங் யதா²னுஸிட்ட²ங் படிபஜ்ஜமானேன, தப்படிபக்கே² கிலேஸே தத³ங்க³ப்பஹானவஸேன பஜஹந்தேன ஸிக்கி²தப்³பா³. அதி⁴சித்தஸிக்கா² யதா²வுத்தேஸு ஆரம்மணேஸு அபி⁴யோக³வஸேன ஜா²னப்படிபக்கா²னங் நீவரணக³ணானங் விக்க²ம்ப⁴னப்பஹானங் குருமானேன ஸிக்கி²தப்³பா³. அதி⁴பஞ்ஞாஸிக்கா² பன யதா²னுரூபங் தத³ங்க³ப்பஹானஸமுச்சே²த³வஸேன ஸானுஸயே கிலேஸே ஸமுச்சி²ந்த³ந்தேன ஸிக்கி²தப்³பா³. தஸ்மா ஸுப்பதிட்டி²தபா⁴வஸாத⁴னட்டே²ன மூலா ச ஸா ஸிக்கி²தப்³ப³தோ ஸிக்கா² சாதி மூலஸிக்கா², கம்மவசனிச்சா²யங் ‘‘மூலஸிக்க²’’ந்தி வுத்தங்.
Tāsu tīsu adhisīlasikkhā cārittavārittavasena duvidhampi sīlaṃ yathānusiṭṭhaṃ paṭipajjamānena, tappaṭipakkhe kilese tadaṅgappahānavasena pajahantena sikkhitabbā. Adhicittasikkhā yathāvuttesu ārammaṇesu abhiyogavasena jhānappaṭipakkhānaṃ nīvaraṇagaṇānaṃ vikkhambhanappahānaṃ kurumānena sikkhitabbā. Adhipaññāsikkhā pana yathānurūpaṃ tadaṅgappahānasamucchedavasena sānusaye kilese samucchindantena sikkhitabbā. Tasmā suppatiṭṭhitabhāvasādhanaṭṭhena mūlā ca sā sikkhitabbato sikkhā cāti mūlasikkhā, kammavacanicchāyaṃ ‘‘mūlasikkha’’nti vuttaṃ.
ஸமாஸீயதே ஸங்கி²பீயதேதி ஸமாஸோ, ததோ ஸமாஸதோ. ஸமக்³கே³ன ஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னோதி பி⁴க்கு². தத்த² ஸப்³ப³ந்திமேன பரியாயேன பஞ்சவக்³க³கரணீயே கம்மே யாவதிகா பி⁴க்கூ² கம்மப்பத்தா, தேஸங் ஆக³தத்தா, ச²ந்தா³ரஹானங் ச²ந்த³ஸ்ஸ ஆஹடத்தா, ஸம்முகீ²பூ⁴தானஞ்ச அப்படிக்கோஸனதோ ஏகஸ்மிங் கம்மே ஸமக்³க³பா⁴வங் உபக³தேன ஸங்கே⁴ன தீஹி அனுஸ்ஸாவனாஹி ஏகாய ஞத்தியா காதப்³ப³கம்மஸங்கா²தேன ஞத்திசதுத்தே²ன த⁴ம்மிகேன வினயகம்மேன வத்து²ஞத்திஅனுஸ்ஸாவனஸீமாபரிஸாஸம்பத்திஸம்பன்னத்தா அகோபேதப்³ப³தங், அப்படிக்கோஸிதப்³ப³தங் உபக³தேன டா²னாரஹேன காரணாரஹேன ஸத்து²ஸாஸனாரஹேன உபஸம்பன்னோ நாம, உபரிபா⁴வங் ஸமாபன்னோ பத்தோதி அத்தோ². பி⁴க்கு²பா⁴வோ ஹி உபரிபா⁴வோ. தஞ்சேஸ யதா²வுத்தேன கம்மேன ஸமாபன்னத்தா ‘‘உபஸம்பன்னோ’’தி வுச்சதி, தேன பி⁴க்கு²னா. ஊனபஞ்சவஸ்ஸதாய நவகோ, தேன நவகேன அது⁴னா பப்³ப³ஜிதேன, அசிரபப்³ப³ஜிதேனாதி வுத்தங் ஹோதி. ஆதோ³தி ஆதி³ம்ஹியேவாதி அத்தோ², ஆதி³தோ பட்டா²யாதி வா. அபி ச தே²ரோ ‘‘ஆதோ³’’தி வசனேன ஸத்³தா⁴பப்³ப³ஜிதானங் குலபுத்தானங் ஆலஸியதோ³ஸேன, அப்படிபஜ்ஜந்தானங் அஞ்ஞாணதோ³ஸேன ச அஞ்ஞதா² படிபஜ்ஜந்தானங் ஸங்வேக³ங் ஜனேதி. கத²ங்? அதிது³ல்லப⁴ங் க²ணங் ஸமவாயங் படிலபி⁴த்வா தங்க²ணங் ந குஸீதேன வா நிரத்த²ககதா²பஸுதேன வா வீதினாமேதப்³ப³ங், கிங் காதப்³ப³ங்? ஆதி³தோ பட்டா²ய நிரந்தரமேவ தீஸு ஸிக்கா²ஸு ஆத³ரோ ஜனேதப்³போ³தி.
Samāsīyate saṅkhipīyateti samāso, tato samāsato. Samaggena saṅghena ñatticatutthena kammena akuppena ṭhānārahena upasampannoti bhikkhu. Tattha sabbantimena pariyāyena pañcavaggakaraṇīye kamme yāvatikā bhikkhū kammappattā, tesaṃ āgatattā, chandārahānaṃ chandassa āhaṭattā, sammukhībhūtānañca appaṭikkosanato ekasmiṃ kamme samaggabhāvaṃ upagatena saṅghena tīhi anussāvanāhi ekāya ñattiyā kātabbakammasaṅkhātena ñatticatutthena dhammikena vinayakammena vatthuñattianussāvanasīmāparisāsampattisampannattā akopetabbataṃ, appaṭikkositabbataṃ upagatena ṭhānārahena kāraṇārahena satthusāsanārahena upasampanno nāma, uparibhāvaṃ samāpanno pattoti attho. Bhikkhubhāvo hi uparibhāvo. Tañcesa yathāvuttena kammena samāpannattā ‘‘upasampanno’’ti vuccati, tena bhikkhunā. Ūnapañcavassatāya navako, tena navakena adhunā pabbajitena, acirapabbajitenāti vuttaṃ hoti. Ādoti ādimhiyevāti attho, ādito paṭṭhāyāti vā. Api ca thero ‘‘ādo’’ti vacanena saddhāpabbajitānaṃ kulaputtānaṃ ālasiyadosena, appaṭipajjantānaṃ aññāṇadosena ca aññathā paṭipajjantānaṃ saṃvegaṃ janeti. Kathaṃ? Atidullabhaṃ khaṇaṃ samavāyaṃ paṭilabhitvā taṅkhaṇaṃ na kusītena vā niratthakakathāpasutena vā vītināmetabbaṃ, kiṃ kātabbaṃ? Ādito paṭṭhāya nirantarameva tīsu sikkhāsu ādaro janetabboti.
‘‘ஸா மாக³தீ⁴ மூலபா⁴ஸா, நரா யாயாதி³கப்பிகா;
‘‘Sā māgadhī mūlabhāsā, narā yāyādikappikā;
ப்³ரஹ்மானோ சஸ்ஸுதாலாபா, ஸம்பு³த்³தா⁴ சாபி பா⁴ஸரே’’தி. –
Brahmāno cassutālāpā, sambuddhā cāpi bhāsare’’ti. –
வசனதோ மூலபா⁴ஸாயாதி மாக³த⁴மூலாய பா⁴ஸாய, ஸபா⁴வனிருத்தியா பா⁴ஸாயாதி வுத்தங் ஹோதி. ஸிக்கி²துந்தி உக்³க³ண்ஹிதுங்.
Vacanato mūlabhāsāyāti māgadhamūlāya bhāsāya, sabhāvaniruttiyā bhāsāyāti vuttaṃ hoti. Sikkhitunti uggaṇhituṃ.
