| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
உத்தரவினிச்ச²ய-டீகா
Uttaravinicchaya-ṭīkā
க³ந்தா²ரம்ப⁴கதா²வண்ணனா
Ganthārambhakathāvaṇṇanā
(க)
(Ka)
தே³வாதிதே³வங் ஸுக³தங், தே³வப்³ர்ஹ்மிந்த³வந்தி³தங்;
Devātidevaṃ sugataṃ, devabrhmindavanditaṃ;
த⁴ம்மஞ்ச வட்டுபச்சே²த³ங், நத்வா வட்டாதிதங் க³ணங்.
Dhammañca vaṭṭupacchedaṃ, natvā vaṭṭātitaṃ gaṇaṃ.
(க²)
(Kha)
வந்த³னாமயபுஞ்ஞேன, கம்மேன ரதனத்தயே;
Vandanāmayapuññena, kammena ratanattaye;
செ²த்வா உபத்³த³வே ஸப்³பே³, ஆரபி⁴ஸ்ஸங் ஸமாஹிதோ.
Chetvā upaddave sabbe, ārabhissaṃ samāhito.
(க³)
(Ga)
தே²ரேன பு³த்³த⁴த³த்தேன, ரசிதஸ்ஸ ஸமாஸதோ;
Therena buddhadattena, racitassa samāsato;
ஸங்வண்ணனமஸங்கிண்ணங், உத்தரஸ்ஸ யதா²ப³லங்.
Saṃvaṇṇanamasaṃkiṇṇaṃ, uttarassa yathābalaṃ.
1. அதா²யமாசரியோ அத்தனோ விரசிதே வினயே தஸ்ஸுபனிஸ்ஸயே வினயபிடகே ச பி⁴க்கூ²னங் நானப்பகாரகோஸல்லஜனநத்த²ங் பரிவாரட்ட²கதா²யஞ்ச ஆக³தவினிச்ச²யங் ஸங்க³ஹெத்வா உத்தரபகரணங் வண்ணயிதுகாமோ பட²மங் தாவ அந்தராயனிவாரணேன யதா²தி⁴ப்பேதஸாத⁴னத்த²ங் ரதனத்தயங் வந்த³ந்தோ ஆஹ ‘‘ஸப்³ப³ஸத்துத்தம’’ந்திஆதி³.
1. Athāyamācariyo attano viracite vinaye tassupanissaye vinayapiṭake ca bhikkhūnaṃ nānappakārakosallajananatthaṃ parivāraṭṭhakathāyañca āgatavinicchayaṃ saṅgahetvā uttarapakaraṇaṃ vaṇṇayitukāmo paṭhamaṃ tāva antarāyanivāraṇena yathādhippetasādhanatthaṃ ratanattayaṃ vandanto āha ‘‘sabbasattuttama’’ntiādi.
பகரணாரம்பே⁴ ரதனத்தயவந்த³னாபயோஜனங் தத்த² தத்தா²சரியேஹி ப³ஹுதா⁴ பபஞ்சிதங், அம்ஹேஹி ச வினயவினிச்ச²யவண்ணனாயங் ஸமாஸதோ த³ஸ்ஸிதந்தி ந தங் இத⁴ வண்ணயிஸ்ஸாம. பகரணாபி⁴தெ⁴ய்ய கரணப்பகாரபயோஜனானிபி தத்த² த³ஸ்ஸிதனயானுஸாரேன இதா⁴பி வேதி³தப்³பா³னி. ஸம்ப³ந்தா⁴தி³த³ஸ்ஸனமுகே²ன அனுத்தானபத³வண்ணனமேவெத்த² கரிஸ்ஸாமி.
Pakaraṇārambhe ratanattayavandanāpayojanaṃ tattha tatthācariyehi bahudhā papañcitaṃ, amhehi ca vinayavinicchayavaṇṇanāyaṃ samāsato dassitanti na taṃ idha vaṇṇayissāma. Pakaraṇābhidheyya karaṇappakārapayojanānipi tattha dassitanayānusārena idhāpi veditabbāni. Sambandhādidassanamukhena anuttānapadavaṇṇanamevettha karissāmi.
ஜினங், த⁴ம்மஞ்ச, க³ணஞ்ச வந்தி³த்வா உத்தரங் தா³னி கரிஸ்ஸாமீதி ஸம்ப³ந்தோ⁴. கிங்விஸிட்ட²ங் ஜினங், த⁴ம்மங், க³ணஞ்ச வந்தி³த்வாதி ஆஹ ‘‘ஸப்³ப³ஸத்துத்தம’’ந்திஆதி³. தத்த² ஸப்³ப³ஸத்துத்தமந்தி பஞ்சஸு காமகு³ணேஸு ஸத்தா ஆஸத்தா விஸத்தா லக்³கி³தாதி ஸத்தா, பரமத்த²தோ ஸத்தபஞ்ஞத்தியா உபாதா³னபூ⁴தா உபாதா³னக்க²ந்தா⁴ வோஹாரதோ க²ந்த⁴ஸந்ததிங் உபாதா³ய பஞ்ஞத்தா ஸம்முதி ‘‘ஸத்தா’’தி வுச்சந்தி. தே பன காமாவசராதி³பூ⁴மிவஸேன, நிரயாதி³பதே³ஸவஸேன, அஹேதுகாதி³படிஸந்தி⁴வஸேனாதி ஏவமாதீ³ஹி அனந்தபபே⁴தா³. தேஸு கீ²ணாஸவானங் யதா²வுத்தனிப்³ப³சனத்தே²ன ஸத்தவோஹாரோ ந லப்³ப⁴தி. ததா²பி தே பூ⁴தபுப்³ப³க³தியா வா தங்ஸதி³ஸத்தா வா ‘‘ஸத்தா’’தி வுச்சந்தி. ஸப்³பே³ ச தே ஸத்தா சா தி ஸப்³ப³ஸத்தா. உத்³த⁴டதமத்தா, உக்³க³ததமத்தா, ஸெட்ட²த்தா ச உத்தமோ, ஸப்³ப³ஸத்தானங் லோகியலோகுத்தரேஹி ரூபாரூபகு³ணேஹி உத்தமோ, ஸப்³ப³ஸத்தேஸு வா உத்தமோ பவரோ ஸெட்டோ²தி ஸப்³ப³ஸத்துத்தமோ. ‘‘ஜின’’ந்தி ஏதஸ்ஸ விஸேஸனங்.
Jinaṃ, dhammañca, gaṇañca vanditvā uttaraṃ dāni karissāmīti sambandho. Kiṃvisiṭṭhaṃ jinaṃ, dhammaṃ, gaṇañca vanditvāti āha ‘‘sabbasattuttama’’ntiādi. Tattha sabbasattuttamanti pañcasu kāmaguṇesu sattā āsattā visattā laggitāti sattā, paramatthato sattapaññattiyā upādānabhūtā upādānakkhandhā vohārato khandhasantatiṃ upādāya paññattā sammuti ‘‘sattā’’ti vuccanti. Te pana kāmāvacarādibhūmivasena, nirayādipadesavasena, ahetukādipaṭisandhivasenāti evamādīhi anantapabhedā. Tesu khīṇāsavānaṃ yathāvuttanibbacanatthena sattavohāro na labbhati. Tathāpi te bhūtapubbagatiyā vā taṃsadisattā vā ‘‘sattā’’ti vuccanti. Sabbe ca te sattā cā ti sabbasattā. Uddhaṭatamattā, uggatatamattā, seṭṭhattā ca uttamo, sabbasattānaṃ lokiyalokuttarehi rūpārūpaguṇehi uttamo, sabbasattesu vā uttamo pavaro seṭṭhoti sabbasattuttamo. ‘‘Jina’’nti etassa visesanaṃ.
புனபி கிங்விஸிட்ட²ந்தி ஆஹ ‘‘தீ⁴ர’’ந்தி. தீ⁴ வுச்சதி பஞ்ஞா, தாய ஈரதி வத்ததீதி தீ⁴ரோ, தங். தாதி³பா⁴வேன இந்த³கீ²லஸினேருஆத³யோ விய அட்ட²லோகத⁴ம்மஸங்கா²தேன பு⁴ஸவாதேன அகம்பியட்டே²ன, சதுவேஸாரஜ்ஜவஸேன ஸதே³வகே லோகே கேனசி அகம்பனீயட்டே²ன ச தீ⁴ரங், தி⁴திஸம்பன்னந்தி அத்தோ². இத³ம்பி தஸ்ஸேவ விஸேஸனங்.
Punapi kiṃvisiṭṭhanti āha ‘‘dhīra’’nti. Dhī vuccati paññā, tāya īrati vattatīti dhīro, taṃ. Tādibhāvena indakhīlasineruādayo viya aṭṭhalokadhammasaṅkhātena bhusavātena akampiyaṭṭhena, catuvesārajjavasena sadevake loke kenaci akampanīyaṭṭhena ca dhīraṃ, dhitisampannanti attho. Idampi tasseva visesanaṃ.
வந்தி³த்வாதி காயவசீமனொத்³வாரேஹி அபி⁴வாதெ³த்வாதி அத்தோ², யதா²பு⁴ச்சகு³ணஸங்கித்தனேன தோ²மெத்வா. ஸிரஸாதி ப⁴த்திபா⁴வனதுத்தமங்கே³ன கரணபூ⁴தேன. இமினா விஸேஸதோ காயபணாமோ த³ஸ்ஸிதோ, கு³ணஸங்கித்தனேன வசீபணாமோ, உப⁴யபணாமேஹி நானந்தரியகதாய மனோபணாமோபி த³ஸ்ஸிதோ ச ஹோதி.
Vanditvāti kāyavacīmanodvārehi abhivādetvāti attho, yathābhuccaguṇasaṃkittanena thometvā. Sirasāti bhattibhāvanatuttamaṅgena karaṇabhūtena. Iminā visesato kāyapaṇāmo dassito, guṇasaṃkittanena vacīpaṇāmo, ubhayapaṇāmehi nānantariyakatāya manopaṇāmopi dassito ca hoti.
ஜினந்தி தே³வபுத்தகிலேஸாபி⁴ஸங்கா²ரமச்சுக²ந்த⁴மாரஸங்கா²தே பஞ்சவிதே⁴ மாரே ப³லவித⁴மனஸமஉச்சே²த³பஹானஸஹாயவேகல்லனிதா³னோபச்சே²த³விஸயாதிக்கமவஸேன பஞ்சஹி ஆகாரேஹி ஜிதவாதி ஜினோ, தங்.
Jinanti devaputtakilesābhisaṅkhāramaccukhandhamārasaṅkhāte pañcavidhe māre balavidhamanasamaucchedapahānasahāyavekallanidānopacchedavisayātikkamavasena pañcahi ākārehi jitavāti jino, taṃ.
‘‘த⁴ம்ம’’ந்தி ஏதஸ்ஸ நிப்³ப³சனாதி³வஸேன அத்த²வினிச்ச²யோ ஹெட்டா² த³ஸ்ஸிதோவ. அத⁴ம்மவித்³த⁴ங்ஸந்தி த⁴ம்மஸங்கா²தஸ்ஸ குஸலஸ்ஸ படிபக்க²த்தா அத⁴ம்மோ வுச்சதி அகுஸலத⁴ம்மோ, தங் அகுஸலஸங்கா²தங் அத⁴ம்மங் வித்³த⁴ங்ஸேதி வினாஸேதி பஜஹதி தத³ங்க³விக்க²ம்ப⁴னஸமுச்சே²த³படிப்பஸ்ஸத்³தி⁴னிஸ்ஸரணப்பஹானேனாதி அத⁴ம்மவித்³த⁴ங்ஸோ, ஸபரியத்திகோ நவலோகுத்தரோ த⁴ம்மோ. பரியத்தி ஹி பஞ்சன்னங் பஹானானங் மூலகாரணத்தா ப²லூபசாரேன ததா² வுச்சதி, தங் அத⁴ம்மவித்³த⁴ங்ஸங். ‘‘த⁴ம்ம’’ந்தி ஏதஸ்ஸ விஸேஸனங்.
‘‘Dhamma’’nti etassa nibbacanādivasena atthavinicchayo heṭṭhā dassitova. Adhammaviddhaṃsanti dhammasaṅkhātassa kusalassa paṭipakkhattā adhammo vuccati akusaladhammo, taṃ akusalasaṅkhātaṃ adhammaṃ viddhaṃseti vināseti pajahati tadaṅgavikkhambhanasamucchedapaṭippassaddhinissaraṇappahānenāti adhammaviddhaṃso, sapariyattiko navalokuttaro dhammo. Pariyatti hi pañcannaṃ pahānānaṃ mūlakāraṇattā phalūpacārena tathā vuccati, taṃ adhammaviddhaṃsaṃ. ‘‘Dhamma’’nti etassa visesanaṃ.
க³ணந்தி அட்ட²ன்னங் அரியபுக்³க³லானங் ஸமூஹங், ஸங்க⁴ந்தி அத்தோ². அங்க³ணனாஸனந்தி அத்தனோ நிஸ்ஸயங் அங்க³ந்தி மத்தெ²ந்தீதி அங்க³ணா, கிலேஸா ராக³தோ³ஸமோஹா, தே அங்க³ணே நாஸேதி யதா²யோக³ங் தத³ங்க³விக்க²ம்ப⁴னஸமுச்சே²த³படிப்பஸ்ஸத்³தி⁴னிஸ்ஸரணப்பஹானேஹி பஜஹதீதி அங்க³ணனாஸனோ, தங். ‘‘க³ண’’ந்தி ஏதஸ்ஸ விஸேஸனங்.
Gaṇanti aṭṭhannaṃ ariyapuggalānaṃ samūhaṃ, saṅghanti attho. Aṅgaṇanāsananti attano nissayaṃ aṅganti matthentīti aṅgaṇā, kilesā rāgadosamohā, te aṅgaṇe nāseti yathāyogaṃ tadaṅgavikkhambhanasamucchedapaṭippassaddhinissaraṇappahānehi pajahatīti aṅgaṇanāsano, taṃ. ‘‘Gaṇa’’nti etassa visesanaṃ.
2. மயா வினயஸ்ஸ யோ ஸாரோ வினிச்ச²யோ ரசிதோ, தஸ்ஸ வினிச்ச²யஸ்ஸாதி யோஜனா. நத்தி² தஸ்ஸ உத்தரோதி அனுத்தரோ, ஸப்³பே³ஸு வினிச்ச²யேஸு, ஸப்³பே³ஸங் வா வினிச்ச²யானங் அனுத்தரோ உத்தமோ வினிச்ச²யோதி ஸப்³பா³னுத்தரோ, தங். உத்தரங் பகரணங் இதா³னி கரிஸ்ஸாமீதி யோஜனா.
2. Mayā vinayassa yo sāro vinicchayo racito, tassa vinicchayassāti yojanā. Natthi tassa uttaroti anuttaro, sabbesu vinicchayesu, sabbesaṃ vā vinicchayānaṃ anuttaro uttamo vinicchayoti sabbānuttaro, taṃ. Uttaraṃ pakaraṇaṃ idāni karissāmīti yojanā.
3. ப⁴ணதோதி ப⁴ணந்தஸ்ஸ பகு³ணங் வாசுக்³க³தங் கரொந்தஸ்ஸ. பட²தோதி பட²ந்தஸ்ஸ வாசுக்³க³தங் ஸஜ்ஜா²யந்தஸ்ஸ. பயுஞ்ஜதோதி தத்த² பகாரேன யுஞ்ஜந்தஸ்ஸ, தங் அஞ்ஞேஸங் வாசெந்தஸ்ஸ வா. ஸுணதோதி பரேஹி வுச்சமானங் ஸுணந்தஸ்ஸ. சிந்தயதோதி யதா²ஸுதங் அத்த²தோ, ஸத்³த³தோ ச சிந்தெந்தஸ்ஸ. ‘‘அபு³த்³த⁴ஸ்ஸ பு³த்³தி⁴வட்³ட⁴ன’’ந்தி வத்தப்³பே³ கா³தா²ப³ந்த⁴வஸேன விப⁴த்திலோபோ. அபு³த்³த⁴ஸ்ஸ பா³லஸ்ஸ வினயே அப்பகதஞ்ஞுனோ பி⁴க்கு²பி⁴க்கு²னிஜனஸ்ஸ. பு³த்³தி⁴வட்³ட⁴னங் வினயவினிச்ச²யே பஞ்ஞாவுத்³தி⁴னிப்பா²த³கங். அத² வா பு³த்³த⁴ஸ்ஸ வினிச்ச²யே கதபரிசயத்தா பஞ்ஞவதோ ஜனஸ்ஸ பு³த்³தி⁴வட்³ட⁴னங் பு³த்³தி⁴யா பஞ்ஞாய திக்க²விஸத³பா⁴வாபாத³னேன பி⁴ய்யோபா⁴வஸாத⁴கங். பரமங் உத்தமங் உத்தரங் நாம பகரணங் வத³தோ கதெ²ந்தஸ்ஸ மே மம ஸந்திகா நிரதா வினிச்ச²யே, தீஸு ஸிக்கா²ஸு வா விஸேஸேன ரதா நிபோ³த⁴த² ஜானாத² ஸுதமயஞாணங் அபி⁴னிப்பா²தே³தா²தி ஸோதுஜனங் ஸவனே நியோஜேதி.
3.Bhaṇatoti bhaṇantassa paguṇaṃ vācuggataṃ karontassa. Paṭhatoti paṭhantassa vācuggataṃ sajjhāyantassa. Payuñjatoti tattha pakārena yuñjantassa, taṃ aññesaṃ vācentassa vā. Suṇatoti parehi vuccamānaṃ suṇantassa. Cintayatoti yathāsutaṃ atthato, saddato ca cintentassa. ‘‘Abuddhassa buddhivaḍḍhana’’nti vattabbe gāthābandhavasena vibhattilopo. Abuddhassa bālassa vinaye appakataññuno bhikkhubhikkhunijanassa. Buddhivaḍḍhanaṃ vinayavinicchaye paññāvuddhinipphādakaṃ. Atha vā buddhassa vinicchaye kataparicayattā paññavato janassa buddhivaḍḍhanaṃ buddhiyā paññāya tikkhavisadabhāvāpādanena bhiyyobhāvasādhakaṃ. Paramaṃ uttamaṃ uttaraṃ nāma pakaraṇaṃ vadato kathentassa me mama santikā niratā vinicchaye, tīsu sikkhāsu vā visesena ratā nibodhatha jānātha sutamayañāṇaṃ abhinipphādethāti sotujanaṃ savane niyojeti.
