| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
গন্থারম্ভকথাৰণ্ণনা
Ganthārambhakathāvaṇṇanā
ৰিপ্পসন্নেনাতি ৰিৰিধপ্পসন্নেন। কথং? ‘‘ইতিপি সো…পে॰… বুদ্ধো ভগৰা, স্ৰাক্খাতো…পে॰… ৰিঞ্ঞূহি, সুপ্পটিপন্নো…পে॰… লোকস্সা’’তি (অ॰ নি॰ ৫.১০) এৰমাদিনা। ‘‘চেতসা’’তি ৰুত্তত্তা তীসু ৰন্দনাসু চেতোৰন্দনা অধিপ্পেতা। তন্নিন্নতাদিৰসেন কাযাদীহি পণামকরণং ৰন্দনা, গুণৰসেন মনসাপি তথাৰ করণং মানং, পচ্চযপ্পটিপত্তিযাদীহি পূজাকরণং পূজা, পচ্চযাদীনং অভিসঙ্খরণং সক্কচ্চ করণং সক্কারো, তেসং। ভাজনন্তি আধারো, অধিকরণং ৰা।
Vippasannenāti vividhappasannena. Kathaṃ? ‘‘Itipi so…pe… buddho bhagavā, svākkhāto…pe… viññūhi, suppaṭipanno…pe… lokassā’’ti (a. ni. 5.10) evamādinā. ‘‘Cetasā’’ti vuttattā tīsu vandanāsu cetovandanā adhippetā. Tanninnatādivasena kāyādīhi paṇāmakaraṇaṃ vandanā, guṇavasena manasāpi tathāva karaṇaṃ mānaṃ, paccayappaṭipattiyādīhi pūjākaraṇaṃ pūjā, paccayādīnaṃ abhisaṅkharaṇaṃ sakkacca karaṇaṃ sakkāro, tesaṃ. Bhājananti ādhāro, adhikaraṇaṃ vā.
থেরা মহাকস্সপাদযো, তেসং ৰংসোতি থেরৰংসো, আগমাধিগমসম্পদায তস্স ৰংসস্স পদীপভূতাতি থেরৰংসপ্পদীপা, তেসং থেরৰংসপ্পদীপানং। অসংহীরত্তা থিরানং। ৰিনযক্কমেতি ৰিনযপিটকে, আরম্ভানুরূপৰচনমেতং। সুত্তাভিধম্মেসুপি তে থিরা এৰ। ‘‘বুদ্ধং ধম্মঞ্চ সঙ্ঘঞ্চ পুব্বাচরিযসীহানঞ্চা’’তি অৰত্ৰা কস্মা ৰিসুং ৰুত্তন্তি চে? পযোজনৰিসেসদস্সনত্থং। ৰত্থুত্তযস্স হি পণামকরণস্স অন্তরাযনিৰারণং পযোজনং অত্তনো নিস্সযভূতানং আচরিযানং পণামকরণস্স উপকারঞ্ঞুতাদস্সনং। তেন বুদ্ধঞ্চ ধম্মঞ্চ সঙ্ঘঞ্চ ৰন্দিত্ৰা, চ-সদ্দেন পুব্বাচরিযসীহানঞ্চ নমো কত্ৰাতি যোজনা। অথ ৰা ‘‘ৰন্দিত্ৰা’’তি চেতোৰন্দনং দস্সেত্ৰা ততো ‘‘নমো কত্ৰা’’তি ৰাচাৰন্দনা, ‘‘কতঞ্জলী’’তি কাযৰন্দনাপি দস্সিতাতি যোজেতব্বং।
Therā mahākassapādayo, tesaṃ vaṃsoti theravaṃso, āgamādhigamasampadāya tassa vaṃsassa padīpabhūtāti theravaṃsappadīpā, tesaṃ theravaṃsappadīpānaṃ. Asaṃhīrattā thirānaṃ. Vinayakkameti vinayapiṭake, ārambhānurūpavacanametaṃ. Suttābhidhammesupi te thirā eva. ‘‘Buddhaṃ dhammañca saṅghañca pubbācariyasīhānañcā’’ti avatvā kasmā visuṃ vuttanti ce? Payojanavisesadassanatthaṃ. Vatthuttayassa hi paṇāmakaraṇassa antarāyanivāraṇaṃ payojanaṃ attano nissayabhūtānaṃ ācariyānaṃ paṇāmakaraṇassa upakāraññutādassanaṃ. Tena buddhañca dhammañca saṅghañca vanditvā, ca-saddena pubbācariyasīhānañca namo katvāti yojanā. Atha vā ‘‘vanditvā’’ti cetovandanaṃ dassetvā tato ‘‘namo katvā’’ti vācāvandanā, ‘‘katañjalī’’ti kāyavandanāpi dassitāti yojetabbaṃ.
ইদানি অভিধানপ্পযোজনং দস্সেতুং ‘‘পামোক্খ’’ন্তিআদিমাহ। তত্থ পামোক্খন্তি পধানং। সীলঞ্হি সব্বেসং কুসলধম্মানং পধানং আদিভাৰতো। যথা চ সত্তানং খজ্জভোজ্জলেয্যপেয্যৰসেন চতুব্বিধোপি আহারো মুখেন পৰিসিত্ৰা অঙ্গমঙ্গানি ফরতি, এৰং যোগিনোপি চাতুভূমকং কুসলং সীলমুখেন পৰিসিত্ৰা অত্থসিদ্ধিং সম্পাদেতি। তেন ৰুত্তং ‘‘মুখ’’ন্তিআদি। অথ ৰা মুখন্তি উপাযো, তেন মোক্খপ্পৰেসায নিব্বানসচ্ছিকিরিযায মুখং উপাযোতি অত্থো। মহেসিনা যং পাতিমোক্খং পকাসিতন্তি সম্বন্ধো। মহন্তে সীলাদিক্খন্ধে এসি গৰেসীতি মহেসি।
Idāni abhidhānappayojanaṃ dassetuṃ ‘‘pāmokkha’’ntiādimāha. Tattha pāmokkhanti padhānaṃ. Sīlañhi sabbesaṃ kusaladhammānaṃ padhānaṃ ādibhāvato. Yathā ca sattānaṃ khajjabhojjaleyyapeyyavasena catubbidhopi āhāro mukhena pavisitvā aṅgamaṅgāni pharati, evaṃ yoginopi cātubhūmakaṃ kusalaṃ sīlamukhena pavisitvā atthasiddhiṃ sampādeti. Tena vuttaṃ ‘‘mukha’’ntiādi. Atha vā mukhanti upāyo, tena mokkhappavesāya nibbānasacchikiriyāya mukhaṃ upāyoti attho. Mahesinā yaṃ pātimokkhaṃ pakāsitanti sambandho. Mahante sīlādikkhandhe esi gavesīti mahesi.
সূরতেন নিৰাতেনাতি ‘‘তত্থ কতমং সোরচ্চং? যো কাযিকো অৰীতিক্কমো’’তিআদিনা (ধ॰ স॰ ১৩৪৯) সূরতেন, নীচৰুত্তিনা মানুদ্ধচ্চৰসেন অত্তানং অনুক্খিপনভাৰেন নিৰাতেন। ৰিনযাচারযুত্তেন চারিত্তৰারিত্তেহি যুত্তেন। ‘‘সোণত্থেরেন যাচিতো’’তি অৰত্ৰা ‘‘সূরতেনা’’তিআদি কস্মা ৰুত্তং, কিং দুস্সীলেন ৰা দুট্ঠেন ৰা অলজ্জিনা ৰা যাচিতেন ৰণ্ণনা কাতুং ন ৰট্টতীতি চে? ন ন ৰট্টতি। থেরস্স ৰচনং পটিক্খিপিতুং ন সক্কা, এৰরূপগুণো থেরোৰ, যাচনৰসেন কত্তব্বো আদরেনাতি দস্সেতুং ৰুত্তং।
Sūratena nivātenāti ‘‘tattha katamaṃ soraccaṃ? Yo kāyiko avītikkamo’’tiādinā (dha. sa. 1349) sūratena, nīcavuttinā mānuddhaccavasena attānaṃ anukkhipanabhāvena nivātena. Vinayācārayuttena cārittavārittehi yuttena. ‘‘Soṇattherena yācito’’ti avatvā ‘‘sūratenā’’tiādi kasmā vuttaṃ, kiṃ dussīlena vā duṭṭhena vā alajjinā vā yācitena vaṇṇanā kātuṃ na vaṭṭatīti ce? Na na vaṭṭati. Therassa vacanaṃ paṭikkhipituṃ na sakkā, evarūpaguṇo therova, yācanavasena kattabbo ādarenāti dassetuṃ vuttaṃ.
নামেনাতি অত্তনো গুণনামেন। সদ্দলক্খণসুভতো, ৰিনিচ্ছযসুভতো, ৰিঞ্ঞেয্যসুভতো চ সুভং।
Nāmenāti attano guṇanāmena. Saddalakkhaṇasubhato, vinicchayasubhato, viññeyyasubhato ca subhaṃ.
গন্থারম্ভকথাৰণ্ণনা নিট্ঠিতা।
Ganthārambhakathāvaṇṇanā niṭṭhitā.
