| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
উত্তরৰিনিচ্ছয-টীকা
Uttaravinicchaya-ṭīkā
গন্থারম্ভকথাৰণ্ণনা
Ganthārambhakathāvaṇṇanā
(ক)
(Ka)
দেৰাতিদেৰং সুগতং, দেৰব্র্হ্মিন্দৰন্দিতং।
Devātidevaṃ sugataṃ, devabrhmindavanditaṃ;
ধম্মঞ্চ ৰট্টুপচ্ছেদং, নত্ৰা ৰট্টাতিতং গণং॥
Dhammañca vaṭṭupacchedaṃ, natvā vaṭṭātitaṃ gaṇaṃ.
(খ)
(Kha)
ৰন্দনামযপুঞ্ঞেন, কম্মেন রতনত্তযে।
Vandanāmayapuññena, kammena ratanattaye;
ছেত্ৰা উপদ্দৰে সব্বে, আরভিস্সং সমাহিতো॥
Chetvā upaddave sabbe, ārabhissaṃ samāhito.
(গ)
(Ga)
থেরেন বুদ্ধদত্তেন, রচিতস্স সমাসতো।
Therena buddhadattena, racitassa samāsato;
সংৰণ্ণনমসংকিণ্ণং, উত্তরস্স যথাবলং॥
Saṃvaṇṇanamasaṃkiṇṇaṃ, uttarassa yathābalaṃ.
১. অথাযমাচরিযো অত্তনো ৰিরচিতে ৰিনযে তস্সুপনিস্সযে ৰিনযপিটকে চ ভিক্খূনং নানপ্পকারকোসল্লজননত্থং পরিৰারট্ঠকথাযঞ্চ আগতৰিনিচ্ছযং সঙ্গহেত্ৰা উত্তরপকরণং ৰণ্ণযিতুকামো পঠমং তাৰ অন্তরাযনিৰারণেন যথাধিপ্পেতসাধনত্থং রতনত্তযং ৰন্দন্তো আহ ‘‘সব্বসত্তুত্তম’’ন্তিআদি।
1. Athāyamācariyo attano viracite vinaye tassupanissaye vinayapiṭake ca bhikkhūnaṃ nānappakārakosallajananatthaṃ parivāraṭṭhakathāyañca āgatavinicchayaṃ saṅgahetvā uttarapakaraṇaṃ vaṇṇayitukāmo paṭhamaṃ tāva antarāyanivāraṇena yathādhippetasādhanatthaṃ ratanattayaṃ vandanto āha ‘‘sabbasattuttama’’ntiādi.
পকরণারম্ভে রতনত্তযৰন্দনাপযোজনং তত্থ তত্থাচরিযেহি বহুধা পপঞ্চিতং, অম্হেহি চ ৰিনযৰিনিচ্ছযৰণ্ণনাযং সমাসতো দস্সিতন্তি ন তং ইধ ৰণ্ণযিস্সাম। পকরণাভিধেয্য করণপ্পকারপযোজনানিপি তত্থ দস্সিতনযানুসারেন ইধাপি ৰেদিতব্বানি। সম্বন্ধাদিদস্সনমুখেন অনুত্তানপদৰণ্ণনমেৰেত্থ করিস্সামি।
Pakaraṇārambhe ratanattayavandanāpayojanaṃ tattha tatthācariyehi bahudhā papañcitaṃ, amhehi ca vinayavinicchayavaṇṇanāyaṃ samāsato dassitanti na taṃ idha vaṇṇayissāma. Pakaraṇābhidheyya karaṇappakārapayojanānipi tattha dassitanayānusārena idhāpi veditabbāni. Sambandhādidassanamukhena anuttānapadavaṇṇanamevettha karissāmi.
জিনং, ধম্মঞ্চ, গণঞ্চ ৰন্দিত্ৰা উত্তরং দানি করিস্সামীতি সম্বন্ধো। কিংৰিসিট্ঠং জিনং, ধম্মং, গণঞ্চ ৰন্দিত্ৰাতি আহ ‘‘সব্বসত্তুত্তম’’ন্তিআদি। তত্থ সব্বসত্তুত্তমন্তি পঞ্চসু কামগুণেসু সত্তা আসত্তা ৰিসত্তা লগ্গিতাতি সত্তা, পরমত্থতো সত্তপঞ্ঞত্তিযা উপাদানভূতা উপাদানক্খন্ধা ৰোহারতো খন্ধসন্ততিং উপাদায পঞ্ঞত্তা সম্মুতি ‘‘সত্তা’’তি ৰুচ্চন্তি। তে পন কামাৰচরাদিভূমিৰসেন, নিরযাদিপদেসৰসেন, অহেতুকাদিপটিসন্ধিৰসেনাতি এৰমাদীহি অনন্তপভেদা। তেসু খীণাসৰানং যথাৰুত্তনিব্বচনত্থেন সত্তৰোহারো ন লব্ভতি। তথাপি তে ভূতপুব্বগতিযা ৰা তংসদিসত্তা ৰা ‘‘সত্তা’’তি ৰুচ্চন্তি। সব্বে চ তে সত্তা চা তি সব্বসত্তা। উদ্ধটতমত্তা, উগ্গততমত্তা, সেট্ঠত্তা চ উত্তমো, সব্বসত্তানং লোকিযলোকুত্তরেহি রূপারূপগুণেহি উত্তমো, সব্বসত্তেসু ৰা উত্তমো পৰরো সেট্ঠোতি সব্বসত্তুত্তমো। ‘‘জিন’’ন্তি এতস্স ৰিসেসনং।
Jinaṃ, dhammañca, gaṇañca vanditvā uttaraṃ dāni karissāmīti sambandho. Kiṃvisiṭṭhaṃ jinaṃ, dhammaṃ, gaṇañca vanditvāti āha ‘‘sabbasattuttama’’ntiādi. Tattha sabbasattuttamanti pañcasu kāmaguṇesu sattā āsattā visattā laggitāti sattā, paramatthato sattapaññattiyā upādānabhūtā upādānakkhandhā vohārato khandhasantatiṃ upādāya paññattā sammuti ‘‘sattā’’ti vuccanti. Te pana kāmāvacarādibhūmivasena, nirayādipadesavasena, ahetukādipaṭisandhivasenāti evamādīhi anantapabhedā. Tesu khīṇāsavānaṃ yathāvuttanibbacanatthena sattavohāro na labbhati. Tathāpi te bhūtapubbagatiyā vā taṃsadisattā vā ‘‘sattā’’ti vuccanti. Sabbe ca te sattā cā ti sabbasattā. Uddhaṭatamattā, uggatatamattā, seṭṭhattā ca uttamo, sabbasattānaṃ lokiyalokuttarehi rūpārūpaguṇehi uttamo, sabbasattesu vā uttamo pavaro seṭṭhoti sabbasattuttamo. ‘‘Jina’’nti etassa visesanaṃ.
পুনপি কিংৰিসিট্ঠন্তি আহ ‘‘ধীর’’ন্তি। ধী ৰুচ্চতি পঞ্ঞা, তায ঈরতি ৰত্ততীতি ধীরো, তং। তাদিভাৰেন ইন্দখীলসিনেরুআদযো ৰিয অট্ঠলোকধম্মসঙ্খাতেন ভুসৰাতেন অকম্পিযট্ঠেন, চতুৰেসারজ্জৰসেন সদেৰকে লোকে কেনচি অকম্পনীযট্ঠেন চ ধীরং, ধিতিসম্পন্নন্তি অত্থো। ইদম্পি তস্সেৰ ৰিসেসনং।
Punapi kiṃvisiṭṭhanti āha ‘‘dhīra’’nti. Dhī vuccati paññā, tāya īrati vattatīti dhīro, taṃ. Tādibhāvena indakhīlasineruādayo viya aṭṭhalokadhammasaṅkhātena bhusavātena akampiyaṭṭhena, catuvesārajjavasena sadevake loke kenaci akampanīyaṭṭhena ca dhīraṃ, dhitisampannanti attho. Idampi tasseva visesanaṃ.
ৰন্দিত্ৰাতি কাযৰচীমনোদ্ৰারেহি অভিৰাদেত্ৰাতি অত্থো, যথাভুচ্চগুণসংকিত্তনেন থোমেত্ৰা। সিরসাতি ভত্তিভাৰনতুত্তমঙ্গেন করণভূতেন। ইমিনা ৰিসেসতো কাযপণামো দস্সিতো, গুণসংকিত্তনেন ৰচীপণামো, উভযপণামেহি নানন্তরিযকতায মনোপণামোপি দস্সিতো চ হোতি।
Vanditvāti kāyavacīmanodvārehi abhivādetvāti attho, yathābhuccaguṇasaṃkittanena thometvā. Sirasāti bhattibhāvanatuttamaṅgena karaṇabhūtena. Iminā visesato kāyapaṇāmo dassito, guṇasaṃkittanena vacīpaṇāmo, ubhayapaṇāmehi nānantariyakatāya manopaṇāmopi dassito ca hoti.
জিনন্তি দেৰপুত্তকিলেসাভিসঙ্খারমচ্চুখন্ধমারসঙ্খাতে পঞ্চৰিধে মারে বলৰিধমনসমউচ্ছেদপহানসহাযৰেকল্লনিদানোপচ্ছেদৰিসযাতিক্কমৰসেন পঞ্চহি আকারেহি জিতৰাতি জিনো, তং।
Jinanti devaputtakilesābhisaṅkhāramaccukhandhamārasaṅkhāte pañcavidhe māre balavidhamanasamaucchedapahānasahāyavekallanidānopacchedavisayātikkamavasena pañcahi ākārehi jitavāti jino, taṃ.
‘‘ধম্ম’’ন্তি এতস্স নিব্বচনাদিৰসেন অত্থৰিনিচ্ছযো হেট্ঠা দস্সিতোৰ। অধম্মৰিদ্ধংসন্তি ধম্মসঙ্খাতস্স কুসলস্স পটিপক্খত্তা অধম্মো ৰুচ্চতি অকুসলধম্মো, তং অকুসলসঙ্খাতং অধম্মং ৰিদ্ধংসেতি ৰিনাসেতি পজহতি তদঙ্গৰিক্খম্ভনসমুচ্ছেদপটিপ্পস্সদ্ধিনিস্সরণপ্পহানেনাতি অধম্মৰিদ্ধংসো, সপরিযত্তিকো নৰলোকুত্তরো ধম্মো। পরিযত্তি হি পঞ্চন্নং পহানানং মূলকারণত্তা ফলূপচারেন তথা ৰুচ্চতি, তং অধম্মৰিদ্ধংসং। ‘‘ধম্ম’’ন্তি এতস্স ৰিসেসনং।
‘‘Dhamma’’nti etassa nibbacanādivasena atthavinicchayo heṭṭhā dassitova. Adhammaviddhaṃsanti dhammasaṅkhātassa kusalassa paṭipakkhattā adhammo vuccati akusaladhammo, taṃ akusalasaṅkhātaṃ adhammaṃ viddhaṃseti vināseti pajahati tadaṅgavikkhambhanasamucchedapaṭippassaddhinissaraṇappahānenāti adhammaviddhaṃso, sapariyattiko navalokuttaro dhammo. Pariyatti hi pañcannaṃ pahānānaṃ mūlakāraṇattā phalūpacārena tathā vuccati, taṃ adhammaviddhaṃsaṃ. ‘‘Dhamma’’nti etassa visesanaṃ.
গণন্তি অট্ঠন্নং অরিযপুগ্গলানং সমূহং, সঙ্ঘন্তি অত্থো। অঙ্গণনাসনন্তি অত্তনো নিস্সযং অঙ্গন্তি মত্থেন্তীতি অঙ্গণা, কিলেসা রাগদোসমোহা, তে অঙ্গণে নাসেতি যথাযোগং তদঙ্গৰিক্খম্ভনসমুচ্ছেদপটিপ্পস্সদ্ধিনিস্সরণপ্পহানেহি পজহতীতি অঙ্গণনাসনো, তং। ‘‘গণ’’ন্তি এতস্স ৰিসেসনং।
Gaṇanti aṭṭhannaṃ ariyapuggalānaṃ samūhaṃ, saṅghanti attho. Aṅgaṇanāsananti attano nissayaṃ aṅganti matthentīti aṅgaṇā, kilesā rāgadosamohā, te aṅgaṇe nāseti yathāyogaṃ tadaṅgavikkhambhanasamucchedapaṭippassaddhinissaraṇappahānehi pajahatīti aṅgaṇanāsano, taṃ. ‘‘Gaṇa’’nti etassa visesanaṃ.
২. মযা ৰিনযস্স যো সারো ৰিনিচ্ছযো রচিতো, তস্স ৰিনিচ্ছযস্সাতি যোজনা। নত্থি তস্স উত্তরোতি অনুত্তরো, সব্বেসু ৰিনিচ্ছযেসু, সব্বেসং ৰা ৰিনিচ্ছযানং অনুত্তরো উত্তমো ৰিনিচ্ছযোতি সব্বানুত্তরো, তং। উত্তরং পকরণং ইদানি করিস্সামীতি যোজনা।
2. Mayā vinayassa yo sāro vinicchayo racito, tassa vinicchayassāti yojanā. Natthi tassa uttaroti anuttaro, sabbesu vinicchayesu, sabbesaṃ vā vinicchayānaṃ anuttaro uttamo vinicchayoti sabbānuttaro, taṃ. Uttaraṃ pakaraṇaṃ idāni karissāmīti yojanā.
৩. ভণতোতি ভণন্তস্স পগুণং ৰাচুগ্গতং করোন্তস্স। পঠতোতি পঠন্তস্স ৰাচুগ্গতং সজ্ঝাযন্তস্স। পযুঞ্জতোতি তত্থ পকারেন যুঞ্জন্তস্স, তং অঞ্ঞেসং ৰাচেন্তস্স ৰা। সুণতোতি পরেহি ৰুচ্চমানং সুণন্তস্স। চিন্তযতোতি যথাসুতং অত্থতো, সদ্দতো চ চিন্তেন্তস্স। ‘‘অবুদ্ধস্স বুদ্ধিৰড্ঢন’’ন্তি ৰত্তব্বে গাথাবন্ধৰসেন ৰিভত্তিলোপো। অবুদ্ধস্স বালস্স ৰিনযে অপ্পকতঞ্ঞুনো ভিক্খুভিক্খুনিজনস্স। বুদ্ধিৰড্ঢনং ৰিনযৰিনিচ্ছযে পঞ্ঞাৰুদ্ধিনিপ্ফাদকং। অথ ৰা বুদ্ধস্স ৰিনিচ্ছযে কতপরিচযত্তা পঞ্ঞৰতো জনস্স বুদ্ধিৰড্ঢনং বুদ্ধিযা পঞ্ঞায তিক্খৰিসদভাৰাপাদনেন ভিয্যোভাৰসাধকং। পরমং উত্তমং উত্তরং নাম পকরণং ৰদতো কথেন্তস্স মে মম সন্তিকা নিরতা ৰিনিচ্ছযে, তীসু সিক্খাসু ৰা ৰিসেসেন রতা নিবোধথ জানাথ সুতমযঞাণং অভিনিপ্ফাদেথাতি সোতুজনং সৰনে নিযোজেতি।
3.Bhaṇatoti bhaṇantassa paguṇaṃ vācuggataṃ karontassa. Paṭhatoti paṭhantassa vācuggataṃ sajjhāyantassa. Payuñjatoti tattha pakārena yuñjantassa, taṃ aññesaṃ vācentassa vā. Suṇatoti parehi vuccamānaṃ suṇantassa. Cintayatoti yathāsutaṃ atthato, saddato ca cintentassa. ‘‘Abuddhassa buddhivaḍḍhana’’nti vattabbe gāthābandhavasena vibhattilopo. Abuddhassa bālassa vinaye appakataññuno bhikkhubhikkhunijanassa. Buddhivaḍḍhanaṃ vinayavinicchaye paññāvuddhinipphādakaṃ. Atha vā buddhassa vinicchaye kataparicayattā paññavato janassa buddhivaḍḍhanaṃ buddhiyā paññāya tikkhavisadabhāvāpādanena bhiyyobhāvasādhakaṃ. Paramaṃ uttamaṃ uttaraṃ nāma pakaraṇaṃ vadato kathentassa me mama santikā niratā vinicchaye, tīsu sikkhāsu vā visesena ratā nibodhatha jānātha sutamayañāṇaṃ abhinipphādethāti sotujanaṃ savane niyojeti.
