| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
கதா²வத்து²பகரண-அனுடீகா
Kathāvatthupakaraṇa-anuṭīkā
க³ந்தா²ரம்ப⁴வண்ணனா
Ganthārambhavaṇṇanā
ஸமுதா³யே ஏகதே³ஸா அந்தோக³தா⁴தி ஸமுதா³யோ தேஸங் அதி⁴ட்டா²னபா⁴வேன வுத்தோ யதா² ‘‘ருக்கே² ஸாகா²’’தி த³ஸ்ஸேதி ‘‘கதா²ஸமுதா³யஸ்ஸா’’திஆதி³னா. தத்த² கதா²னந்தி திஸ்ஸோ கதா² வாதோ³ ஜப்போ விதண்டா³தி. தேஸு யேன பமாணதக்கேஹி பக்க²படிபக்கா²னங் பதிட்டா²பனபடிக்கே²பா ஹொந்தி, ஸோ வாதோ³. ஏகாதி⁴கரணா ஹி அஞ்ஞமஞ்ஞவிருத்³தா⁴ த⁴ம்மா பக்க²படிபக்கா² யதா² ‘‘ஹோதி ததா²க³தோ பரங் மரணா, ந ஹோதி ததா²க³தோ பரங் மரணா’’தி (தீ³॰ நி॰ 1.65). நானாதி⁴கரணா பன அஞ்ஞமஞ்ஞவிருத்³தா⁴பி பக்க²படிபக்கா² நாம ந ஹொந்தி யதா² ‘‘அனிச்சங் ரூபங், நிச்சங் நிப்³பா³ன’’ந்தி. யேன ச²லஜாதினிக்³க³ஹட்டா²னேஹி பக்க²படிபக்கா²னங் பதிட்டா²பனங் படிக்கே²பாரம்போ⁴, ஸோ ஜப்போ. ஆரம்ப⁴மத்தமேவெத்த², ந அத்த²ஸித்³தீ⁴தி த³ஸ்ஸனத்த²ங் ஆரம்ப⁴க்³க³ஹணங். யாய பன ச²லஜாதினிக்³க³ஹட்டா²னேஹி படிபக்க²படிக்கே²பாய வாயமந்தி, ஸா விதண்டா³. தத்த² அத்த²விகப்புபபத்தியா வசனவிகா⁴தோ ச²லங் யதா² ‘‘நவகம்ப³லோயங் புரிஸோ, ராஜா நோ ஸக்கீ²’’தி ஏவமாதி³ . தூ³ஸனபா⁴ஸா ஜாதயோ, உத்தரபதிரூபகாதி அத்தோ². நிக்³க³ஹட்டா²னானி பரதோ ஆவி ப⁴விஸ்ஸந்தி. ஏவங் வாத³ஜப்பவிதண்ட³ப்பபே⁴தா³ஸு தீஸு கதா²ஸு இத⁴ வாத³கதா² ‘‘கதா²’’தி அதி⁴ப்பேதா. ஸா ச கோ² அவிபரீதத⁴ம்மதாய பதிட்டா²பனவஸேன, ந விக்³கா³ஹிககதா²பா⁴வேனாதி வேதி³தப்³ப³ங். மாதிகாட²பனேனேவாதி உத்³தே³ஸதே³ஸனாய ஏவ. ட²பிதஸ்ஸாதி தே³ஸிதஸ்ஸ. தே³ஸனா ஹி தே³ஸேதப்³ப³மத்த²ங் வினெய்யஸந்தானேஸு ட²பனதோ நிக்கி²பனதோ ட²பனங், நிக்கே²போதி ச வுச்சதி.
Samudāye ekadesā antogadhāti samudāyo tesaṃ adhiṭṭhānabhāvena vutto yathā ‘‘rukkhe sākhā’’ti dasseti ‘‘kathāsamudāyassā’’tiādinā. Tattha kathānanti tisso kathā vādo jappo vitaṇḍāti. Tesu yena pamāṇatakkehi pakkhapaṭipakkhānaṃ patiṭṭhāpanapaṭikkhepā honti, so vādo. Ekādhikaraṇā hi aññamaññaviruddhā dhammā pakkhapaṭipakkhā yathā ‘‘hoti tathāgato paraṃ maraṇā, na hoti tathāgato paraṃ maraṇā’’ti (dī. ni. 1.65). Nānādhikaraṇā pana aññamaññaviruddhāpi pakkhapaṭipakkhā nāma na honti yathā ‘‘aniccaṃ rūpaṃ, niccaṃ nibbāna’’nti. Yena chalajātiniggahaṭṭhānehi pakkhapaṭipakkhānaṃ patiṭṭhāpanaṃ paṭikkhepārambho, so jappo. Ārambhamattamevettha, na atthasiddhīti dassanatthaṃ ārambhaggahaṇaṃ. Yāya pana chalajātiniggahaṭṭhānehi paṭipakkhapaṭikkhepāya vāyamanti, sā vitaṇḍā. Tattha atthavikappupapattiyā vacanavighāto chalaṃ yathā ‘‘navakambaloyaṃ puriso, rājā no sakkhī’’ti evamādi . Dūsanabhāsā jātayo, uttarapatirūpakāti attho. Niggahaṭṭhānāni parato āvi bhavissanti. Evaṃ vādajappavitaṇḍappabhedāsu tīsu kathāsu idha vādakathā ‘‘kathā’’ti adhippetā. Sā ca kho aviparītadhammatāya patiṭṭhāpanavasena, na viggāhikakathābhāvenāti veditabbaṃ. Mātikāṭhapanenevāti uddesadesanāya eva. Ṭhapitassāti desitassa. Desanā hi desetabbamatthaṃ vineyyasantānesu ṭhapanato nikkhipanato ṭhapanaṃ, nikkhepoti ca vuccati.
க³ந்தா²ரம்ப⁴வண்ணனா நிட்டி²தா.
Ganthārambhavaṇṇanā niṭṭhitā.
