| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
။ နမော တသ္သ ဘဂဝတော အရဟတော သမ္မာသမ္ဗုဒ္ဓသ္သ။
Namo tassa bhagavato arahato sammāsambuddhassa
ယမကပကရဏ-အနုဋီကာ
Yamakapakaraṇa-anuṭīkā
ဂန္ထာရမ္ဘဝဏ္ဏနာ
Ganthārambhavaṇṇanā
သင္ခေပေနေဝာတိ ဥဒ္ဒေသေနေဝ။ ယံ ‘‘မာတိကာဌပန’’န္တိ ဝုတ္တံ။ ဓမ္မေသူတိ ခန္ဓာဒိဓမ္မေသု ကုသလာဒိဓမ္မေသု စ။ အဝိပရီတတော ဂဟိတေသု ဓမ္မေသု မူလယမကာဒိဝသေန ပဝတ္တိယမာနာ ဒေသနာ ဝေနေယ္ယာနံ နာနပ္ပကာရကောသလ္လာဝဟာ ပရိညာကိစ္စသာဓနီ စ ဟောတိ, န ဝိပရီတတောတိ အာဟ ‘‘ဝိပရီတဂ္ဂဟဏံ။ပေ.။ အာရဒ္ဓ’’န္တိ။ ဧတေန ကထာဝတ္ထုပကရဏဒေသနာနန္တရံ ယမကပကရဏဒေသနာယ ကာရဏမာဟ။ တတ္ထ ဝိပရီတဂ္ဂဟဏန္တိ ပုဂ္ဂလပရိဂ္ဂဟဏာဒိမိစ္ဆာဂာဟံ။ ဓမ္မပုဂ္ဂလောကာသာဒိနိသ္သယာနန္တိ ‘‘ယေ ကေစိ ကုသလာ ဓမ္မာ, သဗ္ဗေ တေ ကုသလမူလာ’’တိအာဒိနာ (ယမ. ၁.မူလယမက.၁) ဓမ္မေ, ‘‘ယသ္သ ရူပက္ခန္ဓော ဥပ္ပဇ္ဇတိ, တသ္သ ဝေဒနာက္ခန္ဓော ဥပ္ပဇ္ဇတီ’’တိအာဒိနာ (ယမ. ၁.ခန္ဓယမက.၅၀) ပုဂ္ဂလံ ‘‘ယတ္ထ ရူပက္ခန္ဓော ဥပ္ပဇ္ဇတိ, တတ္ထ ဝေဒနာက္ခန္ဓော ဥပ္ပဇ္ဇတီ’’တိအာဒိနာ (ယမ. ၁.ခန္ဓယမက.၅၁) ဩကာသံ နိသ္သာယ အာရဗ္ဘ ပဝတ္တာနံ။ အာဒိ-သဒ္ဒေန ပုဂ္ဂလောကာသဥပ္ပာဒနိရောဓတဒုဘယပရိညာဒီနံ သင္ဂဟော ဒဋ္ဌဗ္ဗော။ သန္နိဋ္ဌာနသံသယာနန္တိ ပာဠိဂတိပဋိဝစနသရူပဒသ္သနပဋိက္ခိပနပဋိသေဓနနယေဟိ ယထာပုစ္ဆိတသ္သ အတ္ထသ္သ နိစ္ဆယကရဏံ သန္နိဋ္ဌာနံ, တဒဘာဝတော သံသယနံ သံသယော။ တေသံ သန္နိဋ္ဌာနသံသယာနံ။
Saṅkhepenevāti uddeseneva. Yaṃ ‘‘mātikāṭhapana’’nti vuttaṃ. Dhammesūti khandhādidhammesu kusalādidhammesu ca. Aviparītato gahitesu dhammesu mūlayamakādivasena pavattiyamānā desanā veneyyānaṃ nānappakārakosallāvahā pariññākiccasādhanī ca hoti, na viparītatoti āha ‘‘viparītaggahaṇaṃ…pe… āraddha’’nti. Etena kathāvatthupakaraṇadesanānantaraṃ yamakapakaraṇadesanāya kāraṇamāha. Tattha viparītaggahaṇanti puggalapariggahaṇādimicchāgāhaṃ. Dhammapuggalokāsādinissayānanti ‘‘ye keci kusalā dhammā, sabbe te kusalamūlā’’tiādinā (yama. 1.mūlayamaka.1) dhamme, ‘‘yassa rūpakkhandho uppajjati, tassa vedanākkhandho uppajjatī’’tiādinā (yama. 1.khandhayamaka.50) puggalaṃ ‘‘yattha rūpakkhandho uppajjati, tattha vedanākkhandho uppajjatī’’tiādinā (yama. 1.khandhayamaka.51) okāsaṃ nissāya ārabbha pavattānaṃ. Ādi-saddena puggalokāsauppādanirodhatadubhayapariññādīnaṃ saṅgaho daṭṭhabbo. Sanniṭṭhānasaṃsayānanti pāḷigatipaṭivacanasarūpadassanapaṭikkhipanapaṭisedhananayehi yathāpucchitassa atthassa nicchayakaraṇaṃ sanniṭṭhānaṃ, tadabhāvato saṃsayanaṃ saṃsayo. Tesaṃ sanniṭṭhānasaṃsayānaṃ.
ကာမဉ္စေတ္ထ ဓမ္မပဋိဂ္ဂာဟကာနံ သံသယပုဗ္ဗကံ သန္နိဋ္ဌာနန္တိ ပဌမံ သံသယော ဝတ္တဗ္ဗော, ဒေသေန္တသ္သ ပန ဘဂဝတော သန္နိဋ္ဌာနပုဗ္ဗကော သံသယောတိ ဒသ္သနတ္ထံ အယံ ပဒာနုက္ကမော ကတော။ သဗ္ဗဉ္ဟိ ပရိညေယ္ယံ ဟတ္ထာမလကံ ဝိယ ပစ္စက္ခံ ကတ္ဝာ ဌိတသ္သ ဓမ္မသာမိနော န ကတ္ထစိ သံသယော, ဝိသ္သဇ္ဇေတုကာမတာယ ပန ဝိနေယ္ယဇ္ဈာသယဂတံ သံသယံ ဒသ္သေန္တော သံသယိတဝသေန ပုစ္ဆံ ကရောတီတိ ဧဝံ ဝိသ္သဇ္ဇနပုစ္ဆနဝသေန န သန္နိဋ္ဌာနသံသယာ လဗ္ဘန္တီတိ အယမတ္ထော ဒသ္သိတော, နိစ္ဆိတသံသယဓမ္မဝသေနေဝ ပနေတ္ထ သန္နိဋ္ဌာနသံသယာ ဝေဒိတဗ္ဗာ။ တေနာဟ အဋ္ဌကထာယံ ‘‘ကုသလေသု ကုသလာ နု ခော, န နု ခော ကုသလာတိ သန္ဒေဟာဘာဝတော’’တိအာဒိ။ တေနေဝ စ ‘‘သန္နိဋ္ဌာနသံသယာန’’န္တိ, ‘‘သန္နိဋ္ဌာနသံသယဝသေနာ’’တိ စ ပဌမံ သန္နိဋ္ဌာနဂ္ဂဟဏံ ကတံ။
Kāmañcettha dhammapaṭiggāhakānaṃ saṃsayapubbakaṃ sanniṭṭhānanti paṭhamaṃ saṃsayo vattabbo, desentassa pana bhagavato sanniṭṭhānapubbako saṃsayoti dassanatthaṃ ayaṃ padānukkamo kato. Sabbañhi pariññeyyaṃ hatthāmalakaṃ viya paccakkhaṃ katvā ṭhitassa dhammasāmino na katthaci saṃsayo, vissajjetukāmatāya pana vineyyajjhāsayagataṃ saṃsayaṃ dassento saṃsayitavasena pucchaṃ karotīti evaṃ vissajjanapucchanavasena na sanniṭṭhānasaṃsayā labbhantīti ayamattho dassito, nicchitasaṃsayadhammavaseneva panettha sanniṭṭhānasaṃsayā veditabbā. Tenāha aṭṭhakathāyaṃ ‘‘kusalesu kusalā nu kho, na nu kho kusalāti sandehābhāvato’’tiādi. Teneva ca ‘‘sanniṭṭhānasaṃsayāna’’nti, ‘‘sanniṭṭhānasaṃsayavasenā’’ti ca paṭhamaṃ sanniṭṭhānaggahaṇaṃ kataṃ.
တန္တိ ယမကပကရဏံ။ တသ္သ ယေ သမယာဒယော ဝတ္တဗ္ဗာ, တေ ကထာဝတ္ထုပကရဏဒေသနာနန္တရော ဒေသနာသမယော, တာဝတိံသဘဝနမေဝ ဒေသနာဒေသော, ကုသလာကုသလမူလာဒိယမကာကာရေန ဒေသနာတိ ဝိဘာဂတော ‘‘သင္ခေပေနေဝာ’’တိအာဒိဂာထာဟိ ဝိဘာဝိတာ နိမိတ္တေန သဒ္ဓိံ သံဝဏ္ဏနပဋိညာ စာတိ ဣမမတ္ထံ ဒသ္သေန္တော ‘‘သမယဒေသဒေသနာဝသေနာ’’တိအာဒိမာဟ။ နိမိတ္တဉ္ဟေတံ ဣဓ သံဝဏ္ဏနာယ, ယဒိဒံ ကမာနုပ္ပတ္တိ အာဂတဘာရဝာဟိတာ စ ပဏ္ဍိတာနံ ပဏ္ဍိတကိစ္စဘာဝတော။ တတ္ထ အနုပ္ပတ္တံ ဒသ္သေတ္ဝာတိ သမ္ဗန္ဓော။
Tanti yamakapakaraṇaṃ. Tassa ye samayādayo vattabbā, te kathāvatthupakaraṇadesanānantaro desanāsamayo, tāvatiṃsabhavanameva desanādeso, kusalākusalamūlādiyamakākārena desanāti vibhāgato ‘‘saṅkhepenevā’’tiādigāthāhi vibhāvitā nimittena saddhiṃ saṃvaṇṇanapaṭiññā cāti imamatthaṃ dassento ‘‘samayadesadesanāvasenā’’tiādimāha. Nimittañhetaṃ idha saṃvaṇṇanāya, yadidaṃ kamānuppatti āgatabhāravāhitā ca paṇḍitānaṃ paṇḍitakiccabhāvato. Tattha anuppattaṃ dassetvāti sambandho.
တတ္ထာတိ တသ္မိံ သမယာဒိဒသ္သနေ။ ယမနံ ဥပရမနန္တိ ယမော မရဏန္တိ အာဟ ‘‘ဇာတိယာ သတိ မရဏံ ဟောတီတိ။ပေ.။ ဝိသယော’’တိ။ တတ္ထ ယထာ ‘‘ဇာတိယာ သတိ မရဏံ ဟောတီ’’တိ ဇာတိ ယမသ္သ ဝိသယော, ဧဝံ ‘‘ဥပာဒာနက္ခန္ဓေသု သန္တေသု မရဏံ ဟောတီ’’တိ ဥပာဒာနက္ခန္ဓာ ယမသ္သ ဝိသယောတိ ယောဇေတဗ္ဗံ။ တေ ဟိ မရဏဓမ္မိနောတိ။ အနုပ္ပတ္တမရဏံယေဝ ကိဗ္ဗိသကာရိနံ ပုဂ္ဂလံ ယမပုရိသာ ဝိဝိဓာ ကမ္မကာရဏာ ကရောန္တိ, န အပ္ပတ္တမရဏန္တိ မရဏံ ယမသ္သ ဝိသယော ဝုတ္တော။ အာဏာပဝတ္တိဋ္ဌာနန္တိ ဣဒံ ဝိသယ-သဒ္ဒသ္သ အတ္ထဝစနံ။ ဒေသံ ဝာတိ ကာမာဒိဓာတုတ္တယဒေသံ သန္ဓာယာဟ။ ဓာတုတ္တယိသ္သရော ဟိ မစ္စုရာဇာ။ ပဉ္စာနန္တရိယာနိ အညသတ္ထာရုဒ္ဒေသော စ, တေန ဝာ သဒ္ဓိံ ပဉ္စ ဝေရာနိ ဆ အဘဗ္ဗဋ္ဌာနာနိ။ အာဝတ္တာတိ ပဒက္ခိဏာဝတ္တာ။ တနုရုဟာတိ လောမာ။
Tatthāti tasmiṃ samayādidassane. Yamanaṃ uparamananti yamo maraṇanti āha ‘‘jātiyā sati maraṇaṃ hotīti…pe… visayo’’ti. Tattha yathā ‘‘jātiyā sati maraṇaṃ hotī’’ti jāti yamassa visayo, evaṃ ‘‘upādānakkhandhesu santesu maraṇaṃ hotī’’ti upādānakkhandhā yamassa visayoti yojetabbaṃ. Te hi maraṇadhamminoti. Anuppattamaraṇaṃyeva kibbisakārinaṃ puggalaṃ yamapurisā vividhā kammakāraṇā karonti, na appattamaraṇanti maraṇaṃ yamassa visayo vutto. Āṇāpavattiṭṭhānanti idaṃ visaya-saddassa atthavacanaṃ. Desaṃ vāti kāmādidhātuttayadesaṃ sandhāyāha. Dhātuttayissaro hi maccurājā. Pañcānantariyāni aññasatthāruddeso ca, tena vā saddhiṃ pañca verāni cha abhabbaṭṭhānāni. Āvattāti padakkhiṇāvattā. Tanuruhāti lomā.
ဂန္ထာရမ္ဘဝဏ္ဏနာ နိဋ္ဌိတာ။
Ganthārambhavaṇṇanā niṭṭhitā.
