| Library / Tipiṭaka / තිපිටක • Tipiṭaka / පඤ්‌චපකරණ-මූලටීකා • Pañcapakaraṇa-mūlaṭīkā |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
යමකපකරණ-මූලටීකා
Yamakapakaraṇa-mūlaṭīkā
ගන්‌ථාරම්‌භවණ්‌ණනා
Ganthārambhavaṇṇanā
කථාවත්‌ථුපකරණෙන සඞ්‌ඛෙපෙනෙව දෙසිතෙන ධම්‌මෙසු විපරීතග්‌ගහණං නිවාරෙත්‌වා තෙස්‌වෙව ධම්‌මෙසු ධම්‌මසඞ්‌ගහාදීසු පකාසිතෙසු ධම්‌මපුග්‌ගලොකාසාදිනිස්‌සයානං සන්‌නිට්‌ඨානසංසයානං වසෙන නානප්‌පකාරකඔසල්‌ලත්‌ථං යමකපකරණං ආරද්‌ධං, තං සමයදෙසදෙසකවසෙනෙව දස්‌සෙත්‌වා සංවණ්‌ණනාක්‌කමඤ්‌චස්‌ස අනුප්‌පත්‌තං ‘‘ආගතො භාරො අවස්‌සං වහිතබ්‌බො’’ති සංවණ්‌ණනමස්‌ස පටිජානන්‌තො ආහ ‘‘සඞ්‌ඛෙපෙනෙවා’’තිආදි.
Kathāvatthupakaraṇena saṅkhepeneva desitena dhammesu viparītaggahaṇaṃ nivāretvā tesveva dhammesu dhammasaṅgahādīsu pakāsitesu dhammapuggalokāsādinissayānaṃ sanniṭṭhānasaṃsayānaṃ vasena nānappakārakaosallatthaṃ yamakapakaraṇaṃ āraddhaṃ, taṃ samayadesadesakavaseneva dassetvā saṃvaṇṇanākkamañcassa anuppattaṃ ‘‘āgato bhāro avassaṃ vahitabbo’’ti saṃvaṇṇanamassa paṭijānanto āha ‘‘saṅkhepenevā’’tiādi.
තත්‌ථ යමස්‌ස විසයාතීතොති ජාතියා සති මරණං හොතීති ජාති, පඤ්‌ච වා උපාදානක්‌ඛන්‌ධා යමස්‌ස විසයො, තං සමුදයප්‌පහානෙන අතීතොති අත්‌ථො. යමස්‌ස වා රඤ්‌ඤො විසයං මරණං, තස්‌ස ආණාපවත්‌තිට්‌ඨානං දෙසං වා අතීතො. ‘‘ඡච්‌චාභිඨානානි අභබ්‌බ කාතු’’න්‌ති (ඛු. පා. 6.11; සු. නි. 234) වුත්‌තානං ඡන්‌නං අභබ්‌බට්‌ඨානානං දෙසකොති ඡට්‌ඨානදෙසකො . අයමා එකෙකා හුත්‌වා ආවත්‌තා නීලා අමලා ච තනුරුහා අස්‌සාති අයමාවත්‌තනීලාමලතනුරුහො.
Tattha yamassa visayātītoti jātiyā sati maraṇaṃ hotīti jāti, pañca vā upādānakkhandhā yamassa visayo, taṃ samudayappahānena atītoti attho. Yamassa vā rañño visayaṃ maraṇaṃ, tassa āṇāpavattiṭṭhānaṃ desaṃ vā atīto. ‘‘Chaccābhiṭhānāni abhabba kātu’’nti (khu. pā. 6.11; su. ni. 234) vuttānaṃ channaṃ abhabbaṭṭhānānaṃ desakoti chaṭṭhānadesako. Ayamā ekekā hutvā āvattā nīlā amalā ca tanuruhā assāti ayamāvattanīlāmalatanuruho.
ගන්‌ථාරම්‌භවණ්‌ණනා නිට්‌ඨිතා.
Ganthārambhavaṇṇanā niṭṭhitā.
