| Library / Tipiṭaka / ཏིཔིཊཀ • Tipiṭaka / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā |
པཊྛཱནཔཀརཎ-མཱུལཊཱིཀཱ
Paṭṭhānapakaraṇa-mūlaṭīkā
གནྠཱརམྦྷཝཎྞནཱ
Ganthārambhavaṇṇanā
དིབྦནྟི ཀཱམགུཎཱདཱིཧི ཀཱིལ༹ནྟི ལལ༹ནྟི, ཏེསུ ཝཱ ཝིཧརནྟི, ཝིཛཡསམཏྠཏཱཡོགེན པཙྩཏྠིཀེ ཝིཛེཏུཾ ཨིཙྪནྟི, ཨིསྶརིཡཊྛཱནཱདིསཀྐཱརདཱནགྒཧཎཾ ཏཾཏཾཨཏྠཱནུསཱསནཉྩ ཀརོནྟཱ ཝོཧརནྟི, པུཉྙཡོགཱནུབྷཱཝཔྤཏྟཱཡ ཛུཏིཡཱ ཛོཏནྟི, ཡཐཱབྷིལཱསིཏཉྩ ཝིསཡཾ ཨཔྤཊིགྷཱཏེན གཙྪནྟི, ཡཐིཙྪིཏནིཔྥཱདནེ སཀྐོནྟཱིཏི ཝཱ དེཝཱ, དེཝནཱིཡཱ ཝཱ ཏཾཏཾབྱསནནིཏྠརཎཏྠིཀེཧི སརཎཾ པརཱཡཎནྟི གམནཱིཡཱ, ཨབྷིཏྠཝནཱིཡཱ ཝཱ། སོབྷཱཝིསེསཡོགེན ཀམནཱིཡཱཏི ཝཱ དེཝཱ། ཏེ ཏིཝིདྷཱ – སམྨུཏིདེཝཱ ཨུཔཔཏྟིདེཝཱ ཝིསུདྡྷིདེཝཱཏི། བྷགཝཱ པན ནིརཏིསཡཱཡ ཨབྷིཉྙཱཀཱིལཱ༹ཡ, ཨུཏྟམེཧི དིབྦབྲཧྨཨརིཡཝིཧཱརེཧི, སཔརསནྟཱནསིདྡྷཱཡ པཉྩཝིདྷམཱརཝིཛཡིཙྪཱནིཔྥཏྟིཡཱ, ཙིཏྟིསྶརིཡསཏྟདྷནཱདིསམྨཱཔཊིཔཏྟིཨཝེཙྩཔྤསཱདསཀྐཱརདཱནགྒཧཎསངྑཱཏེན དྷམྨསབྷཱཝཔུགྒལཛ྄ཛྷཱསཡཱནུརཱུཔཱནུསཱསནཱིསངྑཱཏེན ཙ ཝོཧཱརཱཏིསཡེན, པརམཱཡ པཉྙཱསརཱིརཔྤབྷཱསངྑཱཏཱཡ ཛུཏིཡཱ, ཨནོཔམཱཡ ཙ ཉཱཎསརཱིརགཏིཡཱ, མཱརཝིཛཡསབྦཉྙུགུཎཔརཧིཏནིཔྥཱདནེསུ ཨཔྤཊིཧཏཱཡ སཏྟིཡཱ ཙ སམནྣཱགཏཏྟཱ སདེཝཀེན ལོཀེན སརཎནྟི གམནཱིཡཏོ, ཨབྷིཏྠཝནཱིཡཏོ, བྷཏྟིཝསེན ཀམནཱིཡཏོ ཙ སབྦེ ཏེ དེཝེ ཏེཧི གུཎེཧི ཨཏིཀྐནྟོ ཨཏིསཡོ ཝཱ དེཝོཏི དེཝཱཏིདེཝོ། སབྦདེཝེཧི པཱུཛནཱིཡཏརོ དེཝོཏི ཝཱ དེཝཱཏིདེཝོ, ཝིསུདྡྷིདེཝབྷཱཝཾ ཝཱ སབྦཉྙུགུཎཱལངྐཱརཾ པཏྟཏྟཱ ཨཉྙདེཝེཧི ཨཏིརེཀཏརོ ཝཱ དེཝོ དེཝཱཏིདེཝོ། དེཝཱནནྟི ཨུཔཔཏྟིདེཝཱནཾ ཏདཱ དྷམྨཔཊིགྒཱཧཀཱནཾ། སཀྐཱདཱིཧི དེཝེཧི པཧཱརཱདཨསུརིནྡཱདཱིཧི དཱནཝེཧི ཙ པཱུཛིཏོ། ཀཱཡཝཙཱིསཾཡམསྶ སཱིལསྶ ཨིནྡྲིཡསཾཝརསྶ ཙིཏྟསཾཡམསྶ སམཱདྷིསྶ ཙ པཊིཔཀྑཱནཾ ཨཙྩནྟཔཊིཔྤསྶདྡྷིཡཱ སུདྡྷསཾཡམོ།
Dibbanti kāmaguṇādīhi kīḷanti laḷanti, tesu vā viharanti, vijayasamatthatāyogena paccatthike vijetuṃ icchanti, issariyaṭṭhānādisakkāradānaggahaṇaṃ taṃtaṃatthānusāsanañca karontā voharanti, puññayogānubhāvappattāya jutiyā jotanti, yathābhilāsitañca visayaṃ appaṭighātena gacchanti, yathicchitanipphādane sakkontīti vā devā, devanīyā vā taṃtaṃbyasananittharaṇatthikehi saraṇaṃ parāyaṇanti gamanīyā, abhitthavanīyā vā. Sobhāvisesayogena kamanīyāti vā devā. Te tividhā – sammutidevā upapattidevā visuddhidevāti. Bhagavā pana niratisayāya abhiññākīḷāya, uttamehi dibbabrahmaariyavihārehi, saparasantānasiddhāya pañcavidhamāravijayicchānipphattiyā, cittissariyasattadhanādisammāpaṭipattiaveccappasādasakkāradānaggahaṇasaṅkhātena dhammasabhāvapuggalajjhāsayānurūpānusāsanīsaṅkhātena ca vohārātisayena, paramāya paññāsarīrappabhāsaṅkhātāya jutiyā, anopamāya ca ñāṇasarīragatiyā, māravijayasabbaññuguṇaparahitanipphādanesu appaṭihatāya sattiyā ca samannāgatattā sadevakena lokena saraṇanti gamanīyato, abhitthavanīyato, bhattivasena kamanīyato ca sabbe te deve tehi guṇehi atikkanto atisayo vā devoti devātidevo. Sabbadevehi pūjanīyataro devoti vā devātidevo, visuddhidevabhāvaṃ vā sabbaññuguṇālaṅkāraṃ pattattā aññadevehi atirekataro vā devo devātidevo. Devānanti upapattidevānaṃ tadā dhammapaṭiggāhakānaṃ. Sakkādīhi devehi pahārādaasurindādīhi dānavehi ca pūjito. Kāyavacīsaṃyamassa sīlassa indriyasaṃvarassa cittasaṃyamassa samādhissa ca paṭipakkhānaṃ accantapaṭippassaddhiyā suddhasaṃyamo.
ཨིསིསཏྟམོཏི ཙཏུསཙྩཱཝབོདྷགཏིཡཱ ཨིསཡོཏི སངྑྱཾ གཏཱནཾ སཏཾ པསཏྠཱནཾ ཨིསཱིནཾ ཨཏིསཡེན སནྟོ པསཏྠོཏི ཨཏྠོ། ཝིཔསྶཱིཨཱདཡོ ཙ ཨུཔཱདཱཡ བྷགཝཱ ‘‘སཏྟམོ’’ཏི ཝུཏྟོ། ཡཏོ ཝིཉྙཱཎཾ པཙྩུདཱཝཏྟཏི, ཏཾ ནཱམརཱུཔཾ སམུདཡནིརོདྷནེན ནིརོདྷེསཱིཏི ནཱམརཱུཔནིརོདྷནོ། ཨཏིགམྦྷཱིརནཡམཎྜིཏདེསནཾ པཊྛཱནཾ ནཱམ དེསེསི པཀརཎནྟི སམྦནྡྷོ།
Isisattamoti catusaccāvabodhagatiyā isayoti saṅkhyaṃ gatānaṃ sataṃ pasatthānaṃ isīnaṃ atisayena santo pasatthoti attho. Vipassīādayo ca upādāya bhagavā ‘‘sattamo’’ti vutto. Yato viññāṇaṃ paccudāvattati, taṃ nāmarūpaṃ samudayanirodhanena nirodhesīti nāmarūpanirodhano. Atigambhīranayamaṇḍitadesanaṃ paṭṭhānaṃ nāma desesi pakaraṇanti sambandho.
གནྠཱརམྦྷཝཎྞནཱ ནིཊྛིཏཱ།
Ganthārambhavaṇṇanā niṭṭhitā.
