| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā |
༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎
Namo tassa bhagavato arahato sammāsambuddhassa
ཨབྷིདྷམྨཔིཊཀེ
Abhidhammapiṭake
པཉྩཔཀརཎ-ཨནུཊཱིཀཱ
Pañcapakaraṇa-anuṭīkā
དྷཱཏུཀཐཱཔཀརཎ-ཨནུཊཱིཀཱ
Dhātukathāpakaraṇa-anuṭīkā
གནྠཱརམྦྷཝཎྞནཱ
Ganthārambhavaṇṇanā
དྷཱཏུཀཐཱཔཀརཎདེསནཱཡ དེསདེསཀཔརིསཱཔདེསཱ ཝུཏྟཔྤཀཱརཱ ཨེཝཱཏི ཀཱལཱཔདེསཾ དསྶེནྟོ ‘‘དྷཱཏུཀཐཱཔཀརཎཾ དེསེནྟོ’’ཏིཨཱདིམཱཧ། ‘‘ཏསྶེཝ ཨནནྟརཾ ཨདེསཡཱི’’ཏི ཧི ཨིམིནཱ ཝིབྷངྒཱནནྟརཾ དྷཱཏུཀཐཱ དེསིཏཱཏི ཏསྶཱ དེསནཱཀཱལོ ཨཔདིཊྛོ ཧོཏི། ཡེ པན ‘‘ཝིབྷངྒཱནནྟརཾ ཀཐཱཝཏྠུཔཀརཎཾ དེསིཏ’’ནྟི ཝདནྟི, ཏེསཾ ཝཱདཾ པཊིཀྑིཔནྟོ ‘‘ཝིབྷངྒཱནནྟརཾ…པེ॰… དསྶེཏུ’’ནྟི ཨཱཧ།
Dhātukathāpakaraṇadesanāya desadesakaparisāpadesā vuttappakārā evāti kālāpadesaṃ dassento ‘‘dhātukathāpakaraṇaṃ desento’’tiādimāha. ‘‘Tasseva anantaraṃ adesayī’’ti hi iminā vibhaṅgānantaraṃ dhātukathā desitāti tassā desanākālo apadiṭṭho hoti. Ye pana ‘‘vibhaṅgānantaraṃ kathāvatthupakaraṇaṃ desita’’nti vadanti, tesaṃ vādaṃ paṭikkhipanto ‘‘vibhaṅgānantaraṃ…pe… dassetu’’nti āha.
‘‘ཀཱམཱ ཏེ པཋམཱ སེནཱ’’ཏིཨཱདིཝཙནཏོ (སུ॰ ནི॰ ༤༣༨; མཧཱནི॰ ༢༨; ཙཱུལ༹ནི॰ ནནྡམཱཎཝཔུཙྪཱནིདྡེས ༤༧) ཀིལེསཝིདྡྷཾསནམྤི དེཝཔུཏྟམཱརསྶ བལཝིདྷམནནྟི སཀྐཱ ཝཏྟུཾ, ‘‘ཨཔྤཝཏྟིཀརཎཝསེན ཀིལེསཱབྷིསངྑཱརམཱརཱན’’ནྟི པན ཝུཙྩམཱནཏྟཱ ཁནྟིབལསདྡྷཱབལཱདིཨཱནུབྷཱཝེན ཨུསྶཱཧཔརིསཱབལབྷཉྫནམེཝ དེཝཔུཏྟམཱརསྶ བལཝིདྡྷཾསནཾ དཊྛབྦཾ། ཝིསཡཱཏིཀྐམནཾ ཀཱམདྷཱཏུསམཏིཀྐམོ། སམུདཡཔྤཧཱནཔརིཉྙཱཝསེནཱཏི པཧཱནཱབྷིསམཡཔརིཉྙཱབྷིསམཡཱནཾ ཝསེན། ནནུ ཙེཏཾ པཉྩནྣཾ མཱརཱནཾ བྷཉྫནཾ སཱཝཀེསུཔི ལབྦྷཏེཝཱཏི ཙོདནཾ མནསི ཀཏྭཱ ཨཱཧ ‘‘པརཱུཔནིསྶཡརཧིཏ’’ནྟིཨཱདི། ཝཱིརསྶ བྷཱཝོ ཝཱིརིཡནྟི ཀཏྭཱ ཝུཏྟཾ ‘‘མཧཱཝཱིརིཡོཏི མཧཱཝཱིརོ’’ཏི། མཧཱཝཱིརིཡཏཱ ཙ པརིཔུཎྞཝཱིརིཡཔཱརམིཏཱཡ ཙཏུརངྒསམནྣཱགཏཝཱིརིཡཱདྷིཊྛཱནེན ཨནཉྙསཱདྷཱརཎཙཏུབྦིདྷསམྨཔྤདྷཱནསམྤཏྟིཡཱ ཙ ཝེདིཏབྦཱ། ཏཏོ ཨེཝ ཧིསྶ ཝཱིརིཡཱཧཱནིསིདྡྷིཔཱིཏི།
‘‘Kāmā te paṭhamā senā’’tiādivacanato (su. ni. 438; mahāni. 28; cūḷani. nandamāṇavapucchāniddesa 47) kilesaviddhaṃsanampi devaputtamārassa balavidhamananti sakkā vattuṃ, ‘‘appavattikaraṇavasena kilesābhisaṅkhāramārāna’’nti pana vuccamānattā khantibalasaddhābalādiānubhāvena ussāhaparisābalabhañjanameva devaputtamārassa balaviddhaṃsanaṃ daṭṭhabbaṃ. Visayātikkamanaṃ kāmadhātusamatikkamo. Samudayappahānapariññāvasenāti pahānābhisamayapariññābhisamayānaṃ vasena. Nanu cetaṃ pañcannaṃ mārānaṃ bhañjanaṃ sāvakesupi labbhatevāti codanaṃ manasi katvā āha ‘‘parūpanissayarahita’’ntiādi. Vīrassa bhāvo vīriyanti katvā vuttaṃ ‘‘mahāvīriyoti mahāvīro’’ti. Mahāvīriyatā ca paripuṇṇavīriyapāramitāya caturaṅgasamannāgatavīriyādhiṭṭhānena anaññasādhāraṇacatubbidhasammappadhānasampattiyā ca veditabbā. Tato eva hissa vīriyāhānisiddhipīti.
ཁནྡྷཱདིཀེ དྷམྨེ ཨདྷིཊྛཱཡ ནིསྶཱཡ ཝིསཡཾ ཀཏྭཱ ཨབྷིདྷམྨཀཐཱ པཝཏྟཱཏི ཨཱཧ ‘‘ཨབྷིདྷམྨཀཐཱདྷིཊྛཱནཊྛེན ཝཱ’’ཏི། ཏེསཾ ཀཐནཏོཏི ཏེསཾ ཁནྡྷཱདཱིནཾ ཀཐཱབྷཱཝཏོ། ཨེཏེན ཨཏྠཝིསེསསནྣིསྶཡོ བྱཉྫནསམུདཱཡོ པཀརཎནྟི ཝུཏྟཾ ཧོཏི། ཨཐ ཝཱ དྷཱཏུཡོ ཀཐཱིཡནྟི ཨེཏྠ, ཨེཏེན ཝཱཏི དྷཱཏུཀཐཱ, ཏཐཱཔཝཏྟོ བྱཉྫནཏྠསམུདཱཡོ། ཡདི ཨེཝཾ སཏྟནྣམྤི པཀརཎཱནཾ དྷཱཏུཀཐཱབྷཱཝོ ཨཱཔཛྫཏཱིཏི ཙོདནཾ སནྡྷཱཡཱཧ ‘‘ཡདིཔཱི’’ཏིཨཱདི། ཏཏྠ སཱཏིསཡནྟི སཝིསེསཾ ཝིཙིཏྟཱཏིརེཀཝསེན ཨནཝསེསཏོ ཙ དེསནཱཡ པཝཏྟཏྟཱ། ཏཐཱ ཧི ཝུཏྟཾ ‘‘སབྦཱཔི དྷམྨསངྒཎཱི དྷཱཏུཀཐཱཡ མཱཏིཀཱ’’ཏི (དྷཱཏུ॰ ༥)། ཏེནེཝཱཧ ‘‘ཨེཀདེསཀཐནམེཝ ཧི ཨཉྙཏྠ ཀཏ’’ནྟི།
Khandhādike dhamme adhiṭṭhāya nissāya visayaṃ katvā abhidhammakathā pavattāti āha ‘‘abhidhammakathādhiṭṭhānaṭṭhena vā’’ti. Tesaṃ kathanatoti tesaṃ khandhādīnaṃ kathābhāvato. Etena atthavisesasannissayo byañjanasamudāyo pakaraṇanti vuttaṃ hoti. Atha vā dhātuyo kathīyanti ettha, etena vāti dhātukathā, tathāpavatto byañjanatthasamudāyo. Yadi evaṃ sattannampi pakaraṇānaṃ dhātukathābhāvo āpajjatīti codanaṃ sandhāyāha ‘‘yadipī’’tiādi. Tattha sātisayanti savisesaṃ vicittātirekavasena anavasesato ca desanāya pavattattā. Tathā hi vuttaṃ ‘‘sabbāpi dhammasaṅgaṇī dhātukathāya mātikā’’ti (dhātu. 5). Tenevāha ‘‘ekadesakathanameva hi aññattha kata’’nti.
ཨིདཱནི སཱསནེ ཡེསུ དྷཱཏུ-སདྡོ ནིརུལ༹ྷོ, ཏེསཾ ཝསེན ཨཉྙེཧིཔི ཨསཱདྷཱརཎཾ ཨིམསྶ པཀརཎསྶ དྷཱཏུཀཐཱབྷཱཝཾ དསྶེནྟོ ‘‘ཁནྡྷཱཡཏནདྷཱཏཱུཧི ཝཱ’’ཏིཨཱདིམཱཧ། ཏཏྠ ཏཏྠཱཏི ཁནྡྷཱཡཏནདྷཱཏཱུསུ། མཧནྟོ པབྷེདཱནུགཏོ ཝིསཡོ ཨེཏཱསནྟི མཧཱཝིསཡཱ, དྷཱཏུཡོ, ན ཁནྡྷཱཡཏནཱནི ཨཔྤཏརཔདཏྟཱ། ཡེན ཝཱ སབྷཱཝེན དྷམྨཱ སངྒཧཱསངྒཧསམྤཡོགཝིཔྤཡོགེཧི ཨུདྡེསནིདྡེསེ ལབྷནྟི, སོ སབྷཱཝོ དྷཱཏུ། སཱ དྷཱཏུ ཨིདྷ སཱཏིསཡཾ དེསིཏཱཏི སཝིསེསཾ དྷཱཏུཡཱ ཀཐནཏོ ཨིདཾ པཀརཎཾ ‘‘དྷཱཏུཀཐཱ’’ཏི ཝུཏྟཾ། སབྷཱཝཏྠོ ཧི ཨཡཾ དྷཱཏུ-སདྡོ ‘‘དྷཱཏུསོ, བྷིཀྑཝེ , སཏྟཱ སཾསནྡནྟཱི’’ཏིཨཱདཱིསུ (སཾ॰ ནི॰ ༢.༩༨) ཝིཡ། དྷཱཏུབྷེདནྟི དྷཱཏུཝིབྷཱགཾ། པཀརཎནྟི ཝཙནསེསོ། ཀུཏོ པཀརཎ-སདྡོ ལབྦྷཏཱིཏི ཨཱཧ ‘‘སཏྟནྣཾ པཀརཎཱནཾ ཀམེན ཝཎྞནཱཡ པཝཏྟཏྟཱ’’ཏི། ཏེན ཡོཛནཾ ཀཏྭཱཏི ཏེན པཀརཎ-སདྡེན ‘‘དྷཱཏུཀཐཱཝ པཀརཎཾ དྷཱཏུཀཐཱཔཀརཎ’’ནྟི ཡོཛནཾ ཀཏྭཱ། ཏཾ དཱིཔནནྟི ཏཾ དྷཱཏུཀཐཱཔཀརཎསྶ ཨཏྠདཱིཔནཾ, ཨཏྠདཱིཔནཱཀཱརེན པཝཏྟཾ ཝཎྞནཾ། ‘‘ཨཏྠཾ དཱིཔཡིསྶཱམཱི’’ཏི ཝཏྭཱ ‘‘ཏཾ སུཎཱཐཱ’’ཏི ཝདནྟོ སོཏདྭཱརཱནུསཱརེན ཏཏྠ ཨུཔདྷཱརཎེ ནིཡོཛེཏཱིཏི ཨཱཧ ‘‘ཏཾདཱིཔནཝཙནསཝནེན ཨུཔདྷཱརེཐཱཏི ཨཏྠོ’’ཏི།
Idāni sāsane yesu dhātu-saddo niruḷho, tesaṃ vasena aññehipi asādhāraṇaṃ imassa pakaraṇassa dhātukathābhāvaṃ dassento ‘‘khandhāyatanadhātūhi vā’’tiādimāha. Tattha tatthāti khandhāyatanadhātūsu. Mahanto pabhedānugato visayo etāsanti mahāvisayā, dhātuyo, na khandhāyatanāni appatarapadattā. Yena vā sabhāvena dhammā saṅgahāsaṅgahasampayogavippayogehi uddesaniddese labhanti, so sabhāvo dhātu. Sā dhātu idha sātisayaṃ desitāti savisesaṃ dhātuyā kathanato idaṃ pakaraṇaṃ ‘‘dhātukathā’’ti vuttaṃ. Sabhāvattho hi ayaṃ dhātu-saddo ‘‘dhātuso, bhikkhave , sattā saṃsandantī’’tiādīsu (saṃ. ni. 2.98) viya. Dhātubhedanti dhātuvibhāgaṃ. Pakaraṇanti vacanaseso. Kuto pakaraṇa-saddo labbhatīti āha ‘‘sattannaṃ pakaraṇānaṃ kamena vaṇṇanāya pavattattā’’ti. Tena yojanaṃ katvāti tena pakaraṇa-saddena ‘‘dhātukathāva pakaraṇaṃ dhātukathāpakaraṇa’’nti yojanaṃ katvā. Taṃ dīpananti taṃ dhātukathāpakaraṇassa atthadīpanaṃ, atthadīpanākārena pavattaṃ vaṇṇanaṃ. ‘‘Atthaṃ dīpayissāmī’’ti vatvā ‘‘taṃ suṇāthā’’ti vadanto sotadvārānusārena tattha upadhāraṇe niyojetīti āha ‘‘taṃdīpanavacanasavanena upadhārethāti attho’’ti.
གནྠཱརམྦྷཝཎྞནཱ ནིཊྛིཏཱ།
Ganthārambhavaṇṇanā niṭṭhitā.
