| Library / Tipiṭaka / തിപിടക • Tipiṭaka / പഞ്ചപകരണ-മൂലടീകാ • Pañcapakaraṇa-mūlaṭīkā |
നമോ തസ്സ ഭഗവതോ അരഹതോ സമ്മാസമ്ബുദ്ധസ്സ
Namo tassa bhagavato arahato sammāsambuddhassa
യമകപകരണ-മൂലടീകാ
Yamakapakaraṇa-mūlaṭīkā
ഗന്ഥാരമ്ഭവണ്ണനാ
Ganthārambhavaṇṇanā
കഥാവത്ഥുപകരണേന സങ്ഖേപേനേവ ദേസിതേന ധമ്മേസു വിപരീതഗ്ഗഹണം നിവാരേത്വാ തേസ്വേവ ധമ്മേസു ധമ്മസങ്ഗഹാദീസു പകാസിതേസു ധമ്മപുഗ്ഗലോകാസാദിനിസ്സയാനം സന്നിട്ഠാനസംസയാനം വസേന നാനപ്പകാരകഓസല്ലത്ഥം യമകപകരണം ആരദ്ധം, തം സമയദേസദേസകവസേനേവ ദസ്സേത്വാ സംവണ്ണനാക്കമഞ്ചസ്സ അനുപ്പത്തം ‘‘ആഗതോ ഭാരോ അവസ്സം വഹിതബ്ബോ’’തി സംവണ്ണനമസ്സ പടിജാനന്തോ ആഹ ‘‘സങ്ഖേപേനേവാ’’തിആദി.
Kathāvatthupakaraṇena saṅkhepeneva desitena dhammesu viparītaggahaṇaṃ nivāretvā tesveva dhammesu dhammasaṅgahādīsu pakāsitesu dhammapuggalokāsādinissayānaṃ sanniṭṭhānasaṃsayānaṃ vasena nānappakārakaosallatthaṃ yamakapakaraṇaṃ āraddhaṃ, taṃ samayadesadesakavaseneva dassetvā saṃvaṇṇanākkamañcassa anuppattaṃ ‘‘āgato bhāro avassaṃ vahitabbo’’ti saṃvaṇṇanamassa paṭijānanto āha ‘‘saṅkhepenevā’’tiādi.
തത്ഥ യമസ്സ വിസയാതീതോതി ജാതിയാ സതി മരണം ഹോതീതി ജാതി, പഞ്ച വാ ഉപാദാനക്ഖന്ധാ യമസ്സ വിസയോ, തം സമുദയപ്പഹാനേന അതീതോതി അത്ഥോ. യമസ്സ വാ രഞ്ഞോ വിസയം മരണം, തസ്സ ആണാപവത്തിട്ഠാനം ദേസം വാ അതീതോ. ‘‘ഛച്ചാഭിഠാനാനി അഭബ്ബ കാതു’’ന്തി (ഖു॰ പാ॰ ൬.൧൧; സു॰ നി॰ ൨൩൪) വുത്താനം ഛന്നം അഭബ്ബട്ഠാനാനം ദേസകോതി ഛട്ഠാനദേസകോ . അയമാ ഏകേകാ ഹുത്വാ ആവത്താ നീലാ അമലാ ച തനുരുഹാ അസ്സാതി അയമാവത്തനീലാമലതനുരുഹോ.
Tattha yamassa visayātītoti jātiyā sati maraṇaṃ hotīti jāti, pañca vā upādānakkhandhā yamassa visayo, taṃ samudayappahānena atītoti attho. Yamassa vā rañño visayaṃ maraṇaṃ, tassa āṇāpavattiṭṭhānaṃ desaṃ vā atīto. ‘‘Chaccābhiṭhānāni abhabba kātu’’nti (khu. pā. 6.11; su. ni. 234) vuttānaṃ channaṃ abhabbaṭṭhānānaṃ desakoti chaṭṭhānadesako. Ayamā ekekā hutvā āvattā nīlā amalā ca tanuruhā assāti ayamāvattanīlāmalatanuruho.
ഗന്ഥാരമ്ഭവണ്ണനാ നിട്ഠിതാ.
Ganthārambhavaṇṇanā niṭṭhitā.
