| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৯. গণ্ঠিপুপ্ফিযত্থেরঅপদানৰণ্ণনা
9. Gaṇṭhipupphiyattheraapadānavaṇṇanā
সুৰণ্ণৰণ্ণো সম্বুদ্ধোতিআদিকং আযস্মতো গণ্ঠিপুপ্ফিযত্থেরস্স অপদানং। অযম্পি পুরিমবুদ্ধেসু কতাধিকারো অনেকাসু জাতীসু কতপুঞ্ঞসঞ্চযো ৰিপস্সিস্স ভগৰতো কালে একস্মিং কুলগেহে নিব্বত্তো উপভোগপরিভোগেহি অনূনো একদিৰসং ৰিপস্সিং ভগৰন্তং সগণং দিস্ৰা পসন্নমানসো লাজাপঞ্চমেহি পুপ্ফেহি পূজেসি। সো তেনেৰ চিত্তপ্পসাদেন যাৰতাযুকং ঠত্ৰা ততো দেৰলোকে নিব্বত্তো দিব্বসম্পত্তিং অনুভৰিত্ৰা অপরভাগে মনুস্সেসু মনুস্সসম্পত্তিং অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো সদ্ধাজাতো পব্বজিত্ৰা নচিরস্সেৰ অরহত্তং পাপুণি।
Suvaṇṇavaṇṇo sambuddhotiādikaṃ āyasmato gaṇṭhipupphiyattherassa apadānaṃ. Ayampi purimabuddhesu katādhikāro anekāsu jātīsu katapuññasañcayo vipassissa bhagavato kāle ekasmiṃ kulagehe nibbatto upabhogaparibhogehi anūno ekadivasaṃ vipassiṃ bhagavantaṃ sagaṇaṃ disvā pasannamānaso lājāpañcamehi pupphehi pūjesi. So teneva cittappasādena yāvatāyukaṃ ṭhatvā tato devaloke nibbatto dibbasampattiṃ anubhavitvā aparabhāge manussesu manussasampattiṃ anubhavitvā imasmiṃ buddhuppāde ekasmiṃ kulagehe nibbatto saddhājāto pabbajitvā nacirasseva arahattaṃ pāpuṇi.
৯১. সো একদিৰসং পুব্বে কতপুঞ্ঞং সরিত্ৰা সোমনস্সজাতো ‘‘ইমিনা কুসলেনাহং নিব্বানং পত্তো’’তি পুব্বচরিতাপদানং পকাসেন্তো সুৰণ্ণৰণ্ণো সম্বুদ্ধোতিআদিমাহ। তং সব্বং হেট্ঠা ৰুত্তনযত্তা উত্তানত্থমেৰাতি।
91. So ekadivasaṃ pubbe katapuññaṃ saritvā somanassajāto ‘‘iminā kusalenāhaṃ nibbānaṃ patto’’ti pubbacaritāpadānaṃ pakāsento suvaṇṇavaṇṇo sambuddhotiādimāha. Taṃ sabbaṃ heṭṭhā vuttanayattā uttānatthamevāti.
গণ্ঠিপুপ্ফিযত্থেরঅপদানৰণ্ণনা সমত্তা।
Gaṇṭhipupphiyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৯. গণ্ঠিপুপ্ফিযত্থেরঅপদানং • 9. Gaṇṭhipupphiyattheraapadānaṃ
