| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. கா³ரவஸுத்தவண்ணனா
2. Gāravasuttavaṇṇanā
173. து³தியே உத³பாதீ³தி அயங் விதக்கோ பஞ்சமே ஸத்தாஹே உத³பாதி³. அகா³ரவோதி அஞ்ஞஸ்மிங் கா³ரவரஹிதோ, கஞ்சி க³ருட்டா²னே அட்ட²பெத்வாதி அத்தோ². அப்பதிஸ்ஸோதி பதிஸ்ஸயரஹிதோ, கஞ்சி ஜெட்ட²கட்டா²னே அட்ட²பெத்வாதி அத்தோ².
173. Dutiye udapādīti ayaṃ vitakko pañcame sattāhe udapādi. Agāravoti aññasmiṃ gāravarahito, kañci garuṭṭhāne aṭṭhapetvāti attho. Appatissoti patissayarahito, kañci jeṭṭhakaṭṭhāne aṭṭhapetvāti attho.
ஸதே³வகேதிஆதீ³ஸு ஸத்³தி⁴ங் தே³வேஹி ஸதே³வகே. தே³வக்³க³ஹணேன செத்த² மாரப்³ரஹ்மேஸு க³ஹிதேஸுபி மாரோ நாம வஸவத்தீ ஸப்³பே³ஸங் உபரி வஸங் வத்தேதி, ப்³ரஹ்மா நாம மஹானுபா⁴வோ ஏகங்கு³லியா ஏகஸ்மிங் சக்கவாளஸஹஸ்ஸே ஆலோகங் ப²ரதி. த்³வீஹி த்³வீஸு…பே॰… த³ஸஹி அங்கு³லீஹி த³ஸஸுபி சக்கவாளஸஹஸ்ஸேஸு ஆலோகங் ப²ரதி, ஸோ இமினா ஸீலஸம்பன்னதரோதி வத்துங் மா லப⁴தூதி ஸமாரகே ஸப்³ரஹ்மகேதி விஸுங் வுத்தங். ததா² ஸமணா நாம ஏகனிகாயாதி³வஸேன ப³ஹுஸ்ஸுதா ஸீலவந்தோ பண்டி³தா, ப்³ராஹ்மணாபி வத்து²விஜ்ஜாதி³வஸேன ப³ஹுஸ்ஸுதா பண்டி³தா, தே இமினா ஸீலஸம்பன்னதராதி வத்துங் மா லப⁴ந்தூதி ஸஸ்ஸமணப்³ராஹ்மணியா பஜாயாதி வுத்தங். ஸதே³வமனுஸ்ஸாயாதி இத³ங் பன நிப்பதே³ஸதோ த³ஸ்ஸனத்த²ங் க³ஹிதமேவ க³ஹெத்வா வுத்தங். அபிசெத்த² புரிமானி தீணி பதா³னி லோகவஸேன வுத்தானி, பச்சி²மானி த்³வே பஜாவஸேன. ஸீலஸம்பன்னதரந்தி ஸீலேன ஸம்பன்னதரங், அதி⁴கதரந்தி அத்தோ². ஸேஸேஸுபி ஏஸேவ நயோ. எத்த² ச ஸீலாத³யோ சத்தாரோ த⁴ம்மா லோகியலோகுத்தரா கதி²தா, விமுத்திஞாணத³ஸ்ஸனங் லோகியமேவ. பச்சவெக்க²ணஞாணங் ஹேதங்.
Sadevaketiādīsu saddhiṃ devehi sadevake. Devaggahaṇena cettha mārabrahmesu gahitesupi māro nāma vasavattī sabbesaṃ upari vasaṃ vatteti, brahmā nāma mahānubhāvo ekaṅguliyā ekasmiṃ cakkavāḷasahasse ālokaṃ pharati. Dvīhi dvīsu…pe… dasahi aṅgulīhi dasasupi cakkavāḷasahassesu ālokaṃ pharati, so iminā sīlasampannataroti vattuṃ mā labhatūti samārake sabrahmaketi visuṃ vuttaṃ. Tathā samaṇā nāma ekanikāyādivasena bahussutā sīlavanto paṇḍitā, brāhmaṇāpi vatthuvijjādivasena bahussutā paṇḍitā, te iminā sīlasampannatarāti vattuṃ mā labhantūti sassamaṇabrāhmaṇiyā pajāyāti vuttaṃ. Sadevamanussāyāti idaṃ pana nippadesato dassanatthaṃ gahitameva gahetvā vuttaṃ. Apicettha purimāni tīṇi padāni lokavasena vuttāni, pacchimāni dve pajāvasena. Sīlasampannataranti sīlena sampannataraṃ, adhikataranti attho. Sesesupi eseva nayo. Ettha ca sīlādayo cattāro dhammā lokiyalokuttarā kathitā, vimuttiñāṇadassanaṃ lokiyameva. Paccavekkhaṇañāṇaṃ hetaṃ.
பாதுரஹோஸீதி – ‘‘அயங் ஸத்தா² அவீசிதோ யாவ ப⁴வக்³கா³ ஸீலாதீ³ஹி அத்தனா அதி⁴கதரங் அபஸ்ஸந்தோ ‘மயா படிவித்³த⁴ங் நவலோகுத்தரத⁴ம்மமேவ ஸக்கத்வா க³ருங் கத்வா உபனிஸ்ஸாய விஹரிஸ்ஸாமீ’தி சிந்தேதி, காரணங் ப⁴க³வா சிந்தேதி, அத்த²ங் வுட்³டி⁴விஸேஸங் சிந்தேதி, க³ச்சா²மிஸ்ஸ உஸ்ஸாஹங் ஜனெஸ்ஸாமீ’’தி சிந்தெத்வா புரதோ பாகடோ அஹோஸி, அபி⁴முகே² அட்டா²ஸீதி அத்தோ².
Pāturahosīti – ‘‘ayaṃ satthā avīcito yāva bhavaggā sīlādīhi attanā adhikataraṃ apassanto ‘mayā paṭividdhaṃ navalokuttaradhammameva sakkatvā garuṃ katvā upanissāya viharissāmī’ti cinteti, kāraṇaṃ bhagavā cinteti, atthaṃ vuḍḍhivisesaṃ cinteti, gacchāmissa ussāhaṃ janessāmī’’ti cintetvā purato pākaṭo ahosi, abhimukhe aṭṭhāsīti attho.
விஹரந்தி சாதி எத்த² யோ வதெ³ய்ய ‘‘விஹரந்தீதி வசனதோ பச்சுப்பன்னேபி ப³ஹூ பு³த்³தா⁴’’தி, ஸோ ‘‘ப⁴க³வாபி, ப⁴ந்தே, ஏதரஹி அரஹங் ஸம்மாஸம்பு³த்³தோ⁴’’தி இமினா வசனேன படிபா³ஹிதப்³போ³.
Viharanti cāti ettha yo vadeyya ‘‘viharantīti vacanato paccuppannepi bahū buddhā’’ti, so ‘‘bhagavāpi, bhante, etarahi arahaṃ sammāsambuddho’’ti iminā vacanena paṭibāhitabbo.
‘‘ந மே ஆசரியோ அத்தி², ஸதி³ஸோ மே ந விஜ்ஜதி;
‘‘Na me ācariyo atthi, sadiso me na vijjati;
ஸதே³வகஸ்மிங் லோகஸ்மிங், நத்தி² மே படிபுக்³க³லோ’’தி. (மஹாவ॰ 11; ம॰ நி॰ 1.285) –
Sadevakasmiṃ lokasmiṃ, natthi me paṭipuggalo’’ti. (mahāva. 11; ma. ni. 1.285) –
ஆதீ³ஹி சஸ்ஸ ஸுத்தேஹி அஞ்ஞேஸங் பு³த்³தா⁴னங் அபா⁴வோ தீ³பேதப்³போ³. தஸ்மாதி யஸ்மா ஸப்³பே³பி பு³த்³தா⁴ ஸத்³த⁴ம்மக³ருனோ, தஸ்மா. மஹத்தமபி⁴கங்க²தாதி மஹந்தபா⁴வங் பத்த²யமானேன. ஸரங் பு³த்³தா⁴ன-ஸாஸனந்தி பு³த்³தா⁴னங் ஸாஸனங் ஸரந்தேன. து³தியங்.
Ādīhi cassa suttehi aññesaṃ buddhānaṃ abhāvo dīpetabbo. Tasmāti yasmā sabbepi buddhā saddhammagaruno, tasmā. Mahattamabhikaṅkhatāti mahantabhāvaṃ patthayamānena. Saraṃ buddhāna-sāsananti buddhānaṃ sāsanaṃ sarantena. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. கா³ரவஸுத்தங் • 2. Gāravasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. கா³ரவஸுத்தவண்ணனா • 2. Gāravasuttavaṇṇanā
