| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੨. ਗਰੁਕਾਪਤ੍ਤਿਨਿਦ੍ਦੇਸવਣ੍ਣਨਾ
2. Garukāpattiniddesavaṇṇanā
੧੦. ਇਦਾਨਿ ਸਙ੍ਘਾਦਿਸੇਸਂ ਪਕਾਸੇਤੁਂ ‘‘ਮੋਚੇਤੁਕਾਮਚਿਤ੍ਤੇਨਾ’’ਤਿਆਦਿਮਾਰਦ੍ਧਂ। ਤਤ੍ਥ ਮੋਚੇਤੁਂ ਕਾਮੇਤੀਤਿ ਮੋਚੇਤੁਕਾਮਂ, ਮੋਚੇਤੁਕਾਮਞ੍ਚ ਤਂ ਚਿਤ੍ਤਞ੍ਚਾਤਿ ਮੋਚੇਤੁਕਾਮਚਿਤ੍ਤਂ , ਤੇਨ, ਮੋਚਨਸ੍ਸਾਦਚਿਤ੍ਤੇਨਾਤਿ ਅਤ੍ਥੋ। ਏਕਾਦਸਨ੍ਨਞ੍ਹਿ ਰਾਗਾਨਂ ਏਕੇਨ ਮੋਚਨਸ੍ਸਾਦੇਨ ਆਪਤ੍ਤਿ ਹੋਤੀਤਿ વੁਤ੍ਤਂ ਹੋਤਿ।
10. Idāni saṅghādisesaṃ pakāsetuṃ ‘‘mocetukāmacittenā’’tiādimāraddhaṃ. Tattha mocetuṃ kāmetīti mocetukāmaṃ, mocetukāmañca taṃ cittañcāti mocetukāmacittaṃ, tena, mocanassādacittenāti attho. Ekādasannañhi rāgānaṃ ekena mocanassādena āpatti hotīti vuttaṃ hoti.
ਤਤ੍ਰਿਮੇ ਏਕਾਦਸ ਅਸ੍ਸਾਦਾ ਮੋਚਨਸ੍ਸਾਦੋ ਮੁਚ੍ਚਨਸ੍ਸਾਦੋ ਮੁਤ੍ਤਸ੍ਸਾਦੋ ਮੇਥੁਨਸ੍ਸਾਦੋ ਫਸ੍ਸਸ੍ਸਾਦੋ ਕਣ੍ਡੂવਨਸ੍ਸਾਦੋ ਦਸ੍ਸਨਸ੍ਸਾਦੋ ਨਿਸਜ੍ਜਸ੍ਸਾਦੋ વਾਚਸ੍ਸਾਦੋ ਗੇਹਸਿਤਪੇਮਂ વਨਭਙ੍ਗਿਯਨ੍ਤਿ। ਤਤ੍ਥ ਮੋਚਨਸ੍ਸਾਦਚੇਤਨਾਯ ਚੇਤੇਨ੍ਤੋ ਚੇવ ਅਸ੍ਸਾਦੇਨ੍ਤੋ ਚ ਉਪਕ੍ਕਮਤਿ, ਮੁਚ੍ਚਤਿ, ਸਙ੍ਘਾਦਿਸੇਸੋ , ਨ ਮੁਚ੍ਚਤਿ ਚੇ, ਥੁਲ੍ਲਚ੍ਚਯਂ। ਸਚੇ ਪਨ ਸਯਨਕਾਲੇ ਰਾਗਪਰਿਯੁਟ੍ਠਿਤੋ ਹੁਤ੍વਾ ਊਰੁਨਾ વਾ ਮੁਟ੍ਠਿਨਾ વਾ ਅਙ੍ਗਜਾਤਂ ਗਾਲ਼੍ਹਂ ਪੀਲ਼ੇਤ੍વਾ ਮੋਚਨਤ੍ਥਾਯ ਸਉਸ੍ਸਾਹੋ ਸੁਪਤਿ, ਸੁਪਨ੍ਤਸ੍ਸ ਚਸ੍ਸ ਅਸੁਚਿ ਮੁਚ੍ਚਤਿ, ਸਙ੍ਘਾਦਿਸੇਸੋ। ਮੁਚ੍ਚਨਸ੍ਸਾਦੇ ਅਤ੍ਤਨੋ ਧਮ੍ਮਤਾਯ ਮੁਚ੍ਚਮਾਨਂ ਅਸ੍ਸਾਦੇਤਿ, ਨ ਉਪਕ੍ਕਮਤਿ, ਮੁਚ੍ਚਤਿ, ਅਨਾਪਤ੍ਤਿ। ਮੁਤ੍ਤਸ੍ਸਾਦੇ ਅਤ੍ਤਨੋ ਧਮ੍ਮਤਾਯ ਮੁਤ੍ਤੇ ਠਾਨਾ ਚੁਤੇ ਅਸੁਚਿਮ੍ਹਿ ਪਚ੍ਛਾ ਅਸ੍ਸਾਦੇਨ੍ਤਸ੍ਸ વਿਨਾ ਉਪਕ੍ਕਮੇਨ ਮੁਚ੍ਚਤਿ, ਅਨਾਪਤ੍ਤਿ। ਮੇਥੁਨਸ੍ਸਾਦੇ ਮੇਥੁਨਰਾਗੇਨ ਮਾਤੁਗਾਮਂ ਗਣ੍ਹਾਤਿ, ਤੇਨ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ, ਦੁਕ੍ਕਟਂ ਪਨ ਆਪਜ੍ਜਤਿ। ਫਸ੍ਸਸ੍ਸਾਦੋ ਦੁવਿਧੋ ਅਜ੍ਝਤ੍ਤਿਕੋ ਬਾਹਿਰੋ ਚਾਤਿ। ਤਤ੍ਥ ਅਤ੍ਤਨੋ ਨਿਮਿਤ੍ਤਂ ‘‘ਥਦ੍ਧਂ, ਮੁਦੁਕਨ੍ਤਿ ਜਾਨਿਸ੍ਸਾਮੀ’’ਤਿ વਾ ਲੋਲਭਾવੇਨ વਾ ਕੀਲ਼ਾਪਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ। ਬਾਹਿਰਫਸ੍ਸਸ੍ਸਾਦੇ ਪਨ ਕਾਯਸਂਸਗ੍ਗਰਾਗੇਨ ਇਤ੍ਥਿਂ ਫੁਸਤੋ, ਆਲਿਙ੍ਗਤੋ ਚ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ, ਕਾਯਸਂਸਗ੍ਗਸਙ੍ਘਾਦਿਸੇਸਂ ਪਨ ਆਪਜ੍ਜਤਿ।
Tatrime ekādasa assādā mocanassādo muccanassādo muttassādo methunassādo phassassādo kaṇḍūvanassādo dassanassādo nisajjassādo vācassādo gehasitapemaṃ vanabhaṅgiyanti. Tattha mocanassādacetanāya cetento ceva assādento ca upakkamati, muccati, saṅghādiseso , na muccati ce, thullaccayaṃ. Sace pana sayanakāle rāgapariyuṭṭhito hutvā ūrunā vā muṭṭhinā vā aṅgajātaṃ gāḷhaṃ pīḷetvā mocanatthāya saussāho supati, supantassa cassa asuci muccati, saṅghādiseso. Muccanassāde attano dhammatāya muccamānaṃ assādeti, na upakkamati, muccati, anāpatti. Muttassāde attano dhammatāya mutte ṭhānā cute asucimhi pacchā assādentassa vinā upakkamena muccati, anāpatti. Methunassāde methunarāgena mātugāmaṃ gaṇhāti, tena asuci muccati, anāpatti, dukkaṭaṃ pana āpajjati. Phassassādo duvidho ajjhattiko bāhiro cāti. Tattha attano nimittaṃ ‘‘thaddhaṃ, mudukanti jānissāmī’’ti vā lolabhāvena vā kīḷāpayato asuci muccati, anāpatti. Bāhiraphassassāde pana kāyasaṃsaggarāgena itthiṃ phusato, āliṅgato ca asuci muccati, anāpatti, kāyasaṃsaggasaṅghādisesaṃ pana āpajjati.
ਕਣ੍ਡੂવਨਸ੍ਸਾਦੇ ਦਦ੍ਦੁਕਚ੍ਛੁਪਿਲ਼ਕਪਾਣਕਾਦੀਨਂ ਅਞ੍ਞਤਰੇਨ ਖਜ੍ਜਮਾਨਂ ਨਿਮਿਤ੍ਤਂ ਕਣ੍ਡੂવਨਸ੍ਸਾਦੇਨ ਕਣ੍ਡੂવਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ। ਦਸ੍ਸਨਸ੍ਸਾਦੇ ਇਤ੍ਥਿਯਾ ਅਨੋਕਾਸਂ ਉਪਨਿਜ੍ਝਾਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ, ਦੁਕ੍ਕਟਂ ਪਨ ਹੋਤਿ। ਨਿਸਜ੍ਜਸ੍ਸਾਦੇ ਮਾਤੁਗਾਮੇਨ ਸਦ੍ਧਿਂ ਰਹੋ ਨਿਸਿਨ੍ਨਸ੍ਸ ਮੁਤ੍ਤੇਪਿ ਅਨਾਪਤ੍ਤਿ , ਰਹੋਨਿਸਜ੍ਜਾਪਤ੍ਤਿ ਪਨ ਹੋਤਿ। વਾਚਸ੍ਸਾਦੇ ਮਾਤੁਗਾਮਂ ਮੇਥੁਨਪ੍ਪਟਿਸਂਯੁਤ੍ਤਾਹਿ વਾਚਾਹਿ ਓਭਾਸਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ, ਦੁਟ੍ਠੁਲ੍ਲવਾਚਾਸਙ੍ਘਾਦਿਸੇਸਂ ਪਨ ਆਪਜ੍ਜਤਿ। ਗੇਹਸਿਤਪੇਮੇ ਮਾਤਾਦੀਨਂ ਮਾਤਾਦਿਪੇਮੇਨ ਆਲਿਙ੍ਗਨਾਦਿਂ ਕਰੋਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ। વਨਭਙ੍ਗਂ ਸਨ੍ਥવਕਰਣਤ੍ਥਾਯ ਇਤ੍ਥਿਯਾ ਪੇਸਿਤਪੁਪ੍ਫਾਦਿવਨਭਙ੍ਗਸਞ੍ਞਿਤਂ ਪਣ੍ਣਾਕਾਰਂ ‘‘ਇਤ੍ਥਨ੍ਨਾਮਾਯ ਇਮਂ ਪੇਸਿਤ’’ਨ੍ਤਿ ਅਸ੍ਸਾਦੇਨ ਆਮਸਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤੀਤਿ। ਏવਮੇਤੇਸੁ ਮੋਚਨਸ੍ਸਾਦੇਨ ਆਪਤ੍ਤਿ ਹੋਤੀਤਿ ਦਸ੍ਸੇਤੁਂ ‘‘ਮੋਚੇਤੁ…ਪੇ॰… ਨਾ’’ਤਿ વੁਤ੍ਤਂ। ਅਥ વਾ ਮੋਚੇਤੁਕਾਮਂ ਚਿਤ੍ਤਂ ਯਸ੍ਸ ਸੋਯਂ ਮੋਚੇਤੁਕਾਮਚਿਤ੍ਤੋ, ਤੇਨ, ਇਤ੍ਥਮ੍ਭੂਤੇ ਕਰਣવਚਨਂ, ਮੋਚੇਤੁਕਾਮਚਿਤ੍ਤੋ ਹੁਤ੍વਾਤਿ ਅਤ੍ਥੋ।
Kaṇḍūvanassāde daddukacchupiḷakapāṇakādīnaṃ aññatarena khajjamānaṃ nimittaṃ kaṇḍūvanassādena kaṇḍūvato asuci muccati, anāpatti. Dassanassāde itthiyā anokāsaṃ upanijjhāyato asuci muccati, anāpatti, dukkaṭaṃ pana hoti. Nisajjassāde mātugāmena saddhiṃ raho nisinnassa muttepi anāpatti , rahonisajjāpatti pana hoti. Vācassāde mātugāmaṃ methunappaṭisaṃyuttāhi vācāhi obhāsantassa muttepi anāpatti, duṭṭhullavācāsaṅghādisesaṃ pana āpajjati. Gehasitapeme mātādīnaṃ mātādipemena āliṅganādiṃ karontassa muttepi anāpatti. Vanabhaṅgaṃ santhavakaraṇatthāya itthiyā pesitapupphādivanabhaṅgasaññitaṃ paṇṇākāraṃ ‘‘itthannāmāya imaṃ pesita’’nti assādena āmasantassa muttepi anāpattīti. Evametesu mocanassādena āpatti hotīti dassetuṃ ‘‘mocetu…pe… nā’’ti vuttaṃ. Atha vā mocetukāmaṃ cittaṃ yassa soyaṃ mocetukāmacitto, tena, itthambhūte karaṇavacanaṃ, mocetukāmacitto hutvāti attho.
ਉਪਕ੍ਕਮ੍ਮਾਤਿ ਹਤ੍ਥਾਦੀਸੁ ਯੇਨ ਕੇਨਚਿ ਨਿਮਿਤ੍ਤੇ ਉਪਕ੍ਕਮਿਤ੍વਾਤਿ ਅਤ੍ਥੋ। વਿਮੋਚਯਨ੍ਤਿ ਯਂ ਅਨ੍ਤਮਸੋ ਏਕਾ ਖੁਦ੍ਦਕਮਕ੍ਖਿਕਾ ਪਿવੇਯ੍ਯ, ਤਤ੍ਤਕਮ੍ਪਿ વਿਮੋਚੇਨ੍ਤੋਤਿ ਅਤ੍ਥੋ। ਸੁਕ੍ਕਨ੍ਤਿ ਨੀਲਪੀਤਲੋਹਿਤੋਦਾਤਤਕ੍ਕਤੇਲਦਕਖੀਰਦਧਿਸਪ੍ਪਿવਣ੍ਣਸਙ੍ਖਾਤੇਸੁ ਦਸવਿਧੇਸੁ ਸੁਕ੍ਕੇਸੁ ਯਂ ਕਿਞ੍ਚਿ ਸੁਕ੍ਕਂ। ਅਞ੍ਞਤ੍ਰ ਸੁਪਿਨਾਤਿ ਯਾ ਸੁਪਿਨਨ੍ਤੇ ਸੁਕ੍ਕવਿਸ੍ਸਟ੍ਠਿ ਹੋਤਿ, ਤਂ ਠਪੇਤ੍વਾਤਿ ਅਤ੍ਥੋ। ਸਮਣੋਤਿ ਯੋ ਕੋਚਿ ਉਪਸਮ੍ਪਨ੍ਨੋ। ਗਰੁਕਨ੍ਤਿ ਸਙ੍ਘਾਦਿਸੇਸਂ। ਫੁਸੇਤਿ ਆਪਜ੍ਜੇਯ੍ਯਾਤਿ ਅਤ੍ਥੋ। ਚੇਤਨਾ ਉਪਕ੍ਕਮੋ ਮੁਚ੍ਚਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨੀਤਿ। ਸੁਕ੍ਕવਿਸ੍ਸਟ੍ਠਿਸਿਕ੍ਖਾਪਦਂ।
Upakkammāti hatthādīsu yena kenaci nimitte upakkamitvāti attho. Vimocayanti yaṃ antamaso ekā khuddakamakkhikā piveyya, tattakampi vimocentoti attho. Sukkanti nīlapītalohitodātatakkateladakakhīradadhisappivaṇṇasaṅkhātesu dasavidhesu sukkesu yaṃ kiñci sukkaṃ. Aññatra supināti yā supinante sukkavissaṭṭhi hoti, taṃ ṭhapetvāti attho. Samaṇoti yo koci upasampanno. Garukanti saṅghādisesaṃ. Phuseti āpajjeyyāti attho. Cetanā upakkamo muccananti imānettha tīṇi aṅgānīti. Sukkavissaṭṭhisikkhāpadaṃ.
੧੧. ਇਦਾਨਿ ਕਾਯਸਂਸਗ੍ਗਂ ਦਸ੍ਸੇਤੁਂ ‘‘ਕਾਯਸਂਸਗ੍ਗਰਾਗੇਨਾ’’ਤਿਆਦਿਮਾਰਦ੍ਧਂ। ਭਿਕ੍ਖੁ ਮਨੁਸ੍ਸਿਤ੍ਥਿਯਾ ਮਨੁਸ੍ਸਿਤ੍ਥਿਸਞ੍ਞੀ ਹੁਤ੍વਾ ਕਾਯਸਂਸਗ੍ਗਰਾਗੇਨ ਉਪਕ੍ਕਮਿਤ੍વਾ ਮਨੁਸ੍ਸਿਤ੍ਥਿਂ ਪਰਾਮਸਨ੍ਤੋ ਸਙ੍ਘਾਦਿਸੇਸਂ ਆਪਜ੍ਜੇਯ੍ਯਾਤਿ ਯੋਜਨਾ। ਤਤ੍ਥ ਕਾਯਸਂਸਗ੍ਗਰਾਗੇਨਾਤਿ ਹਤ੍ਥਗ੍ਗਹਣਾਦਿਕਾਯਸਮ੍ਫਸ੍ਸੇਨ ਰਾਗੇਨ ਕਾਯਮਿਸ੍ਸਰਾਗੇਨ। ਮਨੁਸ੍ਸਿਤ੍ਥਿਨ੍ਤਿ ਤਦਹੁਜਾਤਮ੍ਪਿ ਜੀવਮਾਨਕਮਨੁਸ੍ਸਿਤ੍ਥਿਂ। ਪਰਾਮਸਨ੍ਤਿ ਪਰਾਮਸਨ੍ਤੋ, ਇਤ੍ਥੀਤਿ ਸਞ੍ਞਾ ਇਤ੍ਥਿਸਞ੍ਞਾ , ਸਾ ਅਸ੍ਸ ਅਤ੍ਥੀਤਿ ਇਤ੍ਥਿਸਞ੍ਞੀ, ਇਤ੍ਥਿਸਞ੍ਞੀ ਹੁਤ੍વਾਤਿ ਅਤ੍ਥੋ। ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਤੇਨ ਰਾਗੇਨ વਾਯਾਮੋ, ਹਤ੍ਥਗ੍ਗਾਹਾਦਿਸਮਾਪਜ੍ਜਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਕਾਯਸਂਸਗ੍ਗਸਿਕ੍ਖਾਪਦਂ।
11. Idāni kāyasaṃsaggaṃ dassetuṃ ‘‘kāyasaṃsaggarāgenā’’tiādimāraddhaṃ. Bhikkhu manussitthiyā manussitthisaññī hutvā kāyasaṃsaggarāgena upakkamitvā manussitthiṃ parāmasanto saṅghādisesaṃ āpajjeyyāti yojanā. Tattha kāyasaṃsaggarāgenāti hatthaggahaṇādikāyasamphassena rāgena kāyamissarāgena. Manussitthinti tadahujātampi jīvamānakamanussitthiṃ. Parāmasanti parāmasanto, itthīti saññā itthisaññā , sā assa atthīti itthisaññī, itthisaññī hutvāti attho. Manussitthī, itthisaññitā, kāyasaṃsaggarāgo, tena rāgena vāyāmo, hatthaggāhādisamāpajjananti imānettha pañca aṅgāni. Kāyasaṃsaggasikkhāpadaṃ.
੧੨. ਇਦਾਨਿ ਦੁਟ੍ਠੁਲ੍ਲਂ ਦਸ੍ਸੇਤੁਂ ‘‘ਦੁਟ੍ਠੁਲ੍ਲવਾਚਸ੍ਸਾਦੇਨਾ’’ਤਿਆਦਿ ਆਰਦ੍ਧਂ। ਤਤ੍ਥ ਦੁਟ੍ਠੁਲ੍ਲવਾਚਸ੍ਸਾਦੇਨਾਤਿ વਚ੍ਚਮਗ੍ਗਪਸ੍ਸਾવਮਗ੍ਗਮੇਥੁਨਧਮ੍ਮਪ੍ਪਟਿਸਂਯੁਤ੍ਤવਾਚਸ੍ਸਾਦਰਾਗੇਨ। ਮਗ੍ਗਂ વਾਰਬ੍ਭ ਮੇਥੁਨਨ੍ਤਿ વਚ੍ਚਮਗ੍ਗਪਸ੍ਸਾવਮਗ੍ਗਾਨਂ ਅਞ੍ਞਤਰਂ ਮਗ੍ਗਂ વਾ ਮੇਥੁਨਂ વਾ ਆਰਬ੍ਭਾਤਿ ਅਤ੍ਥੋ। ਓਭਾਸਨ੍ਤੋਤਿ ਅવਭਾਸਨ੍ਤੋ। ਮਨੁਸ੍ਸਿਤ੍ਥਿਨ੍ਤਿ વਿਞ੍ਞੁਂ ਪਟਿਬਲਂ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਸਲ੍ਲਕ੍ਖਣਸਮਤ੍ਥਂ ਮਨੁਸ੍ਸਿਤ੍ਥਿਂ। ਸੁਣਮਾਨਨ੍ਤਿ ਸੁਣਨ੍ਤਿਂ। ਇਮਿਨਾ ਪਟਿਬਲਾਯਪਿ ਇਤ੍ਥਿਯਾ ਅવਿਞ੍ਞਤ੍ਤਿਪਥੇ ਠਿਤਾਯ ਦੂਤੇਨ વਾ ਪਣ੍ਣੇਨ વਾ ਆਰੋਚੇਨ੍ਤਸ੍ਸ ਦੁਟ੍ਠੁਲ੍ਲવਾਚਾਪਤ੍ਤਿ ਨ ਹੋਤੀਤਿ ਦੀਪਿਤਂ ਹੋਤਿ। ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਦੁਟ੍ਠੁਲ੍ਲવਾਚਸ੍ਸਾਦਰਾਗੋ, ਤੇਨ ਰਾਗੇਨ ਓਭਾਸਨਂ, ਤਙ੍ਖਣવਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਦੁਟ੍ਠੁਲ੍ਲવਾਚਸ੍ਸਾਦਸਿਕ੍ਖਾਪਦਂ।
12. Idāni duṭṭhullaṃ dassetuṃ ‘‘duṭṭhullavācassādenā’’tiādi āraddhaṃ. Tattha duṭṭhullavācassādenāti vaccamaggapassāvamaggamethunadhammappaṭisaṃyuttavācassādarāgena. Maggaṃ vārabbha methunanti vaccamaggapassāvamaggānaṃ aññataraṃ maggaṃ vā methunaṃ vā ārabbhāti attho. Obhāsantoti avabhāsanto. Manussitthinti viññuṃ paṭibalaṃ subhāsitadubbhāsitaṃ duṭṭhullāduṭṭhullaṃ sallakkhaṇasamatthaṃ manussitthiṃ. Suṇamānanti suṇantiṃ. Iminā paṭibalāyapi itthiyā aviññattipathe ṭhitāya dūtena vā paṇṇena vā ārocentassa duṭṭhullavācāpatti na hotīti dīpitaṃ hoti. Manussitthī, itthisaññitā, duṭṭhullavācassādarāgo, tena rāgena obhāsanaṃ, taṅkhaṇavijānananti imānettha pañca aṅgāni. Duṭṭhullavācassādasikkhāpadaṃ.
੧੩. ਇਦਾਨਿ ਅਤ੍ਤਕਾਮਪਾਰਿਚਰਿਯਂ ਦਸ੍ਸੇਤੁਂ ‘‘વਣ੍ਣ’’ਨ੍ਤ੍ਯਾਦਿ વੁਤ੍ਤਂ। ਤਤ੍ਥ ਯੋ ਭਿਕ੍ਖੁ ਅਤ੍ਤਨੋ ਕਾਮਪਾਰਿਚਰਿਯਾਯ વਣ੍ਣਂ વਤ੍વਾ ਮੇਥੁਨਰਾਗੇਨ ਇਤ੍ਥਿਂ ਮੇਥੁਨਂ ਯਾਚਮਾਨੋ ਗਰੁਂ ਫੁਸੇਤਿ ਸਮ੍ਬਨ੍ਧੋ। વਣ੍ਣਂ વਤ੍વਾਤਿ ਗੁਣਂ ਆਨਿਸਂਸਂ ਪਕਾਸੇਤ੍વਾ। ਅਤ੍ਤਨੋਕਾਮਪਾਰਿਚਰਿਯਾਯਾਤਿ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨ ਪਾਰਿਚਰਿਯਾ ਕਾਮਪਾਰਿਚਰਿਯਾ, ਅਤ੍ਤਨੋ ਅਤ੍ਥਾਯ ਕਾਮਪਾਰਿਚਰਿਯਾ ਅਤ੍ਤਨੋਕਾਮਪਾਰਿਚਰਿਯਾ, ਅਲੁਤ੍ਤਸਮਾਸੋਯਂ। ਅਥ વਾ ਅਤ੍ਤਨੋਤਿ ਕਤ੍વਤ੍ਥੇ ਸਾਮਿવਚਨਂ, ਅਤ੍ਤਨੋ ਕਾਮਿਤਾ ਇਚ੍ਛਿਤਾਤਿ ਅਤ੍ਤਨੋਕਾਮਾ, ਸਯਂ ਮੇਥੁਨਰਾਗવਸੇਨ ਪਤ੍ਥਿਤਾਤਿ ਅਤ੍ਥੋ, ਅਤ੍ਤਨੋਕਾਮਾ ਚ ਸਾ ਪਾਰਿਚਰਿਯਾ ਚਾਤਿ ਅਤ੍ਤਨੋਕਾਮਪਾਰਿਚਰਿਯਾ , ਤਾਯ ਅਤ੍ਤਨੋਕਾਮਪਾਰਿਚਰਿਯਾਯ, ‘‘ਏਤਦਗ੍ਗਂ, ਭਗਿਨਿ, ਪਾਰਿਚਰਿਯਾਨਂ, ਯਾ ਮਾਦਿਸਂ ਸੀਲવਨ੍ਤਂ ਕਲ੍ਯਾਣਧਮ੍ਮਂ ਬ੍ਰਹ੍ਮਚਾਰਿਂ ਏਤੇਨ ਧਮ੍ਮੇਨ ਪਰਿਚਰੇਯ੍ਯਾ’’ਤਿ ਏવਂ વਣ੍ਣਂ વਤ੍વਾਤਿ ਅਤ੍ਥੋ। ਯਾਚਧਾਤੁਨੋ ਦ੍વਿਕਮ੍ਮਿਕਤ੍ਤਾ ‘‘ਇਤ੍ਥਿਂ ਮੇਥੁਨਂ ਯਾਚਮਾਨੋ’’ਤਿ વੁਤ੍ਤਂ। ਤਤ੍ਥ ਇਤ੍ਥਿਨ੍ਤਿ ਦੁਟ੍ਠੁਲ੍ਲੋਭਾਸਨੇ વੁਤ੍ਤਪ੍ਪਕਾਰਂ ਇਤ੍ਥਿਂ। ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ , ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਰਾਗੇਨ વਣ੍ਣਭਣਨਂ, ਤਙ੍ਖਣવਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਂ।
13. Idāni attakāmapāricariyaṃ dassetuṃ ‘‘vaṇṇa’’ntyādi vuttaṃ. Tattha yo bhikkhu attano kāmapāricariyāya vaṇṇaṃ vatvā methunarāgena itthiṃ methunaṃ yācamāno garuṃ phuseti sambandho. Vaṇṇaṃ vatvāti guṇaṃ ānisaṃsaṃ pakāsetvā. Attanokāmapāricariyāyāti methunadhammasaṅkhātena kāmena pāricariyā kāmapāricariyā, attano atthāya kāmapāricariyā attanokāmapāricariyā, aluttasamāsoyaṃ. Atha vā attanoti katvatthe sāmivacanaṃ, attano kāmitā icchitāti attanokāmā, sayaṃ methunarāgavasena patthitāti attho, attanokāmā ca sā pāricariyā cāti attanokāmapāricariyā , tāya attanokāmapāricariyāya, ‘‘etadaggaṃ, bhagini, pāricariyānaṃ, yā mādisaṃ sīlavantaṃ kalyāṇadhammaṃ brahmacāriṃ etena dhammena paricareyyā’’ti evaṃ vaṇṇaṃ vatvāti attho. Yācadhātuno dvikammikattā ‘‘itthiṃ methunaṃ yācamāno’’ti vuttaṃ. Tattha itthinti duṭṭhullobhāsane vuttappakāraṃ itthiṃ. Manussitthī, itthisaññitā , attakāmapāricariyāya rāgo, tena rāgena vaṇṇabhaṇanaṃ, taṅkhaṇavijānananti imānettha pañca aṅgāni. Attakāmapāricariyasikkhāpadaṃ.
੧੪. ਇਦਾਨਿ ਸਞ੍ਚਰਿਤ੍ਤਂ ਦਸ੍ਸੇਤੁਂ ‘‘ਸਨ੍ਦੇਸ’’ਨ੍ਤ੍ਯਾਦਿਮਾਰਦ੍ਧਂ। ਤਤ੍ਥ ਭਿਕ੍ਖੁ ਪੁਰਿਸਸ੍ਸ વਾ ਸਨ੍ਦੇਸਂ, ਇਤ੍ਥਿਯਾ વਾ ਸਨ੍ਦੇਸਂ ਪਟਿਗ੍ਗਹੇਤ੍વਾ વੀਮਂਸਿਤ੍વਾ ਪਚ੍ਚਾਹਰਨ੍ਤੋ ਗਰੁਕਂ ਫੁਸੇਤਿ ਸਮ੍ਬਨ੍ਧੋ। ਤਤ੍ਥ ਸਨ੍ਦੇਸਨ੍ਤਿ ‘‘ਗਚ੍ਛ, ਭਨ੍ਤੇ, ਇਤ੍ਥਨ੍ਨਾਮਂ ਮਾਤੁਰਕ੍ਖਿਤਂ ਬ੍ਰੂਹਿ ‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’’ਤਿ (ਪਾਰਾ॰ ੩੦੫) ਏવਂ વੁਤ੍ਤਂ ਪੁਰਿਸਸ੍ਸ ਸਾਸਨਂ, ‘‘ਗਚ੍ਛ, ਭਨ੍ਤੇ, ਇਤ੍ਥਨ੍ਨਾਮਂ ਪੁਰਿਸਂ ਬ੍ਰੂਹਿ ‘ਅਹਂ ਤਸ੍ਸ ਭਰਿਯਾ ਭવਿਸ੍ਸਾਮੀ’’ਤਿ (ਪਾਰਾ॰ ੩੨੬-੩੨੭ ਥੋਕਂ વਿਸਦਿਸਂ) ਏવਂ વੁਤ੍ਤਂ ਇਤ੍ਥਿਯਾ ਸਾਸਨਂ। ਪਟਿਗ੍ਗਣ੍ਹਿਤ੍વਾਤਿ ‘‘ਸਾਧੁ ਉਪਾਸਕਾ’’ਤਿ વਾ ‘‘ਹੋਤੂ’’ਤਿ વਾ ‘‘ਆਰੋਚੇਸ੍ਸਾਮੀ’’ਤਿ વਾ ਯੇਨ ਕੇਨਚਿ ਆਕਾਰੇਨ વਚੀਭੇਦਂ ਕਤ੍વਾ વਾ ਸੀਸਕਮ੍ਪਨਾਦੀਹਿ વਾ ਪਟਿਗ੍ਗਣ੍ਹਿਤ੍વਾ ਸਮ੍ਪਟਿਚ੍ਛਿਤ੍વਾਤਿ ਅਤ੍ਥੋ। વੀਮਂਸਿਤ੍વਾਤਿ વੁਤ੍ਤਪ੍ਪਕਾਰੇਨ ਸਾਸਨਂ ਗਹੇਤ੍વਾ ਪੁਰਿਸਸ੍ਸ વਾ ਇਤ੍ਥਿਯਾ વਾ ਤੇਸਂ ਅવਸ੍ਸਾਰੋਚਨਕਾਨਂ ਮਾਤਾਪਿਤਾਭਾਤਾਭਗਿਨਿਆਦੀਨਂ વਾ ਆਰੋਚੇਤ੍વਾਤਿ ਅਤ੍ਥੋ। ਹਰਂਪਚ੍ਚਾਤਿ ਏਤ੍ਥ ‘‘ਪਚ੍ਚਾਹਰ’’ਨ੍ਤਿ વਤ੍ਤਬ੍ਬੇ ਛਨ੍ਦਹਾਨਿਭਯਾ ਹਰ-ਸਦ੍ਦਂ ਪੁਬ੍ਬਨਿਪਾਤਂ ਕਤ੍વਾ વੁਤ੍ਤਨ੍ਤਿ ਦਟ੍ਠਬ੍ਬਂ। ਯਤ੍ਥ ਪਹਿਤੇਨ ਤਤ੍ਥ ਗਨ੍ਤ੍વਾ ਤੇਨ ਆਰੋਚਿਤਾ ਸਾ ਇਤ੍ਥੀ ‘‘ਸਾਧੂ’’ਤਿ ਸਮ੍ਪਟਿਚ੍ਛਤੁ વਾ ਪਟਿਕ੍ਖਿਪਤੁ વਾ ਲਜ੍ਜਾਯ વਾ ਤੁਣ੍ਹੀ ਹੋਤੁ, ਪੁਨ ਆਗਨ੍ਤ੍વਾ ਤਸ੍ਸ ਪੁਰਿਸਸ੍ਸ ਹਰਨ੍ਤੋ ਏਤ੍ਤਾવਤਾ ਇਮਾਯ ਪਟਿਗ੍ਗਹਣਾਰੋਚਨਪ੍ਪਚ੍ਚਾਹਰਣਸਙ੍ਖਾਤਾਯ ਤਿવਙ੍ਗਸਮ੍ਪਤ੍ਤਿਯਾ ਸੋ ਭਿਕ੍ਖੁ ਸਙ੍ਘਾਦਿਸੇਸਂ ਆਪਜ੍ਜੇਯ੍ਯਾਤਿ ਅਤ੍ਥੋ। ਤੇਸਂ ਮਨੁਸ੍ਸਜਾਤਿਕਤਾ, ਅਲਂવਚਨੀਯਤਾ, ਪਟਿਗ੍ਗਣ੍ਹਨવੀਮਂਸਨਪ੍ਪਚ੍ਚਾਹਰਣਾਨੀਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਸਞ੍ਚਰਿਤ੍ਤਸਿਕ੍ਖਾਪਦਂ।
14. Idāni sañcarittaṃ dassetuṃ ‘‘sandesa’’ntyādimāraddhaṃ. Tattha bhikkhu purisassa vā sandesaṃ, itthiyā vā sandesaṃ paṭiggahetvā vīmaṃsitvā paccāharanto garukaṃ phuseti sambandho. Tattha sandesanti ‘‘gaccha, bhante, itthannāmaṃ māturakkhitaṃ brūhi ‘hohi kira itthannāmassa bhariyā dhanakkītā’’ti (pārā. 305) evaṃ vuttaṃ purisassa sāsanaṃ, ‘‘gaccha, bhante, itthannāmaṃ purisaṃ brūhi ‘ahaṃ tassa bhariyā bhavissāmī’’ti (pārā. 326-327 thokaṃ visadisaṃ) evaṃ vuttaṃ itthiyā sāsanaṃ. Paṭiggaṇhitvāti ‘‘sādhu upāsakā’’ti vā ‘‘hotū’’ti vā ‘‘ārocessāmī’’ti vā yena kenaci ākārena vacībhedaṃ katvā vā sīsakampanādīhi vā paṭiggaṇhitvā sampaṭicchitvāti attho. Vīmaṃsitvāti vuttappakārena sāsanaṃ gahetvā purisassa vā itthiyā vā tesaṃ avassārocanakānaṃ mātāpitābhātābhaginiādīnaṃ vā ārocetvāti attho. Haraṃpaccāti ettha ‘‘paccāhara’’nti vattabbe chandahānibhayā hara-saddaṃ pubbanipātaṃ katvā vuttanti daṭṭhabbaṃ. Yattha pahitena tattha gantvā tena ārocitā sā itthī ‘‘sādhū’’ti sampaṭicchatu vā paṭikkhipatu vā lajjāya vā tuṇhī hotu, puna āgantvā tassa purisassa haranto ettāvatā imāya paṭiggahaṇārocanappaccāharaṇasaṅkhātāya tivaṅgasampattiyā so bhikkhu saṅghādisesaṃ āpajjeyyāti attho. Tesaṃ manussajātikatā, alaṃvacanīyatā, paṭiggaṇhanavīmaṃsanappaccāharaṇānīti imānettha pañca aṅgāni. Sañcarittasikkhāpadaṃ.
੧੫. ਇਦਾਨਿ ਅਮੂਲਕਂ ਪਕਾਸੇਤੁਂ ‘‘ਚਾવੇਤੁਕਾਮੋ’’ਤਿਆਦਿਮਾਰਦ੍ਧਂ। ਚਾવੇਤੁਕਾਮੋ ਭਿਕ੍ਖੁ ਅਮੂਲਨ੍ਤਿਮવਤ੍ਥੁਨਾ ਅਞ੍ਞਂ ਸੁਣਮਾਨਂ ਭਿਕ੍ਖੁਂ ਚੋਦੇਨ੍ਤੋ વਾ ਚੋਦਾਪੇਨ੍ਤੋ વਾ ਗਰੁਂ ਫੁਸੇਤਿ ਸਮ੍ਬਨ੍ਧੋ। ਤਤ੍ਥ ਚਾવੇਤੁਕਾਮੋਤਿ ਬ੍ਰਹ੍ਮਚਰਿਯਾ ਚਾવੇਤੁਕਾਮੋ। ਚੋਦੇਨ੍ਤੋਤਿ ‘‘ਤ੍વਂ ਪਾਰਾਜਿਕਂ ਧਮ੍ਮਂ ਆਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸੀ’’ਤਿਆਦੀਹਿ વਚਨੇਹਿ ਸਯਂ ਚੋਦੇਨ੍ਤੋਤਿ ਅਤ੍ਥੋ। ਏવਂ ਚੋਦੇਨ੍ਤਸ੍ਸ વਾਚਾਯ વਾਚਾਯ ਸਙ੍ਘਾਦਿਸੇਸੋ। ਅਮੂਲਨ੍ਤਿਮવਤ੍ਥੁਨਾਤਿ ਯਂ ਚੋਦਕੇਨ ਚੁਦਿਤਕਮ੍ਹਿ ਪੁਗ੍ਗਲੇ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤਂ, ਇਦਂ ਏਤੇਸਂ ਦਸ੍ਸਨਸવਨਪਰਿਸਙ੍ਕਿਤਸਙ੍ਖਾਤਾਨਂ ਮੂਲਾਨਂ ਅਭਾવਤੋ ਨਾਸ੍ਸ ਮੂਲਨ੍ਤਿ ਅਮੂਲਂ, ਅਨ੍ਤਿਮਂ વਤ੍ਥੁ ਯਸ੍ਸ ਪਾਰਾਜਿਕਸ੍ਸ ਤਦਿਦਂ ਅਨ੍ਤਿਮવਤ੍ਥੁ, ਅਮੂਲਞ੍ਚ ਤਂ ਅਨ੍ਤਿਮવਤ੍ਥੁ ਚੇਤਿ ਅਮੂਲਨ੍ਤਿਮવਤ੍ਥੁ, ਤੇਨ ਅਮੂਲਨ੍ਤਿਮવਤ੍ਥੁਨਾ, ਭਿਕ੍ਖੁਨੋ ਅਨੁਰੂਪੇਸੁ ਏਕੂਨવੀਸਤਿਯਾ ਪਾਰਾਜਿਕੇਸੁ ਅਞ੍ਞਤਰੇਨਾਤਿ ਅਤ੍ਥੋ। ਚੋਦਾਪਯਨ੍ਤਿ ਚੋਦਾਪਯਨ੍ਤੋ, ਤਸ੍ਸ ਸਮੀਪੇ ਠਤ੍વਾ ਅਞ੍ਞਂ ਭਿਕ੍ਖੁਂ ਆਣਾਪੇਤ੍વਾ ਚੋਦਾਪੇਨ੍ਤੋ ਤਸ੍ਸ ਆਣਤ੍ਤਸ੍ਸ વਾਚਾਯ વਾਚਾਯ ਗਰੁਂ ਫੁਸੇਤਿ ਅਤ੍ਥੋ। ਸੁਣਮਾਨਨ੍ਤਿ ਇਮਿਨਾ ਪਰਮ੍ਮੁਖਾ ਦੂਤੇਨ વਾ ਪਣ੍ਣੇਨ વਾ ਚੋਦੇਨ੍ਤਸ੍ਸ ਨ ਰੁਹਤੀਤਿ ਦੀਪਿਤਂ ਹੋਤਿ। ਪਰਮ੍ਮੁਖਾ ਪਨ ਸਤ੍ਤਹਿ ਆਪਤ੍ਤਿਕ੍ਖਨ੍ਧੇਹਿ વਦਨ੍ਤਸ੍ਸ ਦੁਕ੍ਕਟਂ। ਯਂ ਚੋਦੇਤਿ, ਤਸ੍ਸ ਉਪਸਮ੍ਪਨ੍ਨੋਤਿ ਸਙ੍ਖ੍ਯੂਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿવਸੇਨ ਅਮੂਲਕਤਾ, ਚਾવਨਾਧਿਪ੍ਪਾਯੇਨ ਸਮ੍ਮੁਖਾ ਚੋਦਨਾ, ਤਸ੍ਸ ਤਙ੍ਖਣવਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਅਮੂਲਕਸਿਕ੍ਖਾਪਦਂ।
15. Idāni amūlakaṃ pakāsetuṃ ‘‘cāvetukāmo’’tiādimāraddhaṃ. Cāvetukāmo bhikkhu amūlantimavatthunā aññaṃ suṇamānaṃ bhikkhuṃ codento vā codāpento vā garuṃ phuseti sambandho. Tattha cāvetukāmoti brahmacariyā cāvetukāmo. Codentoti ‘‘tvaṃ pārājikaṃ dhammaṃ āpannosi, assamaṇosi, asakyaputtiyosī’’tiādīhi vacanehi sayaṃ codentoti attho. Evaṃ codentassa vācāya vācāya saṅghādiseso. Amūlantimavatthunāti yaṃ codakena cuditakamhi puggale adiṭṭhaṃ asutaṃ aparisaṅkitaṃ, idaṃ etesaṃ dassanasavanaparisaṅkitasaṅkhātānaṃ mūlānaṃ abhāvato nāssa mūlanti amūlaṃ, antimaṃ vatthu yassa pārājikassa tadidaṃ antimavatthu, amūlañca taṃ antimavatthu ceti amūlantimavatthu, tena amūlantimavatthunā, bhikkhuno anurūpesu ekūnavīsatiyā pārājikesu aññatarenāti attho. Codāpayanti codāpayanto, tassa samīpe ṭhatvā aññaṃ bhikkhuṃ āṇāpetvā codāpento tassa āṇattassa vācāya vācāya garuṃ phuseti attho. Suṇamānanti iminā parammukhā dūtena vā paṇṇena vā codentassa na ruhatīti dīpitaṃ hoti. Parammukhā pana sattahi āpattikkhandhehi vadantassa dukkaṭaṃ. Yaṃ codeti, tassa upasampannoti saṅkhyūpagamanaṃ, tasmiṃ suddhasaññitā, yena pārājikena codeti, tassa diṭṭhādivasena amūlakatā, cāvanādhippāyena sammukhā codanā, tassa taṅkhaṇavijānananti imānettha pañca aṅgāni. Amūlakasikkhāpadaṃ.
੧੬. ਇਦਾਨਿ ਅਞ੍ਞਭਾਗਿਯਂ ਦਸ੍ਸੇਤੁਂ ‘‘ਲੇਸਮਤ੍ਤ’’ਨ੍ਤਿਆਦਿਮਾਹ। ਤਤ੍ਥ ਲੇਸਮਤ੍ਤਮੁਪਾਦਾਯਾਤਿ ਜਾਤਿਨਾਮਗੋਤ੍ਤਲਿਙ੍ਗਾਪਤ੍ਤਿਪਤ੍ਤਚੀવਰੂਪਜ੍ਝਾਯਾਚਰਿਯਸੇਨਾਸਨਲੇਸਸਙ੍ਖਾਤੇਸੁ ਦਸਸੁ ਲੇਸੇਸੁ ਯੋ ਤਸ੍ਮਿਂ ਪੁਗ੍ਗਲੇ ਦਿਸ੍ਸਤਿ, ਤਂ ਲੇਸਮਤ੍ਤਂ ਉਪਾਦਾਯ ਨਿਸ੍ਸਾਯ ਭਿਕ੍ਖੁਂ ਬ੍ਰਹ੍ਮਚਰਿਯਾ ਚਾવੇਤੁਕਾਮੋ ਅਮੂਲਨ੍ਤਿਮવਤ੍ਥੁਨਾ ਸੁਣਮਾਨਂ ਭਿਕ੍ਖੁਂ ਚੋਦੇਨ੍ਤੋ ਗਰੁਂ ਫੁਸੇਤਿ ਅਤ੍ਥੋ। ਕਥਂ? ਅਞ੍ਞੋ ਖਤ੍ਤਿਯਜਾਤਿਕੋ ਇਮਿਨਾ ਚੋਦਕੇਨ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਸੋ ਅਞ੍ਞਂ ਅਤ੍ਤਨੋ વੇਰਿਂ ਖਤ੍ਤਿਯਜਾਤਿਕਂ ਭਿਕ੍ਖੁਂ ਪਸ੍ਸਿਤ੍વਾ ਤਂ ਖਤ੍ਤਿਯਜਾਤਿਲੇਸਂ ਗਹੇਤ੍વਾ ਏવਂ ‘‘ਖਤ੍ਤਿਯੋ ਮਯਾ ਦਿਟ੍ਠੋ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ, ਤ੍વਂ ਖਤ੍ਤਿਯੋ ਪਾਰਾਜਿਕਂ ਧਮ੍ਮਂ ਆਪਨ੍ਨੋਸੀ’’ਤਿ વਾ ‘‘ਤ੍વਂ ਸੋ ਖਤ੍ਤਿਯੋ, ਨਾਞ੍ਞੋ, ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ਤਿ વਾ ਚੋਦੇਤਿ, ਏવਂ ਨਾਮਲੇਸਾਦਯੋਪਿ વੇਦਿਤਬ੍ਬਾ। ਅਙ੍ਗਾਨਿ ਪਨੇਤ੍ਥ ਅਨਨ੍ਤਰਸਦਿਸਾਨਿ। ਅਞ੍ਞਭਾਗਿਯਸਿਕ੍ਖਾਪਦਂ।
16. Idāni aññabhāgiyaṃ dassetuṃ ‘‘lesamatta’’ntiādimāha. Tattha lesamattamupādāyāti jātināmagottaliṅgāpattipattacīvarūpajjhāyācariyasenāsanalesasaṅkhātesu dasasu lesesu yo tasmiṃ puggale dissati, taṃ lesamattaṃ upādāya nissāya bhikkhuṃ brahmacariyā cāvetukāmo amūlantimavatthunā suṇamānaṃ bhikkhuṃ codento garuṃ phuseti attho. Kathaṃ? Añño khattiyajātiko iminā codakena pārājikaṃ dhammaṃ ajjhāpajjanto diṭṭho hoti, so aññaṃ attano veriṃ khattiyajātikaṃ bhikkhuṃ passitvā taṃ khattiyajātilesaṃ gahetvā evaṃ ‘‘khattiyo mayā diṭṭho pārājikaṃ dhammaṃ ajjhāpajjanto, tvaṃ khattiyo pārājikaṃ dhammaṃ āpannosī’’ti vā ‘‘tvaṃ so khattiyo, nāñño, pārājikaṃ dhammaṃ ajjhāpannosī’’ti vā codeti, evaṃ nāmalesādayopi veditabbā. Aṅgāni panettha anantarasadisāni. Aññabhāgiyasikkhāpadaṃ.
ਗਰੁਕਾਪਤ੍ਤਿਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Garukāpattiniddesavaṇṇanā niṭṭhitā.
