| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. க³தஸஞ்ஞகத்தே²ரஅபதா³னவண்ணனா
2. Gatasaññakattheraapadānavaṇṇanā
ஜாதியா ஸத்தவஸ்ஸோஹந்திஆதி³கங் ஆயஸ்மதோ க³தஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ புராகதவாஸனாவஸேன ஸத்³தா⁴ஜாதோ ஸத்தவஸ்ஸிககாலேயேவ பப்³ப³ஜிதோ ப⁴க³வதோ பணாமகரணேனேவ பாகடோ அஹோஸி. ஸோ ஏகதி³வஸங் அதீவ நீலமணிப்பபா⁴னி நங்க³லகஸிதட்டா²னே உட்டி²தஸத்தபுப்பா²னி க³ஹெத்வா ஆகாஸே பூஜேஸி. ஸோ யாவதாயுகங் ஸமணத⁴ம்மங் கத்வா தேன புஞ்ஞேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Jātiyāsattavassohantiādikaṃ āyasmato gatasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe nibbatto purākatavāsanāvasena saddhājāto sattavassikakāleyeva pabbajito bhagavato paṇāmakaraṇeneva pākaṭo ahosi. So ekadivasaṃ atīva nīlamaṇippabhāni naṅgalakasitaṭṭhāne uṭṭhitasattapupphāni gahetvā ākāse pūjesi. So yāvatāyukaṃ samaṇadhammaṃ katvā tena puññena devamanussesu saṃsaranto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva arahā ahosi.
10. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஜாதியா ஸத்தவஸ்ஸோஹந்திஆதி³மாஹ. தத்த² ஜாதியா ஸத்தவஸ்ஸோதி மாதுக³ப்³ப⁴தோ நிக்க²ந்தகாலதோ பட்டா²ய பரிபுண்ணஸத்தவஸ்ஸிகோதி அத்தோ². பப்³ப³ஜிங் அனகா³ரியந்தி அகா³ரஸ்ஸ ஹிதங் ஆகா³ரியங் கஸிவாணிஜ்ஜாதி³கம்மங் நத்தி² ஆகா³ரியந்தி அனகா³ரியங், பு³த்³த⁴ஸாஸனே பப்³ப³ஜிங் அஹந்தி அத்தோ².
10. So aparabhāge attano pubbakammaṃ saritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyā sattavassoti mātugabbhato nikkhantakālato paṭṭhāya paripuṇṇasattavassikoti attho. Pabbajiṃ anagāriyanti agārassa hitaṃ āgāriyaṃ kasivāṇijjādikammaṃ natthi āgāriyanti anagāriyaṃ, buddhasāsane pabbajiṃ ahanti attho.
12. ஸுக³தானுக³தங் மக்³க³ந்தி பு³த்³தே⁴ன க³தங் மக்³க³ங். அத² வா ஸுக³தேன தே³ஸிதங் த⁴ம்மானுத⁴ம்மபடிபத்திபூரணவஸேன ஹட்ட²மானஸோ துட்ட²சித்தோ பூஜெத்வாதி ஸம்ப³ந்தோ⁴. ஸேஸங் ஸப்³ப³த்த² உத்தானத்த²மேவாதி.
12.Sugatānugataṃ magganti buddhena gataṃ maggaṃ. Atha vā sugatena desitaṃ dhammānudhammapaṭipattipūraṇavasena haṭṭhamānaso tuṭṭhacitto pūjetvāti sambandho. Sesaṃ sabbattha uttānatthamevāti.
க³தஸஞ்ஞகத்தே²ரஅபதா³னவண்ணனா ஸமத்தா.
Gatasaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. க³தஸஞ்ஞகத்தே²ரஅபதா³னங் • 2. Gatasaññakattheraapadānaṃ
