| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
2. ගතසඤ්‌ඤකත්‌ථෙරඅපදානවණ්‌ණනා
2. Gatasaññakattheraapadānavaṇṇanā
ජාතියා සත්‌තවස්‌සොහන්‌තිආදිකං ආයස්‌මතො ගතසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො තිස්‌සස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො පුරාකතවාසනාවසෙන සද්‌ධාජාතො සත්‌තවස්‌සිකකාලෙයෙව පබ්‌බජිතො භගවතො පණාමකරණෙනෙව පාකටො අහොසි. සො එකදිවසං අතීව නීලමණිප්‌පභානි නඞ්‌ගලකසිතට්‌ඨානෙ උට්‌ඨිතසත්‌තපුප්‌ඵානි ගහෙත්‌වා ආකාසෙ පූජෙසි. සො යාවතායුකං සමණධම්‌මං කත්‌වා තෙන පුඤ්‌ඤෙන දෙවමනුස්‌සෙසු සංසරන්‌තො ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථරි පසීදිත්‌වා පබ්‌බජිතො නචිරස්‌සෙව අරහා අහොසි.
Jātiyāsattavassohantiādikaṃ āyasmato gatasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe nibbatto purākatavāsanāvasena saddhājāto sattavassikakāleyeva pabbajito bhagavato paṇāmakaraṇeneva pākaṭo ahosi. So ekadivasaṃ atīva nīlamaṇippabhāni naṅgalakasitaṭṭhāne uṭṭhitasattapupphāni gahetvā ākāse pūjesi. So yāvatāyukaṃ samaṇadhammaṃ katvā tena puññena devamanussesu saṃsaranto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva arahā ahosi.
10. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො ජාතියා සත්‌තවස්‌සොහන්‌තිආදිමාහ. තත්‌ථ ජාතියා සත්‌තවස්‌සොති මාතුගබ්‌භතො නික්‌ඛන්‌තකාලතො පට්‌ඨාය පරිපුණ්‌ණසත්‌තවස්‌සිකොති අත්‌ථො. පබ්‌බජිං අනගාරියන්‌ති අගාරස්‌ස හිතං ආගාරියං කසිවාණිජ්‌ජාදිකම්‌මං නත්‌ථි ආගාරියන්‌ති අනගාරියං, බුද්‌ධසාසනෙ පබ්‌බජිං අහන්‌ති අත්‌ථො.
10. So aparabhāge attano pubbakammaṃ saritvā somanassajāto pubbacaritāpadānaṃ pakāsento jātiyā sattavassohantiādimāha. Tattha jātiyā sattavassoti mātugabbhato nikkhantakālato paṭṭhāya paripuṇṇasattavassikoti attho. Pabbajiṃ anagāriyanti agārassa hitaṃ āgāriyaṃ kasivāṇijjādikammaṃ natthi āgāriyanti anagāriyaṃ, buddhasāsane pabbajiṃ ahanti attho.
12. සුගතානුගතං මග්‌ගන්‌ති බුද්‌ධෙන ගතං මග්‌ගං. අථ වා සුගතෙන දෙසිතං ධම්‌මානුධම්‌මපටිපත්‌තිපූරණවසෙන හට්‌ඨමානසො තුට්‌ඨචිත්‌තො පූජෙත්‌වාති සම්‌බන්‌ධො. සෙසං සබ්‌බත්‌ථ උත්‌තානත්‌ථමෙවාති.
12.Sugatānugataṃ magganti buddhena gataṃ maggaṃ. Atha vā sugatena desitaṃ dhammānudhammapaṭipattipūraṇavasena haṭṭhamānaso tuṭṭhacitto pūjetvāti sambandho. Sesaṃ sabbattha uttānatthamevāti.
ගතසඤ්‌ඤකත්‌ථෙරඅපදානවණ්‌ණනා සමත්‌තා.
Gatasaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 2. ගතසඤ්‌ඤකත්‌ථෙරඅපදානං • 2. Gatasaññakattheraapadānaṃ
