| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৬. গতিকথা
6. Gatikathā
২৩১. গতিসম্পত্তিযা ঞাণসম্পযুত্তে কতিনং হেতূনং পচ্চযা উপপত্তি হোতি? খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণসম্পযুত্তে কতিনং হেতূনং পচ্চযা উপপত্তি হোতি? রূপাৰচরানং দেৰানং কতিনং হেতূনং পচ্চযা উপপত্তি হোতি? অরূপাৰচরানং দেৰানং কতিনং হেতূনং পচ্চযা উপপত্তি হোতি?
231. Gatisampattiyā ñāṇasampayutte katinaṃ hetūnaṃ paccayā upapatti hoti? Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇasampayutte katinaṃ hetūnaṃ paccayā upapatti hoti? Rūpāvacarānaṃ devānaṃ katinaṃ hetūnaṃ paccayā upapatti hoti? Arūpāvacarānaṃ devānaṃ katinaṃ hetūnaṃ paccayā upapatti hoti?
গতিসম্পত্তিযা ঞাণসম্পযুত্তে অট্ঠন্নং হেতূনং পচ্চযা উপপত্তি হোতি। খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণসম্পযুত্তে অট্ঠন্নং হেতূনং পচ্চযা উপপত্তি হোতি। রূপাৰচরানং দেৰানং অট্ঠন্নং হেতূনং পচ্চযা উপপত্তি হোতি। অরূপাৰচরানং দেৰানং অট্ঠন্নং হেতূনং পচ্চযা উপপত্তি হোতি।
Gatisampattiyā ñāṇasampayutte aṭṭhannaṃ hetūnaṃ paccayā upapatti hoti. Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇasampayutte aṭṭhannaṃ hetūnaṃ paccayā upapatti hoti. Rūpāvacarānaṃ devānaṃ aṭṭhannaṃ hetūnaṃ paccayā upapatti hoti. Arūpāvacarānaṃ devānaṃ aṭṭhannaṃ hetūnaṃ paccayā upapatti hoti.
২৩২. গতিসম্পত্তিযা ঞাণসম্পযুত্তে কতমেসং অট্ঠন্নং হেতূনং পচ্চযা উপপত্তি হোতি? কুসলকম্মস্স জৰনক্খণে তযো হেতূ কুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – কুসলমূলপচ্চযাপি সঙ্খারা। নিকন্তিক্খণে দ্ৰে হেতূ অকুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – অকুসলমূলপচ্চযাপি সঙ্খারা। পটিসন্ধিক্খণে তযো হেতূ অব্যাকতা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘নামরূপপচ্চযাপি ৰিঞ্ঞাণং, ৰিঞ্ঞাণপচ্চযাপি নামরূপং’’ ।
232. Gatisampattiyā ñāṇasampayutte katamesaṃ aṭṭhannaṃ hetūnaṃ paccayā upapatti hoti? Kusalakammassa javanakkhaṇe tayo hetū kusalā; tasmiṃ khaṇe jātacetanāya sahajātapaccayā honti. Tena vuccati – kusalamūlapaccayāpi saṅkhārā. Nikantikkhaṇe dve hetū akusalā; tasmiṃ khaṇe jātacetanāya sahajātapaccayā honti. Tena vuccati – akusalamūlapaccayāpi saṅkhārā. Paṭisandhikkhaṇe tayo hetū abyākatā; tasmiṃ khaṇe jātacetanāya sahajātapaccayā honti. Tena vuccati – ‘‘nāmarūpapaccayāpi viññāṇaṃ, viññāṇapaccayāpi nāmarūpaṃ’’ .
পটিসন্ধিক্খণে পঞ্চক্খন্ধা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে চত্তারো মহাভূতা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি। পটিসন্ধিক্খণে তযো জীৰিতসঙ্খারা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি , ৰিপ্পযুত্তপচ্চযা হোন্তি। পটিসন্ধিক্খণে নামঞ্চ রূপঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে ইমে চুদ্দস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে চত্তারো খন্ধা অরূপিনো সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে পঞ্চিন্দ্রিযানি সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে তযো হেতূ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে নামঞ্চ ৰিঞ্ঞাণঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে ইমে চুদ্দস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে ইমে অট্ঠৰীসতি ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। গতিসম্পত্তিযা ঞাণসম্পযুত্তে ইমেসং অট্ঠন্নং হেতূনং পচ্চযা উপপত্তি হোতি।
Paṭisandhikkhaṇe pañcakkhandhā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe cattāro mahābhūtā sahajātapaccayā honti, aññamaññapaccayā honti, nissayapaccayā honti. Paṭisandhikkhaṇe tayo jīvitasaṅkhārā sahajātapaccayā honti, aññamaññapaccayā honti, nissayapaccayā honti , vippayuttapaccayā honti. Paṭisandhikkhaṇe nāmañca rūpañca sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe pañcindriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe tayo hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe ime aṭṭhavīsati dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Gatisampattiyā ñāṇasampayutte imesaṃ aṭṭhannaṃ hetūnaṃ paccayā upapatti hoti.
খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণসম্পযুত্তে কতমেসং অট্ঠন্নং হেতূনং পচ্চযা উপপত্তি হোতি? কুসলকম্মস্স জৰনক্খণে তযো হেতূ কুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘কুসলমূলপচ্চযাপি সঙ্খারা’’। নিকন্তিক্খণে দ্ৰে হেতূ অকুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘অকুসলমূলপচ্চযাপি সঙ্খারা’’। পটিসন্ধিক্খণে তযো হেতূ অব্যাকতা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘নামরূপপচ্চযাপি ৰিঞ্ঞাণং, ৰিঞ্ঞাণপচ্চযাপি নামরূপং’’।
Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇasampayutte katamesaṃ aṭṭhannaṃ hetūnaṃ paccayā upapatti hoti? Kusalakammassa javanakkhaṇe tayo hetū kusalā; tasmiṃ khaṇe jātacetanāya sahajātapaccayā honti. Tena vuccati – ‘‘kusalamūlapaccayāpi saṅkhārā’’. Nikantikkhaṇe dve hetū akusalā; tasmiṃ khaṇe jātacetanāya sahajātapaccayā honti. Tena vuccati – ‘‘akusalamūlapaccayāpi saṅkhārā’’. Paṭisandhikkhaṇe tayo hetū abyākatā; tasmiṃ khaṇe jātacetanāya sahajātapaccayā honti. Tena vuccati – ‘‘nāmarūpapaccayāpi viññāṇaṃ, viññāṇapaccayāpi nāmarūpaṃ’’.
পটিসন্ধিক্খণে পঞ্চক্খন্ধা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে চত্তারো মহাভূতা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি। পটিসন্ধিক্খণে তযো জীৰিতসঙ্খারা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে নামঞ্চ রূপঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে ইমে চুদ্দস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে চত্তারো খন্ধা অরূপিনো সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে পঞ্চিন্দ্রিযানি সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে তযো হেতূ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে নামঞ্চ ৰিঞ্ঞাণঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে ইমে চুদ্দস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে ইমে অট্ঠৰীসতি ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণসম্পযুত্তে ইমেসং অট্ঠন্নং হেতূনং পচ্চযা উপপত্তি হোতি।
Paṭisandhikkhaṇe pañcakkhandhā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe cattāro mahābhūtā sahajātapaccayā honti, aññamaññapaccayā honti, nissayapaccayā honti. Paṭisandhikkhaṇe tayo jīvitasaṅkhārā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe nāmañca rūpañca sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe pañcindriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe tayo hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe ime aṭṭhavīsati dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇasampayutte imesaṃ aṭṭhannaṃ hetūnaṃ paccayā upapatti hoti.
রূপাৰচরানং দেৰানং কতমেসং অট্ঠন্নং হেতূনং পচ্চযা উপপত্তি হোতি? কুসলকম্মস্স জৰনক্খণে তযো হেতূ কুসলা…পে॰… রূপাৰচরানং দেৰানং ইমেসং অট্ঠন্নং হেতূনং পচ্চযা উপপত্তি হোতি।
Rūpāvacarānaṃ devānaṃ katamesaṃ aṭṭhannaṃ hetūnaṃ paccayā upapatti hoti? Kusalakammassa javanakkhaṇe tayo hetū kusalā…pe… rūpāvacarānaṃ devānaṃ imesaṃ aṭṭhannaṃ hetūnaṃ paccayā upapatti hoti.
অরূপাৰচরানং দেৰানং কতমেসং অট্ঠন্নং হেতূনং পচ্চযা উপপত্তি হোতি? কুসলকম্মস্স জৰনক্খণে তযো হেতূ কুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘কুসলমূলপচ্চযাপি সঙ্খারা’’। নিকন্তিক্খণে দ্ৰে হেতূ অকুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘অকুসলমূলপচ্চযাপি সঙ্খারা’’। পটিসন্ধিক্খণে তযো হেতূ অব্যাকতা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘নামপচ্চযাপি ৰিঞ্ঞাণং ৰিঞ্ঞাণপচ্চযাপি নামং’’।
Arūpāvacarānaṃ devānaṃ katamesaṃ aṭṭhannaṃ hetūnaṃ paccayā upapatti hoti? Kusalakammassa javanakkhaṇe tayo hetū kusalā; tasmiṃ khaṇe jātacetanāya sahajātapaccayā honti. Tena vuccati – ‘‘kusalamūlapaccayāpi saṅkhārā’’. Nikantikkhaṇe dve hetū akusalā; tasmiṃ khaṇe jātacetanāya sahajātapaccayā honti. Tena vuccati – ‘‘akusalamūlapaccayāpi saṅkhārā’’. Paṭisandhikkhaṇe tayo hetū abyākatā; tasmiṃ khaṇe jātacetanāya sahajātapaccayā honti. Tena vuccati – ‘‘nāmapaccayāpi viññāṇaṃ viññāṇapaccayāpi nāmaṃ’’.
পটিসন্ধিক্খণে চত্তারো খন্ধা অরূপিনো সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে পঞ্চিন্দ্রিযানি সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে তযো হেতূ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে নামঞ্চ ৰিঞ্ঞাণঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে ইমে চুদ্দস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। অরূপাৰচরানং দেৰানং ইমেসং অট্ঠন্নং হেতূনং পচ্চযা উপপত্তি হোতি।
Paṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe pañcindriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe tayo hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Arūpāvacarānaṃ devānaṃ imesaṃ aṭṭhannaṃ hetūnaṃ paccayā upapatti hoti.
২৩৩. গতিসম্পত্তিযা ঞাণৰিপ্পযুত্তে কতিনং হেতূনং পচ্চযা উপপত্তি হোতি? খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণৰিপ্পযুত্তে কতিনং হেতূনং পচ্চযা উপপত্তি হোতি?
233. Gatisampattiyā ñāṇavippayutte katinaṃ hetūnaṃ paccayā upapatti hoti? Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇavippayutte katinaṃ hetūnaṃ paccayā upapatti hoti?
গতিসম্পত্তিযা ঞাণৰিপ্পযুত্তে ছন্নং হেতূনং পচ্চযা উপপত্তি হোতি। খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণৰিপ্পযুত্তে ছন্নং হেতূনং পচ্চযা উপপত্তি হোতি ।
Gatisampattiyā ñāṇavippayutte channaṃ hetūnaṃ paccayā upapatti hoti. Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇavippayutte channaṃ hetūnaṃ paccayā upapatti hoti .
গতিসম্পত্তিযা ঞাণৰিপ্পযুত্তে কতমেসং ছন্নং হেতূনং পচ্চযা উপপত্তি হোতি? কুসলকম্মস্স জৰনক্খণে দ্ৰে হেতূ কুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – কুসলমূলপচ্চযাপি সঙ্খারা। নিকন্তিক্খণে দ্ৰে হেতূ অকুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – অকুসলমূলপচ্চযাপি সঙ্খারা। পটিসন্ধিক্খণে দ্ৰে হেতূ অব্যাকতা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘নামরূপপচ্চযাপি ৰিঞ্ঞাণং, ৰিঞ্ঞাণপচ্চযাপি নামরূপং’’।
Gatisampattiyā ñāṇavippayutte katamesaṃ channaṃ hetūnaṃ paccayā upapatti hoti? Kusalakammassa javanakkhaṇe dve hetū kusalā; tasmiṃ khaṇe jātacetanāya sahajātapaccayā honti. Tena vuccati – kusalamūlapaccayāpi saṅkhārā. Nikantikkhaṇe dve hetū akusalā; tasmiṃ khaṇe jātacetanāya sahajātapaccayā honti. Tena vuccati – akusalamūlapaccayāpi saṅkhārā. Paṭisandhikkhaṇe dve hetū abyākatā; tasmiṃ khaṇe jātacetanāya sahajātapaccayā honti. Tena vuccati – ‘‘nāmarūpapaccayāpi viññāṇaṃ, viññāṇapaccayāpi nāmarūpaṃ’’.
পটিসন্ধিক্খণে পঞ্চক্খন্ধা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে চত্তারো মহাভূতা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি। পটিসন্ধিক্খণে তযো জীৰিতসঙ্খারা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে নামঞ্চ রূপঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে ইমে চুদ্দস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। পটিসন্ধিক্খণে চত্তারো খন্ধা অরূপিনো সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে চত্তারি ইন্দ্রিযানি সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে দ্ৰে হেতূ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে নামঞ্চ ৰিঞ্ঞাণঞ্চ সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি। পটিসন্ধিক্খণে ইমে দ্ৰাদস ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, সম্পযুত্তপচ্চযা হোন্তি । পটিসন্ধিক্খণে ইমে ছব্বীসতি ধম্মা সহজাতপচ্চযা হোন্তি, অঞ্ঞমঞ্ঞপচ্চযা হোন্তি, নিস্সযপচ্চযা হোন্তি, ৰিপ্পযুত্তপচ্চযা হোন্তি। গতিসম্পত্তিযা ঞাণৰিপ্পযুত্তে ইমেসং ছন্নং হেতূনং পচ্চযা উপপত্তি হোতি।
Paṭisandhikkhaṇe pañcakkhandhā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe cattāro mahābhūtā sahajātapaccayā honti, aññamaññapaccayā honti, nissayapaccayā honti. Paṭisandhikkhaṇe tayo jīvitasaṅkhārā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe nāmañca rūpañca sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe ime cuddasa dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Paṭisandhikkhaṇe cattāro khandhā arūpino sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe cattāri indriyāni sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe dve hetū sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe nāmañca viññāṇañca sahajātapaccayā honti, aññamaññapaccayā honti, nissayapaccayā honti, sampayuttapaccayā honti. Paṭisandhikkhaṇe ime dvādasa dhammā sahajātapaccayā honti, aññamaññapaccayā honti, nissayapaccayā honti, sampayuttapaccayā honti . Paṭisandhikkhaṇe ime chabbīsati dhammā sahajātapaccayā honti, aññamaññapaccayā honti, nissayapaccayā honti, vippayuttapaccayā honti. Gatisampattiyā ñāṇavippayutte imesaṃ channaṃ hetūnaṃ paccayā upapatti hoti.
খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণৰিপ্পযুত্তে কতমেসং ছন্নং হেতূনং পচ্চযা উপপত্তি হোতি? কুসলকম্মস্স জৰনক্খণে দ্ৰে হেতূ কুসলা; তস্মিং খণে জাতচেতনায সহজাতপচ্চযা হোন্তি। তেন ৰুচ্চতি – ‘‘কুসলমূলপচ্চযাপি সঙ্খারা…পে॰… খত্তিযমহাসালানং ব্রাহ্মণমহাসালানং গহপতিমহাসালানং কামাৰচরানং দেৰানং ঞাণৰিপ্পযুত্তে ইমেসং ছন্নং হেতূনং পচ্চযা উপপত্তি হোতী’’তি।
Khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇavippayutte katamesaṃ channaṃ hetūnaṃ paccayā upapatti hoti? Kusalakammassa javanakkhaṇe dve hetū kusalā; tasmiṃ khaṇe jātacetanāya sahajātapaccayā honti. Tena vuccati – ‘‘kusalamūlapaccayāpi saṅkhārā…pe… khattiyamahāsālānaṃ brāhmaṇamahāsālānaṃ gahapatimahāsālānaṃ kāmāvacarānaṃ devānaṃ ñāṇavippayutte imesaṃ channaṃ hetūnaṃ paccayā upapatti hotī’’ti.
গতিকথা নিট্ঠিতা।
Gatikathā niṭṭhitā.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / গতিকথাৰণ্ণনা • Gatikathāvaṇṇanā
