| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৬. গতিকথা
6. Gatikathā
গতিকথাৰণ্ণনা
Gatikathāvaṇṇanā
২৩১. ইদানি তস্সা ৰিমোক্খুপ্পত্তিযা হেতুভূতং হেতুসম্পত্তিং দস্সেন্তেন কথিতায গতিকথায অপুব্বত্থানুৰণ্ণনা। দুহেতুকপটিসন্ধিকস্সাপি হি ‘‘নত্থি ঝানং অপঞ্ঞস্সা’’তি (ধ॰ প॰ ৩৭২) ৰচনতো ঝানম্পি ন উপ্পজ্জতি, কিং পন ৰিমোক্খো। তত্থ গতিসম্পত্তিযাতি নিরযতিরচ্ছানযোনিপেত্তিৰিসযমনুস্সদেৰসঙ্খাতাসু পঞ্চসু গতীসু মনুস্সদেৰসঙ্খাতায গতিসম্পত্তিযা। এতেন পুরিমা তিস্সো গতিৰিপত্তিযো পটিক্খিপতি। গতিযা সম্পত্তি গতিসম্পত্তি, সুগতীতি ৰুত্তং হোতি। গতীতি চ সহোকাসা খন্ধা। পঞ্চসু চ গতীসু পেত্তিৰিসযগ্গহণেনেৰ অসুরকাযোপি গহিতো। দেৰাতি ছ কামাৰচরদেৰা ব্রহ্মানো চ। দেৰগ্গহণেন অসুরাপি সঙ্গহিতা। ঞাণসম্পযুত্তেতি ঞাণসম্পযুত্তপটিসন্ধিক্খণে। খণোপি হি ঞাণসম্পযুত্তযোগেন তেনেৰ ৰোহারেন ৰুত্তোতি ৰেদিতব্বো। কতিনং হেতূনন্তি অলোভাদোসামোহহেতূসু কতিনং হেতূনং। উপপত্তীতি উপপজ্জনং, নিব্বত্তীতি অত্থো।
231. Idāni tassā vimokkhuppattiyā hetubhūtaṃ hetusampattiṃ dassentena kathitāya gatikathāya apubbatthānuvaṇṇanā. Duhetukapaṭisandhikassāpi hi ‘‘natthi jhānaṃ apaññassā’’ti (dha. pa. 372) vacanato jhānampi na uppajjati, kiṃ pana vimokkho. Tattha gatisampattiyāti nirayatiracchānayonipettivisayamanussadevasaṅkhātāsu pañcasu gatīsu manussadevasaṅkhātāya gatisampattiyā. Etena purimā tisso gativipattiyo paṭikkhipati. Gatiyā sampatti gatisampatti, sugatīti vuttaṃ hoti. Gatīti ca sahokāsā khandhā. Pañcasu ca gatīsu pettivisayaggahaṇeneva asurakāyopi gahito. Devāti cha kāmāvacaradevā brahmāno ca. Devaggahaṇena asurāpi saṅgahitā. Ñāṇasampayutteti ñāṇasampayuttapaṭisandhikkhaṇe. Khaṇopi hi ñāṇasampayuttayogena teneva vohārena vuttoti veditabbo. Katinaṃ hetūnanti alobhādosāmohahetūsu katinaṃ hetūnaṃ. Upapattīti upapajjanaṃ, nibbattīti attho.
যস্মা পন সুদ্দকুলজাতাপি তিহেতুকা হোন্তি, তস্মা তে সন্ধায পঠমপুচ্ছা। যস্মা চ যেভুয্যেন মহাপুঞ্ঞা তীসু মহাসালকুলেসু জাযন্তি, তস্মা তেসং তিণ্ণং কুলানং ৰসেন তিস্সো পুচ্ছা। পাঠো পন সঙ্খিত্তো। মহতী সালা এতেসন্তি মহাসালা, মহাঘরা মহাৰিভৰাতি অত্থো। অথ ৰা মহা সারো এতেসন্তি মহাসারাতি ৰত্তব্বে র-কারস্স ল-কারং কত্ৰা ‘‘মহাসালা’’তি ৰুত্তং। খত্তিযা মহাসালা, খত্তিযেসু ৰা মহাসালাতি খত্তিযমহাসালা। সেসেসুপি এসেৰ নযো। তত্থ যস্স খত্তিযস্স গেহে পচ্ছিমন্তেন কোটিসতং ধনং নিধানগতং হোতি, কহাপণানঞ্চ ৰীসতি অম্বণানি দিৰসং ৰলঞ্জে নিক্খমন্তি, অযং খত্তিযমহাসালো নাম। যস্স ব্রাহ্মণস্স গেহে পচ্ছিমন্তেন অসীতিকোটিধনং নিধানগতং হোতি, কহাপণানঞ্চ দস অম্বণানি দিৰসং ৰলঞ্জে নিক্খমন্তি, অযং ব্রাহ্মণমহাসালো নাম। যস্স গহপতিস্স গেহে পচ্ছিমন্তেন চত্তালীসকোটিধনং নিধানগতং হোতি, কহাপণানঞ্চ পঞ্চ অম্বণানি দিৰসং ৰলঞ্জে নিক্খমন্তি, অযং গহপতিমহাসালো নাম।
Yasmā pana suddakulajātāpi tihetukā honti, tasmā te sandhāya paṭhamapucchā. Yasmā ca yebhuyyena mahāpuññā tīsu mahāsālakulesu jāyanti, tasmā tesaṃ tiṇṇaṃ kulānaṃ vasena tisso pucchā. Pāṭho pana saṅkhitto. Mahatī sālā etesanti mahāsālā, mahāgharā mahāvibhavāti attho. Atha vā mahā sāro etesanti mahāsārāti vattabbe ra-kārassa la-kāraṃ katvā ‘‘mahāsālā’’ti vuttaṃ. Khattiyā mahāsālā, khattiyesu vā mahāsālāti khattiyamahāsālā. Sesesupi eseva nayo. Tattha yassa khattiyassa gehe pacchimantena koṭisataṃ dhanaṃ nidhānagataṃ hoti, kahāpaṇānañca vīsati ambaṇāni divasaṃ valañje nikkhamanti, ayaṃ khattiyamahāsālo nāma. Yassa brāhmaṇassa gehe pacchimantena asītikoṭidhanaṃ nidhānagataṃ hoti, kahāpaṇānañca dasa ambaṇāni divasaṃ valañje nikkhamanti, ayaṃ brāhmaṇamahāsālo nāma. Yassa gahapatissa gehe pacchimantena cattālīsakoṭidhanaṃ nidhānagataṃ hoti, kahāpaṇānañca pañca ambaṇāni divasaṃ valañje nikkhamanti, ayaṃ gahapatimahāsālo nāma.
রূপাৰচরানং অরূপাৰচরানঞ্চ একন্ততিহেতুকত্তা ‘‘ঞাণসম্পযুত্তে’’তি ন ৰুত্তং, মনুস্সেসু পন দুহেতুকাহেতুকানঞ্চ সব্ভাৰতো, কামাৰচরেসু দেৰেসু দুহেতুকানঞ্চ সব্ভাৰতো সেসেসু ‘‘ঞাণসম্পযুত্তে’’তি ৰুত্তং। এত্থ চ কামাৰচরদেৰা পঞ্চকামগুণরতিযা কীল়ন্তি, সরীরজুতিযা চ জোতন্তীতি দেৰা, রূপাৰচরব্রহ্মানো ঝানরতিযা কীল়ন্তি , সরীরজুতিযা চ জোতন্তীতি দেৰা, অরূপাৰচরব্রহ্মানো ঝানরতিযা কীল়ন্তি, ঞাণজুতিযা চ জোতন্তীতি দেৰা।
Rūpāvacarānaṃ arūpāvacarānañca ekantatihetukattā ‘‘ñāṇasampayutte’’ti na vuttaṃ, manussesu pana duhetukāhetukānañca sabbhāvato, kāmāvacaresu devesu duhetukānañca sabbhāvato sesesu ‘‘ñāṇasampayutte’’ti vuttaṃ. Ettha ca kāmāvacaradevā pañcakāmaguṇaratiyā kīḷanti, sarīrajutiyā ca jotantīti devā, rūpāvacarabrahmāno jhānaratiyā kīḷanti , sarīrajutiyā ca jotantīti devā, arūpāvacarabrahmāno jhānaratiyā kīḷanti, ñāṇajutiyā ca jotantīti devā.
২৩২. কুসলকম্মস্স জৰনক্খণেতি অতীতজাতিযা ইধ তিহেতুকপটিসন্ধিজনকস্স তিহেতুককামাৰচরকুসলকম্মস্স চ জৰনৰীথিযং পুনপ্পুনং উপ্পত্তিৰসেন সত্তৰারং জৰনক্খণে, পৰত্তনকালেতি অত্থো। তযো হেতূ কুসলাতি অলোভো কুসলহেতু অদোসো কুসলহেতু অমোহো কুসলহেতু। তস্মিং খণে জাতচেতনাযাতি তস্মিং ৰুত্তক্খণেযেৰ জাতায কুসলচেতনায। সহজাতপচ্চযা হোন্তীতি উপ্পজ্জমানা চ সহউপ্পাদনভাৰেন উপকারকা হোন্তি। তেন ৰুচ্চতীতি তেন সহজাতপচ্চযভাৰেনেৰ ৰুচ্চতি। কুসলমূলপচ্চযাপি সঙ্খারাতি একচিত্তক্খণিকপচ্চযাকারনযেন ৰুত্তং। ‘‘সঙ্খারা’’তি চ বহুৰচনেন তত্থ সঙ্খারক্খন্ধসঙ্গহিতা সব্বে চেতসিকা গহিতাতি ৰেদিতব্বং। অপিসদ্দেন সঙ্খারপচ্চযাপি কুসলমূলানীতিপি ৰুত্তং হোতি।
232.Kusalakammassa javanakkhaṇeti atītajātiyā idha tihetukapaṭisandhijanakassa tihetukakāmāvacarakusalakammassa ca javanavīthiyaṃ punappunaṃ uppattivasena sattavāraṃ javanakkhaṇe, pavattanakāleti attho. Tayo hetū kusalāti alobho kusalahetu adoso kusalahetu amoho kusalahetu. Tasmiṃ khaṇe jātacetanāyāti tasmiṃ vuttakkhaṇeyeva jātāya kusalacetanāya. Sahajātapaccayā hontīti uppajjamānā ca sahauppādanabhāvena upakārakā honti. Tena vuccatīti tena sahajātapaccayabhāveneva vuccati. Kusalamūlapaccayāpi saṅkhārāti ekacittakkhaṇikapaccayākāranayena vuttaṃ. ‘‘Saṅkhārā’’ti ca bahuvacanena tattha saṅkhārakkhandhasaṅgahitā sabbe cetasikā gahitāti veditabbaṃ. Apisaddena saṅkhārapaccayāpi kusalamūlānītipi vuttaṃ hoti.
নিকন্তিক্খণেতি অত্তনো ৰিপাকং দাতুং পচ্চুপট্ঠিতকম্মে ৰা তথা পচ্চুপট্ঠিতকম্মেন উপট্ঠাপিতে কম্মনিমিত্তে ৰা গতিনিমিত্তে ৰা উপ্পজ্জমানানং নিকন্তিক্খণে। নিকন্তীতি নিকামনা পত্থনা। আসন্নমরণস্স হি মোহেন আকুলচিত্তত্তা অৰীচিজালাযপি নিকন্তি উপ্পজ্জতি, কিং পন সেসেসু নিমিত্তেসু। দ্ৰে হেতূতি লোভো অকুসলহেতু মোহো অকুসলহেতু। ভৰনিকন্তি পন পটিসন্ধিঅনন্তরং পৰত্তভৰঙ্গৰীথিতো ৰুট্ঠিতমত্তস্সেৰ অত্তনো খন্ধসন্তানং আরব্ভ সব্বেসম্পি উপ্পজ্জতি। ‘‘যস্স ৰা পন যত্থ অকুসলা ধম্মা ন উপ্পজ্জিত্থ, তস্স তত্থ কুসলা ধম্মা ন উপ্পজ্জিত্থাতি আমন্তা’’তি এৰমাদি ইদমেৰ সন্ধায ৰুত্তং। তস্মিং খণে জাতচেতনাযাতি অকুসলচেতনায।
Nikantikkhaṇeti attano vipākaṃ dātuṃ paccupaṭṭhitakamme vā tathā paccupaṭṭhitakammena upaṭṭhāpite kammanimitte vā gatinimitte vā uppajjamānānaṃ nikantikkhaṇe. Nikantīti nikāmanā patthanā. Āsannamaraṇassa hi mohena ākulacittattā avīcijālāyapi nikanti uppajjati, kiṃ pana sesesu nimittesu. Dve hetūti lobho akusalahetu moho akusalahetu. Bhavanikanti pana paṭisandhianantaraṃ pavattabhavaṅgavīthito vuṭṭhitamattasseva attano khandhasantānaṃ ārabbha sabbesampi uppajjati. ‘‘Yassa vā pana yattha akusalā dhammā na uppajjittha, tassa tattha kusalā dhammā na uppajjitthāti āmantā’’ti evamādi idameva sandhāya vuttaṃ. Tasmiṃ khaṇe jātacetanāyāti akusalacetanāya.
পটিসন্ধিক্খণেতি তেন কম্মেন গহিতপটিসন্ধিক্খণে। তযো হেতূতি অলোভো অব্যাকতহেতু অদোসো অব্যাকতহেতু অমোহো অব্যাকতহেতু। তস্মিং খণে জাতচেতনাযাতি ৰিপাকাব্যাকতচেতনায। নামরূপপচ্চযাপি ৰিঞ্ঞাণন্তি এত্থ তস্মিং পটিসন্ধিক্খণে তযো ৰিপাকহেতূ সেসচেতসিকা চ নামং, হদযৰত্থু রূপং। ততো নামরূপপচ্চযতোপি পটিসন্ধিৰিঞ্ঞাণং পৰত্ততি। ৰিঞ্ঞাণপচ্চযাপি নামরূপন্তি এত্থাপি নামং ৰুত্তপ্পকারমেৰ, রূপং পন ইধ সহেতুকমনুস্সপটিসন্ধিযা অধিপ্পেতত্তা গব্ভসেয্যকানং ৰত্থুদসকং কাযদসকং ভাৰদসকন্তি সমতিংস রূপানি, সংসেদজানং ওপপাতিকানঞ্চ পরিপুণ্ণাযতনানং চক্খুদসকং সোতদসকং ঘানদসকং জিৰ্হাদসকঞ্চাতি সমসত্ততি রূপানি। তং ৰুত্তপ্পকারং নামরূপং পটিসন্ধিক্খণে পটিসন্ধিৰিঞ্ঞাণপচ্চযা পৰত্ততি।
Paṭisandhikkhaṇeti tena kammena gahitapaṭisandhikkhaṇe. Tayo hetūti alobho abyākatahetu adoso abyākatahetu amoho abyākatahetu. Tasmiṃ khaṇe jātacetanāyāti vipākābyākatacetanāya. Nāmarūpapaccayāpi viññāṇanti ettha tasmiṃ paṭisandhikkhaṇe tayo vipākahetū sesacetasikā ca nāmaṃ, hadayavatthu rūpaṃ. Tato nāmarūpapaccayatopi paṭisandhiviññāṇaṃ pavattati. Viññāṇapaccayāpi nāmarūpanti etthāpi nāmaṃ vuttappakārameva, rūpaṃ pana idha sahetukamanussapaṭisandhiyā adhippetattā gabbhaseyyakānaṃ vatthudasakaṃ kāyadasakaṃ bhāvadasakanti samatiṃsa rūpāni, saṃsedajānaṃ opapātikānañca paripuṇṇāyatanānaṃ cakkhudasakaṃ sotadasakaṃ ghānadasakaṃ jivhādasakañcāti samasattati rūpāni. Taṃ vuttappakāraṃ nāmarūpaṃ paṭisandhikkhaṇe paṭisandhiviññāṇapaccayā pavattati.
পঞ্চক্খন্ধাতি এত্থ পটিসন্ধিচিত্তেন পটিসন্ধিক্খণে লব্ভমানানি রূপানি রূপক্খন্ধো, সহজাতা ৰেদনা ৰেদনাক্খন্ধো, সঞ্ঞা সঞ্ঞাক্খন্ধো, সেসচেতসিকা সঙ্খারক্খন্ধো, পটিসন্ধিচিত্তং ৰিঞ্ঞাণক্খন্ধো। সহজাতপচ্চযা হোন্তীতি চত্তারো অরূপিনো খন্ধা অঞ্ঞমঞ্ঞং সহজাতপচ্চযা হোন্তি, রূপক্খন্ধে চত্তারো মহাভূতা অঞ্ঞমঞ্ঞং সহজাতপচ্চযা হোন্তি, অরূপিনো খন্ধা চ হদযরূপঞ্চ অঞ্ঞমঞ্ঞং সহজাতপচ্চযা হোন্তি, মহাভূতাপি উপাদারূপানং সহজাতপচ্চযা হোন্তি। অঞ্ঞমঞ্ঞপচ্চযা হোন্তীতি অঞ্ঞমঞ্ঞং উপ্পাদনুপত্থম্ভনভাৰেন উপকারকা হোন্তি, চত্তারো অরূপিনো খন্ধা চ অঞ্ঞমঞ্ঞপচ্চযা হোন্তি, চত্তারো মহাভূতা অঞ্ঞমঞ্ঞপচ্চযা হোন্তি। নিস্সযপচ্চযা হোন্তীতি অধিট্ঠানাকারেন নিস্সযাকারেন চ উপকারকা হোন্তি, চত্তারো অরূপিনো খন্ধা চ অঞ্ঞমঞ্ঞং নিস্সযপচ্চযা হোন্তীতি সহজাতা ৰিয ৰিত্থারেতব্বা। ৰিপ্পযুত্তপচ্চযা হোন্তীতি একৰত্থুকাদিভাৰানুপগমনেন ৰিপ্পযুত্তভাৰেন উপকারকা হোন্তি, অরূপিনো খন্ধা পটিসন্ধিরূপানং ৰিপ্পযুত্তপচ্চযা হোন্তি, হদযরূপং অরূপীনং খন্ধানং ৰিপ্পযুত্তপচ্চযো হোতি। ‘‘পঞ্চক্খন্ধা’’তি হেত্থ এৰং যথালাভৰসেন ৰুত্তং।
Pañcakkhandhāti ettha paṭisandhicittena paṭisandhikkhaṇe labbhamānāni rūpāni rūpakkhandho, sahajātā vedanā vedanākkhandho, saññā saññākkhandho, sesacetasikā saṅkhārakkhandho, paṭisandhicittaṃ viññāṇakkhandho. Sahajātapaccayā hontīti cattāro arūpino khandhā aññamaññaṃ sahajātapaccayā honti, rūpakkhandhe cattāro mahābhūtā aññamaññaṃ sahajātapaccayā honti, arūpino khandhā ca hadayarūpañca aññamaññaṃ sahajātapaccayā honti, mahābhūtāpi upādārūpānaṃ sahajātapaccayā honti. Aññamaññapaccayā hontīti aññamaññaṃ uppādanupatthambhanabhāvena upakārakā honti, cattāro arūpino khandhā ca aññamaññapaccayā honti, cattāro mahābhūtā aññamaññapaccayā honti. Nissayapaccayā hontīti adhiṭṭhānākārena nissayākārena ca upakārakā honti, cattāro arūpino khandhā ca aññamaññaṃ nissayapaccayā hontīti sahajātā viya vitthāretabbā. Vippayuttapaccayā hontīti ekavatthukādibhāvānupagamanena vippayuttabhāvena upakārakā honti, arūpino khandhā paṭisandhirūpānaṃ vippayuttapaccayā honti, hadayarūpaṃ arūpīnaṃ khandhānaṃ vippayuttapaccayo hoti. ‘‘Pañcakkhandhā’’ti hettha evaṃ yathālābhavasena vuttaṃ.
চত্তারো মহাভূতাতি এত্থ তযো পচ্চযা পঠমং ৰুত্তাযেৰ। তযো জীৰিতসঙ্খারাতি আযু চ উস্মা চ ৰিঞ্ঞাণঞ্চ। আযূতি রূপজীৰিতিন্দ্রিযং অরূপজীৰিতিন্দ্রিযঞ্চ। উস্মাতি তেজোধাতু। ৰিঞ্ঞাণন্তি পটিসন্ধিৰিঞ্ঞাণং। এতানি হি উপরূপরি জীৰিতসঙ্খারং সঙ্খরোন্তি পৰত্তেন্তীতি জীৰিতসঙ্খারা। সহজাতপচ্চযা হোন্তীতি অরূপজীৰিতিন্দ্রিযং পটিসন্ধিৰিঞ্ঞাণঞ্চ সম্পযুত্তকানং খন্ধানঞ্চ হদযরূপস্স চ অঞ্ঞমঞ্ঞসহজাতপচ্চযা হোন্তি, তেজোধাতু তিণ্ণং মহাভূতানং অঞ্ঞমঞ্ঞসহজাতপচ্চযো হোতি, উপাদারূপানং সহজাতপচ্চযোৰ, রূপজীৰিতিন্দ্রিযং সহজাতরূপানং পরিযাযেন সহজাতপচ্চযো হোতীতি ৰেদিতব্বং। অঞ্ঞমঞ্ঞপচ্চযা হোন্তি, নিস্সযপচ্চযা হোন্তীতি দ্ৰযং অরূপজীৰিতিন্দ্রিযং পটিসন্ধিৰিঞ্ঞাণঞ্চ সম্পযুত্তখন্ধানং অঞ্ঞমঞ্ঞপচ্চযা হোন্তি। অঞ্ঞমঞ্ঞনিস্সযপচ্চযা হোন্তীতি ৰুত্তনযেনেৰ যোজেত্ৰা ৰেদিতব্বং। ৰিপ্পযুত্তপচ্চযা হোন্তীতি অরূপজীৰিতিন্দ্রিযং পটিসন্ধিৰিঞ্ঞাণঞ্চ পটিসন্ধিরূপানং ৰিপ্পযুত্তপচ্চযা হোন্তি। রূপজীৰিতিন্দ্রিযং পন অঞ্ঞমঞ্ঞনিস্সযৰিপ্পযুত্তপচ্চযত্তে ন যুজ্জতি। তস্মা ‘‘তযো জীৰিতসঙ্খারা’’তি যথালাভৰসেন ৰুত্তং। নামঞ্চ রূপঞ্চ ৰুত্তনযেনেৰ চতুপচ্চযত্তে যোজেতব্বং। চুদ্দস ধম্মাতি পঞ্চক্খন্ধা, চত্তারো মহাভূতা, তযো জীৰিতসঙ্খারা, নামঞ্চ রূপঞ্চাতি এৰং গণনাৰসেন চুদ্দস ধম্মা। তেসঞ্চ উপরি অঞ্ঞেসঞ্চ সহজাতাদিপচ্চযভাৰো ৰুত্তনযো এৰ। সম্পযুত্তপচ্চযা হোন্তীতি পুন একৰত্থুকএকারম্মণএকুপ্পাদএকনিরোধসঙ্খাতেন সম্পযুত্তভাৰেন উপকারকা হোন্তি।
Cattāro mahābhūtāti ettha tayo paccayā paṭhamaṃ vuttāyeva. Tayo jīvitasaṅkhārāti āyu ca usmā ca viññāṇañca. Āyūti rūpajīvitindriyaṃ arūpajīvitindriyañca. Usmāti tejodhātu. Viññāṇanti paṭisandhiviññāṇaṃ. Etāni hi uparūpari jīvitasaṅkhāraṃ saṅkharonti pavattentīti jīvitasaṅkhārā. Sahajātapaccayā hontīti arūpajīvitindriyaṃ paṭisandhiviññāṇañca sampayuttakānaṃ khandhānañca hadayarūpassa ca aññamaññasahajātapaccayā honti, tejodhātu tiṇṇaṃ mahābhūtānaṃ aññamaññasahajātapaccayo hoti, upādārūpānaṃ sahajātapaccayova, rūpajīvitindriyaṃ sahajātarūpānaṃ pariyāyena sahajātapaccayo hotīti veditabbaṃ. Aññamaññapaccayā honti, nissayapaccayā hontīti dvayaṃ arūpajīvitindriyaṃ paṭisandhiviññāṇañca sampayuttakhandhānaṃ aññamaññapaccayā honti. Aññamaññanissayapaccayā hontīti vuttanayeneva yojetvā veditabbaṃ. Vippayuttapaccayā hontīti arūpajīvitindriyaṃ paṭisandhiviññāṇañca paṭisandhirūpānaṃ vippayuttapaccayā honti. Rūpajīvitindriyaṃ pana aññamaññanissayavippayuttapaccayatte na yujjati. Tasmā ‘‘tayo jīvitasaṅkhārā’’ti yathālābhavasena vuttaṃ. Nāmañca rūpañca vuttanayeneva catupaccayatte yojetabbaṃ. Cuddasadhammāti pañcakkhandhā, cattāro mahābhūtā, tayo jīvitasaṅkhārā, nāmañca rūpañcāti evaṃ gaṇanāvasena cuddasa dhammā. Tesañca upari aññesañca sahajātādipaccayabhāvo vuttanayo eva. Sampayuttapaccayā hontīti puna ekavatthukaekārammaṇaekuppādaekanirodhasaṅkhātena sampayuttabhāvena upakārakā honti.
পঞ্চিন্দ্রিযানীতি সদ্ধিন্দ্রিযাদীনি। নামঞ্চাতি ইধ ৰেদনাদযো তযো খন্ধা। ৰিঞ্ঞাণঞ্চাতি পটিসন্ধিৰিঞ্ঞাণং। পুন চুদ্দস ধম্মাতি চত্তারো খন্ধা, পঞ্চিন্দ্রিযানি, তযো হেতূ, নামঞ্চ ৰিঞ্ঞাণঞ্চাতি এৰং গণনাৰসেন চুদ্দস ধম্মা। অট্ঠৰীসতি ধম্মাতি পুরিমা চ চুদ্দস, ইমে চ চুদ্দসাতি অট্ঠৰীসতি। ইধ রূপস্সাপি পৰিট্ঠত্তা সম্পযুত্তপচ্চযং অপনেত্ৰা ৰিপ্পযুত্তপচ্চযো ৰুত্তো।
Pañcindriyānīti saddhindriyādīni. Nāmañcāti idha vedanādayo tayo khandhā. Viññāṇañcāti paṭisandhiviññāṇaṃ. Puna cuddasa dhammāti cattāro khandhā, pañcindriyāni, tayo hetū, nāmañca viññāṇañcāti evaṃ gaṇanāvasena cuddasa dhammā. Aṭṭhavīsati dhammāti purimā ca cuddasa, ime ca cuddasāti aṭṭhavīsati. Idha rūpassāpi paviṭṭhattā sampayuttapaccayaṃ apanetvā vippayuttapaccayo vutto.
এৰং পটিসন্ধিক্খণে ৰিজ্জমানস্স তস্স তস্স পচ্চযুপ্পন্নস্স ধম্মস্স তং তং পচ্চযভেদং দস্সেত্ৰা পঠমং নিদ্দিট্ঠে হেতূ নিগমেত্ৰা দস্সেন্তো ইমেসং অট্ঠন্নং হেতূনং পচ্চযা উপপত্তি হোতীতি আহ। কম্মাযূহনক্খণে তযো কুসলহেতূ, নিকন্তিক্খণে দ্ৰে অকুসলহেতূ, পটিসন্ধিক্খণে তযো অব্যাকতহেতূতি এৰং অট্ঠ হেতূ। তত্থ তযো কুসলহেতূ, দ্ৰে অকুসলহেতূ চ ইধ পটিসন্ধিক্খণে পৰত্তিযা উপনিস্সযপচ্চযা হোন্তি। তযো অব্যাকতহেতূ যথাযোগং হেতুপচ্চযসহজাতপচ্চযৰসেন পচ্চযা হোন্তি। সেসৰারেসুপি এসেৰ নযো।
Evaṃ paṭisandhikkhaṇe vijjamānassa tassa tassa paccayuppannassa dhammassa taṃ taṃ paccayabhedaṃ dassetvā paṭhamaṃ niddiṭṭhe hetū nigametvā dassento imesaṃ aṭṭhannaṃ hetūnaṃ paccayā upapatti hotīti āha. Kammāyūhanakkhaṇe tayo kusalahetū, nikantikkhaṇe dve akusalahetū, paṭisandhikkhaṇe tayo abyākatahetūti evaṃ aṭṭha hetū. Tattha tayo kusalahetū, dve akusalahetū ca idha paṭisandhikkhaṇe pavattiyā upanissayapaccayā honti. Tayo abyākatahetū yathāyogaṃ hetupaccayasahajātapaccayavasena paccayā honti. Sesavāresupi eseva nayo.
অরূপাৰচরানং পন রূপাভাৰা নামপচ্চযাপি ৰিঞ্ঞাণং, ৰিঞ্ঞাণপচ্চযাপি নামন্তি ৰুত্তং। রূপমিস্সকচুদ্দসকোপি চ পরিহীনো। তস্স পরিহীনত্তা ‘‘অট্ঠৰীসতি ধম্মা’’তি ৰারো চ ন লব্ভতি।
Arūpāvacarānaṃ pana rūpābhāvā nāmapaccayāpi viññāṇaṃ, viññāṇapaccayāpi nāmanti vuttaṃ. Rūpamissakacuddasakopi ca parihīno. Tassa parihīnattā ‘‘aṭṭhavīsati dhammā’’ti vāro ca na labbhati.
২৩৩. ইদানি ৰিমোক্খস্স পচ্চযভূতং তিহেতুকপটিসন্ধিং দস্সেত্ৰা তেনেৰ সম্বন্ধেন দুহেতুকপটিসন্ধিৰিসেসঞ্চ দস্সেতুকামো গতিসম্পত্তিযা ঞাণৰিপ্পযুত্তেতিআদিমাহ। কুসলকম্মস্স জৰনক্খণেতি অতীতজাতিযা ইধ পটিসন্ধিজনকস্স দুহেতুককুসলকম্মস্স ৰুত্তনযেনেৰ জৰনক্খণে। দ্ৰে হেতূতি ঞাণৰিপ্পযুত্তত্তা অলোভো কুসলহেতু অদোসো কুসলহেতু। দ্ৰে অব্যাকতহেতূপি অলোভাদোসাযেৰ।
233. Idāni vimokkhassa paccayabhūtaṃ tihetukapaṭisandhiṃ dassetvā teneva sambandhena duhetukapaṭisandhivisesañca dassetukāmo gatisampattiyā ñāṇavippayuttetiādimāha. Kusalakammassa javanakkhaṇeti atītajātiyā idha paṭisandhijanakassa duhetukakusalakammassa vuttanayeneva javanakkhaṇe. Dve hetūti ñāṇavippayuttattā alobho kusalahetu adoso kusalahetu. Dve abyākatahetūpi alobhādosāyeva.
চত্তারি ইন্দ্রিযানীতি পঞ্ঞিন্দ্রিযৰজ্জানি সদ্ধিন্দ্রিযাদীনি চত্তারি। দ্ৰাদস ধম্মাতি পঞ্ঞিন্দ্রিযস্স অমোহহেতুস্স চ পরিহীনত্তা দ্ৰাদস। তেসং দ্ৰিন্নংযেৰ পরিহীনত্তা ছব্বীসতি। ছন্নং হেতূনন্তি দ্ৰিন্নং কুসলহেতূনং, দ্ৰিন্নং অকুসলহেতূনং, দ্ৰিন্নং ৰিপাকহেতূনন্তি এৰং ছন্নং হেতূনং। রূপারূপাৰচরা পনেত্থ একন্ততিহেতুকত্তা ন গহিতা। সেসং পঠমৰারে ৰুত্তনযেনেৰ ৰেদিতব্বং। ইমস্মিং ৰারে দুহেতুকপটিসন্ধিযা দুহেতুককম্মস্সেৰ ৰুত্তত্তা তিহেতুককম্মেন দুহেতুকপটিসন্ধি ন হোতীতি ৰুত্তং হোতি। তস্মা যং ধম্মসঙ্গহট্ঠকথাযং (ধ॰ স॰ অট্ঠ॰ ৪৯৮) তিপিটকমহাধম্মরক্খিতত্থেরৰাদে ‘‘তিহেতুককম্মেন পটিসন্ধি তিহেতুকাৰ হোতি, দুহেতুকাহেতুকা ন হোতি। দুহেতুককম্মেন দুহেতুকাহেতুকা হোতি, তিহেতুকা ন হোতী’’তি ৰুত্তং, তং ইমায পাল়িযা সমেতি। যং পন তিপিটকচূল়নাগত্থেরস্স চ মোরৰাপিৰাসিমহাদত্তত্থেরস্স চ ৰাদেসু ‘‘তিহেতুককম্মেন পটিসন্ধি তিহেতুকাপি হোতি দুহেতুকাপি, অহেতুকা ন হোতি। দুহেতুককম্মেন দুহেতুকাপি হোতি অহেতুকাপি, তিহেতুকা ন হোতী’’তি ৰুত্তং, তং ইমায পাল়িযা ৰিরুদ্ধং ৰিয দিস্সতি। ইমিস্সা কথায হেতুঅধিকারত্তা অহেতুকপটিসন্ধি ন ৰুত্তাতি।
Cattāri indriyānīti paññindriyavajjāni saddhindriyādīni cattāri. Dvādasa dhammāti paññindriyassa amohahetussa ca parihīnattā dvādasa. Tesaṃ dvinnaṃyeva parihīnattā chabbīsati. Channaṃ hetūnanti dvinnaṃ kusalahetūnaṃ, dvinnaṃ akusalahetūnaṃ, dvinnaṃ vipākahetūnanti evaṃ channaṃ hetūnaṃ. Rūpārūpāvacarā panettha ekantatihetukattā na gahitā. Sesaṃ paṭhamavāre vuttanayeneva veditabbaṃ. Imasmiṃ vāre duhetukapaṭisandhiyā duhetukakammasseva vuttattā tihetukakammena duhetukapaṭisandhi na hotīti vuttaṃ hoti. Tasmā yaṃ dhammasaṅgahaṭṭhakathāyaṃ (dha. sa. aṭṭha. 498) tipiṭakamahādhammarakkhitattheravāde ‘‘tihetukakammena paṭisandhi tihetukāva hoti, duhetukāhetukā na hoti. Duhetukakammena duhetukāhetukā hoti, tihetukā na hotī’’ti vuttaṃ, taṃ imāya pāḷiyā sameti. Yaṃ pana tipiṭakacūḷanāgattherassa ca moravāpivāsimahādattattherassa ca vādesu ‘‘tihetukakammena paṭisandhi tihetukāpi hoti duhetukāpi, ahetukā na hoti. Duhetukakammena duhetukāpi hoti ahetukāpi, tihetukā na hotī’’ti vuttaṃ, taṃ imāya pāḷiyā viruddhaṃ viya dissati. Imissā kathāya hetuadhikārattā ahetukapaṭisandhi na vuttāti.
গতিকথাৰণ্ণনা নিট্ঠিতা।
Gatikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ৬. গতিকথা • 6. Gatikathā
