| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ಗವೇಸೀಸುತ್ತಂ
10. Gavesīsuttaṃ
೧೮೦. ಏಕಂ ಸಮಯಂ ಭಗವಾ ಕೋಸಲೇಸು ಚಾರಿಕಂ ಚರತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ। ಅದ್ದಸಾ ಖೋ ಭಗವಾ ಅದ್ಧಾನಮಗ್ಗಪ್ಪಟಿಪನ್ನೋ ಅಞ್ಞತರಸ್ಮಿಂ ಪದೇಸೇ ಮಹನ್ತಂ ಸಾಲವನಂ; ದಿಸ್ವಾನ 1 ಮಗ್ಗಾ ಓಕ್ಕಮ್ಮ 2 ಯೇನ ತಂ ಸಾಲವನಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಸಾಲವನಂ ಅಜ್ಝೋಗಾಹೇತ್ವಾ ಅಞ್ಞತರಸ್ಮಿಂ ಪದೇಸೇ ಸಿತಂ ಪಾತ್ವಾಕಾಸಿ।
180. Ekaṃ samayaṃ bhagavā kosalesu cārikaṃ carati mahatā bhikkhusaṅghena saddhiṃ. Addasā kho bhagavā addhānamaggappaṭipanno aññatarasmiṃ padese mahantaṃ sālavanaṃ; disvāna 3 maggā okkamma 4 yena taṃ sālavanaṃ tenupasaṅkami; upasaṅkamitvā taṃ sālavanaṃ ajjhogāhetvā aññatarasmiṃ padese sitaṃ pātvākāsi.
ಅಥ ಖೋ ಆಯಸ್ಮತೋ ಆನನ್ದಸ್ಸ ಏತದಹೋಸಿ – ‘‘ಕೋ ನು ಖೋ ಹೇತು ಕೋ ಪಚ್ಚಯೋ ಭಗವತೋ ಸಿತಸ್ಸ ಪಾತುಕಮ್ಮಾಯ? ನ ಅಕಾರಣೇನ ತಥಾಗತಾ ಸಿತಂ ಪಾತುಕರೋನ್ತೀ’’ತಿ। ಅಥ ಖೋ ಆಯಸ್ಮಾ ಆನನ್ದೋ ಭಗವನ್ತಂ ಏತದವೋಚ – ‘‘ಕೋ ನು ಖೋ, ಭನ್ತೇ, ಹೇತು ಕೋ ಪಚ್ಚಯೋ ಭಗವತೋ ಸಿತಸ್ಸ ಪಾತುಕಮ್ಮಾಯ? ನ ಅಕಾರಣೇನ ತಥಾಗತಾ ಸಿತಂ ಪಾತುಕರೋನ್ತೀ’’ತಿ।
Atha kho āyasmato ānandassa etadahosi – ‘‘ko nu kho hetu ko paccayo bhagavato sitassa pātukammāya? Na akāraṇena tathāgatā sitaṃ pātukarontī’’ti. Atha kho āyasmā ānando bhagavantaṃ etadavoca – ‘‘ko nu kho, bhante, hetu ko paccayo bhagavato sitassa pātukammāya? Na akāraṇena tathāgatā sitaṃ pātukarontī’’ti.
‘‘ಭೂತಪುಬ್ಬಂ, ಆನನ್ದ, ಇಮಸ್ಮಿಂ ಪದೇಸೇ ನಗರಂ ಅಹೋಸಿ ಇದ್ಧಞ್ಚೇವ ಫೀತಞ್ಚ ಬಹುಜನಂ ಆಕಿಣ್ಣಮನುಸ್ಸಂ। ತಂ ಖೋ ಪನಾನನ್ದ, ನಗರಂ ಕಸ್ಸಪೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ಉಪನಿಸ್ಸಾಯ ವಿಹಾಸಿ। ಕಸ್ಸಪಸ್ಸ ಖೋ ಪನಾನನ್ದ, ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ ಗವೇಸೀ ನಾಮ ಉಪಾಸಕೋ ಅಹೋಸಿ ಸೀಲೇಸು ಅಪರಿಪೂರಕಾರೀ। ಗವೇಸಿನಾ ಖೋ, ಆನನ್ದ, ಉಪಾಸಕೇನ ಪಞ್ಚಮತ್ತಾನಿ ಉಪಾಸಕಸತಾನಿ ಪಟಿದೇಸಿತಾನಿ ಸಮಾದಪಿತಾನಿ 5 ಅಹೇಸುಂ ಸೀಲೇಸು ಅಪರಿಪೂರಕಾರಿನೋ। ಅಥ ಖೋ, ಆನನ್ದ, ಗವೇಸಿಸ್ಸ ಉಪಾಸಕಸ್ಸ ಏತದಹೋಸಿ – ‘ಅಹಂ ಖೋ ಇಮೇಸಂ ಪಞ್ಚನ್ನಂ ಉಪಾಸಕಸತಾನಂ ಬಹೂಪಕಾರೋ 6 ಪುಬ್ಬಙ್ಗಮೋ ಸಮಾದಪೇತಾ 7, ಅಹಞ್ಚಮ್ಹಿ ಸೀಲೇಸು ಅಪರಿಪೂರಕಾರೀ, ಇಮಾನಿ ಚ ಪಞ್ಚ ಉಪಾಸಕಸತಾನಿ ಸೀಲೇಸು ಅಪರಿಪೂರಕಾರಿನೋ। ಇಚ್ಚೇತಂ ಸಮಸಮಂ, ನತ್ಥಿ ಕಿಞ್ಚಿ ಅತಿರೇಕಂ; ಹನ್ದಾಹಂ ಅತಿರೇಕಾಯಾ’’’ತಿ।
‘‘Bhūtapubbaṃ, ānanda, imasmiṃ padese nagaraṃ ahosi iddhañceva phītañca bahujanaṃ ākiṇṇamanussaṃ. Taṃ kho panānanda, nagaraṃ kassapo bhagavā arahaṃ sammāsambuddho upanissāya vihāsi. Kassapassa kho panānanda, bhagavato arahato sammāsambuddhassa gavesī nāma upāsako ahosi sīlesu aparipūrakārī. Gavesinā kho, ānanda, upāsakena pañcamattāni upāsakasatāni paṭidesitāni samādapitāni 8 ahesuṃ sīlesu aparipūrakārino. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro 9 pubbaṅgamo samādapetā 10, ahañcamhi sīlesu aparipūrakārī, imāni ca pañca upāsakasatāni sīlesu aparipūrakārino. Iccetaṃ samasamaṃ, natthi kiñci atirekaṃ; handāhaṃ atirekāyā’’’ti.
‘‘ಅಥ ಖೋ, ಆನನ್ದ, ಗವೇಸೀ ಉಪಾಸಕೋ ಯೇನ ತಾನಿ ಪಞ್ಚ ಉಪಾಸಕಸತಾನಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಾನಿ ಪಞ್ಚ ಉಪಾಸಕಸತಾನಿ ಏತದವೋಚ – ‘ಅಜ್ಜತಗ್ಗೇ ಮಂ ಆಯಸ್ಮನ್ತೋ ಸೀಲೇಸು ಪರಿಪೂರಕಾರಿಂ ಧಾರೇಥಾ’ತಿ! ಅಥ ಖೋ, ಆನನ್ದ, ತೇಸಂ ಪಞ್ಚನ್ನಂ ಉಪಾಸಕಸತಾನಂ ಏತದಹೋಸಿ – ‘ಅಯ್ಯೋ ಖೋ ಗವೇಸೀ ಅಮ್ಹಾಕಂ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ । ಅಯ್ಯೋ ಹಿ ನಾಮ ಗವೇಸೀ ಸೀಲೇಸು ಪರಿಪೂರಕಾರೀ ಭವಿಸ್ಸತಿ। ಕಿಮಙ್ಗಂ 11 ಪನ ಮಯ’ನ್ತಿ 12! ಅಥ ಖೋ, ಆನನ್ದ, ತಾನಿ ಪಞ್ಚ ಉಪಾಸಕಸತಾನಿ ಯೇನ ಗವೇಸೀ ಉಪಾಸಕೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಗವೇಸಿಂ ಉಪಾಸಕಂ ಏತದವೋಚುಂ – ‘ಅಜ್ಜತಗ್ಗೇ ಅಯ್ಯೋ ಗವೇಸೀ ಇಮಾನಿಪಿ ಪಞ್ಚ ಉಪಾಸಕಸತಾನಿ ಸೀಲೇಸು ಪರಿಪೂರಕಾರಿನೋ ಧಾರೇತೂ’ತಿ। ಅಥ ಖೋ, ಆನನ್ದ, ಗವೇಸಿಸ್ಸ ಉಪಾಸಕಸ್ಸ ಏತದಹೋಸಿ – ‘ಅಹಂ ಖೋ ಇಮೇಸಂ ಪಞ್ಚನ್ನಂ ಉಪಾಸಕಸತಾನಂ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ, ಅಹಞ್ಚಮ್ಹಿ ಸೀಲೇಸು ಪರಿಪೂರಕಾರೀ, ಇಮಾನಿಪಿ ಪಞ್ಚ ಉಪಾಸಕಸತಾನಿ ಸೀಲೇಸು ಪರಿಪೂರಕಾರಿನೋ । ಇಚ್ಚೇತಂ ಸಮಸಮಂ, ನತ್ಥಿ ಕಿಞ್ಚಿ ಅತಿರೇಕಂ; ಹನ್ದಾಹಂ ಅತಿರೇಕಾಯಾ’’’ತಿ!
‘‘Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca – ‘ajjatagge maṃ āyasmanto sīlesu paripūrakāriṃ dhārethā’ti! Atha kho, ānanda, tesaṃ pañcannaṃ upāsakasatānaṃ etadahosi – ‘ayyo kho gavesī amhākaṃ bahūpakāro pubbaṅgamo samādapetā . Ayyo hi nāma gavesī sīlesu paripūrakārī bhavissati. Kimaṅgaṃ 13 pana maya’nti 14! Atha kho, ānanda, tāni pañca upāsakasatāni yena gavesī upāsako tenupasaṅkamiṃsu; upasaṅkamitvā gavesiṃ upāsakaṃ etadavocuṃ – ‘ajjatagge ayyo gavesī imānipi pañca upāsakasatāni sīlesu paripūrakārino dhāretū’ti. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro pubbaṅgamo samādapetā, ahañcamhi sīlesu paripūrakārī, imānipi pañca upāsakasatāni sīlesu paripūrakārino . Iccetaṃ samasamaṃ, natthi kiñci atirekaṃ; handāhaṃ atirekāyā’’’ti!
‘‘ಅಥ ಖೋ, ಆನನ್ದ, ಗವೇಸೀ ಉಪಾಸಕೋ ಯೇನ ತಾನಿ ಪಞ್ಚ ಉಪಾಸಕಸತಾನಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಾನಿ ಪಞ್ಚ ಉಪಾಸಕಸತಾನಿ ಏತದವೋಚ – ‘ಅಜ್ಜತಗ್ಗೇ ಮಂ ಆಯಸ್ಮನ್ತೋ ಬ್ರಹ್ಮಚಾರಿಂ ಧಾರೇಥ ಆರಾಚಾರಿ 15 ವಿರತಂ ಮೇಥುನಾ ಗಾಮಧಮ್ಮಾ’ತಿ। ಅಥ ಖೋ, ಆನನ್ದ, ತೇಸಂ ಪಞ್ಚನ್ನಂ ಉಪಾಸಕಸತಾನಂ ಏತದಹೋಸಿ – ‘ಅಯ್ಯೋ ಖೋ ಗವೇಸೀ ಅಮ್ಹಾಕಂ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ। ಅಯ್ಯೋ ಹಿ ನಾಮ ಗವೇಸೀ ಬ್ರಹ್ಮಚಾರೀ ಭವಿಸ್ಸತಿ ಆರಾಚಾರೀ ವಿರತೋ ಮೇಥುನಾ ಗಾಮಧಮ್ಮಾ। ಕಿಮಙ್ಗಂ ಪನ ಮಯ’ನ್ತಿ! ಅಥ ಖೋ, ಆನನ್ದ, ತಾನಿ ಪಞ್ಚ ಉಪಾಸಕಸತಾನಿ ಯೇನ ಗವೇಸೀ ಉಪಾಸಕೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಗವೇಸಿಂ ಉಪಾಸಕಂ ಏತದವೋಚುಂ – ‘ಅಜ್ಜತಗ್ಗೇ ಅಯ್ಯೋ ಗವೇಸೀ ಇಮಾನಿಪಿ ಪಞ್ಚ ಉಪಾಸಕಸತಾನಿ ಬ್ರಹ್ಮಚಾರಿನೋ ಧಾರೇತು ಆರಾಚಾರಿನೋ ವಿರತಾ ಮೇಥುನಾ ಗಾಮಧಮ್ಮಾ’ತಿ। ಅಥ ಖೋ, ಆನನ್ದ, ಗವೇಸಿಸ್ಸ ಉಪಾಸಕಸ್ಸ ಏತದಹೋಸಿ – ‘ಅಹಂ ಖೋ ಇಮೇಸಂ ಪಞ್ಚನ್ನಂ ಉಪಾಸಕಸತಾನಂ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ। ಅಹಞ್ಚಮ್ಹಿ ಸೀಲೇಸು ಪರಿಪೂರಕಾರೀ। ಇಮಾನಿಪಿ ಪಞ್ಚ ಉಪಾಸಕಸತಾನಿ ಸೀಲೇಸು ಪರಿಪೂರಕಾರಿನೋ। ಅಹಞ್ಚಮ್ಹಿ ಬ್ರಹ್ಮಚಾರೀ ಆರಾಚಾರೀ ವಿರತೋ ಮೇಥುನಾ ಗಾಮಧಮ್ಮಾ। ಇಮಾನಿಪಿ ಪಞ್ಚ ಉಪಾಸಕಸತಾನಿ ಬ್ರಹ್ಮಚಾರಿನೋ ಆರಾಚಾರಿನೋ ವಿರತಾ ಮೇಥುನಾ ಗಾಮಧಮ್ಮಾ। ಇಚ್ಚೇತಂ ಸಮಸಮಂ, ನತ್ಥಿ ಕಿಞ್ಚಿ ಅತಿರೇಕಂ; ಹನ್ದಾಹಂ ಅತಿರೇಕಾಯಾ’’’ತಿ।
‘‘Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca – ‘ajjatagge maṃ āyasmanto brahmacāriṃ dhāretha ārācāri 16 virataṃ methunā gāmadhammā’ti. Atha kho, ānanda, tesaṃ pañcannaṃ upāsakasatānaṃ etadahosi – ‘ayyo kho gavesī amhākaṃ bahūpakāro pubbaṅgamo samādapetā. Ayyo hi nāma gavesī brahmacārī bhavissati ārācārī virato methunā gāmadhammā. Kimaṅgaṃ pana maya’nti! Atha kho, ānanda, tāni pañca upāsakasatāni yena gavesī upāsako tenupasaṅkamiṃsu; upasaṅkamitvā gavesiṃ upāsakaṃ etadavocuṃ – ‘ajjatagge ayyo gavesī imānipi pañca upāsakasatāni brahmacārino dhāretu ārācārino viratā methunā gāmadhammā’ti. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro pubbaṅgamo samādapetā. Ahañcamhi sīlesu paripūrakārī. Imānipi pañca upāsakasatāni sīlesu paripūrakārino. Ahañcamhi brahmacārī ārācārī virato methunā gāmadhammā. Imānipi pañca upāsakasatāni brahmacārino ārācārino viratā methunā gāmadhammā. Iccetaṃ samasamaṃ, natthi kiñci atirekaṃ; handāhaṃ atirekāyā’’’ti.
‘‘ಅಥ ಖೋ, ಆನನ್ದ, ಗವೇಸೀ ಉಪಾಸಕೋ ಯೇನ ತಾನಿ ಪಞ್ಚ ಉಪಾಸಕಸತಾನಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಾನಿ ಪಞ್ಚ ಉಪಾಸಕಸತಾನಿ ಏತದವೋಚ – ‘ಅಜ್ಜತಗ್ಗೇ ಮಂ ಆಯಸ್ಮನ್ತೋ ಏಕಭತ್ತಿಕಂ ಧಾರೇಥ ರತ್ತೂಪರತಂ ವಿರತಂ ವಿಕಾಲಭೋಜನಾ’ತಿ। ಅಥ ಖೋ, ಆನನ್ದ, ತೇಸಂ ಪಞ್ಚನ್ನಂ ಉಪಾಸಕಸತಾನಂ ಏತದಹೋಸಿ – ‘ಅಯ್ಯೋ ಖೋ ಗವೇಸೀ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ। ಅಯ್ಯೋ ಹಿ ನಾಮ ಗವೇಸೀ ಏಕಭತ್ತಿಕೋ ಭವಿಸ್ಸತಿ ರತ್ತೂಪರತೋ ವಿರತೋ ವಿಕಾಲಭೋಜನಾ। ಕಿಮಙ್ಗಂ ಪನ ಮಯ’ನ್ತಿ! ಅಥ ಖೋ, ಆನನ್ದ, ತಾನಿ ಪಞ್ಚ ಉಪಾಸಕಸತಾನಿ ಯೇನ ಗವೇಸೀ ಉಪಾಸಕೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಗವೇಸಿಂ ಉಪಾಸಕಂ ಏತದವೋಚುಂ – ‘ಅಜ್ಜತಗ್ಗೇ ಅಯ್ಯೋ ಗವೇಸೀ ಇಮಾನಿಪಿ ಪಞ್ಚ ಉಪಾಸಕಸತಾನಿ ಏಕಭತ್ತಿಕೇ ಧಾರೇತು ರತ್ತೂಪರತೇ ವಿರತೇ ವಿಕಾಲಭೋಜನಾ’ತಿ। ಅಥ ಖೋ, ಆನನ್ದ, ಗವೇಸಿಸ್ಸ ಉಪಾಸಕಸ್ಸ ಏತದಹೋಸಿ – ‘ಅಹಂ ಖೋ ಇಮೇಸಂ ಪಞ್ಚನ್ನಂ ಉಪಾಸಕಸತಾನಂ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ। ಅಹಞ್ಚಮ್ಹಿ ಸೀಲೇಸು ಪರಿಪೂರಕಾರೀ। ಇಮಾನಿಪಿ ಪಞ್ಚ ಉಪಾಸಕಸತಾನಿ ಸೀಲೇಸು ಪರಿಪೂರಕಾರಿನೋ। ಅಹಞ್ಚಮ್ಹಿ ಬ್ರಹ್ಮಚಾರೀ ಆರಾಚಾರೀ ವಿರತೋ ಮೇಥುನಾ ಗಾಮಧಮ್ಮಾ। ಇಮಾನಿಪಿ ಪಞ್ಚ ಉಪಾಸಕಸತಾನಿ ಬ್ರಹ್ಮಚಾರಿನೋ ಆರಾಚಾರಿನೋ ವಿರತಾ ಮೇಥುನಾ ಗಾಮಧಮ್ಮಾ। ಅಹಞ್ಚಮ್ಹಿ ಏಕಭತ್ತಿಕೋ ರತ್ತೂಪರತೋ ವಿರತೋ ವಿಕಾಲಭೋಜನಾ। ಇಮಾನಿಪಿ ಪಞ್ಚ ಉಪಾಸಕಸತಾನಿ ಏಕಭತ್ತಿಕಾ ರತ್ತೂಪರತಾ ವಿರತಾ ವಿಕಾಲಭೋಜನಾ। ಇಚ್ಚೇತಂ ಸಮಸಮಂ, ನತ್ಥಿ ಕಿಞ್ಚಿ ಅತಿರೇಕಂ; ಹನ್ದಾಹಂ ಅತಿರೇಕಾಯಾ’’’ತಿ।
‘‘Atha kho, ānanda, gavesī upāsako yena tāni pañca upāsakasatāni tenupasaṅkami; upasaṅkamitvā tāni pañca upāsakasatāni etadavoca – ‘ajjatagge maṃ āyasmanto ekabhattikaṃ dhāretha rattūparataṃ virataṃ vikālabhojanā’ti. Atha kho, ānanda, tesaṃ pañcannaṃ upāsakasatānaṃ etadahosi – ‘ayyo kho gavesī bahūpakāro pubbaṅgamo samādapetā. Ayyo hi nāma gavesī ekabhattiko bhavissati rattūparato virato vikālabhojanā. Kimaṅgaṃ pana maya’nti! Atha kho, ānanda, tāni pañca upāsakasatāni yena gavesī upāsako tenupasaṅkamiṃsu; upasaṅkamitvā gavesiṃ upāsakaṃ etadavocuṃ – ‘ajjatagge ayyo gavesī imānipi pañca upāsakasatāni ekabhattike dhāretu rattūparate virate vikālabhojanā’ti. Atha kho, ānanda, gavesissa upāsakassa etadahosi – ‘ahaṃ kho imesaṃ pañcannaṃ upāsakasatānaṃ bahūpakāro pubbaṅgamo samādapetā. Ahañcamhi sīlesu paripūrakārī. Imānipi pañca upāsakasatāni sīlesu paripūrakārino. Ahañcamhi brahmacārī ārācārī virato methunā gāmadhammā. Imānipi pañca upāsakasatāni brahmacārino ārācārino viratā methunā gāmadhammā. Ahañcamhi ekabhattiko rattūparato virato vikālabhojanā. Imānipi pañca upāsakasatāni ekabhattikā rattūparatā viratā vikālabhojanā. Iccetaṃ samasamaṃ, natthi kiñci atirekaṃ; handāhaṃ atirekāyā’’’ti.
‘‘ಅಥ ಖೋ, ಆನನ್ದ, ಗವೇಸೀ ಉಪಾಸಕೋ ಯೇನ ಕಸ್ಸಪೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ತೇನುಪಸಙ್ಕಮಿ ; ಉಪಸಙ್ಕಮಿತ್ವಾ ಕಸ್ಸಪಂ ಭಗವನ್ತಂ ಅರಹನ್ತಂ ಸಮ್ಮಾಸಮ್ಬುದ್ಧಂ ಏತದವೋಚ – ‘ಲಭೇಯ್ಯಾಹಂ, ಭನ್ತೇ, ಭಗವತೋ ಸನ್ತಿಕೇ ಪಬ್ಬಜ್ಜಂ ಲಭೇಯ್ಯಂ ಉಪಸಮ್ಪದ’ನ್ತಿ। ಅಲತ್ಥ ಖೋ, ಆನನ್ದ, ಗವೇಸೀ ಉಪಾಸಕೋ ಕಸ್ಸಪಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ ಸನ್ತಿಕೇ ಪಬ್ಬಜ್ಜಂ, ಅಲತ್ಥ ಉಪಸಮ್ಪದಂ। ಅಚಿರೂಪಸಮ್ಪನ್ನೋ ಖೋ ಪನಾನನ್ದ, ಗವೇಸೀ ಭಿಕ್ಖು ಏಕೋ ವೂಪಕಟ್ಠೋ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರನ್ತೋ ನಚಿರಸ್ಸೇವ – ಯಸ್ಸತ್ಥಾಯ ಕುಲಪುತ್ತಾ ಸಮ್ಮದೇವ ಅಗಾರಸ್ಮಾ ಅನಗಾರಿಯಂ ಪಬ್ಬಜನ್ತಿ, ತದನುತ್ತರಂ – ಬ್ರಹ್ಮಚರಿಯಪರಿಯೋಸಾನಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹಾಸಿ। ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾ’ತಿ ಅಬ್ಭಞ್ಞಾಸಿ। ಅಞ್ಞತರೋ ಚ ಪನಾನನ್ದ, ಗವೇಸೀ ಭಿಕ್ಖು ಅರಹತಂ ಅಹೋಸಿ।
‘‘Atha kho, ānanda, gavesī upāsako yena kassapo bhagavā arahaṃ sammāsambuddho tenupasaṅkami ; upasaṅkamitvā kassapaṃ bhagavantaṃ arahantaṃ sammāsambuddhaṃ etadavoca – ‘labheyyāhaṃ, bhante, bhagavato santike pabbajjaṃ labheyyaṃ upasampada’nti. Alattha kho, ānanda, gavesī upāsako kassapassa bhagavato arahato sammāsambuddhassa santike pabbajjaṃ, alattha upasampadaṃ. Acirūpasampanno kho panānanda, gavesī bhikkhu eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññāsi. Aññataro ca panānanda, gavesī bhikkhu arahataṃ ahosi.
‘‘ಅಥ ಖೋ, ಆನನ್ದ, ತೇಸ ಪಞ್ಚನ್ನಂ ಉಪಾಸಕಸತಾನಂ ಏತದಹೋಸಿ – ‘ಅಯ್ಯೋ ಖೋ ಗವೇಸೀ ಅಮ್ಹಾಕಂ ಬಹೂಪಕಾರೋ ಪುಬ್ಬಙ್ಗಮೋ ಸಮಾದಪೇತಾ। ಅಯ್ಯೋ ಹಿ ನಾಮ ಗವೇಸೀ ಕೇಸಮಸ್ಸುಂ ಓಹಾರೇತ್ವಾ ಕಾಸಾಯಾನಿ ವತ್ಥಾನಿ ಅಚ್ಛಾದೇತ್ವಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿಸ್ಸತಿ। ಕಿಮಙ್ಗಂ ಪನ ಮಯ’ನ್ತಿ! ಅಥ ಖೋ, ಆನನ್ದ, ತಾನಿ ಪಞ್ಚ ಉಪಾಸಕಸತಾನಿ ಯೇನ ಕಸ್ಸಪೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ತೇನುಪಸಙ್ಕಮಿಂಸು ; ಉಪಸಙ್ಕಮಿತ್ವಾ ಕಸ್ಸಪಂ ಭಗವನ್ತಂ ಅರಹನ್ತಂ ಸಮ್ಮಾಸಮ್ಬುದ್ಧಂ ಏತದವೋಚುಂ – ‘ಲಭೇಯ್ಯಾಮ ಮಯಂ, ಭನ್ತೇ, ಭಗವತೋ ಸನ್ತಿಕೇ ಪಬ್ಬಜ್ಜಂ, ಲಭೇಯ್ಯಾಮ ಉಪಸಮ್ಪದ’ನ್ತಿ। ಅಲಭಿಂಸು ಖೋ, ಆನನ್ದ, ತಾನಿ ಪಞ್ಚ ಉಪಾಸಕಸತಾನಿ ಕಸ್ಸಪಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ ಸನ್ತಿಕೇ ಪಬ್ಬಜ್ಜಂ, ಅಲಭಿಂಸು ಉಪಸಮ್ಪದಂ।
‘‘Atha kho, ānanda, tesa pañcannaṃ upāsakasatānaṃ etadahosi – ‘ayyo kho gavesī amhākaṃ bahūpakāro pubbaṅgamo samādapetā. Ayyo hi nāma gavesī kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissati. Kimaṅgaṃ pana maya’nti! Atha kho, ānanda, tāni pañca upāsakasatāni yena kassapo bhagavā arahaṃ sammāsambuddho tenupasaṅkamiṃsu ; upasaṅkamitvā kassapaṃ bhagavantaṃ arahantaṃ sammāsambuddhaṃ etadavocuṃ – ‘labheyyāma mayaṃ, bhante, bhagavato santike pabbajjaṃ, labheyyāma upasampada’nti. Alabhiṃsu kho, ānanda, tāni pañca upāsakasatāni kassapassa bhagavato arahato sammāsambuddhassa santike pabbajjaṃ, alabhiṃsu upasampadaṃ.
‘‘ಅಥ ಖೋ, ಆನನ್ದ, ಗವೇಸಿಸ್ಸ ಭಿಕ್ಖುನೋ ಏತದಹೋಸಿ – ‘ಅಹಂ ಖೋ ಇಮಸ್ಸ ಅನುತ್ತರಸ್ಸ ವಿಮುತ್ತಿಸುಖಸ್ಸ ನಿಕಾಮಲಾಭೀ ಹೋಮಿ ಅಕಿಚ್ಛಲಾಭೀ ಅಕಸಿರಲಾಭೀ। ಅಹೋ ವತಿಮಾನಿಪಿ ಪಞ್ಚ ಭಿಕ್ಖುಸತಾನಿ ಇಮಸ್ಸ ಅನುತ್ತರಸ್ಸ ವಿಮುತ್ತಿಸುಖಸ್ಸ ನಿಕಾಮಲಾಭಿನೋ ಅಸ್ಸು ಅಕಿಚ್ಛಲಾಭಿನೋ ಅಕಸಿರಲಾಭಿನೋ’ತಿ। ಅಥ ಖೋ, ಆನನ್ದ, ತಾನಿ ಪಞ್ಚ ಭಿಕ್ಖುಸತಾನಿ ವೂಪಕಟ್ಠಾ 17 ಅಪ್ಪಮತ್ತಾ ಆತಾಪಿನೋ ಪಹಿತತ್ತಾ ವಿಹರನ್ತಾ ನಚಿರಸ್ಸೇವ – ಯಸ್ಸತ್ಥಾಯ ಕುಲಪುತ್ತಾ ಸಮ್ಮದೇವ ಅಗಾರಸ್ಮಾ ಅನಗಾರಿಯಂ ಪಬ್ಬಜನ್ತಿ, ತದನುತ್ತರಂ – ಬ್ರಹ್ಮಚರಿಯಪರಿಯೋಸಾನಂ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರಿಂಸು। ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾ’ತಿ ಅಬ್ಭಞ್ಞಿಂಸು’’।
‘‘Atha kho, ānanda, gavesissa bhikkhuno etadahosi – ‘ahaṃ kho imassa anuttarassa vimuttisukhassa nikāmalābhī homi akicchalābhī akasiralābhī. Aho vatimānipi pañca bhikkhusatāni imassa anuttarassa vimuttisukhassa nikāmalābhino assu akicchalābhino akasiralābhino’ti. Atha kho, ānanda, tāni pañca bhikkhusatāni vūpakaṭṭhā 18 appamattā ātāpino pahitattā viharantā nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihariṃsu. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññiṃsu’’.
‘‘ಇತಿ ಖೋ , ಆನನ್ದ, ತಾನಿ ಪಞ್ಚ ಭಿಕ್ಖುಸತಾನಿ ಗವೇಸೀಪಮುಖಾನಿ ಉತ್ತರುತ್ತರಿ 19 ಪಣೀತಪಣೀತಂ ವಾಯಮಮಾನಾ ಅನುತ್ತರಂ ವಿಮುತ್ತಿಂ ಸಚ್ಛಾಕಂಸು। ತಸ್ಮಾತಿಹ, ಆನನ್ದ, ಏವಂ ಸಿಕ್ಖಿತಬ್ಬಂ – ‘ಉತ್ತರುತ್ತರಿ ಪಣೀತಪಣೀತಂ ವಾಯಮಮಾನಾ ಅನುತ್ತರಂ ವಿಮುತ್ತಿಂ ಸಚ್ಛಿಕರಿಸ್ಸಾಮಾ’ತಿ। ಏವಞ್ಹಿ ವೋ, ಆನನ್ದ, ಸಿಕ್ಖಿತಬ್ಬ’’ನ್ತಿ। ದಸಮಂ।
‘‘Iti kho , ānanda, tāni pañca bhikkhusatāni gavesīpamukhāni uttaruttari 20 paṇītapaṇītaṃ vāyamamānā anuttaraṃ vimuttiṃ sacchākaṃsu. Tasmātiha, ānanda, evaṃ sikkhitabbaṃ – ‘uttaruttari paṇītapaṇītaṃ vāyamamānā anuttaraṃ vimuttiṃ sacchikarissāmā’ti. Evañhi vo, ānanda, sikkhitabba’’nti. Dasamaṃ.
ಉಪಾಸಕವಗ್ಗೋ ತತಿಯೋ।
Upāsakavaggo tatiyo.
ತಸ್ಸುದ್ದಾನಂ –
Tassuddānaṃ –
ಸಾರಜ್ಜಂ ವಿಸಾರದೋ ನಿರಯಂ, ವೇರಂ ಚಣ್ಡಾಲಪಞ್ಚಮಂ।
Sārajjaṃ visārado nirayaṃ, veraṃ caṇḍālapañcamaṃ;
ಪೀತಿ ವಣಿಜ್ಜಾ ರಾಜಾನೋ, ಗಿಹೀ ಚೇವ ಗವೇಸಿನಾತಿ॥
Pīti vaṇijjā rājāno, gihī ceva gavesināti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ಗವೇಸೀಸುತ್ತವಣ್ಣನಾ • 10. Gavesīsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ಗವೇಸೀಸುತ್ತವಣ್ಣನಾ • 10. Gavesīsuttavaṇṇanā
