| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. க³வேஸீஸுத்தவண்ணனா
10. Gavesīsuttavaṇṇanā
180. த³ஸமே ஸிதங் பாத்வாகாஸீதி மஹாமக்³கே³னேவ க³ச்ச²ந்தோ தங் ஸாலவனங் ஓலோகெத்வா ‘‘அத்தி² நு கோ² இமஸ்மிங் டா²னே கிஞ்சி ஸுகாரணங் உப்பன்னபுப்³ப³’’ந்தி அத்³த³ஸ கஸ்ஸபபு³த்³த⁴காலே க³வேஸினா உபாஸகேன கதங் ஸுகாரணங். அத²ஸ்ஸ ஏதத³ஹோஸி – ‘‘இத³ங் ஸுகாரணங் பி⁴க்கு²ஸங்க⁴ஸ்ஸ அபாகடங் படிச்ச²ன்னங், ஹந்த³ நங் பி⁴க்கு²ஸங்க⁴ஸ்ஸ பாகடங் கரோமீ’’தி மக்³கா³ ஓக்கம்ம அஞ்ஞதரஸ்மிங் பதே³ஸே டி²தோவ ஸிதபாதுகம்மங் அகாஸி, அக்³க³க்³க³த³ந்தே த³ஸ்ஸெத்வா மந்த³ஹஸிதங் ஹஸி . யதா² ஹி லோகியமனுஸ்ஸா உத³ரங் பஹரந்தா ‘‘கஹங் கஹ’’ந்தி ஹஸந்தி, ந ஏவங் பு³த்³தா⁴. பு³த்³தா⁴னங் பன ஹஸிதங் ஹட்ட²பஹட்டா²காரமத்தமேவ ஹோதி.
180. Dasame sitaṃ pātvākāsīti mahāmaggeneva gacchanto taṃ sālavanaṃ oloketvā ‘‘atthi nu kho imasmiṃ ṭhāne kiñci sukāraṇaṃ uppannapubba’’nti addasa kassapabuddhakāle gavesinā upāsakena kataṃ sukāraṇaṃ. Athassa etadahosi – ‘‘idaṃ sukāraṇaṃ bhikkhusaṅghassa apākaṭaṃ paṭicchannaṃ, handa naṃ bhikkhusaṅghassa pākaṭaṃ karomī’’ti maggā okkamma aññatarasmiṃ padese ṭhitova sitapātukammaṃ akāsi, aggaggadante dassetvā mandahasitaṃ hasi . Yathā hi lokiyamanussā udaraṃ paharantā ‘‘kahaṃ kaha’’nti hasanti, na evaṃ buddhā. Buddhānaṃ pana hasitaṃ haṭṭhapahaṭṭhākāramattameva hoti.
ஹஸிதஞ்ச நாமேதங் தேரஸஹி ஸோமனஸ்ஸஸஹக³தசித்தேஹி ஹோதி. தத்த² லோகியமஹாஜனோ அகுஸலதோ சதூஹி, காமாவசரகுஸலதோ சதூஹீதி அட்ட²ஹி சித்தேஹி ஹஸதி, ஸேகா² அகுஸலதோ தி³ட்டி²க³தஸம்பயுத்தானி த்³வே அபனெத்வா ச²ஹி சித்தேஹி ஹஸந்தி, கீ²ணாஸவா சதூஹி ஸஹேதுககிரியசித்தேஹி, ஏகேன அஹேதுககிரியசித்தேனாதி பஞ்சஹி சித்தேஹி ஹஸந்தி. தேஸுபி ப³லவாரம்மணே ஆபாத²மாக³தே த்³வீஹி ஞாணஸம்பயுத்தசித்தேஹி ஹஸந்தி, து³ப்³ப³லாரம்மணே து³ஹேதுகசித்தத்³வயேன ச அஹேதுகசித்தேன சாதி தீஹி சித்தேஹி ஹஸந்தி. இமஸ்மிங் பன டா²னே கிரியாஹேதுகமனோவிஞ்ஞாணதா⁴துஸோமனஸ்ஸஸஹக³தசித்தங் ப⁴க³வதோ பஹட்டா²காரமத்தஹஸிதங் உப்பாதே³தி.
Hasitañca nāmetaṃ terasahi somanassasahagatacittehi hoti. Tattha lokiyamahājano akusalato catūhi, kāmāvacarakusalato catūhīti aṭṭhahi cittehi hasati, sekhā akusalato diṭṭhigatasampayuttāni dve apanetvā chahi cittehi hasanti, khīṇāsavā catūhi sahetukakiriyacittehi, ekena ahetukakiriyacittenāti pañcahi cittehi hasanti. Tesupi balavārammaṇe āpāthamāgate dvīhi ñāṇasampayuttacittehi hasanti, dubbalārammaṇe duhetukacittadvayena ca ahetukacittena cāti tīhi cittehi hasanti. Imasmiṃ pana ṭhāne kiriyāhetukamanoviññāṇadhātusomanassasahagatacittaṃ bhagavato pahaṭṭhākāramattahasitaṃ uppādeti.
தங் பனேதங் ஹஸிதங் ஏவங் அப்பமத்தகம்பி தே²ரஸ்ஸ பாகடங் அஹோஸி. கத²ங்? ததா²ரூபே ஹி காலே ததா²க³தஸ்ஸ சதூஹி தா³டா²ஹி சாதுத்³தீ³பிகமஹாமேக⁴முக²தோ ஸமோஸரிதா விஜ்ஜுலதா விய விரோசமானா மஹாதாலக்க²ந்த⁴ப்பமாணா ரஸ்மிவட்டியோ உட்ட²ஹித்வா திக்க²த்துங் ஸிரவரங் பத³க்கி²ணங் கத்வா தா³ட²க்³கே³ஸுயேவ அந்தரதா⁴யந்தி. தேன ஸஞ்ஞாணேன ஆயஸ்மா ஆனந்தோ³ ப⁴க³வதோ பச்ச²தோ க³ச்ச²மானோபி ஸிதபாதுபா⁴வங் ஜானாதி.
Taṃ panetaṃ hasitaṃ evaṃ appamattakampi therassa pākaṭaṃ ahosi. Kathaṃ? Tathārūpe hi kāle tathāgatassa catūhi dāṭhāhi cātuddīpikamahāmeghamukhato samosaritā vijjulatā viya virocamānā mahātālakkhandhappamāṇā rasmivaṭṭiyo uṭṭhahitvā tikkhattuṃ siravaraṃ padakkhiṇaṃ katvā dāṭhaggesuyeva antaradhāyanti. Tena saññāṇena āyasmā ānando bhagavato pacchato gacchamānopi sitapātubhāvaṃ jānāti.
இத்³த⁴ந்தி ஸமித்³த⁴ங். பீ²தந்தி அதிஸமித்³த⁴ங் ஸப்³ப³பாலிபு²ல்லங் விய. ஆகிண்ணமனுஸ்ஸந்தி ஜனஸமாகுலங். ஸீலேஸு அபரிபூரகாரீதி பஞ்சஸு ஸீலேஸு அஸமத்தகாரீ. படிதே³ஸிதானீதி உபாஸகபா⁴வங் படிதே³ஸிதானி. ஸமாத³பிதானீதி ஸரணேஸு பதிட்டா²பிதானீதி அத்தோ². இச்சேதங் ஸமஸமந்தி இதி ஏதங் காரணங் ஸப்³பா³காரதோ ஸமபா⁴வேனேவ ஸமங், ந ஏகதே³ஸேன. நத்தி² கிஞ்சி அதிரேகந்தி மய்ஹங் இமேஹி கிஞ்சி அதிரேகங் நத்தி². ஹந்தா³தி வவஸ்ஸக்³க³த்தே² நிபாதோ. அதிரேகாயாதி விஸேஸகாரணத்தா²ய படிபஜ்ஜாமீதி அத்தோ². ஸீலேஸு பரிபூரகாரிங் தா⁴ரேதா²தி பஞ்சஸு ஸீலேஸு ஸமத்தகாரீதி ஜானாத². எத்தாவதா தேன பஞ்ச ஸீலானி ஸமாதி³ன்னானி நாம ஹொந்தி. கிமங்க³ பன ந மயந்தி மயங் பன கேனேவ காரணேன பரிபூரகாரினோ ந ப⁴விஸ்ஸாம. ஸேஸமெத்த² உத்தானமேவாதி.
Iddhanti samiddhaṃ. Phītanti atisamiddhaṃ sabbapāliphullaṃ viya. Ākiṇṇamanussanti janasamākulaṃ. Sīlesu aparipūrakārīti pañcasu sīlesu asamattakārī. Paṭidesitānīti upāsakabhāvaṃ paṭidesitāni. Samādapitānīti saraṇesu patiṭṭhāpitānīti attho. Iccetaṃ samasamanti iti etaṃ kāraṇaṃ sabbākārato samabhāveneva samaṃ, na ekadesena. Natthi kiñci atirekanti mayhaṃ imehi kiñci atirekaṃ natthi. Handāti vavassaggatthe nipāto. Atirekāyāti visesakāraṇatthāya paṭipajjāmīti attho. Sīlesu paripūrakāriṃ dhārethāti pañcasu sīlesu samattakārīti jānātha. Ettāvatā tena pañca sīlāni samādinnāni nāma honti. Kimaṅga pana na mayanti mayaṃ pana keneva kāraṇena paripūrakārino na bhavissāma. Sesamettha uttānamevāti.
உபாஸகவக்³கோ³ ததியோ.
Upāsakavaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. க³வேஸீஸுத்தங் • 10. Gavesīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. க³வேஸீஸுத்தவண்ணனா • 10. Gavesīsuttavaṇṇanā
