| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. க³வேஸீஸுத்தவண்ணனா
10. Gavesīsuttavaṇṇanā
180. த³ஸமே ஸுகாரணந்தி போ³தி⁴பரிபாசனஸ்ஸ ஏகந்திகங் ஸுந்த³ரங் காரணங். மந்த³ஹஸிதந்தி ஈஸகங் ஹஸிதங். கஹங் கஹந்தி ஹாஸஸத்³த³ஸ்ஸ அனுகரணமேதங். ஹட்ட²ப்பஹட்டா²காரமத்தந்தி ஹட்ட²ஸ்ஸ பஹட்டா²காரமத்தங். யதா² க³ஹிதஸங்கேதா ‘‘பஹட்டோ² ப⁴க³வா’’தி ஸஞ்ஜானந்தி, ஏவங் ஆகாரனித³ஸ்ஸனமத்தங்.
180. Dasame sukāraṇanti bodhiparipācanassa ekantikaṃ sundaraṃ kāraṇaṃ. Mandahasitanti īsakaṃ hasitaṃ. Kahaṃ kahanti hāsasaddassa anukaraṇametaṃ. Haṭṭhappahaṭṭhākāramattanti haṭṭhassa pahaṭṭhākāramattaṃ. Yathā gahitasaṅketā ‘‘pahaṭṭho bhagavā’’ti sañjānanti, evaṃ ākāranidassanamattaṃ.
இதா³னி இமினா பஸங்கே³ன ஹாஸஸமுட்டா²னங் விபா⁴க³தோ த³ஸ்ஸேதுங் ‘‘ஹஸிதஞ்ச நாமேத’’ந்திஆதி³ ஆரத்³த⁴ங். தத்த² அஜ்ஜு²பெக்க²னவஸேனபி ஹாஸோ ந ஸம்ப⁴வதி, பகே³வ தோ³மனஸ்ஸவஸேனாதி ஆஹ ‘‘தேரஸஹி ஸோமனஸ்ஸஸஹக³தசித்தேஹீ’’தி. நனு ச கேசி கோத⁴வஸேனபி ஹஸந்தீதி? ந, தே ஸம்பியந்தி கோத⁴வத்து²ங் தத்த² ‘‘மயங் தா³னி யதா²காமகாரிதங் ஆபஜ்ஜிஸ்ஸாமா’’தி து³விஞ்ஞெய்யந்தரேன ஸோமனஸ்ஸசித்தேனேவ ஹாஸஸ்ஸ உப்பஜ்ஜனதோ. தேஸூதி பஞ்சஸு ஸோமனஸ்ஸஸஹக³தகிரியசித்தேஸு. ப³லவாரம்மணேதி உளாரதமே ஆரம்மணே யமகபாடிஹாரியஸதி³ஸே. து³ப்³ப³லாரம்மணேதி அனுளாரஆரம்மணே.
Idāni iminā pasaṅgena hāsasamuṭṭhānaṃ vibhāgato dassetuṃ ‘‘hasitañca nāmeta’’ntiādi āraddhaṃ. Tattha ajjhupekkhanavasenapi hāso na sambhavati, pageva domanassavasenāti āha ‘‘terasahi somanassasahagatacittehī’’ti. Nanu ca keci kodhavasenapi hasantīti? Na, te sampiyanti kodhavatthuṃ tattha ‘‘mayaṃ dāni yathākāmakāritaṃ āpajjissāmā’’ti duviññeyyantarena somanassacitteneva hāsassa uppajjanato. Tesūti pañcasu somanassasahagatakiriyacittesu. Balavārammaṇeti uḷāratame ārammaṇe yamakapāṭihāriyasadise. Dubbalārammaṇeti anuḷāraārammaṇe.
‘‘இமஸ்மிங் பன டா²னே…பே॰… உப்பாதே³தீ’’தி இத³ங் போராணட்ட²கதா²யங் ததா² ஆக³தத்தா வுத்தங், ந ஸஹேதுகஸோமனஸ்ஸஸஹக³தசித்தேஹி ப⁴க³வதோ ஸிதங் ந ஹோதீதி த³ஸ்ஸனத்தங். அபி⁴த⁴ம்மடீகாயங் (த⁴॰ ஸ॰ மூலடீ॰ 968) பன ‘‘அதீதங்ஸாதீ³ஸு அப்படிஹதங் ஞாணங் வத்வா ‘இமேஹி த⁴ம்மேஹி ஸமன்னாக³தஸ்ஸ பு³த்³த⁴ஸ்ஸ ப⁴க³வதோ ஸப்³ப³ங் காயகம்மங் ஞாணபுப்³ப³ங்க³மங் ஞாணானுபரிவத்தீ’திஆதி³வசனதோ (மஹானி॰ 156; படி॰ ம॰ 3.5) ‘ப⁴க³வதோ இத³ங் சித்தங் உப்பஜ்ஜதீ’தி வுத்தவசனங் விசாரேதப்³ப³’’ந்தி வுத்தங். தத்த² இமினா ஹஸிதுப்பாத³சித்தேன பவத்தியமானம்பி ப⁴க³வதோ ஸிதகரணங் புப்³பே³னிவாஸஅனாக³தங்ஸஸப்³ப³ஞ்ஞுதஞ்ஞாணானங் அனுவத்தகத்தா ஞாணானுபரிவத்தியேவாதி ஏவங் பன ஞாணானுபரிவத்திபா⁴வே ஸதி ந கோசி பாளிஅட்ட²கதா²னங் விரோதோ⁴. ததா² ஹி அபி⁴த⁴ம்மட்ட²கதா²யங் (த⁴॰ ஸ॰ அட்ட²॰ 568) ‘‘தேஸங் ஞாணானங் சிண்ணபரியந்தே இத³ங் சித்தங் உப்பஜ்ஜதீ’’தி வுத்தங். அவஸ்ஸஞ்சேதங் ஏவங் இச்சி²தப்³ப³ங், அஞ்ஞதா² ஆவஜ்ஜனசித்தஸ்ஸபி ப⁴க³வதோ ததா²ரூபே காலே ந யுஜ்ஜெய்ய. தஸ்ஸபி ஹி விஞ்ஞத்திஸமுட்டா²பகபா⁴வஸ்ஸ நிச்சி²தத்தா. ததா² ஹி வுத்தங் ‘‘ஏவஞ்ச கத்வா மனொத்³வாராவஜ்ஜனஸ்ஸபி விஞ்ஞத்திஸமுட்டா²பகத்தங் உபபன்னங் ஹோதீ’’தி (த⁴॰ ஸ॰ மூலடீ॰ 1 காயகம்மத்³வாரகதா²வண்ணனா) ந ச விஞ்ஞத்திஸமுட்டா²பகத்தே தங்ஸமுட்டா²னகாயவிஞ்ஞத்தியா காயகம்மாதி³பா⁴வங் ஆபஜ்ஜனபா⁴வோ விஸ்ஸஜ்ஜதீதி.
‘‘Imasmiṃ pana ṭhāne…pe… uppādetī’’ti idaṃ porāṇaṭṭhakathāyaṃ tathā āgatattā vuttaṃ, na sahetukasomanassasahagatacittehi bhagavato sitaṃ na hotīti dassanattaṃ. Abhidhammaṭīkāyaṃ (dha. sa. mūlaṭī. 968) pana ‘‘atītaṃsādīsu appaṭihataṃ ñāṇaṃ vatvā ‘imehi dhammehi samannāgatassa buddhassa bhagavato sabbaṃ kāyakammaṃ ñāṇapubbaṅgamaṃ ñāṇānuparivattī’tiādivacanato (mahāni. 156; paṭi. ma. 3.5) ‘bhagavato idaṃ cittaṃ uppajjatī’ti vuttavacanaṃ vicāretabba’’nti vuttaṃ. Tattha iminā hasituppādacittena pavattiyamānampi bhagavato sitakaraṇaṃ pubbenivāsaanāgataṃsasabbaññutaññāṇānaṃ anuvattakattā ñāṇānuparivattiyevāti evaṃ pana ñāṇānuparivattibhāve sati na koci pāḷiaṭṭhakathānaṃ virodho. Tathā hi abhidhammaṭṭhakathāyaṃ (dha. sa. aṭṭha. 568) ‘‘tesaṃ ñāṇānaṃ ciṇṇapariyante idaṃ cittaṃ uppajjatī’’ti vuttaṃ. Avassañcetaṃ evaṃ icchitabbaṃ, aññathā āvajjanacittassapi bhagavato tathārūpe kāle na yujjeyya. Tassapi hi viññattisamuṭṭhāpakabhāvassa nicchitattā. Tathā hi vuttaṃ ‘‘evañca katvā manodvārāvajjanassapi viññattisamuṭṭhāpakattaṃ upapannaṃ hotī’’ti (dha. sa. mūlaṭī. 1 kāyakammadvārakathāvaṇṇanā) na ca viññattisamuṭṭhāpakatte taṃsamuṭṭhānakāyaviññattiyā kāyakammādibhāvaṃ āpajjanabhāvo vissajjatīti.
ஹஸிதந்தி ஸிதமேவ ஸந்தா⁴ய வத³தி. தேனாஹ ‘‘ஏவங் அப்பமத்தகம்பீ’’தி. ஸமோஸரிதா விஜ்ஜுலதா. ஸா ஹி இதரவிஜ்ஜுலதா விய க²ணட்டி²தியா ஸீக⁴னிரோதா⁴ ச ந ஹோதி, அபிச கோ² த³ந்த⁴னிரோதா⁴, ந ச ஸப்³ப³காலிகா. தீ³தி⁴தி பாவகமஹாமேக⁴தோ வா சாதுத்³தீ³பிகமஹாமேக⁴தோ வா நிச்ச²ரதி. தேனாஹ ‘‘சாதுத்³தீ³பிகமஹாமேக⁴முக²தோ’’தி. அயங் கிர தாஸங் ரஸ்மீனங் த⁴ம்மதா, யதி³த³ங் திக்க²த்துங் ஸீஸங் பத³க்கி²ணங் கத்வா தா³ட²க்³கே³ஸுயேவ அந்தரதா⁴னங். ஸேஸமெத்த² ஸுவிஞ்ஞெய்யமேவ.
Hasitanti sitameva sandhāya vadati. Tenāha ‘‘evaṃ appamattakampī’’ti. Samosaritā vijjulatā. Sā hi itaravijjulatā viya khaṇaṭṭhitiyā sīghanirodhā ca na hoti, apica kho dandhanirodhā, na ca sabbakālikā. Dīdhiti pāvakamahāmeghato vā cātuddīpikamahāmeghato vā niccharati. Tenāha ‘‘cātuddīpikamahāmeghamukhato’’ti. Ayaṃ kira tāsaṃ rasmīnaṃ dhammatā, yadidaṃ tikkhattuṃ sīsaṃ padakkhiṇaṃ katvā dāṭhaggesuyeva antaradhānaṃ. Sesamettha suviññeyyameva.
க³வேஸீஸுத்தவண்ணனா நிட்டி²தா.
Gavesīsuttavaṇṇanā niṭṭhitā.
உபாஸகவக்³க³வண்ணனா நிட்டி²தா.
Upāsakavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. க³வேஸீஸுத்தங் • 10. Gavesīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. க³வேஸீஸுத்தவண்ணனா • 10. Gavesīsuttavaṇṇanā
