| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. க³யாகஸ்ஸபத்தே²ரஅபதா³னவண்ணனா
3. Gayākassapattheraapadānavaṇṇanā
ததியாபதா³னே அஜினசம்மவத்தோ²ஹந்திஆதி³கங் ஆயஸ்மதோ க³யாகஸ்ஸபத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயங் குஸலங் உபசினந்தோ இதோ ஏகதிங்ஸகப்பே ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ நிஸ்ஸரணஜ்ஜா²ஸயதாய க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா அரஞ்ஞாயதனே அஸ்ஸமங் மாபெத்வா வனமூலப²லாஹாரோ வஸதி. தேன ச ஸமயேன ப⁴க³வா ஏகோ அது³தியோ தஸ்ஸ அஸ்ஸமஸமீபேனாக³ச்சி², ஸோ ப⁴க³வந்தங் தி³ஸ்வா பஸன்னமானஸோ உபஸங்கமித்வா வந்தி³த்வா ஏகமந்தங் டி²தோ வேலங் ஓலோகெந்தோ மனோஹரானி கோலப²லானி ஸத்து² உபனேஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ப்³ராஹ்மணகுலே நிப்³ப³த்தித்வா வயப்பத்தோ நிஸ்ஸரணஜ்ஜா²ஸயதாய க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா த்³வீஹி தாபஸஸதேஹி ஸத்³தி⁴ங் க³யாய விஹரதி. க³யாய வஸனதோ ஹிஸ்ஸ கஸ்ஸபகொ³த்ததாய ச க³யாகஸ்ஸபோதி ஸமஞ்ஞா அஹோஸி. ஸோ ப⁴க³வதோ ஸத்³தி⁴ங் பரிஸாய ஏஹிபி⁴க்கூ²பஸம்பத³ங் த³த்வா நதீ³கஸ்ஸபஸ்ஸ வுத்தனயேன ஆதி³த்தபரியாய தே³ஸனாய ஓவதி³யமானோ அரஹத்தே பதிட்டா²ஸி.
Tatiyāpadāne ajinacammavatthohantiādikaṃ āyasmato gayākassapattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinanto ito ekatiṃsakappe sikhissa bhagavato kāle kulagehe nibbatto viññutaṃ patto nissaraṇajjhāsayatāya gharāvāsaṃ pahāya tāpasapabbajjaṃ pabbajitvā araññāyatane assamaṃ māpetvā vanamūlaphalāhāro vasati. Tena ca samayena bhagavā eko adutiyo tassa assamasamīpenāgacchi, so bhagavantaṃ disvā pasannamānaso upasaṅkamitvā vanditvā ekamantaṃ ṭhito velaṃ olokento manoharāni kolaphalāni satthu upanesi. So tena puññakammena devamanussesu saṃsaranto imasmiṃ buddhuppāde brāhmaṇakule nibbattitvā vayappatto nissaraṇajjhāsayatāya gharāvāsaṃ pahāya tāpasapabbajjaṃ pabbajitvā dvīhi tāpasasatehi saddhiṃ gayāya viharati. Gayāya vasanato hissa kassapagottatāya ca gayākassapoti samaññā ahosi. So bhagavato saddhiṃ parisāya ehibhikkhūpasampadaṃ datvā nadīkassapassa vuttanayena ādittapariyāya desanāya ovadiyamāno arahatte patiṭṭhāsi.
35. ஸோ அரஹத்தங் பத்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ அஜினசம்மவத்தோ²ஹந்திஆதி³மாஹ . தத்த² அஜினசம்மவத்தோ²தி தாபஸபப்³ப³ஜிதத்தா அஜினசம்மனிவாஸனபாவுரணோதி அத்தோ². கா²ரிபா⁴ரத⁴ரோதி தாபஸகாலே தாபஸபரிக்கா²ரபரிபுண்ணகாஜத⁴ரோதி அத்தோ². கா²ரிகதாபஸபரிக்கா²ரே பூரெத்வா. கோலங் அஹாஸி அஸ்ஸமந்தி கோலப²லங் அஸ்ஸமே பூரெத்வா அஸ்ஸமே நிஸின்னோதி அத்தோ². அகோ³பயிந்தி பாடே² கோலப²லங் பரியேஸித்வா அஸ்ஸமங் கோ³பேஸிங் ரக்கி²ந்தி அத்தோ². ஸேஸங் ஸப்³ப³ங் உத்தானத்த²மேவாதி.
35. So arahattaṃ patvā somanassajāto attano pubbacaritāpadānaṃ pakāsento ajinacammavatthohantiādimāha . Tattha ajinacammavatthoti tāpasapabbajitattā ajinacammanivāsanapāvuraṇoti attho. Khāribhāradharoti tāpasakāle tāpasaparikkhāraparipuṇṇakājadharoti attho. Khārikatāpasaparikkhāre pūretvā. Kolaṃ ahāsi assamanti kolaphalaṃ assame pūretvā assame nisinnoti attho. Agopayinti pāṭhe kolaphalaṃ pariyesitvā assamaṃ gopesiṃ rakkhinti attho. Sesaṃ sabbaṃ uttānatthamevāti.
க³யாகஸ்ஸபத்தே²ரஅபதா³னவண்ணனா ஸமத்தா.
Gayākassapattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. க³யாகஸ்ஸபத்தே²ரஅபதா³னங் • 3. Gayākassapattheraapadānaṃ
