| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၄. ဃရကပောတင္ဂပဉ္ဟော
4. Gharakapotaṅgapañho
၄. ‘‘ဘန္တေ နာဂသေန, ‘ဃရကပောတသ္သ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဃရကပောတော ပရဂေဟေ ဝသမာနော န တေသံ ကိဉ္စိ ဘဏ္ဍသ္သ နိမိတ္တံ ဂဏ္ဟာတိ, မဇ္ဈတ္တော ဝသတိ သညာဗဟုလော, ဧဝမေဝ ခော, မဟာရာဇ, ယောဂိနာ ယောဂာဝစရေန ပရကုလံ ဥပဂတေန တသ္မိံ ကုလေ ဣတ္ထီနံ ဝာ ပုရိသာနံ ဝာ မဉ္စေ ဝာ ပီဌေ ဝာ ဝတ္ထေ ဝာ အလင္ကာရေ ဝာ ဥပဘောဂေ ဝာ ပရိဘောဂေ ဝာ ဘောဇနဝိကတီသု ဝာ န နိမိတ္တံ ဂဟေတဗ္ဗံ, မဇ္ဈတ္တေန ဘဝိတဗ္ဗံ, သမဏသညာ ပစ္စုပဋ္ဌပေတဗ္ဗာ။ ဣဒံ, မဟာရာဇ, ဃရကပောတသ္သ ဧကံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန စူဠနာရဒဇာတကေ –
4. ‘‘Bhante nāgasena, ‘gharakapotassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, gharakapoto paragehe vasamāno na tesaṃ kiñci bhaṇḍassa nimittaṃ gaṇhāti, majjhatto vasati saññābahulo, evameva kho, mahārāja, yoginā yogāvacarena parakulaṃ upagatena tasmiṃ kule itthīnaṃ vā purisānaṃ vā mañce vā pīṭhe vā vatthe vā alaṅkāre vā upabhoge vā paribhoge vā bhojanavikatīsu vā na nimittaṃ gahetabbaṃ, majjhattena bhavitabbaṃ, samaṇasaññā paccupaṭṭhapetabbā. Idaṃ, mahārāja, gharakapotassa ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena cūḷanāradajātake –
မိတံ ခာဒေ မိတံ ဘုဉ္ဇေ၊ န စ ရူပေ မနံ ကရေ’’’တိ။
Mitaṃ khāde mitaṃ bhuñje, na ca rūpe manaṃ kare’’’ti.
ဃရကပောတင္ဂပဉ္ဟော စတုတ္ထော။
Gharakapotaṅgapañho catuttho.
Footnotes:
