| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[454] 16. гхадабан̣д̣ид̇аж̇аад̇агаван̣н̣анаа
[454] 16. Ghaṭapaṇḍitajātakavaṇṇanā
удтзхи ган̣хаад̇и ид̣̇ам̣ сад̇т̇аа ж̇зд̇аванз вихаранд̇о мад̇абуд̇д̇ам̣ гудумб̣игам̣ аараб̣бха гат̇зси. вад̇т̇у мадтагун̣д̣алисад̣̇исамзва. ид̇ха бана сад̇т̇аа д̇ам̣ убаасагам̣ ‘‘гим̣, убаасага, сожасий’’д̇и вад̇ваа ‘‘аама, бханд̇з’’нд̇и вуд̇д̇з ‘‘убаасага, бораан̣агабан̣д̣ид̇аа бан̣д̣ид̇аанам̣ гат̇ам̣ суд̇ваа мад̇абуд̇д̇ам̣ наанусожим̣суу’’д̇и вад̇ваа д̇зна яаажид̇о ад̇ийд̇ам̣ аахари.
Uṭṭhehikaṇhāti idaṃ satthā jetavane viharanto mataputtaṃ kuṭumbikaṃ ārabbha kathesi. Vatthu maṭṭhakuṇḍalisadisameva. Idha pana satthā taṃ upāsakaṃ ‘‘kiṃ, upāsaka, socasī’’ti vatvā ‘‘āma, bhante’’nti vutte ‘‘upāsaka, porāṇakapaṇḍitā paṇḍitānaṃ kathaṃ sutvā mataputtaṃ nānusociṃsū’’ti vatvā tena yācito atītaṃ āhari.
ад̇ийд̇з уд̇д̇арабат̇з гам̣сабхог̇з асид̇ан̃ж̇ананаг̇арз махаагам̣со наама рааж̇аа раж̇ж̇ам̣ гаарзси. д̇асса гам̣со жа, убагам̣со жаад̇и д̣̇вз буд̇д̇аа ахзсум̣, д̣̇зваг̇аб̣бхаа наама згаа д̇хийд̇аа. д̇ассаа ж̇аад̇ад̣̇ивасз нзмид̇д̇агаа б̣раахман̣аа ‘‘зд̇иссаа гужчияам̣ ниб̣б̣ад̇д̇абуд̇д̇аа гам̣саг̇од̇д̇ам̣ гам̣савам̣сам̣ наасзссанд̇ий’’д̇и б̣яаагарим̣су. рааж̇аа б̣алавасинзхзна д̇хийд̇арам̣ винаасзд̇ум̣ наасагки, ‘‘бхаад̇аро ж̇ааниссанд̇ий’’д̇и яаавад̇ааяугам̣ тад̇ваа гааламагааси. д̇асмим̣ гаалагад̇з гам̣со рааж̇аа ахоси, убагам̣со убарааж̇аа. д̇з жинд̇аяим̣су ‘‘сажз маяам̣ бхаг̇иним̣ наасзссаама, г̇аараяхаа бхависсаама, зд̇ам̣ гассажи ад̣̇ад̇ваа ниссаамигам̣ гад̇ваа бадиж̇аг̇г̇иссаамаа’’д̇и. д̇з згат̇уун̣агам̣ баасаад̣̇ам̣ гаарзд̇ваа д̇ам̣ д̇ад̇т̇а васаабзсум̣. нанд̣̇иг̇обаа наама д̇ассаа барижааригаа ахоси. анд̇хагавзн̣д̣о наама д̣̇аасо д̇ассаа саамиго аарагкамагааси.
Atīte uttarapathe kaṃsabhoge asitañjananagare mahākaṃso nāma rājā rajjaṃ kāresi. Tassa kaṃso ca, upakaṃso cāti dve puttā ahesuṃ, devagabbhā nāma ekā dhītā. Tassā jātadivase nemittakā brāhmaṇā ‘‘etissā kucchiyaṃ nibbattaputtā kaṃsagottaṃ kaṃsavaṃsaṃ nāsessantī’’ti byākariṃsu. Rājā balavasinehena dhītaraṃ vināsetuṃ nāsakkhi, ‘‘bhātaro jānissantī’’ti yāvatāyukaṃ ṭhatvā kālamakāsi. Tasmiṃ kālakate kaṃso rājā ahosi, upakaṃso uparājā. Te cintayiṃsu ‘‘sace mayaṃ bhaginiṃ nāsessāma, gārayhā bhavissāma, etaṃ kassaci adatvā nissāmikaṃ katvā paṭijaggissāmā’’ti. Te ekathūṇakaṃ pāsādaṃ kāretvā taṃ tattha vasāpesuṃ. Nandigopā nāma tassā paricārikā ahosi. Andhakaveṇḍo nāma dāso tassā sāmiko ārakkhamakāsi.
д̇ад̣̇аа уд̇д̇арамад̇хурааяа махаасааг̇аро наама рааж̇аа раж̇ж̇ам̣ гаарзси. д̇асса сааг̇аро, убасааг̇аро жаад̇и д̣̇вз буд̇д̇аа ахзсум̣. д̇зсу бид̇у ажжаязна сааг̇аро рааж̇аа ахоси, убасааг̇аро убарааж̇аа. со убагам̣сасса сахааяаго згаажарияагулз згад̇о уг̇г̇ахид̇асиббо. со сааг̇арасса бхаад̇у анд̇збурз д̣̇уб̣бхид̇ваа бхааяамаано балааяид̇ваа гам̣сабхог̇з убагам̣сасса санд̇игам̣ аг̇амааси. убагам̣со д̇ам̣ ран̃н̃о д̣̇ассзси, рааж̇аа д̇асса маханд̇ам̣ яасам̣ ад̣̇ааси. со рааж̇убадтаанам̣ г̇ажчанд̇о д̣̇зваг̇аб̣бхааяа ниваасам̣ згат̇амбхам̣ баасаад̣̇ам̣ д̣̇исваа ‘‘гассзсо ниваасо’’д̇и бужчид̇ваа д̇ам̣ гааран̣ам̣ суд̇ваа д̣̇зваг̇аб̣бхааяа бадиб̣ад̣̇д̇хажид̇д̇о ахоси. д̣̇зваг̇аб̣бхааби згад̣̇ивасам̣ д̇ам̣ убагам̣сзна сад̣̇д̇хим̣ рааж̇убадтаанам̣ ааг̇ажчанд̇ам̣ д̣̇исваа ‘‘го зсо’’д̇и бужчид̇ваа ‘‘махаасааг̇арасса буд̇д̇о убасааг̇аро наамаа’’д̇и нанд̣̇иг̇обааяа санд̇игаа суд̇ваа д̇асмим̣ бадиб̣ад̣̇д̇хажид̇д̇аа ахоси. убасааг̇аро нанд̣̇иг̇обааяа лан̃ж̇ам̣ д̣̇ад̇ваа ‘‘бхаг̇ини, сагкиссаси мз д̣̇зваг̇аб̣бхам̣ д̣̇ассзд̇у’’нд̇и ааха. саа ‘‘на зд̇ам̣ саами, г̇аруга’’нд̇и вад̇ваа д̇ам̣ гааран̣ам̣ д̣̇зваг̇аб̣бхааяа аарожзси. саа багад̇ияаава д̇асмим̣ бадиб̣ад̣̇д̇хажид̇д̇аа д̇ам̣ важанам̣ суд̇ваа ‘‘саад̇хуу’’д̇и самбадижчид̇ваа нанд̣̇иг̇обаа убасааг̇арасса сан̃н̃ам̣ д̣̇ад̇ваа рад̇д̇ибхааг̇з д̇ам̣ баасаад̣̇ам̣ ааробзси. со д̣̇зваг̇аб̣бхааяа сад̣̇д̇хим̣ сам̣ваасам̣ габбзси. ат̇а нзсам̣ бунаббунам̣ сам̣ваасзна д̣̇зваг̇аб̣бхаа г̇аб̣бхам̣ бадилабхи.
Tadā uttaramadhurāya mahāsāgaro nāma rājā rajjaṃ kāresi. Tassa sāgaro, upasāgaro cāti dve puttā ahesuṃ. Tesu pitu accayena sāgaro rājā ahosi, upasāgaro uparājā. So upakaṃsassa sahāyako ekācariyakule ekato uggahitasippo. So sāgarassa bhātu antepure dubbhitvā bhāyamāno palāyitvā kaṃsabhoge upakaṃsassa santikaṃ agamāsi. Upakaṃso taṃ rañño dassesi, rājā tassa mahantaṃ yasaṃ adāsi. So rājupaṭṭhānaṃ gacchanto devagabbhāya nivāsaṃ ekathambhaṃ pāsādaṃ disvā ‘‘kasseso nivāso’’ti pucchitvā taṃ kāraṇaṃ sutvā devagabbhāya paṭibaddhacitto ahosi. Devagabbhāpi ekadivasaṃ taṃ upakaṃsena saddhiṃ rājupaṭṭhānaṃ āgacchantaṃ disvā ‘‘ko eso’’ti pucchitvā ‘‘mahāsāgarassa putto upasāgaro nāmā’’ti nandigopāya santikā sutvā tasmiṃ paṭibaddhacittā ahosi. Upasāgaro nandigopāya lañjaṃ datvā ‘‘bhagini, sakkhissasi me devagabbhaṃ dassetu’’nti āha. Sā ‘‘na etaṃ sāmi, garuka’’nti vatvā taṃ kāraṇaṃ devagabbhāya ārocesi. Sā pakatiyāva tasmiṃ paṭibaddhacittā taṃ vacanaṃ sutvā ‘‘sādhū’’ti sampaṭicchitvā nandigopā upasāgarassa saññaṃ datvā rattibhāge taṃ pāsādaṃ āropesi. So devagabbhāya saddhiṃ saṃvāsaṃ kappesi. Atha nesaṃ punappunaṃ saṃvāsena devagabbhā gabbhaṃ paṭilabhi.
абарабхааг̇з д̇ассаа г̇аб̣бхабад̇идтаанам̣ баагадам̣ ахоси. бхаад̇аро нанд̣̇иг̇обам̣ бужчим̣су, саа абхаяам̣ яаажид̇ваа д̇ам̣ анд̇арам̣ гат̇зси. д̇з суд̇ваа ‘‘бхаг̇иним̣ наасзд̇ум̣ на саггаа, сажз д̇хийд̇арам̣ виж̇ааяиссад̇и, д̇амби на наасзссаама, сажз бана буд̇д̇о бхависсад̇и, наасзссаамаа’’д̇и жинд̇зд̇ваа д̣̇зваг̇аб̣бхам̣ убасааг̇арассзва ад̣̇ам̣су. саа барибун̣н̣аг̇аб̣бхаа д̇хийд̇арам̣ виж̇ааяи. бхаад̇аро суд̇ваа хадтад̇удтаа д̇ассаа ‘‘ан̃ж̇анад̣̇звий’’д̇и наамам̣ гарим̣су. д̇зсам̣ бхог̇авад̣дхамаанам̣ наама бхог̇аг̇аамам̣ ад̣̇ам̣су. убасааг̇аро д̣̇зваг̇аб̣бхам̣ г̇ахзд̇ваа бхог̇авад̣дхамаанаг̇аамз васи. д̣̇зваг̇аб̣бхааяа бунаби г̇аб̣бхо бад̇идтааси, нанд̣̇иг̇обааби д̇ам̣ д̣̇ивасамзва г̇аб̣бхам̣ бадилабхи. д̇аасу барибун̣н̣аг̇аб̣бхаасу згад̣̇ивасамзва д̣̇зваг̇аб̣бхаа буд̇д̇ам̣ виж̇ааяи, нанд̣̇иг̇обаа д̇хийд̇арам̣ виж̇ааяи. д̣̇зваг̇аб̣бхаа буд̇д̇асса винаасанабхаязна буд̇д̇ам̣ нанд̣̇иг̇обааяа рахассзна бзсзд̇ваа д̇ассаа д̇хийд̇арам̣ аахараабзси. д̇ассаа виж̇аад̇абхаавам̣ бхаад̇игаанам̣ аарожзсум̣. д̇з ‘‘буд̇д̇ам̣ виж̇аад̇аа, д̇хийд̇ара’’нд̇и бужчид̇ваа ‘‘д̇хийд̇ара’’нд̇и вуд̇д̇з ‘‘д̇зна хи босзт̇аа’’д̇и аахам̣су. зд̇знубааязна д̣̇зваг̇аб̣бхаа д̣̇аса буд̇д̇з виж̇ааяи, д̣̇аса д̇хийд̇аро нанд̣̇иг̇обаа виж̇ааяи. д̣̇аса буд̇д̇аа нанд̣̇иг̇обааяа санд̇игз вад̣дханд̇и, д̇хийд̇аро д̣̇зваг̇аб̣бхааяа. д̇ам̣ анд̇арам̣ гожи на ж̇аанаад̇и. д̣̇зваг̇аб̣бхааяа ж̇здтабуд̇д̇о ваасуд̣̇зво наама ахоси, д̣̇уд̇ияо б̣алад̣̇зво, д̇ад̇ияо жанд̣̇ад̣̇зво, жад̇уд̇т̇о суурияад̣̇зво, бан̃жамо аг̇г̇ид̣̇зво, чадто варун̣ад̣̇зво, сад̇д̇амо аж̇ж̇уно, адтамо баж̇ж̇уно, навамо гхадабан̣д̣ид̇о, д̣̇асамо ан̇гуро наама ахоси. д̇з анд̇хагавзн̣д̣ад̣̇аасабуд̇д̇аа д̣̇аса бхаад̇игаа жздагаад̇и баагадаа ахзсум̣.
Aparabhāge tassā gabbhapatiṭṭhānaṃ pākaṭaṃ ahosi. Bhātaro nandigopaṃ pucchiṃsu, sā abhayaṃ yācitvā taṃ antaraṃ kathesi. Te sutvā ‘‘bhaginiṃ nāsetuṃ na sakkā, sace dhītaraṃ vijāyissati, tampi na nāsessāma, sace pana putto bhavissati, nāsessāmā’’ti cintetvā devagabbhaṃ upasāgarasseva adaṃsu. Sā paripuṇṇagabbhā dhītaraṃ vijāyi. Bhātaro sutvā haṭṭhatuṭṭhā tassā ‘‘añjanadevī’’ti nāmaṃ kariṃsu. Tesaṃ bhogavaḍḍhamānaṃ nāma bhogagāmaṃ adaṃsu. Upasāgaro devagabbhaṃ gahetvā bhogavaḍḍhamānagāme vasi. Devagabbhāya punapi gabbho patiṭṭhāsi, nandigopāpi taṃ divasameva gabbhaṃ paṭilabhi. Tāsu paripuṇṇagabbhāsu ekadivasameva devagabbhā puttaṃ vijāyi, nandigopā dhītaraṃ vijāyi. Devagabbhā puttassa vināsanabhayena puttaṃ nandigopāya rahassena pesetvā tassā dhītaraṃ āharāpesi. Tassā vijātabhāvaṃ bhātikānaṃ ārocesuṃ. Te ‘‘puttaṃ vijātā, dhītara’’nti pucchitvā ‘‘dhītara’’nti vutte ‘‘tena hi posethā’’ti āhaṃsu. Etenupāyena devagabbhā dasa putte vijāyi, dasa dhītaro nandigopā vijāyi. Dasa puttā nandigopāya santike vaḍḍhanti, dhītaro devagabbhāya. Taṃ antaraṃ koci na jānāti. Devagabbhāya jeṭṭhaputto vāsudevo nāma ahosi, dutiyo baladevo, tatiyo candadevo, catuttho sūriyadevo, pañcamo aggidevo, chaṭṭho varuṇadevo, sattamo ajjuno, aṭṭhamo pajjuno, navamo ghaṭapaṇḍito, dasamo aṅkuro nāma ahosi. Te andhakaveṇḍadāsaputtā dasa bhātikā ceṭakāti pākaṭā ahesuṃ.
д̇з абарабхааг̇з вуд̣̇д̇химанвааяа т̇аамаб̣аласамбаннаа гагкал̣аа парусаа худ̇ваа вилобам̣ гаронд̇аа вижаранд̇и , ран̃н̃о г̇ажчанд̇з бан̣н̣аагаарзби вилумбанд̇зва. мануссаа саннибад̇ид̇ваа ‘‘анд̇хагавзн̣д̣ад̣̇аасабуд̇д̇аа д̣̇аса бхаад̇игаа радтам̣ вилумбанд̇ий’’д̇и рааж̇ан̇г̇ан̣з убаггосим̣су. рааж̇аа анд̇хагавзн̣д̣ам̣ баггосаабзд̇ваа ‘‘гасмаа буд̇д̇зхи вилобам̣ гаараабзсий’’д̇и д̇аж̇ж̇зси. звам̣ д̣̇уд̇ияамби д̇ад̇ияамби мануссзхи убаггосз гад̇з рааж̇аа д̇ам̣ санд̇аж̇ж̇зси. со маран̣абхаяабхийд̇о рааж̇аанам̣ абхаяам̣ яаажид̇ваа ‘‘д̣̇зва, зд̇з на маяхам̣ буд̇д̇аа, убасааг̇арасса буд̇д̇аа’’д̇и д̇ам̣ анд̇арам̣ аарожзси. рааж̇аа бхийд̇о ‘‘гзна д̇з убааязна г̇ан̣хаамаа’’д̇и амажжз бужчид̇ваа ‘‘зд̇з, д̣̇зва, маллаяуд̣̇д̇хавид̇д̇агаа, наг̇арз яуд̣̇д̇хам̣ гаарзд̇ваа д̇ад̇т̇а нз яуд̣̇д̇хаман̣д̣алам̣ ааг̇ад̇з г̇аахаабзд̇ваа маарзссаамаа’’д̇и вуд̇д̇з жааруран̃жа, мудтиган̃жаад̇и д̣̇вз маллз босзд̇ваа ‘‘ид̇о сад̇д̇амз д̣̇ивасз яуд̣̇д̇хам̣ бхависсад̇ий’’д̇и наг̇арз бхзрим̣ жараабзд̇ваа рааж̇ан̇г̇ан̣з яуд̣̇д̇хаман̣д̣алам̣ саж̇ж̇аабзд̇ваа агкаваадам̣ гаарзд̇ваа яуд̣̇д̇хаман̣д̣алам̣ алан̇гаараабзд̇ваа д̇хаж̇абадаагам̣ б̣анд̇хаабзси. сагаланаг̇арам̣ сан̇кубхи. жаггаад̇ижаггам̣ ман̃жаад̇иман̃жам̣ б̣анд̇хид̇ваа жаарурамудтигаа яуд̣̇д̇хаман̣д̣алам̣ ааг̇анд̇ваа ваг̇г̇анд̇аа г̇аж̇ж̇анд̇аа абподзнд̇аа вижарим̣су. д̣̇аса бхаад̇игааби ааг̇анд̇ваа раж̇агавийт̇им̣ вилумбид̇ваа ван̣н̣асаадагз ниваасзд̇ваа г̇анд̇хаабан̣зсу г̇анд̇хам̣ , маалаагаараабан̣зсу маалам̣ вилумбид̇ваа вилид̇д̇аг̇ад̇д̇аа маалад̇хаарино гад̇аган̣н̣абуураа ваг̇г̇анд̇аа г̇аж̇ж̇анд̇аа абподзнд̇аа яуд̣̇д̇хаман̣д̣алам̣ бависим̣су.
Te aparabhāge vuddhimanvāya thāmabalasampannā kakkhaḷā pharusā hutvā vilopaṃ karontā vicaranti , rañño gacchante paṇṇākārepi vilumpanteva. Manussā sannipatitvā ‘‘andhakaveṇḍadāsaputtā dasa bhātikā raṭṭhaṃ vilumpantī’’ti rājaṅgaṇe upakkosiṃsu. Rājā andhakaveṇḍaṃ pakkosāpetvā ‘‘kasmā puttehi vilopaṃ kārāpesī’’ti tajjesi. Evaṃ dutiyampi tatiyampi manussehi upakkose kate rājā taṃ santajjesi. So maraṇabhayabhīto rājānaṃ abhayaṃ yācitvā ‘‘deva, ete na mayhaṃ puttā, upasāgarassa puttā’’ti taṃ antaraṃ ārocesi. Rājā bhīto ‘‘kena te upāyena gaṇhāmā’’ti amacce pucchitvā ‘‘ete, deva, mallayuddhavittakā, nagare yuddhaṃ kāretvā tattha ne yuddhamaṇḍalaṃ āgate gāhāpetvā māressāmā’’ti vutte cārurañca, muṭṭhikañcāti dve malle posetvā ‘‘ito sattame divase yuddhaṃ bhavissatī’’ti nagare bheriṃ carāpetvā rājaṅgaṇe yuddhamaṇḍalaṃ sajjāpetvā akkhavāṭaṃ kāretvā yuddhamaṇḍalaṃ alaṅkārāpetvā dhajapaṭākaṃ bandhāpesi. Sakalanagaraṃ saṅkhubhi. Cakkāticakkaṃ mañcātimañcaṃ bandhitvā cāruramuṭṭhikā yuddhamaṇḍalaṃ āgantvā vaggantā gajjantā apphoṭentā vicariṃsu. Dasa bhātikāpi āgantvā rajakavīthiṃ vilumpitvā vaṇṇasāṭake nivāsetvā gandhāpaṇesu gandhaṃ , mālākārāpaṇesu mālaṃ vilumpitvā vilittagattā māladhārino katakaṇṇapūrā vaggantā gajjantā apphoṭentā yuddhamaṇḍalaṃ pavisiṃsu.
д̇асмим̣ кан̣з жааруро абподзнд̇о вижарад̇и. б̣алад̣̇зво д̇ам̣ д̣̇исваа ‘‘на нам̣ хад̇т̇зна чубиссаамий’’д̇и хад̇т̇исаалад̇о маханд̇ам̣ хад̇т̇ияод̇д̇ам̣ аахарид̇ваа ваг̇г̇ид̇ваа г̇аж̇ж̇ид̇ваа яод̇д̇ам̣ кибид̇ваа жаарурам̣ уд̣̇арз взтзд̇ваа д̣̇вз яод̇д̇агодияо згад̇о гад̇ваа вад̇д̇зд̇ваа угкибид̇ваа сийсамад̇т̇агз бхамзд̇ваа бхуумияам̣ бот̇зд̇ваа б̣ахи агкаваадз киби. жаарурз мад̇з рааж̇аа мудтигамаллам̣ аан̣аабзси. со удтааяа ваг̇г̇ид̇ваа г̇аж̇ж̇ид̇ваа абподзси. б̣алад̣̇зво д̇ам̣ бот̇зд̇ваа адтийни сан̃жун̣н̣зд̇ваа ‘‘амалломхи, амалломхий’’д̇и вад̣̇анд̇амзва ‘‘наахам̣ д̇ава маллабхаавам̣ ваа амаллабхаавам̣ ваа ж̇аанаамий’’д̇и хад̇т̇з г̇ахзд̇ваа бхуумияам̣ бот̇зд̇ваа ж̇ийвид̇агкаяам̣ баабзд̇ваа б̣ахи агкаваадз киби. мудтиго маранд̇о ‘‘яагко худ̇ваа д̇ам̣ каад̣̇ид̇ум̣ лабхиссаамий’’д̇и бад̇т̇анам̣ бадтабзси. со гааламад̇д̇игаадавияам̣ наама яагко худ̇ваа ниб̣б̣ад̇д̇и. рааж̇аа ‘‘г̇ан̣хат̇а д̣̇аса бхаад̇игз жздагз’’д̇и удтахи . д̇асмим̣ кан̣з ваасуд̣̇зво жаггам̣ киби. д̇ам̣ д̣̇виннамби бхаад̇игаанам̣ сийсаани баад̇зси. махааж̇ано бхийд̇ад̇асид̇о ‘‘авассаяаа но хот̇аа’’д̇и д̇зсам̣ баад̣̇зсу бад̇ид̇ваа нибаж̇ж̇и. д̇з д̣̇взби маад̇улз маарзд̇ваа асид̇ан̃ж̇ананаг̇арз раж̇ж̇ам̣ г̇ахзд̇ваа маад̇аабид̇аро д̇ад̇т̇а гад̇ваа ‘‘сагалаж̇амб̣уд̣̇ийбз раж̇ж̇ам̣ г̇ан̣хиссаамаа’’д̇и нигкамид̇ваа анубуб̣б̣зна гаалаяонагаран̃н̃о ниваасам̣ аяуж̇жханаг̇арам̣ г̇анд̇ваа д̇ам̣ баригкибид̇ваа тид̇ам̣ барикааругкаг̇аханам̣ вид̣̇д̇хам̣сзд̇ваа баагаарам̣ бхинд̣̇ид̇ваа рааж̇аанам̣ г̇ахзд̇ваа д̇ам̣ раж̇ж̇ам̣ ад̇д̇ано хад̇т̇аг̇ад̇ам̣ гад̇ваа д̣̇вааравад̇им̣ баабун̣им̣су. д̇асса бана наг̇арасса згад̇о самуд̣̇д̣̇о згад̇о баб̣б̣ад̇о, амануссабариг̇г̇ахид̇ам̣ гира д̇ам̣ ахоси.
Tasmiṃ khaṇe cāruro apphoṭento vicarati. Baladevo taṃ disvā ‘‘na naṃ hatthena chupissāmī’’ti hatthisālato mahantaṃ hatthiyottaṃ āharitvā vaggitvā gajjitvā yottaṃ khipitvā cāruraṃ udare veṭhetvā dve yottakoṭiyo ekato katvā vattetvā ukkhipitvā sīsamatthake bhametvā bhūmiyaṃ pothetvā bahi akkhavāṭe khipi. Cārure mate rājā muṭṭhikamallaṃ āṇāpesi. So uṭṭhāya vaggitvā gajjitvā apphoṭesi. Baladevo taṃ pothetvā aṭṭhīni sañcuṇṇetvā ‘‘amallomhi, amallomhī’’ti vadantameva ‘‘nāhaṃ tava mallabhāvaṃ vā amallabhāvaṃ vā jānāmī’’ti hatthe gahetvā bhūmiyaṃ pothetvā jīvitakkhayaṃ pāpetvā bahi akkhavāṭe khipi. Muṭṭhiko maranto ‘‘yakkho hutvā taṃ khādituṃ labhissāmī’’ti patthanaṃ paṭṭhapesi. So kālamattikaaṭaviyaṃ nāma yakkho hutvā nibbatti. Rājā ‘‘gaṇhatha dasa bhātike ceṭake’’ti uṭṭhahi . Tasmiṃ khaṇe vāsudevo cakkaṃ khipi. Taṃ dvinnampi bhātikānaṃ sīsāni pātesi. Mahājano bhītatasito ‘‘avassayā no hothā’’ti tesaṃ pādesu patitvā nipajji. Te dvepi mātule māretvā asitañjananagare rajjaṃ gahetvā mātāpitaro tattha katvā ‘‘sakalajambudīpe rajjaṃ gaṇhissāmā’’ti nikkhamitvā anupubbena kālayonakarañño nivāsaṃ ayujjhanagaraṃ gantvā taṃ parikkhipitvā ṭhitaṃ parikhārukkhagahanaṃ viddhaṃsetvā pākāraṃ bhinditvā rājānaṃ gahetvā taṃ rajjaṃ attano hatthagataṃ katvā dvāravatiṃ pāpuṇiṃsu. Tassa pana nagarassa ekato samuddo ekato pabbato, amanussapariggahitaṃ kira taṃ ahosi.
д̇асса аарагкам̣ г̇ахзд̇ваа тид̇аяагко бажжаамид̇д̇з д̣̇исваа г̇ад̣̇рабхавзсзна г̇ад̣̇рабхаравам̣ равад̇и. д̇асмим̣ кан̣з яагкаанубхаавзна сагаланаг̇арам̣ уббад̇ид̇ваа махаасамуд̣̇д̣̇з згасмим̣ д̣̇ийбагз д̇идтад̇и. бажжаамид̇д̇зсу г̇ад̇зсу бунааг̇анд̇ваа сагадтаанзязва бад̇идтаад̇и. д̇ад̣̇ааби со г̇ад̣̇рабхо д̇зсам̣ д̣̇асаннам̣ бхаад̇игаанам̣ ааг̇аманам̣ н̃ад̇ваа г̇ад̣̇рабхаравам̣ рави. наг̇арам̣ уббад̇ид̇ваа д̣̇ийбагз бад̇идтааяа д̇зсу наг̇арам̣ ад̣̇исваа нивад̇д̇анд̇зсу бунааг̇анд̇ваа сагадтаанз бад̇идтааси. д̇з буна нивад̇д̇им̣су, бунаби г̇ад̣̇рабхо д̇ат̇зва агааси. д̇з д̣̇вааравад̇инаг̇арз раж̇ж̇ам̣ г̇ан̣хид̇ум̣ асаггонд̇аа ган̣хад̣̇ийбааяанасса исино санд̇игам̣ г̇анд̇ваа ванд̣̇ид̇ваа ‘‘бханд̇з, маяам̣ д̣̇вааравад̇ияам̣ раж̇ж̇ам̣ г̇ахзд̇ум̣ на саггома, згам̣ но убааяам̣ гарот̇аа’’д̇и бужчид̇ваа ‘‘барикаабидтз асугасмим̣ наама таанз зго г̇ад̣̇рабхо жарад̇и. со хи амид̇д̇з д̣̇исваа виравад̇и, д̇асмим̣ кан̣з наг̇арам̣ уббад̇ид̇ваа г̇ажчад̇и, д̇умхз д̇асса баад̣̇з г̇ан̣хат̇а, аяам̣ во нибпаж̇ж̇ануубааяо’’д̇и вуд̇д̇з д̇аабасам̣ ванд̣̇ид̇ваа г̇анд̇ваа г̇ад̣̇рабхасса баад̣̇зсу г̇ахзд̇ваа нибад̇ид̇ваа ‘‘саами, табзд̇ваа д̇умхз ан̃н̃о амхаагам̣ авассаяо над̇т̇и, амхаагам̣ наг̇арам̣ г̇ан̣ханагаалз маа равид̇т̇аа’’д̇и яаажим̣су. г̇ад̣̇рабхо ‘‘на саггаа на виравид̇ум̣, д̇умхз бана батамад̇арам̣ ааг̇анд̇ваа жад̇д̇ааро ж̇анаа маханд̇аани аяанан̇г̇алаани г̇ахзд̇ваа жад̇уусу наг̇арад̣̇ваарзсу маханд̇з аяакаан̣угз бхуумияам̣ аагодзд̇ваа наг̇арасса уббад̇анагаалз нан̇г̇алаани г̇ахзд̇ваа нан̇г̇алаб̣ад̣̇д̇хам̣ аяасан̇калигам̣ аяакаан̣угз б̣анд̇хзяяаат̇а, наг̇арам̣ уббад̇ид̇ум̣ на сагкиссад̇ий’’д̇и ааха.
Tassa ārakkhaṃ gahetvā ṭhitayakkho paccāmitte disvā gadrabhavesena gadrabharavaṃ ravati. Tasmiṃ khaṇe yakkhānubhāvena sakalanagaraṃ uppatitvā mahāsamudde ekasmiṃ dīpake tiṭṭhati. Paccāmittesu gatesu punāgantvā sakaṭṭhāneyeva patiṭṭhāti. Tadāpi so gadrabho tesaṃ dasannaṃ bhātikānaṃ āgamanaṃ ñatvā gadrabharavaṃ ravi. Nagaraṃ uppatitvā dīpake patiṭṭhāya tesu nagaraṃ adisvā nivattantesu punāgantvā sakaṭṭhāne patiṭṭhāsi. Te puna nivattiṃsu, punapi gadrabho tatheva akāsi. Te dvāravatinagare rajjaṃ gaṇhituṃ asakkontā kaṇhadīpāyanassa isino santikaṃ gantvā vanditvā ‘‘bhante, mayaṃ dvāravatiyaṃ rajjaṃ gahetuṃ na sakkoma, ekaṃ no upāyaṃ karothā’’ti pucchitvā ‘‘parikhāpiṭṭhe asukasmiṃ nāma ṭhāne eko gadrabho carati. So hi amitte disvā viravati, tasmiṃ khaṇe nagaraṃ uppatitvā gacchati, tumhe tassa pāde gaṇhatha, ayaṃ vo nipphajjanūpāyo’’ti vutte tāpasaṃ vanditvā gantvā gadrabhassa pādesu gahetvā nipatitvā ‘‘sāmi, ṭhapetvā tumhe añño amhākaṃ avassayo natthi, amhākaṃ nagaraṃ gaṇhanakāle mā ravitthā’’ti yāciṃsu. Gadrabho ‘‘na sakkā na viravituṃ, tumhe pana paṭhamataraṃ āgantvā cattāro janā mahantāni ayanaṅgalāni gahetvā catūsu nagaradvāresu mahante ayakhāṇuke bhūmiyaṃ ākoṭetvā nagarassa uppatanakāle naṅgalāni gahetvā naṅgalabaddhaṃ ayasaṅkhalikaṃ ayakhāṇuke bandheyyātha, nagaraṃ uppatituṃ na sakkhissatī’’ti āha.
д̇з ‘‘саад̇хуу’’д̇и вад̇ваа д̇асмим̣ авираванд̇зязва нан̇г̇алаани аад̣̇ааяа жад̇уусу наг̇арад̣̇ваарзсу каан̣угз бхуумияам̣ аагодзд̇ваа адтам̣су. д̇асмим̣ кан̣з г̇ад̣̇рабхо вирави, наг̇арам̣ уббад̇ид̇умаарабхи. жад̇уусу д̣̇ваарзсу тид̇аа жад̇уухи аяанан̇г̇алзхи г̇ахзд̇ваа нан̇г̇алаб̣ад̣̇д̇хаа аяасан̇калигаа каан̣угзсу б̣анд̇хим̣су, наг̇арам̣ уббад̇ид̇ум̣ наасагки. д̣̇аса бхаад̇игаа д̇ад̇о наг̇арам̣ бависид̇ваа рааж̇аанам̣ маарзд̇ваа раж̇ж̇ам̣ г̇ан̣хим̣су. звам̣ д̇з сагалаж̇амб̣уд̣̇ийбз д̇зсадтияаа наг̇арасахассзсу саб̣б̣арааж̇аано жаггзна ж̇ийвид̇агкаяам̣ баабзд̇ваа д̣̇вааравад̇ияам̣ васамаанаа раж̇ж̇ам̣ д̣̇аса годтаасз гад̇ваа вибхаж̇им̣су, бхаг̇иним̣ бана ан̃ж̇анад̣̇звим̣ на сарим̣су. д̇ад̇о буна ‘‘згаад̣̇аса годтаасз гаромаа’’д̇и вуд̇д̇з ан̇гуро ‘‘мама годтаасам̣ д̇ассаа д̣̇зт̇а, ахам̣ вохаарам̣ гад̇ваа ж̇ийвиссаами, гзвалам̣ д̇умхз ад̇д̇ано ж̇анабад̣̇з маяхам̣ сун̇гам̣ виссаж̇ж̇зт̇аа’’д̇и ааха. д̇з ‘‘саад̇хуу’’д̇и самбадижчид̇ваа д̇асса годтаасам̣ бхаг̇инияаа д̣̇ад̇ваа сад̣̇д̇хим̣ д̇ааяа нава рааж̇аано д̣̇вааравад̇ияам̣ васим̣су. ан̇гуро бана ван̣иж̇ж̇амагааси. звам̣ д̇зсу абараабарам̣ буд̇д̇ад̇хийд̇аахи вад̣дхамаанзсу ад̣̇д̇хаанз г̇ад̇з маад̇аабид̇аро гааламагам̣су.
Te ‘‘sādhū’’ti vatvā tasmiṃ aviravanteyeva naṅgalāni ādāya catūsu nagaradvāresu khāṇuke bhūmiyaṃ ākoṭetvā aṭṭhaṃsu. Tasmiṃ khaṇe gadrabho viravi, nagaraṃ uppatitumārabhi. Catūsu dvāresu ṭhitā catūhi ayanaṅgalehi gahetvā naṅgalabaddhā ayasaṅkhalikā khāṇukesu bandhiṃsu, nagaraṃ uppatituṃ nāsakkhi. Dasa bhātikā tato nagaraṃ pavisitvā rājānaṃ māretvā rajjaṃ gaṇhiṃsu. Evaṃ te sakalajambudīpe tesaṭṭhiyā nagarasahassesu sabbarājāno cakkena jīvitakkhayaṃ pāpetvā dvāravatiyaṃ vasamānā rajjaṃ dasa koṭṭhāse katvā vibhajiṃsu, bhaginiṃ pana añjanadeviṃ na sariṃsu. Tato puna ‘‘ekādasa koṭṭhāse karomā’’ti vutte aṅkuro ‘‘mama koṭṭhāsaṃ tassā detha, ahaṃ vohāraṃ katvā jīvissāmi, kevalaṃ tumhe attano janapade mayhaṃ suṅkaṃ vissajjethā’’ti āha. Te ‘‘sādhū’’ti sampaṭicchitvā tassa koṭṭhāsaṃ bhaginiyā datvā saddhiṃ tāya nava rājāno dvāravatiyaṃ vasiṃsu. Aṅkuro pana vaṇijjamakāsi. Evaṃ tesu aparāparaṃ puttadhītāhi vaḍḍhamānesu addhāne gate mātāpitaro kālamakaṃsu.
д̇ад̣̇аа гира мануссаанам̣ вийсад̇ивассасахассааяугагаало ахоси. д̇ад̣̇аа ваасуд̣̇звамахаарааж̇асса зго буд̇д̇о гааламагааси. рааж̇аа согабарзд̇о саб̣б̣агижжаани бахааяа ман̃жасса аданим̣ бариг̇г̇ахзд̇ваа вилабанд̇о нибаж̇ж̇и. д̇асмим̣ гаалз гхадабан̣д̣ид̇о жинд̇зси ‘‘табзд̇ваа мам̣ ан̃н̃о гожи мама бхаад̇у согам̣ харид̇ум̣ самад̇т̇о наама над̇т̇и, убааязнасса согам̣ хариссаамий’’д̇и. со уммад̇д̇агавзсам̣ г̇ахзд̇ваа ‘‘сасам̣ мз д̣̇зт̇а, сасам̣ мз д̣̇зт̇аа’’д̇и аагаасам̣ уллогзнд̇о сагаланаг̇арам̣ вижари. ‘‘гхадабан̣д̣ид̇о уммад̇д̇аго ж̇аад̇о’’д̇и сагаланаг̇арам̣ сан̇кубхи. д̇асмим̣ гаалз рохин̣зяяо наама амажжо ваасуд̣̇зваран̃н̃о санд̇игам̣ г̇анд̇ваа д̇зна сад̣̇д̇хим̣ гат̇ам̣ самудтаабзнд̇о батамам̣ г̇аат̇амааха –
Tadā kira manussānaṃ vīsativassasahassāyukakālo ahosi. Tadā vāsudevamahārājassa eko putto kālamakāsi. Rājā sokapareto sabbakiccāni pahāya mañcassa aṭaniṃ pariggahetvā vilapanto nipajji. Tasmiṃ kāle ghaṭapaṇḍito cintesi ‘‘ṭhapetvā maṃ añño koci mama bhātu sokaṃ harituṃ samattho nāma natthi, upāyenassa sokaṃ harissāmī’’ti. So ummattakavesaṃ gahetvā ‘‘sasaṃ me detha, sasaṃ me dethā’’ti ākāsaṃ ullokento sakalanagaraṃ vicari. ‘‘Ghaṭapaṇḍito ummattako jāto’’ti sakalanagaraṃ saṅkhubhi. Tasmiṃ kāle rohiṇeyyo nāma amacco vāsudevarañño santikaṃ gantvā tena saddhiṃ kathaṃ samuṭṭhāpento paṭhamaṃ gāthamāha –
165.
165.
‘‘удтзхи ган̣ха гим̣ сзси, го ад̇т̇о субанзна д̇з;
‘‘Uṭṭhehi kaṇha kiṃ sesi, ko attho supanena te;
яоби д̇уяхам̣ саго бхаад̇аа, хад̣̇аяам̣ жагку жа д̣̇агкин̣ам̣;
Yopi tuyhaṃ sako bhātā, hadayaṃ cakkhu ca dakkhiṇaṃ;
д̇асса ваад̇аа б̣алийяанд̇и, гхадо ж̇аббад̇и гзсаваа’’д̇и.
Tassa vātā balīyanti, ghaṭo jappati kesavā’’ti.
д̇ад̇т̇а ган̣хаад̇и г̇од̇д̇знаалабад̇и, ган̣хааяанаг̇од̇д̇о гирзса. го ад̇т̇од̇и гад̇араа наама вад̣дхи. хад̣̇аяам̣ жагку жа д̣̇агкин̣анд̇и хад̣̇аязна жзва д̣̇агкин̣ажагкунаа жа самаанод̇и ад̇т̇о. д̇асса ваад̇аа б̣алийяанд̇ийд̇и д̇асса хад̣̇аяам̣ абасмаараваад̇аа авад̇т̇аранд̇ийд̇и ад̇т̇о. ж̇аббад̇ийд̇и ‘‘сасам̣ мз д̣̇зт̇аа’’д̇и виббалабад̇и. гзсаваад̇и со гира гзсасобханад̇ааяа ‘‘гзсаваа’’д̇и бан̃н̃ааяид̇т̇а, д̇зна д̇ам̣ наамзнаалабад̇и.
Tattha kaṇhāti gottenālapati, kaṇhāyanagotto kiresa. Ko atthoti katarā nāma vaḍḍhi. Hadayaṃ cakkhu ca dakkhiṇanti hadayena ceva dakkhiṇacakkhunā ca samānoti attho. Tassa vātā balīyantīti tassa hadayaṃ apasmāravātā avattharantīti attho. Jappatīti ‘‘sasaṃ me dethā’’ti vippalapati. Kesavāti so kira kesasobhanatāya ‘‘kesavā’’ti paññāyittha, tena taṃ nāmenālapati.
звам̣ амажжзна вуд̇д̇з д̇асса уммад̇д̇агабхаавам̣ н̃ад̇ваа сад̇т̇аа абхисамб̣уд̣̇д̇хо худ̇ваа д̣̇уд̇ияам̣ г̇аат̇амааха –
Evaṃ amaccena vutte tassa ummattakabhāvaṃ ñatvā satthā abhisambuddho hutvā dutiyaṃ gāthamāha –
166.
166.
‘‘д̇асса д̇ам̣ важанам̣ суд̇ваа, рохин̣зяяасса гзсаво;
‘‘Tassa taṃ vacanaṃ sutvā, rohiṇeyyassa kesavo;
д̇арамаанаруубо вудтааси, бхаад̇усогзна аддид̇о’’д̇и.
Taramānarūpo vuṭṭhāsi, bhātusokena aṭṭito’’ti.
рааж̇аа удтааяа сийгхам̣ баасаад̣̇аа од̇арид̇ваа гхадабан̣д̣ид̇асса санд̇игам̣ г̇анд̇ваа убхосу хад̇т̇зсу д̣̇ал̣хам̣ г̇ахзд̇ваа д̇зна сад̣̇д̇хим̣ саллабанд̇о д̇ад̇ияам̣ г̇аат̇амааха –
Rājā uṭṭhāya sīghaṃ pāsādā otaritvā ghaṭapaṇḍitassa santikaṃ gantvā ubhosu hatthesu daḷhaṃ gahetvā tena saddhiṃ sallapanto tatiyaṃ gāthamāha –
167.
167.
‘‘гим̣ ну уммад̇д̇аруубова, гзвалам̣ д̣̇ваарагам̣ имам̣;
‘‘Kiṃ nu ummattarūpova, kevalaṃ dvārakaṃ imaṃ;
сасо сасод̇и лабаси, го ну д̇з сасамаахарий’’д̇и.
Saso sasoti lapasi, ko nu te sasamāharī’’ti.
д̇ад̇т̇а гзвалам̣ д̣̇ваарагам̣ иманд̇и гасмаа уммад̇д̇аго вияа худ̇ваа сагалам̣ имам̣ д̣̇вааравад̇инаг̇арам̣ вижаранд̇о ‘‘сасо сасо’’д̇и лабаси. го д̇ава сасам̣ хари, гзна д̇з сасо г̇ахид̇од̇и бужчад̇и.
Tattha kevalaṃ dvārakaṃ imanti kasmā ummattako viya hutvā sakalaṃ imaṃ dvāravatinagaraṃ vicaranto ‘‘saso saso’’ti lapasi. Ko tava sasaṃ hari, kena te saso gahitoti pucchati.
со ран̃н̃аа звам̣ вуд̇д̇зби бунаббунам̣ д̇ад̣̇зва важанам̣ вад̣̇ад̇и. рааж̇аа буна д̣̇вз г̇аат̇аа абхааси –
So raññā evaṃ vuttepi punappunaṃ tadeva vacanaṃ vadati. Rājā puna dve gāthā abhāsi –
168.
168.
‘‘сован̣н̣амаяам̣ ман̣иймаяам̣, лохамаяам̣ ат̇а руубияаамаяам̣;
‘‘Sovaṇṇamayaṃ maṇīmayaṃ, lohamayaṃ atha rūpiyāmayaṃ;
сан̇касилаабаваал̣амаяам̣, гаараяиссаами д̇з сасам̣.
Saṅkhasilāpavāḷamayaṃ, kārayissāmi te sasaṃ.
169.
169.
‘‘санд̇и ан̃н̃зби сасагаа, аран̃н̃з ванаг̇ожараа;
‘‘Santi aññepi sasakā, araññe vanagocarā;
д̇зби д̇з аанаяиссаами, гийд̣̇исам̣ сасамижчасий’’д̇и.
Tepi te ānayissāmi, kīdisaṃ sasamicchasī’’ti.
д̇ад̇рааяам̣ сан̇кзбад̇т̇о – д̇зсу суван̣н̣амаяаад̣̇ийсу яам̣ ижчаси, д̇ам̣ вад̣̇а, ахам̣ д̇з гаарзд̇ваа д̣̇ассаами, ат̇ааби д̇з на рожзси, ан̃н̃зби аран̃н̃з ванаг̇ожараа сасагаа ад̇т̇и, д̇зби д̇з аанаяиссаами, вад̣̇а бхад̣̇рамука, гийд̣̇исам̣ сасамижчасийд̇и.
Tatrāyaṃ saṅkhepattho – tesu suvaṇṇamayādīsu yaṃ icchasi, taṃ vada, ahaṃ te kāretvā dassāmi, athāpi te na rocesi, aññepi araññe vanagocarā sasakā atthi, tepi te ānayissāmi, vada bhadramukha, kīdisaṃ sasamicchasīti.
ран̃н̃о гат̇ам̣ суд̇ваа гхадабан̣д̣ид̇о чадтам̣ г̇аат̇амааха –
Rañño kathaṃ sutvā ghaṭapaṇḍito chaṭṭhaṃ gāthamāha –
170.
170.
‘‘на жаахамзд̇з ижчаами, яз сасаа бат̇ависсид̇аа;
‘‘Na cāhamete icchāmi, ye sasā pathavissitā;
жанд̣̇ад̇о сасамижчаами, д̇ам̣ мз охара гзсаваа’’д̇и.
Candato sasamicchāmi, taṃ me ohara kesavā’’ti.
д̇ад̇т̇а охараад̇и од̇аарзхи.
Tattha oharāti otārehi.
рааж̇аа д̇асса гат̇ам̣ суд̇ваа ‘‘ниссам̣саяам̣ мз бхаад̇аа уммад̇д̇агова ж̇аад̇о’’д̇и д̣̇оманассаббад̇д̇о сад̇д̇амам̣ г̇аат̇амааха –
Rājā tassa kathaṃ sutvā ‘‘nissaṃsayaṃ me bhātā ummattakova jāto’’ti domanassappatto sattamaṃ gāthamāha –
171.
171.
‘‘со нууна мад̇хурам̣ н̃аад̇и, ж̇ийвид̇ам̣ виж̇ахиссаси;
‘‘So nūna madhuraṃ ñāti, jīvitaṃ vijahissasi;
абад̇т̇ияам̣ яо бад̇т̇аяаси, жанд̣̇ад̇о сасамижчасий’’д̇и.
Apatthiyaṃ yo patthayasi, candato sasamicchasī’’ti.
д̇ад̇т̇а н̃аад̇ийд̇и ганидтам̣ аалабанд̇о ааха. ид̣̇ам̣ вуд̇д̇ам̣ ход̇и – ‘‘д̇аад̇а, маяхам̣ бияан̃аад̇и со д̇вам̣ нууна ад̇имад̇хурам̣ ад̇д̇ано ж̇ийвид̇ам̣ виж̇ахиссаси, яо абад̇т̇зд̇аб̣б̣ам̣ бад̇т̇аяасий’’д̇и.
Tattha ñātīti kaniṭṭhaṃ ālapanto āha. Idaṃ vuttaṃ hoti – ‘‘tāta, mayhaṃ piyañāti so tvaṃ nūna atimadhuraṃ attano jīvitaṃ vijahissasi, yo apatthetabbaṃ patthayasī’’ti.
гхадабан̣д̣ид̇о ран̃н̃о важанам̣ суд̇ваа нижжало тад̇ваа ‘‘бхаад̇ига, д̇вам̣ жанд̣̇ад̇о сасагам̣ бад̇т̇знд̇асса д̇ам̣ алабхид̇ваа ж̇ийвид̇агкаяабхаавам̣ ж̇аананд̇о гим̣ гааран̣аа мад̇абуд̇д̇ам̣ анусожасий’’д̇и вад̇ваа адтамам̣ г̇аат̇амааха –
Ghaṭapaṇḍito rañño vacanaṃ sutvā niccalo ṭhatvā ‘‘bhātika, tvaṃ candato sasakaṃ patthentassa taṃ alabhitvā jīvitakkhayabhāvaṃ jānanto kiṃ kāraṇā mataputtaṃ anusocasī’’ti vatvā aṭṭhamaṃ gāthamāha –
172.
172.
‘‘звам̣ жз ган̣ха ж̇аанааси, яад̣̇ан̃н̃аманусаасаси;
‘‘Evaṃ ce kaṇha jānāsi, yadaññamanusāsasi;
гасмаа бурз мад̇ам̣ буд̇д̇ам̣, аж̇ж̇ааби манусожасий’’д̇и.
Kasmā pure mataṃ puttaṃ, ajjāpi manusocasī’’ti.
д̇ад̇т̇а званд̇и ид̣̇ам̣ алаб̣бханзяяадтаанам̣ наама на бад̇т̇зд̇аб̣б̣анд̇и яад̣̇и звам̣ ж̇аанааси. яад̣̇ан̃н̃аманусаасасийд̇и звам̣ ж̇аананд̇ова яад̣̇и ан̃н̃ам̣ анусаасасийд̇и ад̇т̇о. бурзд̇и ат̇а гасмаа ид̇о жад̇умаасамад̇т̇агз мад̇абуд̇д̇ам̣ аж̇ж̇ааби анусожасийд̇и вад̣̇ад̇и.
Tattha evanti idaṃ alabbhaneyyaṭṭhānaṃ nāma na patthetabbanti yadi evaṃ jānāsi. Yadaññamanusāsasīti evaṃ jānantova yadi aññaṃ anusāsasīti attho. Pureti atha kasmā ito catumāsamatthake mataputtaṃ ajjāpi anusocasīti vadati.
звам̣ со анд̇аравийт̇ияам̣ тид̇агова ‘‘бхаад̇ига, ахам̣ д̇аава бан̃н̃ааяамаанам̣ бад̇т̇зми, д̇вам̣ бана абан̃н̃ааяамаанасса сожасий’’д̇и вад̇ваа д̇асса д̇хаммам̣ д̣̇зсзнд̇о буна д̣̇вз г̇аат̇аа абхааси –
Evaṃ so antaravīthiyaṃ ṭhitakova ‘‘bhātika, ahaṃ tāva paññāyamānaṃ patthemi, tvaṃ pana apaññāyamānassa socasī’’ti vatvā tassa dhammaṃ desento puna dve gāthā abhāsi –
173.
173.
‘‘яам̣ на лаб̣бхаа мануссзна, амануссзна ваа буна;
‘‘Yaṃ na labbhā manussena, amanussena vā puna;
ж̇аад̇о мз маа марий буд̇д̇о, гуд̇о лаб̣бхаа алаб̣бхияам̣.
Jāto me mā marī putto, kuto labbhā alabbhiyaṃ.
174.
174.
‘‘на манд̇аа муулабхзсаж̇ж̇аа, осад̇хзхи д̇ханзна ваа;
‘‘Na mantā mūlabhesajjā, osadhehi dhanena vā;
саггаа аанаяид̇ум̣ ган̣ха, яам̣ бзд̇аманусожасий’’д̇и.
Sakkā ānayituṃ kaṇha, yaṃ petamanusocasī’’ti.
д̇ад̇т̇а яанд̇и бхаад̇ига яам̣ звам̣ ж̇аад̇о мз буд̇д̇о маа марийд̇и мануссзна ваа д̣̇звзна ваа буна на лаб̣бхаа на саггаа лад̣̇д̇хум̣, д̇ам̣ д̇вам̣ бад̇т̇зси, д̇ад̣̇зд̇ам̣ гуд̇о лаб̣бхаа гзна гааран̣зна саггаа лад̣̇д̇хум̣, на саггаад̇и д̣̇ийбзд̇и. гасмаа? яасмаа алаб̣бхияам̣, алаб̣бханзяяадтаанан̃хи наамзд̇анд̇и ад̇т̇о. манд̇аад̇и манд̇абаяог̇зна. муулабхзсаж̇ж̇аад̇и муулабхзсаж̇ж̇зна. осад̇хзхийд̇и наанаавид̇хосад̇хзхи. д̇ханзна ваад̇и годисад̇асан̇кязнаби д̇ханзна ваа. ид̣̇ам̣ вуд̇д̇ам̣ ход̇и – ‘‘яам̣ д̇вам̣ бзд̇аманусожаси, д̇ам̣ зд̇зхи манд̇абаяог̇аад̣̇ийхи аанзд̇ум̣ на саггаа’’д̇и.
Tattha yanti bhātika yaṃ evaṃ jāto me putto mā marīti manussena vā devena vā puna na labbhā na sakkā laddhuṃ, taṃ tvaṃ patthesi, tadetaṃ kuto labbhā kena kāraṇena sakkā laddhuṃ, na sakkāti dīpeti. Kasmā? Yasmā alabbhiyaṃ, alabbhaneyyaṭṭhānañhi nāmetanti attho. Mantāti mantapayogena. Mūlabhesajjāti mūlabhesajjena. Osadhehīti nānāvidhosadhehi. Dhanena vāti koṭisatasaṅkhyenapi dhanena vā. Idaṃ vuttaṃ hoti – ‘‘yaṃ tvaṃ petamanusocasi, taṃ etehi mantapayogādīhi ānetuṃ na sakkā’’ti.
рааж̇аа д̇ам̣ суд̇ваа ‘‘яуд̇д̇ам̣, д̇аад̇а, саллагкид̇ам̣ мз, мама согахаран̣ад̇т̇ааяа д̇аяаа ид̣̇ам̣ гад̇а’’нд̇и гхадабан̣д̣ид̇ам̣ ван̣н̣знд̇о жад̇ассо г̇аат̇аа абхааси –
Rājā taṃ sutvā ‘‘yuttaṃ, tāta, sallakkhitaṃ me, mama sokaharaṇatthāya tayā idaṃ kata’’nti ghaṭapaṇḍitaṃ vaṇṇento catasso gāthā abhāsi –
175.
175.
‘‘яасса зд̇аад̣̇исаа ассу, амажжаа бурисабан̣д̣ид̇аа;
‘‘Yassa etādisā assu, amaccā purisapaṇḍitā;
яат̇аа ниж̇жхаабаяз аж̇ж̇а, гхадо бурисабан̣д̣ид̇о.
Yathā nijjhāpaye ajja, ghaṭo purisapaṇḍito.
176.
176.
‘‘аад̣̇ид̇д̇ам̣ вад̇а мам̣ санд̇ам̣, гхад̇асид̇д̇ам̣ва баавагам̣;
‘‘Ādittaṃ vata maṃ santaṃ, ghatasittaṃva pāvakaṃ;
вааринаа вияа осин̃жам̣, саб̣б̣ам̣ ниб̣б̣аабаяз д̣̇арам̣.
Vārinā viya osiñcaṃ, sabbaṃ nibbāpaye daraṃ.
177.
177.
‘‘аб̣б̣ахий вад̇а мз саллам̣, яамааси хад̣̇аяассид̇ам̣;
‘‘Abbahī vata me sallaṃ, yamāsi hadayassitaṃ;
яо мз согабарзд̇асса, буд̇д̇асогам̣ абаануд̣̇и.
Yo me sokaparetassa, puttasokaṃ apānudi.
178.
178.
‘‘сохам̣ аб̣б̣уул̣хасаллосми, вийд̇асого анаавило;
‘‘Sohaṃ abbūḷhasallosmi, vītasoko anāvilo;
на сожаами на род̣̇аами, д̇ава суд̇ваана маан̣аваа’’д̇и.
Na socāmi na rodāmi, tava sutvāna māṇavā’’ti.
д̇ад̇т̇а батамаг̇аат̇ааяа сан̇кзбад̇т̇о – яат̇аа язна гааран̣зна аж̇ж̇а мам̣ буд̇д̇асогабарзд̇ам̣ гхадо бурисабан̣д̣ид̇о согахаран̣ад̇т̇ааяа ниж̇жхаабаяз ниж̇жхаабзси б̣од̇хзси. яасса ан̃н̃ассаби зд̇аад̣̇исаа бурисабан̣д̣ид̇аа амажжаа ассу, д̇асса гуд̇о согод̇и. сзсаг̇аат̇аа вуд̇д̇ад̇т̇ааязва.
Tattha paṭhamagāthāya saṅkhepattho – yathā yena kāraṇena ajja maṃ puttasokaparetaṃ ghaṭo purisapaṇḍito sokaharaṇatthāya nijjhāpaye nijjhāpesi bodhesi. Yassa aññassapi etādisā purisapaṇḍitā amaccā assu, tassa kuto sokoti. Sesagāthā vuttatthāyeva.
авасаанз –
Avasāne –
179.
179.
‘‘звам̣ гаронд̇и саббан̃н̃аа, яз хонд̇и анугамбагаа;
‘‘Evaṃ karonti sappaññā, ye honti anukampakā;
нивад̇д̇аяанд̇и согамхаа, гхадо ж̇здтам̣ва бхаад̇ара’’нд̇и. –
Nivattayanti sokamhā, ghaṭo jeṭṭhaṃva bhātara’’nti. –
аяам̣ абхисамб̣уд̣̇д̇хаг̇аат̇аа уд̇д̇аанад̇т̇ааязва.
Ayaṃ abhisambuddhagāthā uttānatthāyeva.
звам̣ гхадагумаарзна вийд̇асогз гад̇з ваасуд̣̇звз раж̇ж̇ам̣ анусаасанд̇з д̣̇ийгхасса ад̣̇д̇хуно ажжаязна д̣̇асабхаад̇игабуд̇д̇аа гумаараа жинд̇аяим̣су ‘‘ган̣хад̣̇ийбааяанам̣ ‘д̣̇иб̣б̣ажагкуго’д̇и вад̣̇анд̇и, виймам̣сиссаама д̇аава на’’нд̇и. д̇з згам̣ д̣̇ахарагумаарам̣ алан̇гарид̇ваа г̇аб̣бхиниаагаарзна д̣̇ассзд̇ваа уд̣̇арз масуурагам̣ б̣анд̇хид̇ваа д̇асса санд̇игам̣ нзд̇ваа ‘‘бханд̇з, аяам̣ гумааригаа гим̣ виж̇ааяиссад̇ий’’д̇и бужчим̣су. д̇аабасо ‘‘д̣̇асабхаад̇игарааж̇уунам̣ винаасагаало бад̇д̇о, маяхам̣ ну ко ааяусан̇кааро гийд̣̇исо ход̇ий’’д̇и ологзнд̇о ‘‘аж̇ж̇зва маран̣ам̣ бхависсад̇ий’’д̇и н̃ад̇ваа ‘‘гумаараа иминаа д̇умхаагам̣ го ад̇т̇о’’д̇и вад̇ваа ‘‘гат̇зт̇зва но, бханд̇з’’д̇и ниб̣ад̣̇д̇хо ‘‘аяам̣ ид̇о сад̇д̇амз д̣̇ивасз кад̣̇ирагхадигам̣ виж̇ааяиссад̇и, д̇ааяа ваасуд̣̇звагулам̣ нассиссад̇и, абижа ко бана д̇умхз д̇ам̣ кад̣̇ирагхадигам̣ г̇ахзд̇ваа жхаабзд̇ваа чааригам̣ над̣̇ияам̣ багкибзяяаат̇аа’’д̇и ааха. ат̇а нам̣ д̇з ‘‘гуудаж̇адила, бурисо виж̇ааяанаго наама над̇т̇ий’’д̇и вад̇ваа д̇анд̇араж̇ж̇угам̣ наама гаммагаран̣ам̣ гад̇ваа д̇ад̇т̇зва ж̇ийвид̇агкаяам̣ баабаяим̣су. рааж̇аано гумаарз баггосаабзд̇ваа ‘‘гим̣ гааран̣аа д̇аабасам̣ маараяид̇т̇аа’’д̇и бужчид̇ваа саб̣б̣ам̣ суд̇ваа бхийд̇аа д̇асса аарагкам̣ д̣̇ад̇ваа сад̇д̇амз д̣̇ивасз д̇асса гужчид̇о нигканд̇ам̣ кад̣̇ирагхадигам̣ жхаабзд̇ваа чааригам̣ над̣̇ияам̣ кибим̣су. саа над̣̇ияаа вуяхамаанаа мукад̣̇ваарз згабассз лаг̇г̇и, д̇ад̇о зрагам̣ ниб̣б̣ад̇д̇и.
Evaṃ ghaṭakumārena vītasoke kate vāsudeve rajjaṃ anusāsante dīghassa addhuno accayena dasabhātikaputtā kumārā cintayiṃsu ‘‘kaṇhadīpāyanaṃ ‘dibbacakkhuko’ti vadanti, vīmaṃsissāma tāva na’’nti. Te ekaṃ daharakumāraṃ alaṅkaritvā gabbhiniākārena dassetvā udare masūrakaṃ bandhitvā tassa santikaṃ netvā ‘‘bhante, ayaṃ kumārikā kiṃ vijāyissatī’’ti pucchiṃsu. Tāpaso ‘‘dasabhātikarājūnaṃ vināsakālo patto, mayhaṃ nu kho āyusaṅkhāro kīdiso hotī’’ti olokento ‘‘ajjeva maraṇaṃ bhavissatī’’ti ñatvā ‘‘kumārā iminā tumhākaṃ ko attho’’ti vatvā ‘‘kathetheva no, bhante’’ti nibaddho ‘‘ayaṃ ito sattame divase khadiraghaṭikaṃ vijāyissati, tāya vāsudevakulaṃ nassissati, apica kho pana tumhe taṃ khadiraghaṭikaṃ gahetvā jhāpetvā chārikaṃ nadiyaṃ pakkhipeyyāthā’’ti āha. Atha naṃ te ‘‘kūṭajaṭila, puriso vijāyanako nāma natthī’’ti vatvā tantarajjukaṃ nāma kammakaraṇaṃ katvā tattheva jīvitakkhayaṃ pāpayiṃsu. Rājāno kumāre pakkosāpetvā ‘‘kiṃ kāraṇā tāpasaṃ mārayitthā’’ti pucchitvā sabbaṃ sutvā bhītā tassa ārakkhaṃ datvā sattame divase tassa kucchito nikkhantaṃ khadiraghaṭikaṃ jhāpetvā chārikaṃ nadiyaṃ khipiṃsu. Sā nadiyā vuyhamānā mukhadvāre ekapasse laggi, tato erakaṃ nibbatti.
ат̇згад̣̇ивасам̣ д̇з рааж̇аано ‘‘самуд̣̇д̣̇агийл̣ам̣ гийл̣иссаамаа’’д̇и мукад̣̇ваарам̣ г̇анд̇ваа махааман̣д̣абам̣ гаараабзд̇ваа алан̇гад̇аман̣д̣абз каад̣̇анд̇аа биванд̇аа гийл̣аавасзнзва бавад̇д̇ахад̇т̇абаад̣̇абараамаасаа д̣̇вид̇хаа бхиж̇ж̇ид̇ваа махаагалахам̣ гарим̣су. ат̇зго ан̃н̃ам̣ муг̇г̇арам̣ алабханд̇о зрагаванад̇о згам̣ зрагабад̇д̇ам̣ г̇ан̣хи. д̇ам̣ г̇ахид̇амад̇д̇амзва кад̣̇ирамусалам̣ ахоси. со д̇зна махааж̇анам̣ бот̇зси . ат̇ан̃н̃зхи саб̣б̣зхи г̇ахид̇аг̇ахид̇ам̣ кад̣̇ирамусаламзва ахоси. д̇з ан̃н̃аман̃н̃ам̣ бахарид̇ваа махаавинаасам̣ баабун̣им̣су. д̇зсу махаавинаасам̣ винассанд̇зсу ваасуд̣̇зво жа б̣алад̣̇зво жа бхаг̇иний ан̃ж̇анад̣̇звий жа бурохид̇о жаад̇и жад̇д̇ааро ж̇анаа рат̇ам̣ абхирухид̇ваа балааяим̣су, сзсаа саб̣б̣зби винадтаа. д̇зби жад̇д̇ааро рат̇зна балааяанд̇аа гаал̣амад̇д̇игаадавим̣ баабун̣им̣су. со хи мудтигамалло бад̇т̇анам̣ гад̇ваа яагко худ̇ваа д̇ад̇т̇а ниб̣б̣ад̇д̇о б̣алад̣̇звасса ааг̇ад̇абхаавам̣ н̃ад̇ваа д̇ад̇т̇а г̇аамам̣ маабзд̇ваа маллавзсам̣ г̇ахзд̇ваа ‘‘го яуж̇жхид̇угаамо’’д̇и ваг̇г̇анд̇о г̇аж̇ж̇анд̇о абподзнд̇о вижари. б̣алад̣̇зво д̇ам̣ д̣̇исваава ‘‘бхаад̇ига, ахам̣ иминаа сад̣̇д̇хим̣ яуж̇жхиссаамий’’д̇и вад̇ваа ваасуд̣̇звз ваарзнд̇зязва рат̇аа оруяха д̇асса санд̇игам̣ г̇анд̇ваа ваг̇г̇анд̇о г̇аж̇ж̇анд̇о абподзси. ат̇а нам̣ со басаарид̇ахад̇т̇зязва г̇ахзд̇ваа муулаганд̣̇ам̣ вияа каад̣̇и. ваасуд̣̇зво д̇асса мад̇абхаавам̣ н̃ад̇ваа бхаг̇инин̃жа бурохид̇ан̃жа аад̣̇ааяа саб̣б̣арад̇д̇им̣ г̇анд̇ваа суурияод̣̇аяз згам̣ бажжанд̇аг̇аамам̣ бад̇ваа ‘‘аахаарам̣ бажид̇ваа аахарат̇аа’’д̇и бхаг̇инин̃жа бурохид̇ан̃жа г̇аамам̣ бахин̣ид̇ваа саяам̣ згасмим̣ г̇ажчанд̇арз бадижчанно нибаж̇ж̇и.
Athekadivasaṃ te rājāno ‘‘samuddakīḷaṃ kīḷissāmā’’ti mukhadvāraṃ gantvā mahāmaṇḍapaṃ kārāpetvā alaṅkatamaṇḍape khādantā pivantā kīḷāvaseneva pavattahatthapādaparāmāsā dvidhā bhijjitvā mahākalahaṃ kariṃsu. Atheko aññaṃ muggaraṃ alabhanto erakavanato ekaṃ erakapattaṃ gaṇhi. Taṃ gahitamattameva khadiramusalaṃ ahosi. So tena mahājanaṃ pothesi . Athaññehi sabbehi gahitagahitaṃ khadiramusalameva ahosi. Te aññamaññaṃ paharitvā mahāvināsaṃ pāpuṇiṃsu. Tesu mahāvināsaṃ vinassantesu vāsudevo ca baladevo ca bhaginī añjanadevī ca purohito cāti cattāro janā rathaṃ abhiruhitvā palāyiṃsu, sesā sabbepi vinaṭṭhā. Tepi cattāro rathena palāyantā kāḷamattikaaṭaviṃ pāpuṇiṃsu. So hi muṭṭhikamallo patthanaṃ katvā yakkho hutvā tattha nibbatto baladevassa āgatabhāvaṃ ñatvā tattha gāmaṃ māpetvā mallavesaṃ gahetvā ‘‘ko yujjhitukāmo’’ti vagganto gajjanto apphoṭento vicari. Baladevo taṃ disvāva ‘‘bhātika, ahaṃ iminā saddhiṃ yujjhissāmī’’ti vatvā vāsudeve vārenteyeva rathā oruyha tassa santikaṃ gantvā vagganto gajjanto apphoṭesi. Atha naṃ so pasāritahattheyeva gahetvā mūlakandaṃ viya khādi. Vāsudevo tassa matabhāvaṃ ñatvā bhaginiñca purohitañca ādāya sabbarattiṃ gantvā sūriyodaye ekaṃ paccantagāmaṃ patvā ‘‘āhāraṃ pacitvā āharathā’’ti bhaginiñca purohitañca gāmaṃ pahiṇitvā sayaṃ ekasmiṃ gacchantare paṭicchanno nipajji.
ат̇а нам̣ ж̇араа наама зго луд̣̇д̣̇аго г̇ажчам̣ жаланд̇ам̣ д̣̇исваа ‘‘суугаро зд̇т̇а бхависсад̇ий’’д̇и сан̃н̃ааяа сад̇д̇им̣ кибид̇ваа баад̣̇з виж̇жхид̇ваа ‘‘го мам̣ виж̇жхий’’д̇и вуд̇д̇з мануссасса вид̣̇д̇хабхаавам̣ н̃ад̇ваа бхийд̇о балааяид̇ум̣ аарабхи . рааж̇аа сад̇им̣ бажжубадтабзд̇ваа удтааяа ‘‘маад̇ула, маа бхааяи, зхий’’д̇и баггосид̇ваа ааг̇ад̇ам̣ ‘‘госи наама д̇ва’’нд̇и бужчид̇ваа ‘‘ахам̣ саами, ж̇араа наамаа’’д̇и вуд̇д̇з ‘‘ж̇арааяа вид̣̇д̇хо мариссад̇ийд̇и гира мам̣ бораан̣аа б̣яаагарим̣су, ниссам̣саяам̣ аж̇ж̇а маяаа марид̇аб̣б̣а’’нд̇и н̃ад̇ваа ‘‘маад̇ула, маа бхааяи, зхи бахаарам̣ мз б̣анд̇хаа’’д̇и д̇зна бахаарамукам̣ б̣анд̇хаабзд̇ваа д̇ам̣ уяяож̇зси. б̣алававзд̣̇анаа бавад̇д̇им̣су, ид̇арзхи аабхад̇ам̣ аахаарам̣ барибхун̃ж̇ид̇ум̣ наасагки. ат̇а д̇з ааманд̇зд̇ваа ‘‘аж̇ж̇а ахам̣ мариссаами, д̇умхз бана сукумаалаа ан̃н̃ам̣ гаммам̣ гад̇ваа ж̇ийвид̇ум̣ на сагкиссат̇а, имам̣ виж̇ж̇ам̣ сигкат̇аа’’д̇и згам̣ виж̇ж̇ам̣ сигкаабзд̇ваа д̇з уяяож̇зд̇ваа д̇ад̇т̇зва ж̇ийвид̇агкаяам̣ баабун̣и. звам̣ ан̃ж̇анад̣̇звим̣ табзд̇ваа саб̣б̣зва винаасам̣ баабун̣им̣сууд̇и.
Atha naṃ jarā nāma eko luddako gacchaṃ calantaṃ disvā ‘‘sūkaro ettha bhavissatī’’ti saññāya sattiṃ khipitvā pāde vijjhitvā ‘‘ko maṃ vijjhī’’ti vutte manussassa viddhabhāvaṃ ñatvā bhīto palāyituṃ ārabhi . Rājā satiṃ paccupaṭṭhapetvā uṭṭhāya ‘‘mātula, mā bhāyi, ehī’’ti pakkositvā āgataṃ ‘‘kosi nāma tva’’nti pucchitvā ‘‘ahaṃ sāmi, jarā nāmā’’ti vutte ‘‘jarāya viddho marissatīti kira maṃ porāṇā byākariṃsu, nissaṃsayaṃ ajja mayā maritabba’’nti ñatvā ‘‘mātula, mā bhāyi, ehi pahāraṃ me bandhā’’ti tena pahāramukhaṃ bandhāpetvā taṃ uyyojesi. Balavavedanā pavattiṃsu, itarehi ābhataṃ āhāraṃ paribhuñjituṃ nāsakkhi. Atha te āmantetvā ‘‘ajja ahaṃ marissāmi, tumhe pana sukhumālā aññaṃ kammaṃ katvā jīvituṃ na sakkhissatha, imaṃ vijjaṃ sikkhathā’’ti ekaṃ vijjaṃ sikkhāpetvā te uyyojetvā tattheva jīvitakkhayaṃ pāpuṇi. Evaṃ añjanadeviṃ ṭhapetvā sabbeva vināsaṃ pāpuṇiṃsūti.
сад̇т̇аа имам̣ д̇хаммад̣̇зсанам̣ аахарид̇ваа ‘‘убаасага, звам̣ бораан̣агабан̣д̣ид̇аа бан̣д̣ид̇аанам̣ гат̇ам̣ суд̇ваа ад̇д̇ано буд̇д̇асогам̣ харим̣су, маа жинд̇аяий’’д̇и вад̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз убаасаго сод̇аабад̇д̇ипалз бад̇идтахи. д̇ад̣̇аа рохин̣зяяо аананд̣̇о ахоси, ваасуд̣̇зво саарибуд̇д̇о, авасзсаа б̣уд̣̇д̇хабарисаа, гхадабан̣д̣ид̇о бана ахамзва ахосинд̇и.
Satthā imaṃ dhammadesanaṃ āharitvā ‘‘upāsaka, evaṃ porāṇakapaṇḍitā paṇḍitānaṃ kathaṃ sutvā attano puttasokaṃ hariṃsu, mā cintayī’’ti vatvā saccāni pakāsetvā jātakaṃ samodhānesi, saccapariyosāne upāsako sotāpattiphale patiṭṭhahi. Tadā rohiṇeyyo ānando ahosi, vāsudevo sāriputto, avasesā buddhaparisā, ghaṭapaṇḍito pana ahameva ahosinti.
гхадабан̣д̣ид̇аж̇аад̇агаван̣н̣анаа сол̣асамаа.
Ghaṭapaṇḍitajātakavaṇṇanā soḷasamā.
ид̇и сол̣асаж̇аад̇агабадиман̣д̣ид̇асса
Iti soḷasajātakapaṭimaṇḍitassa
д̣̇асаганибаад̇аж̇аад̇агасса ад̇т̇аван̣н̣анаа нидтид̇аа.
Dasakanipātajātakassa atthavaṇṇanā niṭṭhitā.
ж̇аад̇агуд̣̇д̣̇аанам̣ –
Jātakuddānaṃ –
жад̇уд̣̇вааро ган̣хубосо, сан̇ка б̣од̇хи д̣̇ийбааяано;
Catudvāro kaṇhuposo, saṅkha bodhi dīpāyano;
ниг̇род̇ха д̇аггала д̇хамма-баало гуггуда гун̣д̣алий;
Nigrodha takkala dhamma-pālo kukkuṭa kuṇḍalī;
б̣илаара жагга бхуури жа, ман̇г̇ала гхада сол̣аса.
Bilāra cakka bhūri ca, maṅgala ghaṭa soḷasa.
д̣̇асаганибаад̇аван̣н̣анаа нидтид̇аа.
Dasakanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 454. гхадабан̣д̣ид̇аж̇аад̇агам̣ • 454. Ghaṭapaṇḍitajātakaṃ
