| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. ঘটসুত্তং
3. Ghaṭasuttaṃ
২৩৭. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা চ সারিপুত্তো আযস্মা চ মহামোগ্গল্লানো রাজগহে ৰিহরন্তি ৰেল়ুৰনে কলন্দকনিৰাপে একৰিহারে। অথ খো আযস্মা সারিপুত্তো সাযন্হসমযং পটিসল্লানা ৰুট্ঠিতো যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মতা মহামোগ্গল্লানেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো আযস্মা সারিপুত্তো আযস্মন্তং মহামোগ্গল্লানং এতদৰোচ –
237. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā ca sāriputto āyasmā ca mahāmoggallāno rājagahe viharanti veḷuvane kalandakanivāpe ekavihāre. Atha kho āyasmā sāriputto sāyanhasamayaṃ paṭisallānā vuṭṭhito yenāyasmā mahāmoggallāno tenupasaṅkami; upasaṅkamitvā āyasmatā mahāmoggallānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā sāriputto āyasmantaṃ mahāmoggallānaṃ etadavoca –
‘‘ৰিপ্পসন্নানি খো তে, আৰুসো মোগ্গল্লান, ইন্দ্রিযানি; পরিসুদ্ধো মুখৰণ্ণো পরিযোদাতো সন্তেন নূনাযস্মা মহামোগ্গল্লানো অজ্জ ৰিহারেন ৰিহাসী’’তি। ‘‘ওল়ারিকেন খ্ৰাহং, আৰুসো, অজ্জ ৰিহারেন ৰিহাসিং। অপি চ, মে অহোসি ধম্মী কথা’’তি। ‘‘কেন সদ্ধিং পনাযস্মতো মহামোগ্গল্লানস্স অহোসি ধম্মী কথা’’তি? ‘‘ভগৰতা খো মে, আৰুসো, সদ্ধিং অহোসি ধম্মী কথা’’তি। ‘‘দূরে খো, আৰুসো, ভগৰা এতরহি সাৰত্থিযং ৰিহরতি জেতৰনে অনাথপিণ্ডিকস্স আরামে। কিং নু খো, আযস্মা, মহামোগ্গল্লানো ভগৰন্তং ইদ্ধিযা উপসঙ্কমি; উদাহু ভগৰা আযস্মন্তং মহামোগ্গল্লানং ইদ্ধিযা উপসঙ্কমী’’তি? ‘‘ন খ্ৰাহং, আৰুসো, ভগৰন্তং ইদ্ধিযা উপসঙ্কমিং; নপি মং ভগৰা ইদ্ধিযা উপসঙ্কমি। অপি চ, মে যাৰতা ভগৰা এত্তাৰতা দিব্বচক্খু ৰিসুজ্ঝি দিব্বা চ সোতধাতু। ভগৰতোপি যাৰতাহং এত্তাৰতা দিব্বচক্খু ৰিসুজ্ঝি দিব্বা চ সোতধাতূ’’তি। ‘‘যথাকথং পনাযস্মতো মহামোগ্গল্লানস্স ভগৰতা সদ্ধিং অহোসি ধম্মী কথা’’তি?
‘‘Vippasannāni kho te, āvuso moggallāna, indriyāni; parisuddho mukhavaṇṇo pariyodāto santena nūnāyasmā mahāmoggallāno ajja vihārena vihāsī’’ti. ‘‘Oḷārikena khvāhaṃ, āvuso, ajja vihārena vihāsiṃ. Api ca, me ahosi dhammī kathā’’ti. ‘‘Kena saddhiṃ panāyasmato mahāmoggallānassa ahosi dhammī kathā’’ti? ‘‘Bhagavatā kho me, āvuso, saddhiṃ ahosi dhammī kathā’’ti. ‘‘Dūre kho, āvuso, bhagavā etarahi sāvatthiyaṃ viharati jetavane anāthapiṇḍikassa ārāme. Kiṃ nu kho, āyasmā, mahāmoggallāno bhagavantaṃ iddhiyā upasaṅkami; udāhu bhagavā āyasmantaṃ mahāmoggallānaṃ iddhiyā upasaṅkamī’’ti? ‘‘Na khvāhaṃ, āvuso, bhagavantaṃ iddhiyā upasaṅkamiṃ; napi maṃ bhagavā iddhiyā upasaṅkami. Api ca, me yāvatā bhagavā ettāvatā dibbacakkhu visujjhi dibbā ca sotadhātu. Bhagavatopi yāvatāhaṃ ettāvatā dibbacakkhu visujjhi dibbā ca sotadhātū’’ti. ‘‘Yathākathaṃ panāyasmato mahāmoggallānassa bhagavatā saddhiṃ ahosi dhammī kathā’’ti?
‘‘ইধাহং, আৰুসো, ভগৰন্তং এতদৰোচং – ‘আরদ্ধৰীরিযো আরদ্ধৰীরিযোতি, ভন্তে, ৰুচ্চতি। কিত্তাৰতা নু খো, ভন্তে, আরদ্ধৰীরিযো হোতী’তি? এৰং ৰুত্তে, মং, আৰুসো, ভগৰা এতদৰোচ – ‘ইধ, মোগ্গল্লান, ভিক্খু আরদ্ধৰীরিযো ৰিহরতি – কামং তচো চ ন্হারু চ অট্ঠী চ অৰসিস্সতু, সরীরে উপসুস্সতু মংসলোহিতং, যং তং পুরিসথামেন পুরিসৰীরিযেন পুরিসপরক্কমেন পত্তব্বং ন তং অপাপুণিত্ৰা ৰীরিযস্স সণ্ঠানং ভৰিস্সতীতি। এৰং খো, মোগ্গল্লান, আরদ্ধৰীরিযো হোতী’তি। এৰং খো মে, আৰুসো, ভগৰতা সদ্ধিং অহোসি ধম্মী কথা’’তি।
‘‘Idhāhaṃ, āvuso, bhagavantaṃ etadavocaṃ – ‘āraddhavīriyo āraddhavīriyoti, bhante, vuccati. Kittāvatā nu kho, bhante, āraddhavīriyo hotī’ti? Evaṃ vutte, maṃ, āvuso, bhagavā etadavoca – ‘idha, moggallāna, bhikkhu āraddhavīriyo viharati – kāmaṃ taco ca nhāru ca aṭṭhī ca avasissatu, sarīre upasussatu maṃsalohitaṃ, yaṃ taṃ purisathāmena purisavīriyena purisaparakkamena pattabbaṃ na taṃ apāpuṇitvā vīriyassa saṇṭhānaṃ bhavissatīti. Evaṃ kho, moggallāna, āraddhavīriyo hotī’ti. Evaṃ kho me, āvuso, bhagavatā saddhiṃ ahosi dhammī kathā’’ti.
‘‘সেয্যথাপি, আৰুসো, হিমৰতো পব্বতরাজস্স পরিত্তা পাসাণসক্খরা যাৰদেৰ উপনিক্খেপনমত্তায ; এৰমেৰ খো মযং আযস্মতো মহামোগ্গল্লানস্স যাৰদেৰ উপনিক্খেপনমত্তায। আযস্মা হি মহামোগ্গল্লানো মহিদ্ধিকো মহানুভাৰো আকঙ্খমানো কপ্পং তিট্ঠেয্যা’’তি।
‘‘Seyyathāpi, āvuso, himavato pabbatarājassa parittā pāsāṇasakkharā yāvadeva upanikkhepanamattāya ; evameva kho mayaṃ āyasmato mahāmoggallānassa yāvadeva upanikkhepanamattāya. Āyasmā hi mahāmoggallāno mahiddhiko mahānubhāvo ākaṅkhamāno kappaṃ tiṭṭheyyā’’ti.
‘‘সেয্যথাপি , আৰুসো, মহতিযা লোণঘটায পরিত্তা লোণসক্খরায যাৰদেৰ উপনিক্খেপনমত্তায; এৰমেৰ খো মযং আযস্মতো সারিপুত্তস্স যাৰদেৰ উপনিক্খেপনমত্তায। আযস্মা হি সারিপুত্তো ভগৰতা অনেকপরিযাযেন থোমিতো ৰণ্ণিতো পসত্থো –
‘‘Seyyathāpi , āvuso, mahatiyā loṇaghaṭāya parittā loṇasakkharāya yāvadeva upanikkhepanamattāya; evameva kho mayaṃ āyasmato sāriputtassa yāvadeva upanikkhepanamattāya. Āyasmā hi sāriputto bhagavatā anekapariyāyena thomito vaṇṇito pasattho –
‘‘সারিপুত্তোৰ পঞ্ঞায, সীলেন উপসমেন চ।
‘‘Sāriputtova paññāya, sīlena upasamena ca;
যোপি পারঙ্গতো ভিক্খু, এতাৰপরমো সিযা’’তি॥
Yopi pāraṅgato bhikkhu, etāvaparamo siyā’’ti.
ইতিহ তে উভো মহানাগা অঞ্ঞমঞ্ঞস্স সুভাসিতং সুলপিতং সমনুমোদিংসূতি। ততিযং।
Itiha te ubho mahānāgā aññamaññassa subhāsitaṃ sulapitaṃ samanumodiṃsūti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. ঘটসুত্তৰণ্ণনা • 3. Ghaṭasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. ঘটসুত্তৰণ্ণনা • 3. Ghaṭasuttavaṇṇanā
