| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. க⁴டஸுத்தவண்ணனா
3. Ghaṭasuttavaṇṇanā
237. ததியே ஏகவிஹாரேதி ஏகஸ்மிங் க³ப்³பே⁴. ததா³ கிர ப³ஹூ ஆக³ந்துகா பி⁴க்கூ² ஸன்னிபதிங்ஸு. தஸ்மிங் பரிவேணக்³கே³ன வா விஹாரக்³கே³ன வா ஸேனாஸனேஸு அபாபுணந்தேஸு த்³வின்னங் தே²ரானங் ஏகோ க³ப்³போ⁴ ஸம்பத்தோ. தே தி³வா பாடியேக்கேஸு டா²னேஸு நிஸீத³ந்தி, ரத்திங் பன நேஸங் அந்தரே சீவரஸாணிங் பஸாரெந்தி. தே அத்தனோ அத்தனோ பத்தபத்தட்டா²னேயேவ நிஸீத³ந்தி. தேன வுத்தங் ‘‘ஏகவிஹாரே’’தி. ஓளாரிகேனாதி இத³ங் ஓளாரிகாரம்மணதங் ஸந்தா⁴ய வுத்தங். தி³ப்³ப³சக்கு²தி³ப்³ப³ஸோததா⁴துவிஹாரேன ஹி ஸோ விஹாஸி, தேஸஞ்ச ரூபாயதனஸத்³தா³யதனஸங்கா²தங் ஓளாரிகங் ஆரம்மணங். இதி தி³ப்³ப³சக்கு²னா ரூபஸ்ஸ தி³ட்ட²த்தா தி³ப்³பா³ய ச ஸோததா⁴துயா ஸத்³த³ஸ்ஸ ஸுதத்தா ஸோ விஹாரோ ஓளாரிகோ நாம ஜாதோ. தி³ப்³ப³சக்கு² விஸுஜ்ஜீ²தி ப⁴க³வதோ ரூபத³ஸ்ஸனத்தா²ய விஸுத்³த⁴ங் அஹோஸி. தி³ப்³பா³ ச ஸோததா⁴தூதி ஸாபி ப⁴க³வதோ ஸத்³த³ஸுணனத்த²ங் விஸுஜ்ஜி² . ப⁴க³வதோபி தே²ரஸ்ஸ ரூபத³ஸ்ஸனத்த²ஞ்சேவ ஸத்³த³ஸுணனத்த²ஞ்ச தது³ப⁴யங் விஸுஜ்ஜி². ததா³ கிர தே²ரோ ‘‘கத²ங் நு கோ² ஏதரஹி ஸத்தா² விஹரதீ’’தி ஆலோகங் வட்³டெ⁴த்வா தி³ப்³பே³ன சக்கு²னா ஸத்தா²ரங் ஜேதவனே விஹாரே க³ந்த⁴குடியங் நிஸின்னங் தி³ஸ்வா தஸ்ஸ தி³ப்³பா³ய ஸோததா⁴துயா ஸத்³த³ங் ஸுணி. ஸத்தா²பி ததே²வ அகாஸி. ஏவங் தே அஞ்ஞமஞ்ஞங் பஸ்ஸிங்ஸு சேவ, ஸத்³த³ஞ்ச அஸ்ஸோஸுங்.
237. Tatiye ekavihāreti ekasmiṃ gabbhe. Tadā kira bahū āgantukā bhikkhū sannipatiṃsu. Tasmiṃ pariveṇaggena vā vihāraggena vā senāsanesu apāpuṇantesu dvinnaṃ therānaṃ eko gabbho sampatto. Te divā pāṭiyekkesu ṭhānesu nisīdanti, rattiṃ pana nesaṃ antare cīvarasāṇiṃ pasārenti. Te attano attano pattapattaṭṭhāneyeva nisīdanti. Tena vuttaṃ ‘‘ekavihāre’’ti. Oḷārikenāti idaṃ oḷārikārammaṇataṃ sandhāya vuttaṃ. Dibbacakkhudibbasotadhātuvihārena hi so vihāsi, tesañca rūpāyatanasaddāyatanasaṅkhātaṃ oḷārikaṃ ārammaṇaṃ. Iti dibbacakkhunā rūpassa diṭṭhattā dibbāya ca sotadhātuyā saddassa sutattā so vihāro oḷāriko nāma jāto. Dibbacakkhu visujjhīti bhagavato rūpadassanatthāya visuddhaṃ ahosi. Dibbā ca sotadhātūti sāpi bhagavato saddasuṇanatthaṃ visujjhi . Bhagavatopi therassa rūpadassanatthañceva saddasuṇanatthañca tadubhayaṃ visujjhi. Tadā kira thero ‘‘kathaṃ nu kho etarahi satthā viharatī’’ti ālokaṃ vaḍḍhetvā dibbena cakkhunā satthāraṃ jetavane vihāre gandhakuṭiyaṃ nisinnaṃ disvā tassa dibbāya sotadhātuyā saddaṃ suṇi. Satthāpi tatheva akāsi. Evaṃ te aññamaññaṃ passiṃsu ceva, saddañca assosuṃ.
ஆரத்³த⁴வீரியோதி பரிபுண்ணவீரியோ பக்³க³ஹிதவீரியோ. யாவதே³வ உபனிக்கே²பனமத்தாயாதி தியோஜனஸஹஸ்ஸவித்தா²ரஸ்ஸ ஹிமவதோ ஸந்திகே ட²பிதா ஸாஸபமத்தா பாஸாணஸக்க²ரா ‘‘ஹிமவா நு கோ² மஹா, அயங் நு கோ² பாஸாணஸக்க²ரா’’தி ஏவங் யாவ உபனிக்கே²பனமத்தஸ்ஸேவ அத்தா²ய ப⁴வெய்யாதி வுத்தங் ஹோதி. பரதோபி ஏஸேவ நயோ. கப்பந்தி ஆயுகப்பங். லோணக⁴டாயாதி சக்கவாளமுக²வட்டியா ஆதா⁴ரகங் கத்வா முக²வட்டியா ப்³ரஹ்மலோகங் ஆஹச்ச டி²தாய லோணசாடியாதி த³ஸ்ஸேதி.
Āraddhavīriyoti paripuṇṇavīriyo paggahitavīriyo. Yāvadeva upanikkhepanamattāyāti tiyojanasahassavitthārassa himavato santike ṭhapitā sāsapamattā pāsāṇasakkharā ‘‘himavā nu kho mahā, ayaṃ nu kho pāsāṇasakkharā’’ti evaṃ yāva upanikkhepanamattasseva atthāya bhaveyyāti vuttaṃ hoti. Paratopi eseva nayo. Kappanti āyukappaṃ. Loṇaghaṭāyāti cakkavāḷamukhavaṭṭiyā ādhārakaṃ katvā mukhavaṭṭiyā brahmalokaṃ āhacca ṭhitāya loṇacāṭiyāti dasseti.
இமே பன தே²ரா உபமங் ஆஹரந்தா ஸரிக்க²கேனேவ ச விஜ்ஜமானகு³ணேன ச ஆஹரிங்ஸு. கத²ங்? அயஞ்ஹி இத்³தி⁴ நாம அச்சுக்³க³தட்டே²ன சேவ விபுலட்டே²ன ச ஹிமவந்தஸதி³ஸா, பஞ்ஞா சதுபூ⁴மகத⁴ம்மே அனுபவிஸித்வா டி²தட்டே²ன ஸப்³ப³ப்³யஞ்ஜனேஸு அனுபவிட்ட²லோணரஸஸதி³ஸா. ஏவங் தாவ ஸரிக்க²கட்டே²ன ஆஹரிங்ஸு. ஸமாதி⁴லக்க²ணங் பன மஹாமொக்³க³ல்லானத்தே²ரஸ்ஸ விபூ⁴தங் பாகடங். கிஞ்சாபி ஸாரிபுத்தத்தே²ரஸ்ஸ அவிஜ்ஜமானஇத்³தி⁴ நாம நத்தி², ப⁴க³வதா பன ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் இத்³தி⁴மந்தானங் யதி³த³ங் மஹாமொக்³க³ல்லானோ’’தி அயமேவ ஏதத³க்³கே³ ட²பிதோ. விபஸ்ஸனாலக்க²ணங் பன ஸாரிபுத்தத்தே²ரஸ்ஸ விபூ⁴தங் பாகடங். கிஞ்சாபி மஹாமொக்³க³ல்லானத்தே²ரஸ்ஸாபி பஞ்ஞா அத்தி², ப⁴க³வதா பன ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் மஹாபஞ்ஞானங் யதி³த³ங் ஸாரிபுத்தோ’’தி (அ॰ நி॰ 1.189) அயமேவ ஏதத³க்³கே³ ட²பிதோ. தஸ்மா யதா² ஏதே அஞ்ஞமஞ்ஞஸ்ஸ து⁴ரங் ந பாபுணந்தி, ஏவங் விஜ்ஜமானகு³ணேன ஆஹரிங்ஸு. ஸமாதி⁴லக்க²ணஸ்மிஞ்ஹி மஹாமொக்³க³ல்லானோ நிப்ப²த்திங் க³தோ, விபஸ்ஸனாலக்க²ணே ஸாரிபுத்தத்தே²ரோ, த்³வீஸுபி ஏதேஸு ஸம்மாஸம்பு³த்³தோ⁴தி. ததியங்.
Ime pana therā upamaṃ āharantā sarikkhakeneva ca vijjamānaguṇena ca āhariṃsu. Kathaṃ? Ayañhi iddhi nāma accuggataṭṭhena ceva vipulaṭṭhena ca himavantasadisā, paññā catubhūmakadhamme anupavisitvā ṭhitaṭṭhena sabbabyañjanesu anupaviṭṭhaloṇarasasadisā. Evaṃ tāva sarikkhakaṭṭhena āhariṃsu. Samādhilakkhaṇaṃ pana mahāmoggallānattherassa vibhūtaṃ pākaṭaṃ. Kiñcāpi sāriputtattherassa avijjamānaiddhi nāma natthi, bhagavatā pana ‘‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’’ti ayameva etadagge ṭhapito. Vipassanālakkhaṇaṃ pana sāriputtattherassa vibhūtaṃ pākaṭaṃ. Kiñcāpi mahāmoggallānattherassāpi paññā atthi, bhagavatā pana ‘‘etadaggaṃ, bhikkhave, mama sāvakānaṃ bhikkhūnaṃ mahāpaññānaṃ yadidaṃ sāriputto’’ti (a. ni. 1.189) ayameva etadagge ṭhapito. Tasmā yathā ete aññamaññassa dhuraṃ na pāpuṇanti, evaṃ vijjamānaguṇena āhariṃsu. Samādhilakkhaṇasmiñhi mahāmoggallāno nipphattiṃ gato, vipassanālakkhaṇe sāriputtatthero, dvīsupi etesu sammāsambuddhoti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. க⁴டஸுத்தங் • 3. Ghaṭasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. க⁴டஸுத்தவண்ணனா • 3. Ghaṭasuttavaṇṇanā
