| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
३. घटसुत्तवण्णना
3. Ghaṭasuttavaṇṇanā
२३७. परिवेणग्गेनाति परिवेणभागेन। केचि ‘‘एकविहारेति एकच्छन्ने एकस्मिं आवासे’’ति वदन्ति। तेति ते द्वेपि थेरा। पाटियेक्केसु ठानेसूति विसुं विसुं ठानेसु। निसीदन्तीति दिवाविहारं निसीदन्ति। ओळारिको नाम जातो परित्तधम्मारम्मणत्ता तस्स। तेति थेरो भगवा च।
237.Pariveṇaggenāti pariveṇabhāgena. Keci ‘‘ekavihāreti ekacchanne ekasmiṃ āvāse’’ti vadanti. Teti te dvepi therā. Pāṭiyekkesu ṭhānesūti visuṃ visuṃ ṭhānesu. Nisīdantīti divāvihāraṃ nisīdanti. Oḷāriko nāma jāto parittadhammārammaṇattā tassa. Teti thero bhagavā ca.
परिपुण्णवीरियोति चतुकिच्चसाधनवसेन सम्पुण्णवीरियो। पग्गहितवीरियोति ईसकम्पि सङ्कोचं अनापज्जित्वा पवत्तितवीरियो। उपनिक्खेपनमत्तस्सेवाति समीपे ठपनमत्तस्सेव।
Paripuṇṇavīriyoti catukiccasādhanavasena sampuṇṇavīriyo. Paggahitavīriyoti īsakampi saṅkocaṃ anāpajjitvā pavattitavīriyo. Upanikkhepanamattassevāti samīpe ṭhapanamattasseva.
चतुभूमकधम्मेसु लब्भमानत्ता पञ्ञाय ‘‘चतुभूमकधम्मे अनुपविसित्वा ठितट्ठेना’’ति वुत्तं। लक्खितब्बट्ठेन समाधि एव समाधिलक्खणं। एवं विपस्सनालक्खणं वेदितब्बं। अञ्ञमञ्ञस्साति अञ्ञस्स अञ्ञस्स नानालक्खणाति वेदितब्बं। अञ्ञस्साति इतरस्स। धुरन्ति वहितब्बभारं। द्वीसुपि एतेसूति समाधिलक्खणविपस्सनालक्खणेसु सम्मासम्बुद्धो निप्फत्तिं गतो।
Catubhūmakadhammesu labbhamānattā paññāya ‘‘catubhūmakadhamme anupavisitvā ṭhitaṭṭhenā’’ti vuttaṃ. Lakkhitabbaṭṭhena samādhi eva samādhilakkhaṇaṃ. Evaṃ vipassanālakkhaṇaṃ veditabbaṃ. Aññamaññassāti aññassa aññassa nānālakkhaṇāti veditabbaṃ. Aññassāti itarassa. Dhuranti vahitabbabhāraṃ. Dvīsupi etesūti samādhilakkhaṇavipassanālakkhaṇesu sammāsambuddho nipphattiṃ gato.
घटसुत्तवण्णना निट्ठिता।
Ghaṭasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ३. घटसुत्तं • 3. Ghaṭasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ३. घटसुत्तवण्णना • 3. Ghaṭasuttavaṇṇanā
