| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
3. ඝටසුත්‌තවණ්‌ණනා
3. Ghaṭasuttavaṇṇanā
237. පරිවෙණග්‌ගෙනාති පරිවෙණභාගෙන. කෙචි ‘‘එකවිහාරෙති එකච්‌ඡන්‌නෙ එකස්‌මිං ආවාසෙ’’ති වදන්‌ති. තෙති තෙ ද්‌වෙපි ථෙරා. පාටියෙක්‌කෙසු ඨානෙසූති විසුං විසුං ඨානෙසු. නිසීදන්‌තීති දිවාවිහාරං නිසීදන්‌ති. ඔළාරිකො නාම ජාතො පරිත්‌තධම්‌මාරම්‌මණත්‌තා තස්‌ස. තෙති ථෙරො භගවා ච.
237.Pariveṇaggenāti pariveṇabhāgena. Keci ‘‘ekavihāreti ekacchanne ekasmiṃ āvāse’’ti vadanti. Teti te dvepi therā. Pāṭiyekkesu ṭhānesūti visuṃ visuṃ ṭhānesu. Nisīdantīti divāvihāraṃ nisīdanti. Oḷāriko nāma jāto parittadhammārammaṇattā tassa. Teti thero bhagavā ca.
පරිපුණ්‌ණවීරියොති චතුකිච්‌චසාධනවසෙන සම්‌පුණ්‌ණවීරියො. පග්‌ගහිතවීරියොති ඊසකම්‌පි සඞ්‌කොචං අනාපජ්‌ජිත්‌වා පවත්‌තිතවීරියො. උපනික්‌ඛෙපනමත්‌තස්‌සෙවාති සමීපෙ ඨපනමත්‌තස්‌සෙව.
Paripuṇṇavīriyoti catukiccasādhanavasena sampuṇṇavīriyo. Paggahitavīriyoti īsakampi saṅkocaṃ anāpajjitvā pavattitavīriyo. Upanikkhepanamattassevāti samīpe ṭhapanamattasseva.
චතුභූමකධම්‌මෙසු ලබ්‌භමානත්‌තා පඤ්‌ඤාය ‘‘චතුභූමකධම්‌මෙ අනුපවිසිත්‌වා ඨිතට්‌ඨෙනා’’ති වුත්‌තං. ලක්‌ඛිතබ්‌බට්‌ඨෙන සමාධි එව සමාධිලක්‌ඛණං. එවං විපස්‌සනාලක්‌ඛණං වෙදිතබ්‌බං. අඤ්‌ඤමඤ්‌ඤස්‌සාති අඤ්‌ඤස්‌ස අඤ්‌ඤස්‌ස නානාලක්‌ඛණාති වෙදිතබ්‌බං. අඤ්‌ඤස්‌සාති ඉතරස්‌ස. ධුරන්‌ති වහිතබ්‌බභාරං. ද්‌වීසුපි එතෙසූති සමාධිලක්‌ඛණවිපස්‌සනාලක්‌ඛණෙසු සම්‌මාසම්‌බුද්‌ධො නිප්‌ඵත්‌තිං ගතො.
Catubhūmakadhammesu labbhamānattā paññāya ‘‘catubhūmakadhamme anupavisitvā ṭhitaṭṭhenā’’ti vuttaṃ. Lakkhitabbaṭṭhena samādhi eva samādhilakkhaṇaṃ. Evaṃ vipassanālakkhaṇaṃ veditabbaṃ. Aññamaññassāti aññassa aññassa nānālakkhaṇāti veditabbaṃ. Aññassāti itarassa. Dhuranti vahitabbabhāraṃ. Dvīsupi etesūti samādhilakkhaṇavipassanālakkhaṇesu sammāsambuddho nipphattiṃ gato.
ඝටසුත්‌තවණ්‌ණනා නිට්‌ඨිතා.
Ghaṭasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. ඝටසුත්‌තං • 3. Ghaṭasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. ඝටසුත්‌තවණ්‌ණනා • 3. Ghaṭasuttavaṇṇanā
