| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. ராஜவக்³கோ³
4. Rājavaggo
1. க⁴டிகாரஸுத்தவண்ணனா
1. Ghaṭikārasuttavaṇṇanā
282. சரியந்தி போ³தி⁴சரியங், போ³தி⁴ஸம்பா⁴ரஸம்ப⁴ரணவஸேன பவத்திதங் போ³தி⁴ஸத்தபடிபத்திந்தி அத்தோ². ஸுகாரணந்தி போ³தி⁴பரிபாசனஸ்ஸ ஏகந்திகங் ஸுந்த³ரங் காரணங், கஸ்ஸபஸ்ஸ ப⁴க³வதோ பயிருபாஸனாதி³ங் ஸந்தா⁴ய வத³தி. தஞ்ஹி தேன ஸத்³தி⁴ங் மயா இத⁴ கதந்தி வத்தப்³ப³தங் லப⁴தி. மந்த³ஹஸிதந்தி ஈஸகங் ஹஸிதங். குஹங் குஹந்தி ஹாஸ-ஸத்³த³ஸ்ஸ அனுகரணமேதங். ஹட்ட²பஹட்டா²காரமத்தந்தி ஹட்ட²பஹட்ட²மத்தங். யதா² க³ஹிதஸங்கேதா ‘‘பஹட்டோ² ப⁴க³வா’’தி ஸஞ்ஜானந்தி, ஏவங் ஆகாரத³ஸ்ஸனமத்தங்.
282.Cariyanti bodhicariyaṃ, bodhisambhārasambharaṇavasena pavattitaṃ bodhisattapaṭipattinti attho. Sukāraṇanti bodhiparipācanassa ekantikaṃ sundaraṃ kāraṇaṃ, kassapassa bhagavato payirupāsanādiṃ sandhāya vadati. Tañhi tena saddhiṃ mayā idha katanti vattabbataṃ labhati. Mandahasitanti īsakaṃ hasitaṃ. Kuhaṃ kuhanti hāsa-saddassa anukaraṇametaṃ. Haṭṭhapahaṭṭhākāramattanti haṭṭhapahaṭṭhamattaṃ. Yathā gahitasaṅketā ‘‘pahaṭṭho bhagavā’’ti sañjānanti, evaṃ ākāradassanamattaṃ.
இதா³னி இமினா பஸங்கே³ன தாஸங் ஸமுட்டா²னங் விபா⁴க³தோ த³ஸ்ஸேதுங் ‘‘ஹஸிதஞ்ச நாமேத’’ந்திஆதி³ ஆரத்³த⁴ங். தத்த² அஜ்ஜு²பெக்க²னவஸேனபி ஹாஸோ ந ஸம்ப⁴வதி, பகே³வ தோ³மனஸ்ஸவஸேனாதி ஆஹ ‘‘தேரஸஹி ஸோமனஸ்ஸஸஹக³தசித்தேஹீ’’தி. நனு ச கேசி கோத⁴வஸேனபி ஹஸந்தீதி? ந, தேஸம்பி யங் தங் கோத⁴வத்து², தஸ்ஸ மயங் தா³னி யதா²காமகாரிதங் ஆபஜ்ஜிஸ்ஸாமாதி து³விஞ்ஞெய்யந்தரேன ஸோமனஸ்ஸசித்தேனேவ ஹாஸஸ்ஸ உப்பஜ்ஜனதோ. தேஸூதி பஞ்சஸு ஸோமனஸ்ஸஸஹக³தசித்தேஸு. ப³லவாரம்மணேதி உளாரஆரம்மணே யமகமஹாபாடிஹாரியஸதி³ஸே. து³ப்³ப³லாரம்மணேதி அனுளாரே ஆரம்மணே. இமஸ்மிங் பன டா²னே…பே॰… உப்பாதே³ஸீதி இத³ங் போராணட்ட²கதா²யங் ததா² ஆக³தத்தா வுத்தங். ந அஹேதுகஸோமனஸ்ஸஸஹக³தசித்தேன ப⁴க³வதோ ஸிதங் ஹோதீதி த³ஸ்ஸனத்த²ங்.
Idāni iminā pasaṅgena tāsaṃ samuṭṭhānaṃ vibhāgato dassetuṃ ‘‘hasitañca nāmeta’’ntiādi āraddhaṃ. Tattha ajjhupekkhanavasenapi hāso na sambhavati, pageva domanassavasenāti āha ‘‘terasahi somanassasahagatacittehī’’ti. Nanu ca keci kodhavasenapi hasantīti? Na, tesampi yaṃ taṃ kodhavatthu, tassa mayaṃ dāni yathākāmakāritaṃ āpajjissāmāti duviññeyyantarena somanassacitteneva hāsassa uppajjanato. Tesūti pañcasu somanassasahagatacittesu. Balavārammaṇeti uḷāraārammaṇe yamakamahāpāṭihāriyasadise. Dubbalārammaṇeti anuḷāre ārammaṇe. Imasmiṃ pana ṭhāne…pe… uppādesīti idaṃ porāṇaṭṭhakathāyaṃ tathā āgatattā vuttaṃ. Na ahetukasomanassasahagatacittena bhagavato sitaṃ hotīti dassanatthaṃ.
அபி⁴த⁴ம்மடீகாயங் (த⁴॰ ஸ॰ மூலடீ॰ 568) பன ‘‘அதீதங்ஸாதீ³ஸு அப்படிஹதங் ஞாணங் வத்வா ‘இமேஹி தீஹி த⁴ம்மேஹி ஸமன்னாக³தஸ்ஸ பு³த்³த⁴ஸ்ஸ ப⁴க³வதோ ஸப்³ப³ங் காயகம்மங் ஞாணபுப்³ப³ங்க³மங் ஞாணானுபரிவத்த’ந்திஆதி³வசனதோ (மஹானி॰ 69, 156; சூளனி॰ மாக⁴ராஜமாணவபுச்சா²னித்³தே³ஸ 85; படி॰ ம॰ 3.5; நெத்தி॰ 15; தீ³॰ நி॰ அட்ட²॰ 3.305; விப⁴॰ மூலடீ॰ ஸுத்தந்தபா⁴ஜனீயவண்ணனா; தீ³॰ நி॰ டீ॰ 3.141, 305) ‘ப⁴க³வதோ இத³ங் சித்தங் உப்பஜ்ஜதீ’தி வுத்தவசனங் விசாரேதப்³ப³’’ந்தி வுத்தங். தத்த² இமினா ஹஸிதுப்பாத³சித்தேன பவத்தியமானம்பி ப⁴க³வதோ ஸிதகரணங் புப்³பே³னிவாஸ-அனாக³தங்ஸ-ஸப்³ப³ஞ்ஞுதஞ்ஞாணானங் அனுவத்தகத்தா ஞாணானுபரிவத்தியேவாதி, ஏவங் பன ஞாணானுபரிவத்திபா⁴வே ஸதி ந கோசி பாளிஅட்ட²கதா²னங் விரோதோ⁴. ததா² ஹி அபி⁴த⁴ம்மட்ட²கதா²யங் (த⁴॰ ஸ॰ அட்ட²॰ 568) ‘‘தேஸங் ஞாணானங் சிண்ணபரியந்தே இத³ங் சித்தங் உப்பஜ்ஜதீ’’தி வுத்தங். அவஸ்ஸஞ்ச ஏதங் ஏவங் இச்சி²தப்³ப³ங், அஞ்ஞதா² ஆவஜ்ஜனஸ்ஸபி ப⁴க³வதோ பவத்தி ததா²ரூபே காலே ந ஸங்யுஜ்ஜெய்ய, தஸ்ஸபி ஹி விஞ்ஞத்திஸமுட்டா²பகபா⁴வஸ்ஸ இச்சி²தத்தா, ததா² ஹி வுத்தங் – ‘‘ஏவஞ்ச கத்வா மனொத்³வாராவஜ்ஜனஸ்ஸபி விஞ்ஞத்திஸமுட்டா²பகத்தங் உபபன்னங் ஹோதீ’’தி, ந ச விஞ்ஞத்திஸமுட்டா²பகத்தே தங்ஸமுட்டி²தாய விஞ்ஞத்தியா காயகம்மாதி³பா⁴வங் ஆபஜ்ஜனபா⁴வோ விப³ந்த⁴தீதி தமேவ ஸந்தா⁴ய வத³தி. தேனாஹ ‘‘ஏவங் அப்பமத்தகம்பீ’’தி. ஸதேரிதா விஜ்ஜுலதா நாம ஸதேரதாவிஜ்ஜுலதா. ஸா ஹி இதரவிஜ்ஜுலதா விய க²ணட்டி²திகா ஸீக⁴னிரோதா⁴ ச ந ஹோதி, அபிச கோ² த³ந்த⁴னிரோதா⁴, தஞ்ச ஸப்³ப³காலங் சதுதீ³பிகமஹாமேக⁴தோவ நிச்ச²ரதி தேனாஹ ‘‘சாதுத்³தீ³பிகமஹாமேக⁴முக²தோ’’தி. அயங் கிர தாஸங் ரஸ்மிவட்டீனங் த⁴ம்மதா, யதி³த³ங் திக்க²த்துங் ஸிரவரங் பத³க்கி²ணங் கத்வா தா³ட²க்³கே³ஸுயேவ அந்தரதா⁴னங்.
Abhidhammaṭīkāyaṃ (dha. sa. mūlaṭī. 568) pana ‘‘atītaṃsādīsu appaṭihataṃ ñāṇaṃ vatvā ‘imehi tīhi dhammehi samannāgatassa buddhassa bhagavato sabbaṃ kāyakammaṃ ñāṇapubbaṅgamaṃ ñāṇānuparivatta’ntiādivacanato (mahāni. 69, 156; cūḷani. māgharājamāṇavapucchāniddesa 85; paṭi. ma. 3.5; netti. 15; dī. ni. aṭṭha. 3.305; vibha. mūlaṭī. suttantabhājanīyavaṇṇanā; dī. ni. ṭī. 3.141, 305) ‘bhagavato idaṃ cittaṃ uppajjatī’ti vuttavacanaṃ vicāretabba’’nti vuttaṃ. Tattha iminā hasituppādacittena pavattiyamānampi bhagavato sitakaraṇaṃ pubbenivāsa-anāgataṃsa-sabbaññutaññāṇānaṃ anuvattakattā ñāṇānuparivattiyevāti, evaṃ pana ñāṇānuparivattibhāve sati na koci pāḷiaṭṭhakathānaṃ virodho. Tathā hi abhidhammaṭṭhakathāyaṃ (dha. sa. aṭṭha. 568) ‘‘tesaṃ ñāṇānaṃ ciṇṇapariyante idaṃ cittaṃ uppajjatī’’ti vuttaṃ. Avassañca etaṃ evaṃ icchitabbaṃ, aññathā āvajjanassapi bhagavato pavatti tathārūpe kāle na saṃyujjeyya, tassapi hi viññattisamuṭṭhāpakabhāvassa icchitattā, tathā hi vuttaṃ – ‘‘evañca katvā manodvārāvajjanassapi viññattisamuṭṭhāpakattaṃ upapannaṃ hotī’’ti, na ca viññattisamuṭṭhāpakatte taṃsamuṭṭhitāya viññattiyā kāyakammādibhāvaṃ āpajjanabhāvo vibandhatīti tameva sandhāya vadati. Tenāha ‘‘evaṃ appamattakampī’’ti. Sateritā vijjulatā nāma sateratāvijjulatā. Sā hi itaravijjulatā viya khaṇaṭṭhitikā sīghanirodhā ca na hoti, apica kho dandhanirodhā, tañca sabbakālaṃ catudīpikamahāmeghatova niccharati tenāha ‘‘cātuddīpikamahāmeghamukhato’’ti. Ayaṃ kira tāsaṃ rasmivaṭṭīnaṃ dhammatā, yadidaṃ tikkhattuṃ siravaraṃ padakkhiṇaṃ katvā dāṭhaggesuyeva antaradhānaṃ.
283. யதி³பி சத்தாரி அஸங்க்²யெய்யானி கப்பானங் ஸதஸஹஸ்ஸஞ்ச பஞ்ஞாபாரமிதா பரிபா⁴விதா, ததா²பி இதா³னி தங் பு³த்³த⁴ந்தரங் தஸ்ஸா படிபாதே³தப்³ப³த்தா வுத்தங் ‘‘அபரிபக்கஞாணத்தா’’தி. காமஞ்சஸ்ஸ ஞாணாய இதா³னிபி படிபாதே³தப்³ப³தா அத்தி², ஏவங் ஸந்தேபி நனு ஸம்மாஸம்பு³த்³தே⁴ஸு பஸாதே³ன ஸம்பா⁴வனாய ப⁴விதப்³ப³ங் ததா² சிரகாலங் பரிபா⁴விதத்தா, கத²ங் தத்த² ஹீளனாதி ஆஹ ‘‘ப்³ராஹ்மணகுலே’’திஆதி³. சிரகாலபரிசிதாபி ஹி கு³ணபா⁴வனா அப்பகேனபி அகல்யாணமித்தஸங்ஸக்³கே³ன விபரிவத்ததி அஞ்ஞத²த்தங் க³ச்ச²தி. தேன மஹாஸத்தோபி ஜாதிஸித்³தா⁴யங் லத்³தி⁴யங் ட²த்வா ஜாதிஸித்³தே⁴ன மானேன ஏவமாஹ – ‘‘கிங் பன தேன முண்ட³கேன ஸமணகேன தி³ட்டே²னா’’தி. ததா² ஹி வுத்தங் அட்ட²கதா²யங் –
283. Yadipi cattāri asaṅkhyeyyāni kappānaṃ satasahassañca paññāpāramitā paribhāvitā, tathāpi idāni taṃ buddhantaraṃ tassā paṭipādetabbattā vuttaṃ ‘‘aparipakkañāṇattā’’ti. Kāmañcassa ñāṇāya idānipi paṭipādetabbatā atthi, evaṃ santepi nanu sammāsambuddhesu pasādena sambhāvanāya bhavitabbaṃ tathā cirakālaṃ paribhāvitattā, kathaṃ tattha hīḷanāti āha ‘‘brāhmaṇakule’’tiādi. Cirakālaparicitāpi hi guṇabhāvanā appakenapi akalyāṇamittasaṃsaggena viparivattati aññathattaṃ gacchati. Tena mahāsattopi jātisiddhāyaṃ laddhiyaṃ ṭhatvā jātisiddhena mānena evamāha – ‘‘kiṃ pana tena muṇḍakena samaṇakena diṭṭhenā’’ti. Tathā hi vuttaṃ aṭṭhakathāyaṃ –
‘‘தஸ்மா அகல்யாணஜனங், ஆஸீவிஸமிவோரக³ங்,
‘‘Tasmā akalyāṇajanaṃ, āsīvisamivoragaṃ,
ஆரகா பரிவஜ்ஜெய்ய, பூ⁴திகாமோ விசக்க²ணோ’’தி. (தீ³॰ நி॰ அட்ட²॰ 1.170-172);
Ārakā parivajjeyya, bhūtikāmo vicakkhaṇo’’ti. (dī. ni. aṭṭha. 1.170-172);
ந்ஹானசுண்ணேன ஸுத்தேன கதா ஸொத்தி, குருவிந்த³கு³ளிகா, ஸா ஏவ ஸினாயந்தி காயங் விஸோதெ⁴ந்தி ஏதாயாதி ஸினானங். தேனாஹ – ‘‘ஸொத்தி ஸினானந்தி ஸினானத்தா²ய கதஸொத்தி’’ந்தி.
Nhānacuṇṇena suttena katā sotti, kuruvindaguḷikā, sā eva sināyanti kāyaṃ visodhenti etāyāti sinānaṃ. Tenāha – ‘‘sotti sinānanti sinānatthāya katasotti’’nti.
284. அரியபரிஹாரேனாதி அரியானங் பரிஹாரேன, அனாகா³மீனங் ந்ஹானகாலே அத்தனோ காயஸ்ஸ பரிஹாரனியாமேனாதி அத்தோ². அத்தனோ ஞாணஸம்பத்தியா விப⁴வஸம்பத்தியா பஸன்னகாரங் காதுங் ஸக்கி²ஸ்ஸதி. ஏதத³த்த²ந்தி ‘‘அஹிதனிவாரணங், ஹிதே நியோஜனங் ப்³யஸனே பரிவஜ்ஜன’’ந்தி யதி³த³ங், ஏதத³த்த²ங் மித்தா நாம ஹொந்தி. கேசி ‘‘யாவெத்த² அஹுபீ’’தி பட²ந்தி, தேஸங் யாவ எத்த² கேஸக்³க³க³ஹணங் தாவ அயங் நிப³ந்தோ⁴ அஹுபீதி அத்தோ².
284.Ariyaparihārenāti ariyānaṃ parihārena, anāgāmīnaṃ nhānakāle attano kāyassa parihāraniyāmenāti attho. Attano ñāṇasampattiyā vibhavasampattiyā pasannakāraṃ kātuṃ sakkhissati. Etadatthanti ‘‘ahitanivāraṇaṃ, hite niyojanaṃ byasane parivajjana’’nti yadidaṃ, etadatthaṃ mittā nāma honti. Keci ‘‘yāvettha ahupī’’ti paṭhanti, tesaṃ yāva ettha kesaggagahaṇaṃ tāva ayaṃ nibandho ahupīti attho.
285. ஸதிபடிலாப⁴த்தா²யாதி போ³தி⁴யா மஹாபி⁴னீஹாரங் கத்வா போ³தி⁴ஸம்பா⁴ரபடிபதா³ய பூரணபா⁴வே ஸதியா படிலாப⁴த்தா²ய. இதா³னி தஸ்ஸ ஸதுப்பாத³னீயகதா²ய பவத்திதாகாரங் ஸங்கே²பேனேவ த³ஸ்ஸேதுங் ‘‘தஸ்ஸ ஹீ’’திஆதி³ வுத்தங். தத்த² ந லாமகட்டா²னங் ஓதிண்ணஸத்தோதி இமினா மஹாஸத்தஸ்ஸ பணீதாதி⁴முத்ததங் த³ஸ்ஸெத்வா ஏவங் பணீதாதி⁴முத்திகஸ்ஸ பமாத³கிரியா ந யுத்தாதி த³ஸ்ஸெந்தோ ‘‘தாதி³ஸஸ்ஸ நாம பமாத³விஹாரோ ந யுத்தோ’’தி ஆஹ. ததா³ போ³தி⁴ஸத்தஸ்ஸ நெக்க²ம்மஜ்ஜா²ஸயோ தேலப்பதீ³போ விய விஸேஸதோ நிப்³ப³த்தி, தங் தி³ஸ்வா ப⁴க³வா தத³னுரூபங் த⁴ம்மகத²ங் கரொந்தோ ‘‘தாதி³ஸஸ்ஸ…பே॰… கதே²ஸீ’’தி. பரஸமுத்³த³வாஸீ தே²ரா அஞ்ஞதா² வத³ந்தி. அட்ட²கதா²யங் பன நாயங் பு³த்³தா⁴னங் பா⁴ரோ, யதி³த³ங் பூரிதபாரமீனங் போ³தி⁴ஸத்தானங் ததா² த⁴ம்மதே³ஸனா தேஸங் மஹாபி⁴னீஹாரஸமனந்தரம்பி போ³தி⁴ஸம்பா⁴ரஸ்ஸ ஸயம்பு⁴ஞாணேனேவ படிவிதி³தத்தா. தஸ்மா போ³தி⁴ஸத்தபா⁴வபவேத³னமேவ தஸ்ஸ ப⁴க³வா அகாஸீதி த³ஸ்ஸேதுங் ‘‘ஸதிபடிலாப⁴த்தா²யா’’திஆதி³ வுத்தங். ஸதிபடிலாப⁴த்தா²யாதி ஸம்மாபடிபத்தியா உஜ்ஜலனே பாகடகரஸதிபடிலாபா⁴ய.
285.Satipaṭilābhatthāyāti bodhiyā mahābhinīhāraṃ katvā bodhisambhārapaṭipadāya pūraṇabhāve satiyā paṭilābhatthāya. Idāni tassa satuppādanīyakathāya pavattitākāraṃ saṅkhepeneva dassetuṃ ‘‘tassa hī’’tiādi vuttaṃ. Tattha na lāmakaṭṭhānaṃ otiṇṇasattoti iminā mahāsattassa paṇītādhimuttataṃ dassetvā evaṃ paṇītādhimuttikassa pamādakiriyā na yuttāti dassento ‘‘tādisassa nāma pamādavihāro na yutto’’ti āha. Tadā bodhisattassa nekkhammajjhāsayo telappadīpo viya visesato nibbatti, taṃ disvā bhagavā tadanurūpaṃ dhammakathaṃ karonto ‘‘tādisassa…pe… kathesī’’ti. Parasamuddavāsī therā aññathā vadanti. Aṭṭhakathāyaṃ pana nāyaṃ buddhānaṃ bhāro, yadidaṃ pūritapāramīnaṃ bodhisattānaṃ tathā dhammadesanā tesaṃ mahābhinīhārasamanantarampi bodhisambhārassa sayambhuñāṇeneva paṭividitattā. Tasmā bodhisattabhāvapavedanameva tassa bhagavā akāsīti dassetuṃ ‘‘satipaṭilābhatthāyā’’tiādi vuttaṃ. Satipaṭilābhatthāyāti sammāpaṭipattiyā ujjalane pākaṭakarasatipaṭilābhāya.
286. ஞாணஞ்ஹி கிலேஸத⁴ம்மவிதா³லனபதா³லனேஹி ஸிங்க³ங் வியாதி ஸிங்க³ங். தஞ்ஹி படிபத்தியா உபத்த²ம்பி⁴தங் உஸ்ஸிதங் நாம ஹோதி, தத³பா⁴வே பதிதங் நாம. கேசி பன வீரியங் ஸிங்க³ந்தி வத³ந்தி. தஸ்மிங் ஸம்மப்பதா⁴னவஸேன பவத்தே பா³ஹிரபப்³ப³ஜ்ஜங் உபக³தாபி மஹாஸத்தா விஸுத்³தா⁴ஸயா அப்பிச்ச²தாதி³கு³ணஸமங்கி³னோ யதா²ரஹங் க³ந்த²து⁴ரங் வாஸது⁴ரஞ்ச பரிப்³ரூஹயந்தா விஹரந்தி, பகே³வ பு³த்³த⁴ஸாஸனே அப்பிச்ச²தாதீ³ஹீதி ஆஹ ‘‘சதுபாரிஸுத்³தி⁴ஸீலே பனா’’திஆதி³. விபஸ்ஸனங் ப்³ரூஹெந்தா ஸிகா²ப்பத்தவிபஸ்ஸனா ஹொந்தீதி வுத்தங் – ‘‘யாவ அனுலோமஞாணங் ஆஹச்ச திட்ட²ந்தீ’’தி, அனுலோமஞாணதோ ஓரமேவ விபஸ்ஸனங் ட²பெந்தீதி அத்தோ². மக்³க³ப²லத்த²ங் வாயாமங் ந கரொந்தி பஞ்ஞாபாரமிதாய ஸப்³ப³ஞ்ஞுதஞ்ஞாணக³ப்³ப⁴ஸ்ஸ அபரிபுண்ணத்தா அபரிபக்கத்தா ச.
286. Ñāṇañhi kilesadhammavidālanapadālanehi siṅgaṃ viyāti siṅgaṃ. Tañhi paṭipattiyā upatthambhitaṃ ussitaṃ nāma hoti, tadabhāve patitaṃ nāma. Keci pana vīriyaṃ siṅganti vadanti. Tasmiṃ sammappadhānavasena pavatte bāhirapabbajjaṃ upagatāpi mahāsattā visuddhāsayā appicchatādiguṇasamaṅgino yathārahaṃ ganthadhuraṃ vāsadhurañca paribrūhayantā viharanti, pageva buddhasāsane appicchatādīhīti āha ‘‘catupārisuddhisīle panā’’tiādi. Vipassanaṃ brūhentā sikhāppattavipassanā hontīti vuttaṃ – ‘‘yāva anulomañāṇaṃ āhacca tiṭṭhantī’’ti, anulomañāṇato orameva vipassanaṃ ṭhapentīti attho. Maggaphalatthaṃ vāyāmaṃ na karonti paññāpāramitāya sabbaññutaññāṇagabbhassa aparipuṇṇattā aparipakkattā ca.
287. தே²ரேஹீதி வுத்³த⁴தரேஹி. நிவாஸே ஸதீதி யஸ்மிங் டா²னே பப்³ப³ஜிதோ, தத்தே²வ நிவாஸே. வப்பகாலதோதி ஸஸ்ஸானங் வப்பகாலதோ. புப்³பே³ விய ததோ பரங் திகி²ணேன ஸூரியஸந்தாபேன பயோஜனங் நத்தீ²தி வுத்தங் – ‘‘வப்பகாலே விதானங் விய உபரி வத்த²கிலஞ்ஜங் ப³ந்தி⁴த்வா’’தி. புடகேதி கலாபே.
287.Therehīti vuddhatarehi. Nivāse satīti yasmiṃ ṭhāne pabbajito, tattheva nivāse. Vappakālatoti sassānaṃ vappakālato. Pubbe viya tato paraṃ tikhiṇena sūriyasantāpena payojanaṃ natthīti vuttaṃ – ‘‘vappakāle vitānaṃ viya upari vatthakilañjaṃ bandhitvā’’ti. Puṭaketi kalāpe.
288. பச்சயஸாமக்³கி³ஹேதுகத்தா த⁴ம்மப்பத்தியா பதே³ஸதோ பரிஞ்ஞாவத்து²காபி அரியா உபட்டி²தே சித்தவிகா⁴தபச்சயே யதே³தங் நாதிஸாவஜ்ஜங், ததே³வங் க³ண்ஹந்தீதி அயமெத்த² த⁴ம்மதாதி ஆஹ – ‘‘அலாப⁴ங் ஆரப்³ப⁴ சித்தஞ்ஞத²த்த’’ந்திஆதி³. ஸோதி கிகீ காஸிராஜா. ப்³ராஹ்மணப⁴த்தோதி ப்³ராஹ்மணேஸு ப⁴த்தோ. தே³வேதி ப்³ராஹ்மணே ஸந்தா⁴யாஹ. பூ⁴மிதே³வாதி தேஸங் ஸமஞ்ஞா, ததா³ ப்³ராஹ்மணக³ருகோ லோகோ. ததா³ ஹி கஸ்ஸபோபி ப⁴க³வா ப்³ராஹ்மணகுலே நிப்³ப³த்தி. தீ⁴து அவண்ணங் வத்வாதி, ‘‘மஹாராஜ, தவ தீ⁴தா ப்³ராஹ்மணஸமயங் பஹாய முண்ட³பாஸண்டி³கஸமயங் க³ண்ஹீ’’திஆதி³னா ராஜபுத்தியா அகு³ணங் வத்வா. வரங் க³ண்ஹிங்ஸு ஞாதகா. ரஜ்ஜங் நிய்யாதேஸி ‘‘மா மே வசனங் முஸா அஹோஸி, அட்ட²மே தி³வஸே நிக்³க³ண்ஹிஸ்ஸாமீ’’தி.
288. Paccayasāmaggihetukattā dhammappattiyā padesato pariññāvatthukāpi ariyā upaṭṭhite cittavighātapaccaye yadetaṃ nātisāvajjaṃ, tadevaṃ gaṇhantīti ayamettha dhammatāti āha – ‘‘alābhaṃ ārabbha cittaññathatta’’ntiādi. Soti kikī kāsirājā. Brāhmaṇabhattoti brāhmaṇesu bhatto. Deveti brāhmaṇe sandhāyāha. Bhūmidevāti tesaṃ samaññā, tadā brāhmaṇagaruko loko. Tadā hi kassapopi bhagavā brāhmaṇakule nibbatti. Dhītu avaṇṇaṃ vatvāti, ‘‘mahārāja, tava dhītā brāhmaṇasamayaṃ pahāya muṇḍapāsaṇḍikasamayaṃ gaṇhī’’tiādinā rājaputtiyā aguṇaṃ vatvā. Varaṃ gaṇhiṃsu ñātakā. Rajjaṃ niyyātesi ‘‘mā me vacanaṃ musā ahosi, aṭṭhame divase niggaṇhissāmī’’ti.
பாவனஅஸ்மனயனவஸேன ஸம்மா பாவீகதத்தா பரிஸுத்³த⁴தண்டு³லானி. பாளியங் தண்டு³லபடிப⁴ஸ்தானீதி தண்டு³லக²ண்டா³னி. முக்³க³படிப⁴ஸ்தகளாயபடிப⁴ஸ்தேஸுபி ஏஸேவ நயோ.
Pāvanaasmanayanavasena sammā pāvīkatattā parisuddhataṇḍulāni. Pāḷiyaṃ taṇḍulapaṭibhastānīti taṇḍulakhaṇḍāni. Muggapaṭibhastakaḷāyapaṭibhastesupi eseva nayo.
289. கோ நு கோ²தி பு⁴ம்மத்தே² பச்சத்தவசனந்தி ஆஹ – ‘‘குஹிங் நு கோ²’’தி பாரிபூரிங் யோஜீயந்தி ப்³யஞ்ஜனபோ⁴ஜனானி எத்தா²தி பரியோகோ³, ததோ பரியோகா³. தேனாஹ ‘‘ஸூபபா⁴ஜனதோ’’தி. ஸஞ்ஞங் த³த்வாதி வுத்தங் ஸப்³ப³ங் ஆசிக்கி²த்வா தும்ஹாகங் அத்தா²ய ஸம்பாதெ³த்வா நிக்கி²த்தோ உபட்டா²கோதி ப⁴க³வதோ ஆரோசேதா²தி ஸஞ்ஞங் த³த்வா. அதிவிஸ்ஸத்தோ²தி அதிவிய விஸ்ஸத்தோ². பஞ்சவண்ணாதி கு²த்³தி³காதி³வஸேன பஞ்சப்பகாரா.
289.Ko nu khoti bhummatthe paccattavacananti āha – ‘‘kuhiṃ nu kho’’ti pāripūriṃ yojīyanti byañjanabhojanāni etthāti pariyogo, tato pariyogā. Tenāha ‘‘sūpabhājanato’’ti. Saññaṃ datvāti vuttaṃ sabbaṃ ācikkhitvā tumhākaṃ atthāya sampādetvā nikkhitto upaṭṭhākoti bhagavato ārocethāti saññaṃ datvā. Ativissatthoti ativiya vissattho. Pañcavaṇṇāti khuddikādivasena pañcappakārā.
290. கிந்தி நிஸ்ஸக்கே பச்சத்தவசனங், கஸ்மாதி அத்தோ²? த⁴ம்மிகோதி இமினா ஆக³மனஸுத்³தி⁴ங் த³ஸ்ஸேதி . பி⁴க்கூ²னங் பத்தே ப⁴த்தஸதி³ஸோதி இமினா உபாஸகேன ஸத்து² பரிச்சத்தபா⁴வங் தத்த² ஸத்து²னோ ச அபரிஸங்கதங் த³ஸ்ஸேதி. ஸிக்கா²பத³வேலா நாம நத்தீ²தி த⁴ம்மஸ்ஸாமிபா⁴வதோ ஸிக்கா²பத³மரியாதா³ நாம நத்தி² பண்ணத்திவஜ்ஜே, பகதிவஜ்ஜே பன ஸேதுகா⁴தோ ஏவ.
290.Kinti nissakke paccattavacanaṃ, kasmāti attho? Dhammikoti iminā āgamanasuddhiṃ dasseti . Bhikkhūnaṃ patte bhattasadisoti iminā upāsakena satthu pariccattabhāvaṃ tattha satthuno ca aparisaṅkataṃ dasseti. Sikkhāpadavelā nāma natthīti dhammassāmibhāvato sikkhāpadamariyādā nāma natthi paṇṇattivajje, pakativajje pana setughāto eva.
291. ச²த³னட்டா²னே யதா³காஸங், ததே³வ தஸ்ஸ கே³ஹஸ்ஸ ச²த³னந்தி ஆகாஸச்ச²த³னங். பகதியா உதுப²ரணமேவாதி சா²தி³தே யாதி³ஸங் உது, ச²த³னே உத்திணபா⁴வேபி தம்ஹி கே³ஹே தாதி³ஸமேவ உதுப²ரணங் அஹோஸி. தேஸங்யேவாதி தேஸங் க⁴டிகாரஸ்ஸ மாதாபிதூனங் ஏவ.
291. Chadanaṭṭhāne yadākāsaṃ, tadeva tassa gehassa chadananti ākāsacchadanaṃ. Pakatiyā utupharaṇamevāti chādite yādisaṃ utu, chadane uttiṇabhāvepi tamhi gehe tādisameva utupharaṇaṃ ahosi. Tesaṃyevāti tesaṃ ghaṭikārassa mātāpitūnaṃ eva.
292. ‘‘சதஸ்ஸோ முட்டி²யோ ஏகோ குடு³வோ, சத்தாரோ குடு³வா ஏகோ பத்தோ², சத்தாரோ பத்தா² ஏகோ ஆள்ஹகோ, சத்தாரோ ஆள்ஹகா ஏகங் தோ³ணங், சத்தாரி தோ³ணானி ஏகா மானிகா, சதஸ்ஸோ மானிகா ஏகா கா²ரீ, வீஸதி கா²ரிகா ஏகோ வாஹோதி ததே³வ ஏகஸகட’’ந்தி ஸுத்தனிபாதட்ட²கதா²தீ³ஸு (ஸு॰ நி॰ அட்ட²॰ 2.662) வுத்தங், இத⁴ பன ‘‘த்³வே ஸகடானி ஏகோ வாஹோ’’தி வுத்தங். தேலபா²ணிதாதி³ந்தி ஆதி³-ஸத்³தே³ன ஸப்பிஆதி³ங் மரிசாதி³கடுகப⁴ண்ட³ஞ்ச ஸங்க³ண்ஹாதி. நாஹங் ரஞ்ஞா தி³ட்ட²புப்³போ³, குதோ பரிப்ப²ஸ்ஸோதி அதி⁴ப்பாயோ. நச்சித்வாதி நச்சங் த³த்வா.
292. ‘‘Catasso muṭṭhiyo eko kuḍuvo, cattāro kuḍuvā eko pattho, cattāro patthā eko āḷhako, cattāro āḷhakā ekaṃ doṇaṃ, cattāri doṇāni ekā mānikā, catasso mānikā ekā khārī, vīsati khārikā eko vāhoti tadeva ekasakaṭa’’nti suttanipātaṭṭhakathādīsu (su. ni. aṭṭha. 2.662) vuttaṃ, idha pana ‘‘dve sakaṭāni eko vāho’’ti vuttaṃ. Telaphāṇitādinti ādi-saddena sappiādiṃ maricādikaṭukabhaṇḍañca saṅgaṇhāti. Nāhaṃ raññā diṭṭhapubbo, kuto paripphassoti adhippāyo. Naccitvāti naccaṃ datvā.
க⁴டிகாரஸுத்தவண்ணனாய லீனத்த²ப்பகாஸனா ஸமத்தா.
Ghaṭikārasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 1. க⁴டிகாரஸுத்தங் • 1. Ghaṭikārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 1. க⁴டிகாரஸுத்தவண்ணனா • 1. Ghaṭikārasuttavaṇṇanā
