| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. ঘটীকারসুত্তৰণ্ণনা
10. Ghaṭīkārasuttavaṇṇanā
৫০. ‘‘উপপন্নাসে’’তি সে-কারাগমং কত্ৰা নিদ্দেসো, ‘‘উপপন্না’’ইচ্চেৰ অত্থোতি আহ ‘‘নিব্বত্তিৰসেন উপগতা’’তি। অত্তনো সম্পত্তিতো অৰিহানতো অৰিহা, তেসং ব্রহ্মলোকো অৰিহাব্রহ্মলোকো, তস্মিং। উপপত্তিসমনন্তরমেৰাতি পঠমকোট্ঠাসে এৰ। অরহত্তফলৰিমুত্তিযাতি অসেক্খৰিমুত্তিযা। সেক্খৰিমুত্তিযা পন অৰিহূপপত্তিতো পগেৰ ৰিমুত্তা। মানুসং দেহং সমতিক্কমন্তি চিত্তুপক্কিলেসপহানৰসেনাতি ফলেন হেতুদস্সনমিদন্তি আহ ‘‘মানুসং দেহন্তি ইধ…পে॰… ৰুত্তানী’’তি। দিৰি ভৰং দিব্বং, ব্রহ্মত্তভাৰসঞ্ঞিতং খন্ধপঞ্চকং। তত্থ সংযোজনকোতি ৰুত্তং ‘‘দিব্বং যোগন্তি পঞ্চ উদ্ধম্ভাগিযসংযোজনানী’’তি। ইমস্সাতি দেৰপুত্তস্স। ‘‘হিত্ৰা মানুসং দেহং, দিব্বযোগং উপচ্চগু’’ন্তি তেসং ত্ৰং কুসলং সব্বাৰজ্জপ্পহানেন অনৰজ্জতং ভাসতীতি কুসলী ৰদেসি। অত্থেন সদ্দস্স অভেদোপচারং কত্ৰা গম্ভীরৰচনং ৰুত্তন্তি আহ ‘‘গম্ভীরত্থ’’ন্তি অত্থস্সেৰ গম্ভীরতো, ন সদ্দস্স। সমুচ্ছিন্নকামরাগতায সব্বসো কামৰিসযপ্পহানেন নিরামিসব্রহ্মচারী নাম অনাগামী। নিৰাসনট্ঠানভূতো সমানো একো গামো এতস্সাতি আহ ‘‘একগামৰাসী’’তি।
50. ‘‘Upapannāse’’ti se-kārāgamaṃ katvā niddeso, ‘‘upapannā’’icceva atthoti āha ‘‘nibbattivasena upagatā’’ti. Attano sampattito avihānato avihā, tesaṃ brahmaloko avihābrahmaloko, tasmiṃ. Upapattisamanantaramevāti paṭhamakoṭṭhāse eva. Arahattaphalavimuttiyāti asekkhavimuttiyā. Sekkhavimuttiyā pana avihūpapattito pageva vimuttā. Mānusaṃ dehaṃ samatikkamanti cittupakkilesapahānavasenāti phalena hetudassanamidanti āha ‘‘mānusaṃ dehanti idha…pe… vuttānī’’ti. Divi bhavaṃ dibbaṃ, brahmattabhāvasaññitaṃ khandhapañcakaṃ. Tattha saṃyojanakoti vuttaṃ ‘‘dibbaṃ yoganti pañca uddhambhāgiyasaṃyojanānī’’ti. Imassāti devaputtassa. ‘‘Hitvā mānusaṃ dehaṃ, dibbayogaṃ upaccagu’’nti tesaṃ tvaṃ kusalaṃ sabbāvajjappahānena anavajjataṃ bhāsatīti kusalī vadesi. Atthena saddassa abhedopacāraṃ katvā gambhīravacanaṃ vuttanti āha ‘‘gambhīrattha’’nti atthasseva gambhīrato, na saddassa. Samucchinnakāmarāgatāya sabbaso kāmavisayappahānena nirāmisabrahmacārī nāma anāgāmī. Nivāsanaṭṭhānabhūto samāno eko gāmo etassāti āha ‘‘ekagāmavāsī’’ti.
ঘটীকারসুত্তৰণ্ণনা নিট্ঠিতা।
Ghaṭīkārasuttavaṇṇanā niṭṭhitā.
আদিত্তৰগ্গৰণ্ণনা নিট্ঠিতা।
Ādittavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. ঘটীকারসুত্তং • 10. Ghaṭīkārasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. ঘটীকারসুত্তৰণ্ণনা • 10. Ghaṭīkārasuttavaṇṇanā
