| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಘಟೀಕಾರಸುತ್ತವಣ್ಣನಾ
10. Ghaṭīkārasuttavaṇṇanā
೫೦. ‘‘ಉಪಪನ್ನಾಸೇ’’ತಿ ಸೇ-ಕಾರಾಗಮಂ ಕತ್ವಾ ನಿದ್ದೇಸೋ, ‘‘ಉಪಪನ್ನಾ’’ಇಚ್ಚೇವ ಅತ್ಥೋತಿ ಆಹ ‘‘ನಿಬ್ಬತ್ತಿವಸೇನ ಉಪಗತಾ’’ತಿ। ಅತ್ತನೋ ಸಮ್ಪತ್ತಿತೋ ಅವಿಹಾನತೋ ಅವಿಹಾ, ತೇಸಂ ಬ್ರಹ್ಮಲೋಕೋ ಅವಿಹಾಬ್ರಹ್ಮಲೋಕೋ, ತಸ್ಮಿಂ। ಉಪಪತ್ತಿಸಮನನ್ತರಮೇವಾತಿ ಪಠಮಕೋಟ್ಠಾಸೇ ಏವ। ಅರಹತ್ತಫಲವಿಮುತ್ತಿಯಾತಿ ಅಸೇಕ್ಖವಿಮುತ್ತಿಯಾ। ಸೇಕ್ಖವಿಮುತ್ತಿಯಾ ಪನ ಅವಿಹೂಪಪತ್ತಿತೋ ಪಗೇವ ವಿಮುತ್ತಾ। ಮಾನುಸಂ ದೇಹಂ ಸಮತಿಕ್ಕಮನ್ತಿ ಚಿತ್ತುಪಕ್ಕಿಲೇಸಪಹಾನವಸೇನಾತಿ ಫಲೇನ ಹೇತುದಸ್ಸನಮಿದನ್ತಿ ಆಹ ‘‘ಮಾನುಸಂ ದೇಹನ್ತಿ ಇಧ…ಪೇ॰… ವುತ್ತಾನೀ’’ತಿ। ದಿವಿ ಭವಂ ದಿಬ್ಬಂ, ಬ್ರಹ್ಮತ್ತಭಾವಸಞ್ಞಿತಂ ಖನ್ಧಪಞ್ಚಕಂ। ತತ್ಥ ಸಂಯೋಜನಕೋತಿ ವುತ್ತಂ ‘‘ದಿಬ್ಬಂ ಯೋಗನ್ತಿ ಪಞ್ಚ ಉದ್ಧಮ್ಭಾಗಿಯಸಂಯೋಜನಾನೀ’’ತಿ। ಇಮಸ್ಸಾತಿ ದೇವಪುತ್ತಸ್ಸ। ‘‘ಹಿತ್ವಾ ಮಾನುಸಂ ದೇಹಂ, ದಿಬ್ಬಯೋಗಂ ಉಪಚ್ಚಗು’’ನ್ತಿ ತೇಸಂ ತ್ವಂ ಕುಸಲಂ ಸಬ್ಬಾವಜ್ಜಪ್ಪಹಾನೇನ ಅನವಜ್ಜತಂ ಭಾಸತೀತಿ ಕುಸಲೀ ವದೇಸಿ। ಅತ್ಥೇನ ಸದ್ದಸ್ಸ ಅಭೇದೋಪಚಾರಂ ಕತ್ವಾ ಗಮ್ಭೀರವಚನಂ ವುತ್ತನ್ತಿ ಆಹ ‘‘ಗಮ್ಭೀರತ್ಥ’’ನ್ತಿ ಅತ್ಥಸ್ಸೇವ ಗಮ್ಭೀರತೋ, ನ ಸದ್ದಸ್ಸ। ಸಮುಚ್ಛಿನ್ನಕಾಮರಾಗತಾಯ ಸಬ್ಬಸೋ ಕಾಮವಿಸಯಪ್ಪಹಾನೇನ ನಿರಾಮಿಸಬ್ರಹ್ಮಚಾರೀ ನಾಮ ಅನಾಗಾಮೀ। ನಿವಾಸನಟ್ಠಾನಭೂತೋ ಸಮಾನೋ ಏಕೋ ಗಾಮೋ ಏತಸ್ಸಾತಿ ಆಹ ‘‘ಏಕಗಾಮವಾಸೀ’’ತಿ।
50. ‘‘Upapannāse’’ti se-kārāgamaṃ katvā niddeso, ‘‘upapannā’’icceva atthoti āha ‘‘nibbattivasena upagatā’’ti. Attano sampattito avihānato avihā, tesaṃ brahmaloko avihābrahmaloko, tasmiṃ. Upapattisamanantaramevāti paṭhamakoṭṭhāse eva. Arahattaphalavimuttiyāti asekkhavimuttiyā. Sekkhavimuttiyā pana avihūpapattito pageva vimuttā. Mānusaṃ dehaṃ samatikkamanti cittupakkilesapahānavasenāti phalena hetudassanamidanti āha ‘‘mānusaṃ dehanti idha…pe… vuttānī’’ti. Divi bhavaṃ dibbaṃ, brahmattabhāvasaññitaṃ khandhapañcakaṃ. Tattha saṃyojanakoti vuttaṃ ‘‘dibbaṃ yoganti pañca uddhambhāgiyasaṃyojanānī’’ti. Imassāti devaputtassa. ‘‘Hitvā mānusaṃ dehaṃ, dibbayogaṃ upaccagu’’nti tesaṃ tvaṃ kusalaṃ sabbāvajjappahānena anavajjataṃ bhāsatīti kusalī vadesi. Atthena saddassa abhedopacāraṃ katvā gambhīravacanaṃ vuttanti āha ‘‘gambhīrattha’’nti atthasseva gambhīrato, na saddassa. Samucchinnakāmarāgatāya sabbaso kāmavisayappahānena nirāmisabrahmacārī nāma anāgāmī. Nivāsanaṭṭhānabhūto samāno eko gāmo etassāti āha ‘‘ekagāmavāsī’’ti.
ಘಟೀಕಾರಸುತ್ತವಣ್ಣನಾ ನಿಟ್ಠಿತಾ।
Ghaṭīkārasuttavaṇṇanā niṭṭhitā.
ಆದಿತ್ತವಗ್ಗವಣ್ಣನಾ ನಿಟ್ಠಿತಾ।
Ādittavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ಘಟೀಕಾರಸುತ್ತಂ • 10. Ghaṭīkārasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ಘಟೀಕಾರಸುತ್ತವಣ್ಣನಾ • 10. Ghaṭīkārasuttavaṇṇanā
