| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. கோ⁴ஸிதஸுத்தங்
6. Ghositasuttaṃ
129. ஏகங் ஸமயங் ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதாராமே. அத² கோ² கோ⁴ஸிதோ க³ஹபதி யேனாயஸ்மா ஆனந்தோ³ தேனுபஸங்கமி…பே॰… ஏகமந்தங் நிஸின்னோ கோ² கோ⁴ஸிதோ க³ஹபதி ஆயஸ்மந்தங் ஆனந்த³ங் ஏதத³வோச – ‘‘‘தா⁴துனானத்தங், தா⁴துனானத்த’ந்தி , ப⁴ந்தே ஆனந்த³, வுச்சதி. கித்தாவதா நு கோ², ப⁴ந்தே, தா⁴துனானத்தங் வுத்தங் ப⁴க³வதா’’தி? ‘‘ஸங்விஜ்ஜதி கோ², க³ஹபதி, சக்கு²தா⁴து, ரூபா ச மனாபா, சக்கு²விஞ்ஞாணஞ்ச ஸுக²வேத³னியங். ப²ஸ்ஸங் படிச்ச உப்பஜ்ஜதி ஸுகா² வேத³னா. ஸங்விஜ்ஜதி கோ², க³ஹபதி, சக்கு²தா⁴து, ரூபா ச அமனாபா, சக்கு²விஞ்ஞாணஞ்ச து³க்க²வேத³னியங். ப²ஸ்ஸங் படிச்ச உப்பஜ்ஜதி து³க்கா² வேத³னா. ஸங்விஜ்ஜதி கோ², க³ஹபதி, சக்கு²தா⁴து, ரூபா ச மனாபா உபெக்கா²வேத³னியா, சக்கு²விஞ்ஞாணஞ்ச அது³க்க²மஸுக²வேத³னியங். ப²ஸ்ஸங் படிச்ச உப்பஜ்ஜதி அது³க்க²மஸுகா² வேத³னா…பே॰… ஸங்விஜ்ஜதி கோ², க³ஹபதி, ஜிவ்ஹாதா⁴து, ரஸா ச மனாபா, ஜிவ்ஹாவிஞ்ஞாணஞ்ச ஸுக²வேத³னியங். ப²ஸ்ஸங் படிச்ச உப்பஜ்ஜதி ஸுகா² வேத³னா. ஸங்விஜ்ஜதி கோ², க³ஹபதி, ஜிவ்ஹாதா⁴து, ரஸா ச அமனாபா, ஜிவ்ஹாவிஞ்ஞாணஞ்ச து³க்க²வேத³னியங். ப²ஸ்ஸங் படிச்ச உப்பஜ்ஜதி து³க்கா² வேத³னா. ஸங்விஜ்ஜதி கோ², க³ஹபதி, ஜிவ்ஹாதா⁴து, ரஸா ச உபெக்கா²வேத³னியா, ஜிவ்ஹாவிஞ்ஞாணஞ்ச அது³க்க²மஸுக²வேத³னியங். ப²ஸ்ஸங் படிச்ச உப்பஜ்ஜதி அது³க்க²மஸுகா² வேத³னா…பே॰… ஸங்விஜ்ஜதி கோ², க³ஹபதி, மனோதா⁴து, த⁴ம்மா ச மனாபா, மனோவிஞ்ஞாணஞ்ச ஸுக²வேத³னியங். ப²ஸ்ஸங் படிச்ச உப்பஜ்ஜதி ஸுகா² வேத³னா. ஸங்விஜ்ஜதி கோ², க³ஹபதி, மனோதா⁴து, த⁴ம்மா ச அமனாபா, மனோவிஞ்ஞாணஞ்ச து³க்க²வேத³னியங். ப²ஸ்ஸங் படிச்ச உப்பஜ்ஜதி து³க்கா² வேத³னா. ஸங்விஜ்ஜதி கோ², க³ஹபதி, மனோதா⁴து, த⁴ம்மா ச உபெக்கா²வேத³னியா, மனோவிஞ்ஞாணஞ்ச அது³க்க²மஸுக²வேத³னியங். ப²ஸ்ஸங் படிச்ச உப்பஜ்ஜதி அது³க்க²மஸுகா² வேத³னா. எத்தாவதா கோ², க³ஹபதி, தா⁴துனானத்தங் வுத்தங் ப⁴க³வதா’’தி. ச²ட்ட²ங்.
129. Ekaṃ samayaṃ āyasmā ānando kosambiyaṃ viharati ghositārāme. Atha kho ghosito gahapati yenāyasmā ānando tenupasaṅkami…pe… ekamantaṃ nisinno kho ghosito gahapati āyasmantaṃ ānandaṃ etadavoca – ‘‘‘dhātunānattaṃ, dhātunānatta’nti , bhante ānanda, vuccati. Kittāvatā nu kho, bhante, dhātunānattaṃ vuttaṃ bhagavatā’’ti? ‘‘Saṃvijjati kho, gahapati, cakkhudhātu, rūpā ca manāpā, cakkhuviññāṇañca sukhavedaniyaṃ. Phassaṃ paṭicca uppajjati sukhā vedanā. Saṃvijjati kho, gahapati, cakkhudhātu, rūpā ca amanāpā, cakkhuviññāṇañca dukkhavedaniyaṃ. Phassaṃ paṭicca uppajjati dukkhā vedanā. Saṃvijjati kho, gahapati, cakkhudhātu, rūpā ca manāpā upekkhāvedaniyā, cakkhuviññāṇañca adukkhamasukhavedaniyaṃ. Phassaṃ paṭicca uppajjati adukkhamasukhā vedanā…pe… saṃvijjati kho, gahapati, jivhādhātu, rasā ca manāpā, jivhāviññāṇañca sukhavedaniyaṃ. Phassaṃ paṭicca uppajjati sukhā vedanā. Saṃvijjati kho, gahapati, jivhādhātu, rasā ca amanāpā, jivhāviññāṇañca dukkhavedaniyaṃ. Phassaṃ paṭicca uppajjati dukkhā vedanā. Saṃvijjati kho, gahapati, jivhādhātu, rasā ca upekkhāvedaniyā, jivhāviññāṇañca adukkhamasukhavedaniyaṃ. Phassaṃ paṭicca uppajjati adukkhamasukhā vedanā…pe… saṃvijjati kho, gahapati, manodhātu, dhammā ca manāpā, manoviññāṇañca sukhavedaniyaṃ. Phassaṃ paṭicca uppajjati sukhā vedanā. Saṃvijjati kho, gahapati, manodhātu, dhammā ca amanāpā, manoviññāṇañca dukkhavedaniyaṃ. Phassaṃ paṭicca uppajjati dukkhā vedanā. Saṃvijjati kho, gahapati, manodhātu, dhammā ca upekkhāvedaniyā, manoviññāṇañca adukkhamasukhavedaniyaṃ. Phassaṃ paṭicca uppajjati adukkhamasukhā vedanā. Ettāvatā kho, gahapati, dhātunānattaṃ vuttaṃ bhagavatā’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. கோ⁴ஸிதஸுத்தவண்ணனா • 6. Ghositasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. கோ⁴ஸிதஸுத்தவண்ணனா • 6. Ghositasuttavaṇṇanā
