| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. கோ⁴ஸிதஸுத்தவண்ணனா
6. Ghositasuttavaṇṇanā
129. ச²ட்டே² ரூபா ச மனாபாதி ரூபா ச மனாபா ஸங்விஜ்ஜந்தி. சக்கு²விஞ்ஞாணஞ்சாதி சக்கு²விஞ்ஞாணஞ்ச ஸங்விஜ்ஜதி. ஸுக²வேத³னியங் ப²ஸ்ஸந்தி சக்கு²விஞ்ஞாணஸம்பயுத்தங் உபனிஸ்ஸயவஸேன ஜவனகாலே ஸுக²வேத³னாய பச்சயபூ⁴தங் ப²ஸ்ஸங். ஸுகா² வேத³னாதி ஏகங் ப²ஸ்ஸங் படிச்ச ஜவனவஸேன ஸுக²வேத³னா உப்பஜ்ஜதி. ஸேஸபதே³ஸுபி ஏஸேவ நயோ.
129. Chaṭṭhe rūpā ca manāpāti rūpā ca manāpā saṃvijjanti. Cakkhuviññāṇañcāti cakkhuviññāṇañca saṃvijjati. Sukhavedaniyaṃ phassanti cakkhuviññāṇasampayuttaṃ upanissayavasena javanakāle sukhavedanāya paccayabhūtaṃ phassaṃ. Sukhā vedanāti ekaṃ phassaṃ paṭicca javanavasena sukhavedanā uppajjati. Sesapadesupi eseva nayo.
இதி இமஸ்மிங் ஸுத்தே தேவீஸதி தா⁴துயோ கதி²தா. கத²ங்? எத்த² ஹி சக்கு²பஸாதோ³ சக்கு²தா⁴து, தஸ்ஸ ஆரம்மணங் ரூபதா⁴து, சக்கு²விஞ்ஞாணங் விஞ்ஞாணதா⁴து, சக்கு²விஞ்ஞாணதா⁴துயா ஸஹஜாதா தயோ க²ந்தா⁴ த⁴ம்மதா⁴து, ஏவங் பஞ்சஸு த்³வாரேஸு சதுன்னங் சதுன்னங் வஸேன வீஸதி. மனொத்³வாரே ‘‘மனோதா⁴தூ’’தி ஆவஜ்ஜனசித்தங் க³ஹிதங், ஆரம்மணஞ்சேவ ஹத³யவத்து² ச த⁴ம்மதா⁴து, வத்து²னிஸ்ஸிதங் மனோவிஞ்ஞாணதா⁴தூதி ஏவங் தேவீஸதி ஹொந்தி. ஏவங் தேவீஸதியா தா⁴தூனங் வஸேன தா⁴துனானத்தங் வுத்தங் ப⁴க³வதாதி த³ஸ்ஸேதி.
Iti imasmiṃ sutte tevīsati dhātuyo kathitā. Kathaṃ? Ettha hi cakkhupasādo cakkhudhātu, tassa ārammaṇaṃ rūpadhātu, cakkhuviññāṇaṃ viññāṇadhātu, cakkhuviññāṇadhātuyā sahajātā tayo khandhā dhammadhātu, evaṃ pañcasu dvāresu catunnaṃ catunnaṃ vasena vīsati. Manodvāre ‘‘manodhātū’’ti āvajjanacittaṃ gahitaṃ, ārammaṇañceva hadayavatthu ca dhammadhātu, vatthunissitaṃ manoviññāṇadhātūti evaṃ tevīsati honti. Evaṃ tevīsatiyā dhātūnaṃ vasena dhātunānattaṃ vuttaṃ bhagavatāti dasseti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. கோ⁴ஸிதஸுத்தங் • 6. Ghositasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. கோ⁴ஸிதஸுத்தவண்ணனா • 6. Ghositasuttavaṇṇanā
