| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. கோ⁴டமுக²ஸுத்தவண்ணனா
4. Ghoṭamukhasuttavaṇṇanā
412. கே²மியா நாம ரஞ்ஞோ தே³வியா ரோபிதத்தா தங் அம்ப³வனங் கே²மியம்ப³வனந்தி வுச்சதீதி வத³ந்தி. த⁴ம்மிகோதி த⁴ம்மயுத்தோ ஸப்³ப³ஸோவ அத⁴ம்மங் பஹாய த⁴ம்மே டி²தோ. பரிப்³ப³ஜதி பப்³ப³ஜதி ஏதேனாதி பரிப்³ப³ஜோ, க⁴ராவாஸதோ நிக்க²மனபுப்³ப³கங் லிங்க³க்³க³ஹணவஸேன ஸீலஸமாதா³னங். எத்தா²தி ஏதஸ்மிங் பரிப்³ப³ஜே. ஸபா⁴வோதி தங் பரிப்³பா³ஜனியங், தேஹி தேஹி பரிப்³பா³ஜகேஹி அனுட்டா²தப்³போ³ படிபத்தித⁴ம்மஸங்கா²தோ ஸபா⁴வோ. த⁴ம்மோவ பமாணந்தி ஏதேன மயங் அஹிரிமனா சித்தஸ்ஸ யதா²உபட்டி²தங் கதே²ம, தஸ்மா தங் அப்பமாணங், யோ பனெத்த² அவிததோ² த⁴ம்மோ, ததே³வ பமாணங். அதி⁴க³தபடிபத்திஸங்கா²தோ ஸபா⁴வோ அத்தி², தஸ்ஸ தும்ஹேஹி தும்ஹேஹி ப³ஹுனா நானாஸந்த³ஸ்ஸனாதி³ கம்மேன இத⁴ ப⁴விதப்³ப³ங், ப³ஹுதே³வெத்த² வத்தப்³ப³ந்தி அதி⁴ப்பாயோ.
412. Khemiyā nāma rañño deviyā ropitattā taṃ ambavanaṃ khemiyambavananti vuccatīti vadanti. Dhammikoti dhammayutto sabbasova adhammaṃ pahāya dhamme ṭhito. Paribbajati pabbajati etenāti paribbajo, gharāvāsato nikkhamanapubbakaṃ liṅgaggahaṇavasena sīlasamādānaṃ. Etthāti etasmiṃ paribbaje. Sabhāvoti taṃ paribbājaniyaṃ, tehi tehi paribbājakehi anuṭṭhātabbo paṭipattidhammasaṅkhāto sabhāvo. Dhammova pamāṇanti etena mayaṃ ahirimanā cittassa yathāupaṭṭhitaṃ kathema, tasmā taṃ appamāṇaṃ, yo panettha avitatho dhammo, tadeva pamāṇaṃ. Adhigatapaṭipattisaṅkhāto sabhāvo atthi, tassa tumhehi tumhehi bahunā nānāsandassanādi kammena idha bhavitabbaṃ, bahudevettha vattabbanti adhippāyo.
414. ஸாரத்தரத்தாதி ஸாரஜ்ஜனவஸேன ரத்தா, ப³ஹுலராக³வஸேன அபி⁴ரத்தாதி அத்தோ². அத்தனா ஞாபேதப்³ப³மத்த²ங் அனுக்³க³ஹாபேதி போ³தே⁴தீதி அனுக்³க³ஹோ, ஞாபிதகாரணங், ஸஹ அனுக்³க³ஹேனாதி ஸானுக்³க³ஹா. தேனாஹ ‘‘ஸகாரணா’’தி. கிங் பன தங் காரணங்? இமஸ்ஸாதி⁴ப்பாயோ ‘‘நத்தி² த⁴ம்மிகோ பரிப்³ப³ஜோ’’தி மயா வுத்தோ, அத்³தா⁴ பனாயஸ்மா உதே³னோ யாதா²வதோ த⁴ம்மிகங் பரிப்³ப³ஜங் மே ஆசிக்க²தீதி. தேனாஹ ‘‘வுத்தஞ்ஹேத’’ந்திஆதி³.
414.Sārattarattāti sārajjanavasena rattā, bahularāgavasena abhirattāti attho. Attanā ñāpetabbamatthaṃ anuggahāpeti bodhetīti anuggaho, ñāpitakāraṇaṃ, saha anuggahenāti sānuggahā. Tenāha ‘‘sakāraṇā’’ti. Kiṃ pana taṃ kāraṇaṃ? Imassādhippāyo ‘‘natthi dhammiko paribbajo’’ti mayā vutto, addhā panāyasmā udeno yāthāvato dhammikaṃ paribbajaṃ me ācikkhatīti. Tenāha ‘‘vuttañheta’’ntiādi.
421. ஸப்³ப³மித³ங் தா²வரஜங்க³மங் புரிஸகதங், தஸ்மா யங் கிஞ்சி கத்வா அத்தா போஸேதப்³போ³ ரக்கி²தப்³போ³தி லோகாயதனிஸ்ஸிதோ நீதிமக்³கோ³ கோ⁴டமுக²கந்தோ, தஸ்மா ஆஹ ‘‘ஏதஸ்ஸ கிர ஜானநஸிப்பே’’திஆதி³. ஸக்³கே³ நிப்³ப³த்தோ நாம நத்தி² அகத்தப்³ப³மேவ கரணதோ. தே³வலோகபரியாபன்னத⁴னங் மனுஸ்ஸானங் உபகப்பபுஞ்ஞாபா⁴வதோ புப்³பே³ அத்தனா நிஹிதத⁴னங் ‘‘அஸுகே சா’’தி ஆசிக்கி²த்வா க³தோ. ஸேஸங் ஸுவிஞ்ஞெய்யமேவ.
421. Sabbamidaṃ thāvarajaṅgamaṃ purisakataṃ, tasmā yaṃ kiñci katvā attā posetabbo rakkhitabboti lokāyatanissito nītimaggo ghoṭamukhakanto, tasmā āha ‘‘etassa kira jānanasippe’’tiādi. Saggenibbatto nāma natthi akattabbameva karaṇato. Devalokapariyāpannadhanaṃ manussānaṃ upakappapuññābhāvato pubbe attanā nihitadhanaṃ ‘‘asuke cā’’ti ācikkhitvā gato. Sesaṃ suviññeyyameva.
கோ⁴டமுக²ஸுத்தவண்ணனாய லீனத்த²ப்பகாஸனா ஸமத்தா.
Ghoṭamukhasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. கோ⁴டமுக²ஸுத்தங் • 4. Ghoṭamukhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. கோ⁴டமுக²ஸுத்தவண்ணனா • 4. Ghoṭamukhasuttavaṇṇanā
