| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৪. ঘোটমুখসুত্তৰণ্ণনা
4. Ghoṭamukhasuttavaṇṇanā
৪১২. খেমিযা নাম রঞ্ঞো দেৰিযা রোপিতত্তা তং অম্বৰনং খেমিযম্বৰনন্তি ৰুচ্চতীতি ৰদন্তি। ধম্মিকোতি ধম্মযুত্তো সব্বসোৰ অধম্মং পহায ধম্মে ঠিতো। পরিব্বজতি পব্বজতি এতেনাতি পরিব্বজো, ঘরাৰাসতো নিক্খমনপুব্বকং লিঙ্গগ্গহণৰসেন সীলসমাদানং। এত্থাতি এতস্মিং পরিব্বজে। সভাৰোতি তং পরিব্বাজনিযং, তেহি তেহি পরিব্বাজকেহি অনুট্ঠাতব্বো পটিপত্তিধম্মসঙ্খাতো সভাৰো। ধম্মোৰ পমাণন্তি এতেন মযং অহিরিমনা চিত্তস্স যথাউপট্ঠিতং কথেম, তস্মা তং অপ্পমাণং, যো পনেত্থ অৰিতথো ধম্মো, তদেৰ পমাণং। অধিগতপটিপত্তিসঙ্খাতো সভাৰো অত্থি, তস্স তুম্হেহি তুম্হেহি বহুনা নানাসন্দস্সনাদি কম্মেন ইধ ভৰিতব্বং, বহুদেৰেত্থ ৰত্তব্বন্তি অধিপ্পাযো।
412. Khemiyā nāma rañño deviyā ropitattā taṃ ambavanaṃ khemiyambavananti vuccatīti vadanti. Dhammikoti dhammayutto sabbasova adhammaṃ pahāya dhamme ṭhito. Paribbajati pabbajati etenāti paribbajo, gharāvāsato nikkhamanapubbakaṃ liṅgaggahaṇavasena sīlasamādānaṃ. Etthāti etasmiṃ paribbaje. Sabhāvoti taṃ paribbājaniyaṃ, tehi tehi paribbājakehi anuṭṭhātabbo paṭipattidhammasaṅkhāto sabhāvo. Dhammova pamāṇanti etena mayaṃ ahirimanā cittassa yathāupaṭṭhitaṃ kathema, tasmā taṃ appamāṇaṃ, yo panettha avitatho dhammo, tadeva pamāṇaṃ. Adhigatapaṭipattisaṅkhāto sabhāvo atthi, tassa tumhehi tumhehi bahunā nānāsandassanādi kammena idha bhavitabbaṃ, bahudevettha vattabbanti adhippāyo.
৪১৪. সারত্তরত্তাতি সারজ্জনৰসেন রত্তা, বহুলরাগৰসেন অভিরত্তাতি অত্থো। অত্তনা ঞাপেতব্বমত্থং অনুগ্গহাপেতি বোধেতীতি অনুগ্গহো, ঞাপিতকারণং, সহ অনুগ্গহেনাতি সানুগ্গহা। তেনাহ ‘‘সকারণা’’তি। কিং পন তং কারণং? ইমস্সাধিপ্পাযো ‘‘নত্থি ধম্মিকো পরিব্বজো’’তি মযা ৰুত্তো, অদ্ধা পনাযস্মা উদেনো যাথাৰতো ধম্মিকং পরিব্বজং মে আচিক্খতীতি। তেনাহ ‘‘ৰুত্তঞ্হেত’’ন্তিআদি।
414.Sārattarattāti sārajjanavasena rattā, bahularāgavasena abhirattāti attho. Attanā ñāpetabbamatthaṃ anuggahāpeti bodhetīti anuggaho, ñāpitakāraṇaṃ, saha anuggahenāti sānuggahā. Tenāha ‘‘sakāraṇā’’ti. Kiṃ pana taṃ kāraṇaṃ? Imassādhippāyo ‘‘natthi dhammiko paribbajo’’ti mayā vutto, addhā panāyasmā udeno yāthāvato dhammikaṃ paribbajaṃ me ācikkhatīti. Tenāha ‘‘vuttañheta’’ntiādi.
৪২১. সব্বমিদং থাৰরজঙ্গমং পুরিসকতং, তস্মা যং কিঞ্চি কত্ৰা অত্তা পোসেতব্বো রক্খিতব্বোতি লোকাযতনিস্সিতো নীতিমগ্গো ঘোটমুখকন্তো, তস্মা আহ ‘‘এতস্স কির জাননসিপ্পে’’তিআদি। সগ্গে নিব্বত্তো নাম নত্থি অকত্তব্বমেৰ করণতো। দেৰলোকপরিযাপন্নধনং মনুস্সানং উপকপ্পপুঞ্ঞাভাৰতো পুব্বে অত্তনা নিহিতধনং ‘‘অসুকে চা’’তি আচিক্খিত্ৰা গতো। সেসং সুৰিঞ্ঞেয্যমেৰ।
421. Sabbamidaṃ thāvarajaṅgamaṃ purisakataṃ, tasmā yaṃ kiñci katvā attā posetabbo rakkhitabboti lokāyatanissito nītimaggo ghoṭamukhakanto, tasmā āha ‘‘etassa kira jānanasippe’’tiādi. Saggenibbatto nāma natthi akattabbameva karaṇato. Devalokapariyāpannadhanaṃ manussānaṃ upakappapuññābhāvato pubbe attanā nihitadhanaṃ ‘‘asuke cā’’ti ācikkhitvā gato. Sesaṃ suviññeyyameva.
ঘোটমুখসুত্তৰণ্ণনায লীনত্থপ্পকাসনা সমত্তা।
Ghoṭamukhasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৪. ঘোটমুখসুত্তং • 4. Ghoṭamukhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৪. ঘোটমুখসুত্তৰণ্ণনা • 4. Ghoṭamukhasuttavaṇṇanā
