| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၄. ဃောဋမုခသုတ္တဝဏ္ဏနာ
4. Ghoṭamukhasuttavaṇṇanā
၄၁၂. ဧဝံ မေ သုတန္တိ ဃောဋမုခသုတ္တံ။ တတ္ထ ခေမိယမ္ဗဝနေတိ ဧဝံနာမကေ အမ္ဗဝနေ။ ဓမ္မိကော ပရိဗ္ဗဇောတိ ဓမ္မိကာ ပဗ္ဗဇ္ဇာ။ အဒသ္သနာတိ တုမ္ဟာဒိသာနံ ဝာ ပဏ္ဍိတာနံ အဒသ္သနေန။ ယော ဝာ ပနေတ္ထ ဓမ္မောတိ ယော ဝာ ပန ဧတ္ထ ဓမ္မော သဘာဝော, တသ္သေဝ ဝာ အဒသ္သနေန။ ဣမိနာ ‘‘အမ္ဟာကံ ကထာ အပ္ပမာဏံ, ဓမ္မောဝ ပမာဏ’’န္တိ ဒသ္သေတိ။ တတော ထေရော ‘‘နဝဥပောသထာဂာရေ ဝိယ ဗဟုနာ ကမ္မေန ဣဓ ဘဝိတဗ္ဗ’’န္တိ စိန္တေတ္ဝာ စင္ကမာ ဩရုယ္ဟ ပဏ္ဏသာလံ ပဝိသိတ္ဝာ နိသီဒိ။ တံ ဒသ္သေတုံ ဧဝံ ဝုတ္တေတိအာဒိ ဝုတ္တံ။
412.Evaṃme sutanti ghoṭamukhasuttaṃ. Tattha khemiyambavaneti evaṃnāmake ambavane. Dhammiko paribbajoti dhammikā pabbajjā. Adassanāti tumhādisānaṃ vā paṇḍitānaṃ adassanena. Yo vā panettha dhammoti yo vā pana ettha dhammo sabhāvo, tasseva vā adassanena. Iminā ‘‘amhākaṃ kathā appamāṇaṃ, dhammova pamāṇa’’nti dasseti. Tato thero ‘‘navauposathāgāre viya bahunā kammena idha bhavitabba’’nti cintetvā caṅkamā oruyha paṇṇasālaṃ pavisitvā nisīdi. Taṃ dassetuṃ evaṃ vuttetiādi vuttaṃ.
၄၁၃. စတ္တာရောမေ ဗ္ရာဟ္မဏာတိ ထေရသ္သ ကိရ ဧတဒဟောသိ – ‘‘အယံ ဗ္ရာဟ္မဏော ‘ဓမ္မိကံ ပဗ္ဗဇ္ဇံ ဥပဂတော သမဏော ဝာ ဗ္ရာဟ္မဏော ဝာ နတ္ထီ’တိ ဝဒတိ။ ဣမသ္သ စတ္တာရော ပုဂ္ဂလေ ဒ္ဝေ စ ပရိသာ ဒသ္သေတ္ဝာ ‘စတုတ္ထံ ပုဂ္ဂလံ ကတရာယ ပရိသာယ ဗဟုလံ ပသ္သသီ’တိ ပုစ္ဆိသ္သာမိ, ဇာနမာနော ‘အနာဂာရိယပရိသာယ’န္တိ ဝက္ခတိ။ ဧဝမေတံ သကမုခေနေဝ ‘ဓမ္မိကော ပရိဗ္ဗဇော အတ္ထီ’တိ ဝဒာပေသ္သာမီ’’တိ ဣမံ ဒေသနံ အာရဘိ။
413.Cattārome brāhmaṇāti therassa kira etadahosi – ‘‘ayaṃ brāhmaṇo ‘dhammikaṃ pabbajjaṃ upagato samaṇo vā brāhmaṇo vā natthī’ti vadati. Imassa cattāro puggale dve ca parisā dassetvā ‘catutthaṃ puggalaṃ katarāya parisāya bahulaṃ passasī’ti pucchissāmi, jānamāno ‘anāgāriyaparisāya’nti vakkhati. Evametaṃ sakamukheneva ‘dhammiko paribbajo atthī’ti vadāpessāmī’’ti imaṃ desanaṃ ārabhi.
၄၁၄. တတ္ထ သာရတ္တရတ္တာတိ သုဋ္ဌု ရတ္တရတ္တာ။ သာနုဂ္ဂဟာ ဝာစာ ဘာသိတာ သကာရဏာ ဝာစာ ဘာသိတာ။ ဝုတ္တဉ္ဟေတံ မယာ ‘‘အမ္ဟာကံ ကထာ အပ္ပမာဏံ, ဓမ္မောဝ ပမာဏ’’န္တိ။
414. Tattha sārattarattāti suṭṭhu rattarattā. Sānuggahā vācā bhāsitā sakāraṇā vācā bhāsitā. Vuttañhetaṃ mayā ‘‘amhākaṃ kathā appamāṇaṃ, dhammova pamāṇa’’nti.
၄၂၁. ကိံ ပန တေတိ ဂိဟိ နာမ ကပ္ပိယမ္ပိ အကပ္ပိယမ္ပိ ဝဒေယ္ယာတိ ဝိဝေစနတ္ထံ ပုစ္ဆိ။ ကာရာပေသီတိ မာပေသိ။ ကာရာပေတ္ဝာ စ ပန ကာလံ ကတ္ဝာ သဂ္ဂေ နိဗ္ဗတ္တော။ ဧတသ္သ ကိရ ဇာနနသိပ္ပေ မာတရမ္ပိ ပိတရမ္ပိ ဃာတေတ္ဝာ အတ္တာဝ ဃာတေတဗ္ဗောတိ အာဂစ္ဆတိ။ ဧတံ သိပ္ပံ ဇာနန္တော ဌပေတ္ဝာ ဧတံ အညော သဂ္ဂေ နိဗ္ဗတ္တော နာမ နတ္ထိ, ဧသ ပန ထေရံ ဥပနိသ္သာယ ပုညံ ကတ္ဝာ တတ္ထ နိဗ္ဗတ္တိတ္ဝာ စ ပန ‘‘ကေနာဟံ ကမ္မေန ဣဓ နိဗ္ဗတ္တော’’တိ အာဝဇ္ဇေတ္ဝာ ယထာဘူတံ ဉတ္ဝာ ဧကဒိဝသံ ဇိဏ္ဏာယ ဘောဇနသာလာယ ပဋိသင္ခရဏတ္ထံ သင္ဃေ သန္နိပတိတေ မနုသ္သဝေသေန အာဂန္တ္ဝာ ပုစ္ဆိ – ‘‘ကိမတ္ထံ, ဘန္တေ, သင္ဃော သန္နိပတိတော’’တိ? ဘောဇနသာလာယ ပဋိသင္ခရဏတ္ထန္တိ။ ကေနေသာ ကာရိတာတိ? ဃောဋမုခေနာတိ။ ဣဒာနိ သော ကုဟိန္တိ? ကာလင္ကတောတိ။ အတ္ထိ ပနသ္သ ကောစိ ဉာတကောတိ? အတ္ထိ ဧကာ ဘဂိနီတိ။ ပက္ကောသာပေထ နန္တိ။ ဘိက္ခူ ပက္ကောသာပေသုံ။ သော တံ ဥပသင္ကမိတ္ဝာ – ‘‘အဟံ, တဝ ဘာတာ, ဃောဋမုခော နာမ ဣမံ သာလံ ကာရေတ္ဝာ သဂ္ဂေ နိဗ္ဗတ္တော, အသုကေ စ အသုကေ စ ဌာနေ မယာ ဌပိတံ ဓနံ အတ္ထိ, တံ ဂဟေတ္ဝာ ဣမဉ္စ ဘောဇနသာလံ ကာရေဟိ, ဒာရကေ စ ပောသေဟီ’’တိ ဝတ္ဝာ ဘိက္ခုသင္ဃံ ဝန္ဒိတ္ဝာ ဝေဟာသံ ဥပ္ပတိတ္ဝာ ဒေဝလောကမေဝ အဂမာသိ။ သေသံ သဗ္ဗတ္ထ ဥတ္တာနမေဝာတိ။
421.Kiṃ pana teti gihi nāma kappiyampi akappiyampi vadeyyāti vivecanatthaṃ pucchi. Kārāpesīti māpesi. Kārāpetvā ca pana kālaṃ katvā sagge nibbatto. Etassa kira jānanasippe mātarampi pitarampi ghātetvā attāva ghātetabboti āgacchati. Etaṃ sippaṃ jānanto ṭhapetvā etaṃ añño sagge nibbatto nāma natthi, esa pana theraṃ upanissāya puññaṃ katvā tattha nibbattitvā ca pana ‘‘kenāhaṃ kammena idha nibbatto’’ti āvajjetvā yathābhūtaṃ ñatvā ekadivasaṃ jiṇṇāya bhojanasālāya paṭisaṅkharaṇatthaṃ saṅghe sannipatite manussavesena āgantvā pucchi – ‘‘kimatthaṃ, bhante, saṅgho sannipatito’’ti? Bhojanasālāya paṭisaṅkharaṇatthanti. Kenesā kāritāti? Ghoṭamukhenāti. Idāni so kuhinti? Kālaṅkatoti. Atthi panassa koci ñātakoti? Atthi ekā bhaginīti. Pakkosāpetha nanti. Bhikkhū pakkosāpesuṃ. So taṃ upasaṅkamitvā – ‘‘ahaṃ, tava bhātā, ghoṭamukho nāma imaṃ sālaṃ kāretvā sagge nibbatto, asuke ca asuke ca ṭhāne mayā ṭhapitaṃ dhanaṃ atthi, taṃ gahetvā imañca bhojanasālaṃ kārehi, dārake ca posehī’’ti vatvā bhikkhusaṅghaṃ vanditvā vehāsaṃ uppatitvā devalokameva agamāsi. Sesaṃ sabbattha uttānamevāti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
ဃောဋမုခသုတ္တဝဏ္ဏနာ နိဋ္ဌိတာ။
Ghoṭamukhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၄. ဃောဋမုခသုတ္တံ • 4. Ghoṭamukhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၄. ဃောဋမုခသုတ္တဝဏ္ဏနာ • 4. Ghoṭamukhasuttavaṇṇanā
