| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) |
೪. ಘೋಟಮುಖಸುತ್ತವಣ್ಣನಾ
4. Ghoṭamukhasuttavaṇṇanā
೪೧೨. ಖೇಮಿಯಾ ನಾಮ ರಞ್ಞೋ ದೇವಿಯಾ ರೋಪಿತತ್ತಾ ತಂ ಅಮ್ಬವನಂ ಖೇಮಿಯಮ್ಬವನನ್ತಿ ವುಚ್ಚತೀತಿ ವದನ್ತಿ। ಧಮ್ಮಿಕೋತಿ ಧಮ್ಮಯುತ್ತೋ ಸಬ್ಬಸೋವ ಅಧಮ್ಮಂ ಪಹಾಯ ಧಮ್ಮೇ ಠಿತೋ। ಪರಿಬ್ಬಜತಿ ಪಬ್ಬಜತಿ ಏತೇನಾತಿ ಪರಿಬ್ಬಜೋ, ಘರಾವಾಸತೋ ನಿಕ್ಖಮನಪುಬ್ಬಕಂ ಲಿಙ್ಗಗ್ಗಹಣವಸೇನ ಸೀಲಸಮಾದಾನಂ। ಏತ್ಥಾತಿ ಏತಸ್ಮಿಂ ಪರಿಬ್ಬಜೇ। ಸಭಾವೋತಿ ತಂ ಪರಿಬ್ಬಾಜನಿಯಂ, ತೇಹಿ ತೇಹಿ ಪರಿಬ್ಬಾಜಕೇಹಿ ಅನುಟ್ಠಾತಬ್ಬೋ ಪಟಿಪತ್ತಿಧಮ್ಮಸಙ್ಖಾತೋ ಸಭಾವೋ। ಧಮ್ಮೋವ ಪಮಾಣನ್ತಿ ಏತೇನ ಮಯಂ ಅಹಿರಿಮನಾ ಚಿತ್ತಸ್ಸ ಯಥಾಉಪಟ್ಠಿತಂ ಕಥೇಮ, ತಸ್ಮಾ ತಂ ಅಪ್ಪಮಾಣಂ, ಯೋ ಪನೇತ್ಥ ಅವಿತಥೋ ಧಮ್ಮೋ, ತದೇವ ಪಮಾಣಂ। ಅಧಿಗತಪಟಿಪತ್ತಿಸಙ್ಖಾತೋ ಸಭಾವೋ ಅತ್ಥಿ, ತಸ್ಸ ತುಮ್ಹೇಹಿ ತುಮ್ಹೇಹಿ ಬಹುನಾ ನಾನಾಸನ್ದಸ್ಸನಾದಿ ಕಮ್ಮೇನ ಇಧ ಭವಿತಬ್ಬಂ, ಬಹುದೇವೇತ್ಥ ವತ್ತಬ್ಬನ್ತಿ ಅಧಿಪ್ಪಾಯೋ।
412. Khemiyā nāma rañño deviyā ropitattā taṃ ambavanaṃ khemiyambavananti vuccatīti vadanti. Dhammikoti dhammayutto sabbasova adhammaṃ pahāya dhamme ṭhito. Paribbajati pabbajati etenāti paribbajo, gharāvāsato nikkhamanapubbakaṃ liṅgaggahaṇavasena sīlasamādānaṃ. Etthāti etasmiṃ paribbaje. Sabhāvoti taṃ paribbājaniyaṃ, tehi tehi paribbājakehi anuṭṭhātabbo paṭipattidhammasaṅkhāto sabhāvo. Dhammova pamāṇanti etena mayaṃ ahirimanā cittassa yathāupaṭṭhitaṃ kathema, tasmā taṃ appamāṇaṃ, yo panettha avitatho dhammo, tadeva pamāṇaṃ. Adhigatapaṭipattisaṅkhāto sabhāvo atthi, tassa tumhehi tumhehi bahunā nānāsandassanādi kammena idha bhavitabbaṃ, bahudevettha vattabbanti adhippāyo.
೪೧೪. ಸಾರತ್ತರತ್ತಾತಿ ಸಾರಜ್ಜನವಸೇನ ರತ್ತಾ, ಬಹುಲರಾಗವಸೇನ ಅಭಿರತ್ತಾತಿ ಅತ್ಥೋ। ಅತ್ತನಾ ಞಾಪೇತಬ್ಬಮತ್ಥಂ ಅನುಗ್ಗಹಾಪೇತಿ ಬೋಧೇತೀತಿ ಅನುಗ್ಗಹೋ, ಞಾಪಿತಕಾರಣಂ, ಸಹ ಅನುಗ್ಗಹೇನಾತಿ ಸಾನುಗ್ಗಹಾ। ತೇನಾಹ ‘‘ಸಕಾರಣಾ’’ತಿ। ಕಿಂ ಪನ ತಂ ಕಾರಣಂ? ಇಮಸ್ಸಾಧಿಪ್ಪಾಯೋ ‘‘ನತ್ಥಿ ಧಮ್ಮಿಕೋ ಪರಿಬ್ಬಜೋ’’ತಿ ಮಯಾ ವುತ್ತೋ, ಅದ್ಧಾ ಪನಾಯಸ್ಮಾ ಉದೇನೋ ಯಾಥಾವತೋ ಧಮ್ಮಿಕಂ ಪರಿಬ್ಬಜಂ ಮೇ ಆಚಿಕ್ಖತೀತಿ। ತೇನಾಹ ‘‘ವುತ್ತಞ್ಹೇತ’’ನ್ತಿಆದಿ।
414.Sārattarattāti sārajjanavasena rattā, bahularāgavasena abhirattāti attho. Attanā ñāpetabbamatthaṃ anuggahāpeti bodhetīti anuggaho, ñāpitakāraṇaṃ, saha anuggahenāti sānuggahā. Tenāha ‘‘sakāraṇā’’ti. Kiṃ pana taṃ kāraṇaṃ? Imassādhippāyo ‘‘natthi dhammiko paribbajo’’ti mayā vutto, addhā panāyasmā udeno yāthāvato dhammikaṃ paribbajaṃ me ācikkhatīti. Tenāha ‘‘vuttañheta’’ntiādi.
೪೨೧. ಸಬ್ಬಮಿದಂ ಥಾವರಜಙ್ಗಮಂ ಪುರಿಸಕತಂ, ತಸ್ಮಾ ಯಂ ಕಿಞ್ಚಿ ಕತ್ವಾ ಅತ್ತಾ ಪೋಸೇತಬ್ಬೋ ರಕ್ಖಿತಬ್ಬೋತಿ ಲೋಕಾಯತನಿಸ್ಸಿತೋ ನೀತಿಮಗ್ಗೋ ಘೋಟಮುಖಕನ್ತೋ, ತಸ್ಮಾ ಆಹ ‘‘ಏತಸ್ಸ ಕಿರ ಜಾನನಸಿಪ್ಪೇ’’ತಿಆದಿ। ಸಗ್ಗೇ ನಿಬ್ಬತ್ತೋ ನಾಮ ನತ್ಥಿ ಅಕತ್ತಬ್ಬಮೇವ ಕರಣತೋ। ದೇವಲೋಕಪರಿಯಾಪನ್ನಧನಂ ಮನುಸ್ಸಾನಂ ಉಪಕಪ್ಪಪುಞ್ಞಾಭಾವತೋ ಪುಬ್ಬೇ ಅತ್ತನಾ ನಿಹಿತಧನಂ ‘‘ಅಸುಕೇ ಚಾ’’ತಿ ಆಚಿಕ್ಖಿತ್ವಾ ಗತೋ। ಸೇಸಂ ಸುವಿಞ್ಞೇಯ್ಯಮೇವ।
421. Sabbamidaṃ thāvarajaṅgamaṃ purisakataṃ, tasmā yaṃ kiñci katvā attā posetabbo rakkhitabboti lokāyatanissito nītimaggo ghoṭamukhakanto, tasmā āha ‘‘etassa kira jānanasippe’’tiādi. Saggenibbatto nāma natthi akattabbameva karaṇato. Devalokapariyāpannadhanaṃ manussānaṃ upakappapuññābhāvato pubbe attanā nihitadhanaṃ ‘‘asuke cā’’ti ācikkhitvā gato. Sesaṃ suviññeyyameva.
ಘೋಟಮುಖಸುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।
Ghoṭamukhasuttavaṇṇanāya līnatthappakāsanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೪. ಘೋಟಮುಖಸುತ್ತಂ • 4. Ghoṭamukhasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) / ೪. ಘೋಟಮುಖಸುತ್ತವಣ್ಣನಾ • 4. Ghoṭamukhasuttavaṇṇanā
